Waswe, Bae Iu Obeyim Olketa Warning Bilong Jehovah?

“Diswan nao road for iufala wakabaot followim.”​—ISA. 30:21.

1, 2. Wanem nao Satan barava laek for duim, and hao nao Bible savve helpem iumi?

SAPOS saen long road point go long difren road, datwan savve trikim iumi. Maet datfala road no sef. Tingim sapos wanfala fren talem iu wanfala nogud man changem saen long road bikos hem laekem pipol for lus. Waswe, bae iu obeyim warning wea fren bilong iu talem?

² Satan hem wanfala nogud man wea barava laek for trikim iumi. (Rev. 12:9) Long study bifor, iumi storyim olketa samting wea savve spoelem iumi. Satan iusim olketa samting hia for mekem iumi no obeyim Jehovah and no followim datfala road for kasem laef olowe. (Matt. 7:13, 14) Bat iumi lanem fren bilong iumi Jehovah God warnim iumi abaotem olketa trik bilong Satan. Distaem bae iumi storyim nara thrifala samting wea Satan iusim for trikim iumi and hao Bible savve helpem iumi for againstim olketa samting hia. Taem iumi readim Bible, hem olsem Jehovah wakabaot bihaen long iumi and sei: “Diswan nao road for iufala wakabaot followim.” (Isa. 30:21) Taem iumi ting raonem olketa warning hia, datwan bae helpem iumi gohed strong for obeyim Jehovah.

No Followim “Olketa Laea Teacher”

3, 4. (a) Why nao olketa laea teacher olsem well wea no garem eni wata? (b) Hu nao olketa laea teacher and wanem nao olketa laek duim?

³ Tingim sapos iu akrosim wanfala desert and iu barava thirsty. Iu lukim wanfala well wea stap farawe lelebet. Iu wakabaot go long hem bikos iu tingse bae hem garem wata. Bat taem iu kasem datfala well, no eni wata stap insaed. Datwan mekem iu barava feel nogud! Truth long Bible hem olsem wata bat olketa laea teacher olsem well wea no garem eni wata. Pipol wea bilivim olketa laea teacher bae sorre. Jehovah iusim aposol Paul and Peter for warnim iumi abaotem olketa laea teacher. (Readim Acts 20:29, 30; 2 Peter 2:1-3.) Hu nao olketa laea teacher hia? Paul and Peter helpem iumi luksavve long olketa laea teacher and hao olketa trikim pipol.

⁴ Paul sei long olketa elder long Ephesus: “Samfala long iufala tu bae talem olketa samting wea no stret.” Peter sei long olketa Christian: “Olketa laea teacher bae stap midolwan long iufala.” So maet olketa laea teacher stap insaed kongregeson. Olketa laea teacher hia hem olketa apostate.a Wanem nao olketa laek duim? Paul sei taem olketa lusim organization bilong Jehovah, olketa laek “for mekem olketa disaepol followim olketa.” Olketa disaepol hia hem olketa disaepol bilong Jesus Christ. Olketa laea teacher no go aotsaed for mekem pipol kamap disaepol bilong olketa, bat olketa trae for mekem olketa long kongregeson nao for followim olketa. Jesus sei olketa apostate olketa olsem wild dog wea kaikaim olketa sheepsheep. Olketa apostate laek for spoelem faith bilong olketa long kongregeson and mekem olketa lusim truth.​—Matt. 7:15; 2 Tim. 2:18.

5. Wanem nao olketa apostate duim for trikim pipol?

⁵ Wanem nao olketa apostate duim for trikim pipol? Olketa “kleva tumas” for storyim idea bilong olketa long kongregeson, olsem criminal tekem haed olketa samting insaed kantri. Olketa talem “olketa laea toktok” long wei wea hem here stret, olsem criminal hem mekem laea selen for luk olsem hem tru wan. Olketa trae for mekem staka pipol bilivim “olketa laea teaching” bilong olketa. Peter sei olketa apostate “twistim” olketa Scripture tu. Olketa explainim Bible long wei wea no stret mekem pipol bilivim olketa idea bilong olketa. (2 Pet. 2:1, 3, 13; 3:16) Tru tumas, olketa apostate nating tingim iumi. Sapos iumi followim olketa, datwan bae mekem iumi for no followim road for kasem laef olowe.

