Waswe, Iu Acceptim Help From Jehovah?
“Jehovah hem helpem mi; bae mi no fraet.”—HEBREWS 13:6.
1, 2. Why nao hem important for iumi acceptim help bilong Jehovah and wei wea hem leadim iumi long laef?
TINGIM sapos iu wakabaot followim wanfala road long bush. Iu no go seleva bikos wanfala man wea leadim iu hem go witim iu, and hem savve tumas long datfala road. Nomata savve and strong bilong hem winim iu, hem wakabaot isisi witim iu. Hem lukim iu foldaon samfala taem. From hem wari nogud iu garekil, hem holem hand bilong iu taem iufala go long raf ples. Waswe, bae iu les for hem helpem iu? Nomoa nao, bikos maet iu stap long danger.
2 From iumi olketa Christian, iumi wakabaot followim wanfala road wea hard. Waswe, iumi mas wakabaot seleva followim datfala road? (Matthew 7:14) Nomoa, Bible showim hao best Man for leadim iumi, Jehovah God, hem letem olketa man for wakabaot witim hem. (Genesis 5:24; 6:9) Waswe, Jehovah helpem olketa servant bilong hem taem olketa wakabaot? Hem sei olsem: “Mi, God bilong iu Jehovah, mi holem strong raet hand bilong iu, Datwan wea sei long iu, ‘No fraet. Mi nao bae helpem iu.’ ” (Isaiah 41:13) From Jehovah hem olsem datfala man wea leadim iumi, hem kaen tumas for helpem iumi and hem laek for fren witim olketa wea luk aotem wei for wakabaot witim hem. Iumi evriwan laek for acceptim help bilong hem!
3. Wanem nao olketa kwestin wea iumi bae storyim long disfala article?
3 Long firstfala article, iumi storyim fofala wei wea Jehovah helpem pipol bilong hem long bifor. Waswe, long distaem hem helpem pipol bilong hem long sem wei tu? And hao nao iumi savve mek sure iumi acceptim eni help olsem from hem? Iumi ting raonem olketa kwestin hia firstaem. Bae diswan mekem iumi moa sure hao Jehovah nao Man for helpem iumi.—Hebrews 13:6.
Help From Olketa Angel
4. Why nao staka servant bilong God distaem barava sure hao olketa angel sapotim olketa?
4 Waswe, olketa angel helpem olketa servant bilong Jehovah distaem? Ia. Hem tru, olketa tru worshiper distaem no lukim olketa angel witim eye. For tok stret, nomata long bifor, tu-thri taem nomoa olketa man lukim angel witim eye taem angel sevem olketa from danger. Staka samting wea olketa angel duim bifor, olketa man no savve lukim. Datwan hem semsem tu distaem. Nomata olsem, taem olketa servant bilong God bifor luksavve olketa angel stap for sapotim olketa, diswan barava encouragem olketa. (2 Kings 6:14-17) Iumi tu savve feel olsem.
5. Long wanem wei nao Bible showimaot olketa angel join insaed long waka for preach distaem?
5 Olketa angel bilong Jehovah barava interest long wanfala spesol waka wea iumi insaed long hem. Wanem nao datfala waka? Ansa hem stap long Revelation 14:6, wea sei: “Mi lukim narafala angel flae long skae, and hem garem gud nius for olowe for talemaot olsem hapi nius for olketa wea stap long earth, and long evri nation and tribe and languis and pipol.” Disfala “gud nius for olowe” hem barava join witim “gud nius bilong kingdom” wea Jesus sei pipol bae “talemaot . . . evriwea long earth for givim witness long evri nation; and then end bae kam.” (Matthew 24:14) Jesus no iusim olketa angel for story witim pipol. Hem givim disfala important assignment long olketa man. (Matthew 28:19, 20) From iumi savve wei wea olketa wise and strongfala angel helpem iumi, datwan barava encouragem iumi!
