Tingting Gud Abaotem Wei Bilong Iu and Samting wea Iu Mas Duim
“Iufala mas tingting gud abaotem wei bilong iufala and samting wea iufala mas duim. Iufala mas holy and duim samting wea showimaot iufala faithful long God!”—2 PET. 3:11.
1, 2. Sapos iumi laekem God for hapi long iumi, iumi mas hao?
HAO narawan ting long iumi hem important samting long iumi olketa man. Bat for iumi olketa Christian, samting wea important winim datwan hem hao Jehovah ting long iumi. Diswan hem bikos Jehovah nao hae winim evriwan long universe, and hem nao “givim laef.”—Ps. 36:9.
2 Aposol Peter sei for Jehovah hapi long iumi, iumi mas “holy and duim samting wea showimaot [iumi] faithful long God.” (Readim 2 Peter 3:11.) For iumi “holy” laef bilong iumi mas klin. Diswan minim tingting bilong iumi, samting wea iumi duim, and worship bilong iumi mas klin. And tu, iumi mas “duim samting wea showimaot [iumi] faithful long God” from iumi lovem and respectim hem. So samting wea important long God hem no samting wea iumi duim nomoa, bat tingting bilong iumi abaotem God tu. From Jehovah hem “lukluk gud long heart,” hem savve sapos iumi holy and sapos iumi worshipim hem nomoa.—1 Chron. 29:17.
3. Hem gud for iumi tingim olketa wanem kwestin?
3 Satan no laekem God for hapi long iumi. Hem traem best for spoelem wei wea iumi fren witim Jehovah. Satan hem evritaem laea for trae trikim iumi mekem iumi no gohed for worshipim Jehovah. (John 8:44; 2 Cor. 11:13-15) So hem gud for tingim olketa kwestin hia: ‘Wanem nao Satan iusim for trikim pipol? Hao nao mi savve protectim wei wea mi fren witim Jehovah?’
WANEM NAO SATAN IUSIM FOR TRIKIM PIPOL?
4. Wanem nao Satan trae for duim for spoelem wei wea iumi fren witim God, and why nao olsem?
4 Disaepol James hem sei: “Samting wea man seleva laekem nao savve traem hem. Taem datfala feeling for laekem samting hem kamap strong tumas, hem mekem man for duim sin, wea datwan hem lead go long dae.” (Jas. 1:14, 15) For spoelem wei wea iumi fren witim God, Satan trae for kasem heart bilong iumi bikos feeling for laekem samting hem start kam from heart.
5, 6. (a) Wanem nao Satan duim for trae kasem heart bilong iumi? (b) Wanem nao thrifala samting wea Satan iusim for mekem heart bilong iumi laekem olketa nogud samting? Why nao hem savve hao for iusim olketa trik hia?
5 Wanem nao Satan duim for trae kasem heart bilong iumi? Bible sei: “Full world hem stap long paoa bilong Satan.” (1 John 5:19) Wanfala kleva trik wea Satan iusim hem “olketa samting long world.” (Readim 1 John 2:15, 16.) For plande thousand year finis, Satan iusim olketa samting long disfala world for trikim pipol. Iumi stap long disfala world, so iumi mas protectim iumiseleva from olketa kleva trik bilong hem.—John 17:15.
6 Satan trae for mekem heart bilong iumi laekem olketa nogud samting. Aposol John storyim thrifala samting wea Satan iusim: (1) ‘samting wea body laekem,’ (2) ‘samting wea eye laekem,’ and (3) “wei for man show-off witim samting wea hem garem.” Satan iusim thrifala samting hia for traem Jesus long wilderness. From Satan iusim olketa trik hia for staka year finis, and hem savve long olketa wik point bilong iumi, hem savve which wan long thrifala trik hia nao bae hem iusim for traem man wanwan. Bae iumi storyim hao iumi savve protectim iumiseleva, bat firstaem bae iumi storyim why nao Devil savve trikim Eve bat hem no savve trikim Son bilong God.
‘SAMTING WEA BODY LAEKEM’
7. Hao nao Satan iusim ‘samting wea body laekem’ for switim Eve?
7 For olketa man laef, olketa mas kaikai. God wakem earth for garem staka kaikai. Maet Satan iusim feeling bilong iumi for laek kaikai for switim iumi for duim samting wea God no laekem. Hem nao samting wea hem duim long Eve. (Readim Genesis 3:1-6.) Satan talem Eve bae hem no dae sapos hem kaikaim frut from “tree wea piksarem wei for savve long gud and nogud samting.” Hem sei sapos hem kaikaim datwan bae hem olsem God. (Gen. 2:9) Satan laekem Eve for tingse hem no need for obeyim God for gohed laef. Bat datwan hem nating tru! Eve savve disaed for no agree long datwan, or for gohed tingim datwan and letem feeling for laekem datfala frut kamap strong. Nomata staka nara tree stap long garden wea hem savve kaikaim, hem disaed for gohed tingim datfala tree long midol bilong garden. Gogo hem kaikaim frut bilong datfala tree nao. Satan switim hem for laekem samting wea God tambuim.
8. Hao nao Satan iusim ‘samting wea body laekem’ for traem Jesus, and why nao Satan no win?
8 Satan trae for duim semkaen samting tu long Jesus taem hem stap long wilderness. Bihaen Jesus no kaikai for 40 day and naet, Satan iusim kaikai for traem hem. Satan sei: “Sapos iu wanfala son bilong God, talem olketa ston hia for kamap bred.” (Matt. 4:1-3) Jesus savve disaed for iusim paoa bilong hem for kasem kaikai, or hem savve disaed for no duim datwan. Jesus savve hem no stret for iusim paoa bilong hem for kasem samting for hemseleva. Nomata hem hangre, wei wea hem fren witim God hem barava important long hem winim kaikai. Jesus sei long Satan: “Olketa Holy Raeting talem finis: ‘Samting wea mekem man laef nao, hem no kaikai nomoa, bat hem evri toktok wea kamaot from mouth bilong Jehovah.’”—Matt. 4:4.