6. Wanem warning nao Bible talem abaotem olketa apostate?

⁶ Wanem nao iumi savve duim for protectim iumiseleva from olketa apostate? Bible talem stret wanem for duim. (Readim Romans 16:17; 2 John 9-11.) Hem sei: “No fren witim olketa.” Datwan minim iumi mas stap klia long olketa. Datfala warning from Bible hem olsem warning wea doctor talem for stap klia long man wea garem sik wea isi for narawan kasem. Doctor savve sapos iu kasem datfala sik bae iu dae. Hem talem stret wanem for duim and iu mas followim datwan. Olketa apostate olsem man wea garem sik, and olketa teachim olketa laea teaching for mekem pipol garem sem tingting olsem olketa. (1 Tim. 6:3, 4) Jehovah hem olsem datfala gud doctor and hem talem iumi for stap klia long olketa apostate. Waswe, bae iumi strong for followim warning wea Jehovah talem?

7, 8. (a) Wanem nao iumi mas duim for stap klia long olketa laea teacher? (b) Why nao iu disaed strong for againstim olketa laea teacher?

⁷ Wanem nao iumi mas duim for stap klia long olketa laea teacher? Iumi mas no story witim olketa or letem olketa kam long haos bilong iumi. Iumi mas no readim olketa buk bilong olketa, lukluk long olketa long TV, readim wanem olketa putim long Internet, or raetem long Internet eni samting abaotem wanem olketa talem. Why nao iumi disaed strong for stap klia long olketa? Hem bikos iumi lovem “God wea evritaem talem tru samting.” Iumi no laek for lisin long olketa laea teaching wea againstim tru samting long Bible. (Ps. 31:5; John 17:17) Iumi tinghae tu long organization bilong Jehovah wea teachim iumi olketa tru samting. Organization teachim iumi abaotem nem bilong God, Jehovah, mining bilong datfala nem, plan bilong hem for earth, wanem bae happen long iumi taem iumi dae, and wei wea olketa wea dae bae laef bak. Waswe, iu tingim hapi wea iu kasem taem iu lanem datwan and olketa nara tru samting long Bible? No letem olketa laea teacher mekem iu for againstim organization bilong Jehovah wea teachim iu tru samting long Bible.​—John 6:66-69.

⁸ Nomata wanem olketa laea teacher talem, iumi bae no followim olketa! Iumi no garem eni reason for lisin long pipol wea olsem well wea no garem eni wata. Sapos iumi lisin long olketa, bae iumi sorre bihaen. Dastawe iumi disaed strong for faithful long Jehovah and organization bilong hem. No enitaem organization bilong Jehovah duim nogud samting long iumi. Hem evritaem givim wata wea klin, wea hem nao tru samting long Bible.​—Isa. 55:1-3; Matt. 24:45-47.

“No Lisin Long Olketa Laea Story”

9, 10. (a) Wanem warning abaotem olketa laea story nao Paul talem long Timothy? (b) Wanem nao olketa laea story wea Paul tingim? (Lukim footnote.)

⁹ Sapos samwan muvim saen long road for point go long difren road, datwan savve trikim iumi. Samfala taem hem isi for luksavve long datwan, bat samfala taem hem no isi. Hem semsem tu witim olketa laea story wea Satan talem. Sapos iumi no careful, samfala laea story wea Satan talem savve trikim iumi. Aposol Paul warning iumi abaotem “olketa laea story” hia. (Readim 1 Timothy 1:3, 4.) Wanem nao olketa laea story hia, and wanem nao iumi mas duim mekem iumi no lisin long olketa? Iumi need for savve long ansa bilong olketa kwestin hia mekem iumi gohed followim road for kasem laef olowe.

¹⁰ Warning wea Paul talem abaotem olketa laea story hem stap long firstfala leta wea hem raetem for Timothy, wea hem wanfala elder. Paul talem Timothy for no letem eni samting spoelem kongregeson and for helpem olketa brata and sista gohed faithful long Jehovah. (1 Tim. 1:18, 19) Greek word wea Paul iusim for “laea story” minim “wanfala laea” or “mekap story.” The International Standard Bible Encyclopaedia sei hem wanfala story wea join witim religion bat hem no tru. Maet Paul tingim olketa laea toktok wea kamaot from olketa kastom story bifor wea mekem pipol interest long hem.b Paul sei olketa story olsem savve spoelem man bikos hem “mekem pipol garem staka kwestin nomoa” abaotem samting wea no tru and for weistim staka taem for trae faendem ansa for olketa kwestin hia. Satan iusim olketa laea story for mekem pipol no tingim olketa important samting. Paul tok stret olsem: No lisin long olketa laea story!

11. (a) Long wanem wei nao Satan iusim false religion for trikim pipol? (b) Iumi shud lisin long wanem warning?