6, 7. (a) Wanem nao showimaot olketa angel gohed sapotim waka bilong iumi for preach? (b) Wanem nao iumi mas duim for kasem sapot bilong olketa angel bilong Jehovah?
6 Staka pruv stap wea showimaot olketa angel sapotim waka bilong iumi. Olsem example, staka taem iumi herem hao taem Olketa Jehovah’s Witness duim ministry bilong olketa, olketa meetim samwan wea no longtaem go nomoa prea long God for helpem hem faendem truth. From kaen samting olsem happen staka taem, diswan showimaot olketa angel nao sapotim waka wea iumi duim. From olketa angel helpem iumi olsem, staka moa pipol gohed for lanem samting wea angel wea “flae long skae” hem talem: “Fraet long God and givim glory long hem.”—Revelation 14:7.
7 Waswe, iu laekem olketa strongfala angel bilong Jehovah for sapotim iu? Sapos olsem, duim best bilong iu long ministry bilong iu. (1 Corinthians 15:58) Taem iumi willing for duim disfala spesol assignment wea kam from Jehovah, iumi sure bae iumi kasem help from olketa angel bilong hem.
Help From Chief Bilong Olketa Angel
8. Jesus garem wanem hae position long heven, and why nao diswan encouragem iumi?
8 Jehovah givim narafala angel tu for helpem iumi. Revelation 10:1 hem story abaotem wanfala “strongfala angel” wea “feis bilong hem olsem sun.” Disfala angel wea John lukim long vision hem piksarem Jesus wea kasem glory taem hem kasem paoa long heven. (Revelation 1:13, 16) Waswe, Jesus hem really wanfala angel? Ia, bikos nara nem bilong hem tu “chief angel.” (1 Thessalonians 4:16) Jesus nao garem paoa wea winim evri nara spirit son bilong Jehovah. Jehovah markem hem olsem komanda long army bilong olketa angel bilong Hem. From hem nao chief bilong olketa angel, hem savve givim barava bigfala help. Wanem nao olketa wei wea hem savve duim diswan?
9, 10. (a) Hao nao Jesus kamap “man for helpem iumi” taem iumi sin? (b) Wanem help nao iumi kasem from example bilong Jesus?
9 Olo aposol John hem raet olsem: “Sapos eniwan sin, iumi garem wanfala man for helpem iumi wea stap witim Dadi, Jesus Christ, man wea raeteous.” (1 John 2:1) Why nao John sei Jesus hem “man for helpem iumi” especially taem iumi “sin”? Bikos iumi sin evriday, and sin lead go long dae. (Ecclesiastes 7:20; Romans 6:23) Bat, Jesus givim laef bilong hem olsem wanfala sakrifaes for olketa sin bilong iumi. And from hem stap witim Dadi bilong iumi wea garem fasin for showimaot mercy, hem savve ask for iumi. Each wan long iumi needim help olsem. Hao nao iumi savve kasem datwan? Iumi need for repent from olketa sin bilong iumi and askem God for forgivim iumi long faondeson bilong sakrifaes bilong Jesus. And tu, iumi mas no duim moa olketa sin bilong iumi.
10 Jesus dae for iumi, and tu, hem showimaot perfect example for iumi. (1 Peter 2:21) Example bilong hem leadim iumi and helpem iumi for stap klia long olketa bigfala sin and mekem Jehovah God hapi. Iumi thankiu tumas for help hia wea hem givim. Jesus promis tu for givim nara samting for helpem olketa follower bilong hem.
Help Bilong Holy Spirit
11, 12. Wanem nao spirit bilong Jehovah, hao nao hem iusim datwan, and why nao iumi needim distaem?
