Bible Buk Namba 61—2 Peter
Man wea Raetem: Peter
Ples Hem Raetem: Babylon (?)
Taem Hem Finis Raetem: c. 64 C.E.
TAEM Peter hem raetem mek-tu leta bilong hem, hem savve bae hem klosap dae. Hem barava want for helpem olketa Christian for no forgetim wei wea stretfala savve hem important tumas for stap strong long ministry bilong olketa. Waswe, eni reason for daot stap for sei aposol Peter hem no raetem disfala mek-tu leta wea garem nem bilong hem? Disfala leta seleva aotem eni daot abaotem hu nao raetem leta hia. Man wea raetem sei hem nao “Simon Peter, wanfala slave and aposol bilong Jesus Christ.” (2 Pet. 1:1) Hem sei diswan “hem mek-tu leta wea mi raetem long iufala.” (3:1) Hem sei hem barava lukim witim eye bilong hem taem wea Jesus Christ hem change and kasem glory, wanfala privilege wea Peter, James and John nao lukim, and hem raetem diswan witim feeling bilong man wea barava lukim. (1:16-21) Hem talem hao Jesus talem profesi abaotem dae bilong hem.—2 Pet. 1:14; John 21:18, 19.
2 Bat, samfala savveman sei difren stael bilong tufala leta bilong Peter hem reason for garem daot hao hem no raetem mek-tu leta. Bat hem no wanfala really problem, from subject and reason for raetem disfala leta hem difren. And tu, Peter raetem leta hia “thru long Silvanus, wanfala faithful brata,” and sapos Silvanus hem free lelebet for changem olketa sentence, hem maet wanfala reason hao stael hem difren long tufala leta, from luk olsem Silvanus no tek part for raetem mek-tu leta. (1 Pet. 5:12) Samfala sei hem no part bilong Bible bikos “olketa Father bifor no tinghae long hem.” Bat, samfala savveman sei Mek-tu Peter hem part bilong Bible bifor disfala Third Council of Carthage hem kamap.
3 Wanem taem nao Peter hem raetem mek-tu leta bilong hem? Luk olsem hem raetem long 64 C.E. from Babylon or klosap long there, no long taem bihaen firstfala leta, bat no eni klia pruv stap long wea nao hem raetem disfala leta. Taem hem raetem disfala leta, klosap evri leta bilong Paul gogo long olketa Christian kongregeson and Peter hem savve long olketa and hem savve evriwan kam from God and join witim “evri narafala Scripture.” Mek-tu leta bilong Peter hem “for olketa wea kasem faith, wea garem sem privilege witim iumi,” and tu hem for olketa wea kasem firstfala leta and pipol wea Peter preach long olketa. Mek-wan and mek-tu leta bilong Peter kasem plande ples.—2 Pet. 3:15, 16; 1:1; 3:1; 1 Pet. 1:1.
WEI WEA HEM HELPEM IUMI
8 Stretfala savve hem important tumas! Insaed raeting bilong Peter hem iusim stretfala savve wea hem kasem from olketa Hebrew Scripture. Hem talem stret hao olketa kam from holy spirit: “No enitaem profesi kamap from will bilong man, bat olketa man toktok kam from God taem holy spirit leadim olketa.” Hem talem tu, hao God givim ‘wisdom long Paul.’ (1:21; 3:15) Iumi kasem gudfala samting taem iumi tingim Bible and for hol strong long stretfala savve. Sapos olsem bae iumi no wikdaon, olsem olketa wea Peter raet abaotem, wea sei: “Evri samting gohed semsem olsem from start bilong creation.” (3:4) And tu, bae iumi no foldaon long olketa trap bilong olketa giaman teacher wea Peter storyim long chapter 2 long leta bilong hem. Bat, iumi mas tingim evritaem samting wea Paul and narafala man for raetem Bible talem. Evri samting hia helpem iumi for stap “strong insaed long truth” and long patient and strongfala wei “gohed for grow long kaenfala fasin wea man no fit for kasem and savve abaotem Lord and Man Wea Sevem iumi, Jesus Christ.”—1:12; 3:18.
9 For helpem iumi kasem moa “stretfala savve abaotem God and abaotem Jesus, Lord bilong iumi,” Peter encouragem iumi for trae hard for buildimap olketa Christian fasin wea stap long chapter 1, verse 5 go kasem 7. Then, long verse 8, hem sei: “From sapos evri samting hia stap long iufala and fulap evribit long iufala, olketa bae stopem iufala from wei for stap nating or for no garem frut long saed bilong stretfala savve abaotem Lord bilong iumi, Jesus Christ.” Tru nao, hem nambawan encouragement for waka hard olsem olketa minister bilong God insaed long olketa nogud taem!—1:2.
10 Hem important tumas for barava trae hard for mek sure iumi savve share long olketa “spesol and barava nambawan promis” bilong Jehovah God! Peter hem encouragem olketa anointed Christian for luk go long Kingdom goal, taem hem sei: “For disfala reason nao, olketa brata, iufala mas duim best bilong iufala for mekem wei wea hem kolem and chusim iufala kamap tru for iufala seleva; bikos sapos iufala gohed for duim evri samting hia iufala bae nating fail. Tru nao, long disfala nambawan wei iufala bae go insaed long kingdom wea stap for olowe bilong Lord and Man For Sevem iumi, Jesus Christ.” Then Peter hem point go long nambawan glory bilong Jesus long Kingdom bilong hem, wea hem lukim witim eye bilong hem long vision wea Jesus change and kasem glory, and hem sei: “Dastawe toktok bilong profesi kamap moa strong long mifala.” Tru nao, evri profesi abaotem nambawan Kingdom bilong Jehovah bae fulfill evribit. So, iumi savve garem trust taem iumi talem tu toktok bilong Peter from profesi bilong Isaiah: “Iumi weitim niufala skae and niufala earth olsem hem promisim, wea raeteous fasin bae stap.”—2 Pet. 1:4, 10, 11, 19; 3:13; Isa. 65:17, 18.