¹¹ Wanem nao samfala laea story wea savve trikim iumi sapos iumi no careful? Laea story hem eni teaching bilong religion wea mekem iumi “les for lisin long olketa tru teaching.” (2 Tim. 4:3, 4) Satan hem kleva tumas. Hem iusim false religion for trikim pipol. Dastawe Bible sei Satan “act olsem wanfala angel wea givim laet.” (2 Cor. 11:14) Olsem example, olketa religion wea sei olketa Christian tingse olketa followim Christ bat olketa teachim olketa laea teaching olsem Trinity, hellfire, and soul wea no savve dae. Staka pipol tingse God hapi long wei for celebratem Christmas and Easter, bat olketa celebration hia join witim false worship. Sapos iumi lisin long warning wea God talem for stap klia from false religion and “no tasim samting wea no klin,” bae olketa laea story no trikim iumi.​—2 Cor. 6:14-17.

12, 13. (a) Wanem nao thrifala laea toktok wea Satan mekhae long hem, bat wanem nao tru samting? (b) Wanem nao iumi mas duim sapos iumi no laekem Satan for trikim iumi long olketa laea story?

¹² Satan mekhae long olketa nara laea wea savve trikim iumi sapos iumi no careful. Iumi bae storyim thrifala laea toktok. First wan: Iu savve duim eni samting wea iu laekem and disaedem seleva wanem hem stret and wanem hem no stret. Staka taem iumi herem diswan long TV or long movie, or readim long magasin, niuspepa, or long Internet. From iumi herem disfala laea toktok evritaem, hem isi for iumi garem kaen tingting olsem and followim rabis tingting bilong world. Bat iumi needim God for talem iumi wanem hem stret and wanem hem no stret. (Jer. 10:23) Mek-tu laea toktok: God bae nating stretem eni samting long earth. Disfala toktok mekem pipol tingim nomoa laef distaem. Olketa no tingim future or for duim samting wea bae mekem God hapi. Maet iumi start for garem sem tingting and no “duim plande gudfala samting” long waka bilong God and “stap nating nomoa.” (2 Pet. 1:8) Bat klosap nao Jehovah bae stretem olketa nogud samting long earth, and iumi mas duim samting for showimaot iumi bilivim datwan. (Matt. 24:44) Mek-thri laea toktok: God nating tingim iu. Sapos Satan mekem iumi for bilivim laea toktok hia, maet datwan mekem iumi for no gohed worshipim Jehovah. Bat Jehovah lovem and tinghae long evriwan wea worshipim hem.​—Matt. 10:29-31.

¹³ Iumi mas careful for no garem tingting bilong pipol long world nomata maet samfala taem wanem olketa talem and tingim hem here stret. Bat Satan laek for trikim iumi and hem savve tumas hao for duim datwan. Iumi mas lisin long olketa warning long Bible sapos iumi no laekem Satan for trikim iumi long olketa laea story.​—2 Pet. 1:16.

No “Followim Satan”

14. (a) Wanem warning nao Paul talem long olketa widow woman wea young? (b) Why nao iumi evriwan need for obeyim datfala warning?

¹⁴ Tingim sapos wanfala saen sei: “Diswan Nao Road for Followim Satan.” Tru tumas, no eni Christian laek for followim kaen saen olsem. Nomata olsem, samfala tru Christian maet start for “followim Satan.” Paul warnim iumi hao datwan savve happen. (Readim 1 Timothy 5:11-15.) Nomata Paul story abaotem samfala widow woman wea young, iumi savve lanem gud samting from wanem hem talem. Maet olketa widow tingse olketa no followim Satan bat wanem olketa duim and storyim showimaot olketa followim hem. Wanem nao iumi savve duim for mek sure iumi no followim Satan? Bae iumi storyim warning wea Paul talem for no gossip and talem nogud samting abaotem narawan.

15. (a) Wanem nao Satan laekem? (b) Olsem Paul talem, wanem nao Satan iusim for mekem iumi duim samting wea hem laekem?

¹⁵ Satan no laekem iumi for preachim gud nius. (Rev. 12:17) Hem laekem iumi for iusim taem bilong iumi for duim olketa iusles samting or samting wea bae spoelem wan mind long kongregeson. Paul storyim samfala samting wea Satan iusim for mekem iumi duim wanem hem laekem. Paul sei olketa widow long taem bilong hem “stap nating nomoa and raraon.” Staka taem olketa widow hia visitim olketa fren and storyim olketa samting wea no important. Iumi mas careful for no duim sem samting. Olsem example, maet iumi iusim staka taem and taem bilong nara pipol for readim and sendem olketa e-mail or text message abaotem samting wea no important and wea maet hem no tru. Paul sei tu olketa widow bifor savve “gossip.” Samfala taem pipol wea gossip savve talem nogud samting abaotem narawan. Datwan savve spoelem narawan bikos wei for gossip savve mekem man for talem laea samting abaotem narawan. Olketa laea story savve mekem pipol raoa. (Prov. 26:20) Pipol wea talem laea for spoelem narawan, olketa olsem Devil nomata olketa no luksavve long datwan.c Paul sei tu olketa widow “poke nose long bisnis bilong narawan.” Olketa laek for talem pipol wanem olketa shud duim bat no eniwan long iumi garem raet for duim datwan. Olketa samting wea iumi storyim savve mekem iumi for no duim preaching waka wea Jehovah givim long iumi. Sapos iumi stop for preach, datwan showimaot iumi start for followim Satan and againstim Jehovah. Iumi evriwan mas chusim hu nao iumi saedem.​—Matt. 12:30.