11 Jesus talem disfala promis: “Mi bae askem Dadi and hem bae givim narafala samting for helpem iufala wea bae stap witim iufala olowe, disfala spirit bilong truth wea world kanduit kasem.” (John 14:16, 17) Disfala “spirit bilong truth,” or holy spirit, hem no wanfala man bat hem paoa wea Jehovah iusim for duim samting. Disfala paoa hem no savve finis. Hem paoa wea Jehovah iusim for creatim universe, for duim olketa spesol mirakol, and for showimaot will bilong hem thru long olketa vision. From Jehovah hem no iusim spirit bilong hem long olketa wei hia long distaem, waswe, datwan minim iumi no needim datfala spirit?
12 Nomoa nao! Long disfala “nogud taem wea hard for deal witim,” iumi needim spirit bilong Jehovah winim enitaem bifor. (2 Timothy 3:1) Hem strongim iumi for gohed taem iumi kasem olketa test. Hem helpem iumi for mekem grow olketa naesfala fasin wea mekem iumi kamap moa klos long Jehovah and long olketa spiritual brata and sista bilong iumi. (Galatians 5:22, 23) So, hao nao iumi savve kasem gud samting from disfala nambawan wei wea Jehovah helpem iumi?
13, 14. (a) Why nao iumi sure Jehovah hem willing for givim holy spirit long pipol bilong hem? (b) Wanem samting wea iumi duim nao maet showimaot iumi no really acceptim datfala present bilong holy spirit?
13 Firstfala samting, iumi need for prea for holy spirit. Jesus sei: “Sapos iufala, nomata iufala wicked, savve hao for givim gudfala present long olketa pikinini bilong iufala, Dadi bilong iufala long heven bae barava givim holy spirit long olketa wea askem hem!” (Luke 11:13) Tru tumas, Jehovah nao Dadi wea winim evri nara dadi. Sapos iumi garem faith taem iumi askem holy spirit from hem, bae hem willing tumas for givim iumi disfala present. So, kwestin nao hem olsem, Waswe, iumi ask for holy spirit? Iumi shud duim datwan taem iumi prea each day.
14 Mek-tu samting, iumi acceptim datfala present taem iumi duim samting followim wanem iumi askem. Example bilong diswan: Wanfala Christian hem stragol witim feeling for laek lukluk long dirty piksa. Hem prea for holy spirit helpem hem for againstim barava nogud fasin hia. Hem askem kaonsel from olketa Christian elder, and olketa givim advaes long hem for duim samting kwiktaem for lusim datfala nogud wei, and no go long ples wea kaen samting olsem stap. (Matthew 5:29) Waswe sapos hem no followim advaes bilong olketa and gohed for lukluk long kaen piksa olsem? Waswe, hem duim samting followim prea bilong hem wea hem askem holy spirit for helpem hem? Or maet samting hem duim mekem spirit bilong God feel sorre and bae hem no kasem datfala present bilong holy spirit. (Ephesians 4:30) Tru nao, iumi evriwan need for duim samting iumi fit for duim for mek sure iumi gohed for kasem disfala nambawan present from Jehovah.
Help From Word Bilong God
15. Hao nao iumi showaot iumi no ting nating long Bible?
15 Bible hem samting wea helpem olketa faithful servant bilong Jehovah for staka handred year finis. Iumi need for ting long Bible olsem samting wea savve barava helpem iumi, and no wanfala buk nating nomoa. For kasem datfala help iumi mas waka hard. Iumi need for readim Bible evritaem.
16, 17. (a) Wanem nao olketa reward wea Psalm 1:2, 3 sei man bae kasem sapos hem readim law bilong God? (b) Hao nao Psalm 1:3 showimaot iumi mas waka hard?
16 Psalm 1:2, 3 sei olsem abaotem man wea mekem God hapi: “Hem hapi long law bilong Jehovah, and hem read smol long law bilong hem day and naet. And hem bae kamap olsem wanfala tree wea olketa plantim klosap long planti smol wata, wea garem frut long taem bilong hem and wea leaf bilong hem no savve dae, and evri samting wea hem duim bae win.” Waswe, iu lukim main point bilong datfala scripture? Hem naes story abaotem wanfala tree wea grow saed long river and givim naesfala shade. Hem bae gud tumas for sleep long aftanun andanit tree olsem! Bat disfala psalm no invaetem iumi for tingim wei for rest. Hem storyim difren samting, hem story abaotem wei for waka hard. Hao nao olsem?
17 Lukim hao disfala tree hem no grow nating nomoa saed long river. Hem tree wea garem frut, wea man min for “plantim” saed long “planti smol wata.” Hao nao wanfala tree hem grow saed long planti smol wata? Long plantation bilong olketa frut tree, maet man wea ownim hem digim olketa drain for mekem wata kasem olketa rut bilong olketa tree. So point hem klia nao! Sapos iumi grow gud long spiritual wei olsem datfala tree, datwan hem bikos samwan hem duim bigfala waka for helpem iumi. Iumi stap insaed wanfala organization wea givim iumi olketa klin wata bilong truth, bat iumi nao mas duim samting for kasem disfala wata. For mind and heart bilong iumi kasem olketa truth wea stap insaed Bible, iumi need for ting raonem samting iumi readim and duim research. Sapos iumi duim olsem, bae iumi garem gudfala frut.
18. Wanem nao iumi need for duim for kasem olketa ansa from Bible for eni kwestin iumi garem?
18 Bible bae no helpem iumi sapos hem stap nomoa antap wanfala tebol. And hem no wanfala gud luck samting wea sapos iumi openem eni page bae iumi faendem ansa long eni kwestin bilong iumi. Taem iumi mas disaedem samting, iumi need for dig for “savve bilong God” olsem iumi dig for riches. (Proverbs 2:1-5) Staka taem iumi need for waka hard for duim research bifor iumi faendem advaes from Bible wea fitim need bilong iumi. Iumi garem staka Bible pablikeson for helpem iumi. Taem iumi iusim olketa hia for dig for nambawan wisdom insaed Bible, iumi kasem gudfala samting from help wea Jehovah givim.
Help From Olketa Christian Brata
19. (a) Why nao iumi fit for ting long olketa article insaed Wastaoa and Wekap! magasin olsem help wea kam from olketa Christian brata? (b) Hao nao iuseleva kasem help from wanfala article insaed olketa magasin?
19 From bifor kam olketa servant bilong Jehovah long earth helpem each other. Waswe datwan hem difren distaem? Nomoa. Iumi evriwan savve tingim olketa taem wea iumi kasem help wea iumi barava needim from olketa brata bilong iumi. Olsem example, waswe, iu savve tingim eni article insaed Wastaoa or Wekap! magasin wea comfortim iu taem iu needim datwan, or wea helpem iu for stretem wanfala problem or wanfala test bilong faith wea kasem iu? Jehovah nao givim iu datwan thru long “faithful and wise slave” wea garem waka for givim “kaikai long barava taem.”—Matthew 24:45-47.
20. Wanem nao olketa wei wea olketa Christian elder showimaot olketa “present olsem man”?
20 Bat staka taem, iumi kasem narakaen help from olketa brata bilong iumi. Maet wanfala Christian elder givim wanfala tok wea muvim iumi, or hem duim shepherding kol wea helpem iumi long hardfala taem wea iumi kasem, or hem givim gudfala advaes long wei for deal witim wanfala wik point. Wanfala Christian sista wea tinghae tumas long help wea hem kasem from wanfala elder, sei olsem: “Taem mifala gogo long field service, elder hia encouragem mi for talemaot tingting bilong mi. Long naet bifor datwan, mi prea long Jehovah for givim kam samwan wea mi savve story witim. Disfala brata story witim mi long kaenfala wei. Hem helpem mi for luksavve wei wea Jehovah helpem mi for longtaem finis. Mi thankiu tumas long Jehovah for sendem disfala elder long mi.” Long olketa wei olsem, olketa Christian elder showimaot olketa “present olsem man” wea Jehovah givim thru long Jesus Christ for helpem iumi gohed strong long road for kasem laef.—Ephesians 4:8.