16. Wanem nao iumi shud duim sapos iumi no laek for followim Satan?

¹⁶ Sapos iumi lisin long wanem Bible talem bae iumi no followim Satan. Tingim samfala wise kaonsel wea Paul talem. Hem sei iumi shud “evritaem busy long waka bilong Lord.” (1 Cor. 15:58) Taem iumi waka hard for Jehovah, bae iumi no garem taem for duim olketa samting wea no important and wea savve spoelem iumi. (Matt. 6:33) Paul sei tu for “talem nomoa gudfala toktok for strongim and helpem” narawan. (Eph. 4:29) No gossip and no lisin long olketa wea gossip.d Trustim and respectim olketa brata and sista. Sapos iu duim olsem, bae iu evritaem talem gud samting abaotem narawan. Paul talem iumi tu for “no poke nose long bisnis bilong narawan.” (1 Thess. 4:11) Duim samting wea showimaot iu tingim narawan bat respectim olketa tu. Hem gud for tingim hao maet man no laek for storyim samfala samting and hem no laekem olketa narawan tu for savve abaotem datwan. Iumi mas tingim tu hao iumi shud no disaed for narawan bat olketa mas disaed seleva.​—Gal. 6:5.

17. Why nao Jehovah givim olketa warning, and wanem nao iumi mas disaed strong for duim?

¹⁷ Iumi thankiu long Jehovah for talem wanem iumi mas no duim! Iumi shud tingim evritaem Jehovah givim olketa warning hia bikos hem barava lovem iumi. Hem no laekem Satan for laea long iumi and mekem iumi safa. Road wea Jehovah laekem iumi for followim hem no isi bat hem nomoa road for kasem laef olowe. (Matt. 7:14) Iumi mas evritaem disaed strong for obeyim Jehovah taem hem sei: “Diswan nao road for iufala wakabaot followim.”​—Isa. 30:21.

[Olketa Footnote]

Wanem Nao Ansa Bilong Iu?

Wanem nao iu savve duim for showimaot iu obeyim olketa warning long olketa scripture hia?

• 2 Peter 2:1-3

• 1 Timothy 1:3, 4

• 1 Timothy 5:11-15

[Box/​Olketa Piksa long page 19]

Olketa Feather wea Wind Blowim

Wanfala kastom story bilong olketa Jew showimaot wei for gossip savve spoelem narawan.

Wanfala man talem laea toktok long staka pipol abaotem wanfala wise man long vilij. Gogo datfala man askem wise man hia for forgivim hem. So hem askem hem: “Wanem nao mi savve duim for showimaot mi sorre long wanem mi talem abaotem iu?” Datfala wise man sei: “Wanfala samting nao iu savve duim. Tekem pilo wea fulap long feather and openem and letem wind blowim olketa feather hia.” Datfala man no savve why nao hem mas duim datwan bat hem followim nomoa wanem wise man hia talem. Bihaen hem go bak long wise man and sei: “Waswe iu forgivim mi nao?” Wise man sei: “Iu go and faendem evri feather firstaem.” Datfala man sei: “Mi hard for duim datwan bikos wind hem blowim evri feather finis. Mi no savve faendem eniwan nao.” Then wise man sei: “Olsem wind blowim olketa feather long staka ples, staka pipol herem laea toktok wea iu talem. Iu no savve faendem olketa feather hia, so hard tumas for pipol forgetim wanem iu talem.”

Iumi lanem important samting. Hard for iumi changem moa toktok wea iumi talem and samfala taem iumi no savve stopem olketa nogud samting wea kamaot from datwan. So bifor iumi talem nogud samting abaotem narawan, hem gud for tingim hao olketa toktok bilong iumi savve olsem feather wea wind blowim.

[Piksa long page 16]

Wanem nao maet samfala duim wea showimaot olketa letem olketa apostate for kam insaed haos bilong olketa?