21, 22. (a) Wanem nao kamaot from wei wea olketa insaed kongregeson followim kaonsel long Philippians 2:4? (b) Why nao olketa smolfala help wea iumi kasem olketa important?
21 Evri faithful Christian laek for followim disfala kaonsel from God for “no interest long olketa samting bilong [hem] seleva nomoa, bat interest long olketa samting bilong narafala pipol tu.” (Philippians 2:4) Taem olketa insaed Christian kongregeson followim datfala kaonsel, olketa showimaot kaenfala fasin long each other long staka difren wei. Olsem example, wanfala famili kasem barava hard taem. Dadi and smol dota bilong hem gogo insaed car for go long stoa. Taem tufala kakam bak for haos, tufala insaed wanfala accident. Dota hia hem dae and dadi hem garekil big. Taem hem kamaot from hospital hem barava disable. From waef bilong hem sorre tumas, hem faendem barava hard for lukaftarem hasband bilong hem. So wanfala hasband and waef insaed kongregeson keepim tufala hia long haos bilong tufala for samfala week.
22 Klosap evritaem help wea iumi kasem hem no from iumi insaed barava hard taem olsem. Iumi savve kasem help long olketa smolfala wei tu. Bat nomata hem smol nomoa, iumi tinghae tumas long datwan, iaman? Waswe, iu savve tingim olketa taem wea kaenfala toktok or samting wea wanfala brata or sista duim hem helpem iu long barava wei wea iu needim help? Evri samting hia hem wei wea Jehovah lukaftarem iumi.—Proverbs 17:17; 18:24.
23. Taem iumi helpem each other, hao nao Jehovah ting long diswan?
23 Waswe, iu laekem Jehovah for iusim iu for helpem narawan? Iu garem spesol chance for duim datwan. For tok stret, Jehovah tinghae tumas long eni samting wea iu duim for helpem narawan. Bible hem sei: “Man wea showimaot kaenfala fasin long poor man hem give long Jehovah, and Hem bae peim bak kaenfala fasin bilong hem.” (Proverbs 19:17) Iumi savve kasem bigfala hapi taem iumi givim iumiseleva for duim samting for olketa brata and sista bilong iumi. (Acts 20:35) Eniwan wea no laek for kaban witim nara pipol hem no savve kasem hapi wea kamaot from wei for givim help olsem or kasem strong taem samwan helpem hem. (Proverbs 18:1) So, iumi laek for faithful for hipap tugeta long olketa Christian meeting mekem iumi savve encouragem each other.—Hebrews 10:24, 25.
24. Nomata iumi no lukim olketa spesol mirakol wea Jehovah duim bifor, why nao datwan no minim iumi no kasem eni gud samting?
24 Iumi hapi tumas for ting raonem olketa wei wea Jehovah helpem iumi. Nomata iumi no stap long taem wea Jehovah duim olketa spesol mirakol for fulfillim olketa plan bilong hem, datwan no minim iumi no kasem eni gud samting. Samting wea barava important nao hem wei wea Jehovah helpem iumi long staka wei for mekem iumi gohed faithful. And sapos iumi evriwan faithful, bae iumi stap laef for lukim nambawan samting wea winim olketa samting wea Jehovah duim finis long history bilong olketa man! Iumi want for acceptim and iusim evribit help wea Jehovah givim mekem iumi tu savve talem toktok bilong text bilong iumi for year 2005: “Jehovah nao man wea helpem mi.”—Psalm 121:2.
Wanem Nao Tingting Bilong Iu?
Distaem, hao nao Jehovah givim help wea iumi needim thru long—
• olketa angel?
• holy spirit bilong hem?
• Bible?
• olketa Christian brata?
[Piksa long page 18]
Taem iumi savve olketa angel sapotim waka for preach, diswan encouragem iumi
[Piksa long page 21]
Jehovah savve iusim olketa brata bilong iumi for givim comfort wea iumi needim