‘SAMTING WEA EYE LAEKEM’
9. Wanem nao datfala toktok ‘samting wea eye laekem’ hem minim, and hao nao Satan iusim datwan for trikim Eve?
9 Nara trik bilong Satan wea John storyim hem ‘samting wea eye laekem.’ Taem man gohed for lukluk long wanfala samting, hem savve start for laekem datwan. Satan iusim diswan for trikim Eve. Hem sei: “Eye bilong iu bae open.” Taem Eve gohed lukluk long datfala frut, datwan mekem hem barava laekem. Datfala tree hem “barava luk naes tumas long hem.”
10. Hao nao Satan iusim ‘samting wea eye laekem’ for traem Jesus, and wanem nao Jesus talem?
10 Hao nao Satan iusim ‘samting wea eye laekem’ for traem Jesus? Satan “showim hem evri kantri long world. Then Devil sei long hem: ‘Bae mi givim iu paoa ovarem evri kantri hia and olketa nambawan samting wea olketa garem.’” (Luke 4:5, 6) Jesus no barava lukim evri kantri long world bat hem lukim olketa nambawan samting wea olketa garem insaed wanfala vision. Masbi Satan tingse samting wea Jesus lukim bae switim hem. Hem sei long Jesus: “Sapos iu baodaon and worshipim mi distaem, bae mi givim iu evri samting hia.” (Luke 4:7) Jesus barava no laek for mekem Satan hapi. Hem stretawe sei: “Olketa Holy Raeting talem finis: ‘Iu mas baodaon long God bilong iu Jehovah, and iu mas worshipim hem nomoa.’”—Luke 4:8.
‘WEI FOR SHOW-OFF WITIM SAMTING WEA MAN GAREM’
11. Hao nao Satan trikim Eve?
11 John storyim tu ‘wei for show-off witim samting wea man garem.’ Adam and Eve no savve show-off olsem taem tufala nomoa stap long earth, bat tufala kamap praod. Satan trikim Eve for tingse God stopem hem for kasem wanfala nambawan samting wea hem shud kasem. Devil sei sapos hem kaikaim frut from “tree wea piksarem wei for savve long gud and nogud samting,” bae hem “olsem God long wei for savve long wanem nao hem gud and wanem nao hem nogud.” (Gen. 2:17; 3:5) Satan laekem Eve for tingse hem savve independent from Jehovah. Maet wanfala reason why Eve bilivim Satan hem bikos Eve hem praod. Hem kaikaim datfala frut wea God tambuim and tingse hem bae no dae. Bat hem dae nao!
12. Wanem nao narafala samting wea Satan duim for trae switim Jesus, and wanem nao Jesus talem?
12 Jesus hem difren from Eve bikos hem barava hambol! Satan trae for switim hem for duim samting wea bae mekem olketa narawan tinghae long hem, and wea bae testim God. Bat from Jesus no praod, hem barava no laek for duim datwan! Hem tok stret long Satan and sei: “Olketa Holy Raeting talem finis: ‘Iu mas no testim God bilong iu Jehovah.’”—Readim Luke 4:9-12.
HAO NAO IUMI SAVVE PROTECTIM WEI WEA IUMI FREN WITIM JEHOVAH?
13, 14. Hao nao Satan trae for trikim iumi distaem?
13 Distaem tu Satan iusim olketa sem trik wea hem iusim for trae trikim Eve and Jesus. Hem iusim ‘samting wea body laekem’ for switim pipol for durong, or for ova tumas long kaikai and drink. Hem iusim ‘samting wea eye laekem’ for switim pipol for lukluk long pornography, especially long Internet. And hem iusim feeling for laek ‘show-off witim samting wea man garem’ for mekem pipol praod and laekem paoa, bignem, and staka material samting.
14 Satan iusim “olketa samting long world” olsem man for fishing hem iusim bait. Fish savve laek kaikai long bait wea luk naes, bat hem garem huk insaed. Olsem tu, Satan iusim olketa samting wea maet iumi tingse hem normal nomoa and samting iumi needim for switim iumi for laek duim samting wea againstim olketa law bilong God. Satan laekem iumi for tingse for kasem need bilong iumi and for garem gudfala laef, hem important winim wei for duim wanem God laekem. Waswe, bae iu letem Satan iusim olketa samting hia for trikim iu?
15. Hao nao iumi savve followim example bilong Jesus and no letem Satan trikim iumi?
15 Satan trikim Eve bat hem no savve trikim Jesus. Evritaem Satan trae for trikim Jesus, Jesus hem sei: “Olketa Holy Raeting talem finis,” and then hem talem toktok from wanfala scripture. Sapos iumi studyim gud Bible bae iumi fit for tingim olketa scripture wea savve helpem iumi taem iumi kasem test. (Ps. 1:1, 2) Wei for tingim example bilong olketa wea faithful for worshipim God long bifor savve helpem iumi for faithful tu. (Rome 15:4) Sapos iumi barava respectim Jehovah, wea minim iumi lovem samting wea hem lovem and heitim samting wea hem heitim, datwan bae protectim iumi.—Ps. 97:10.
16, 17. Hao nao tingting bilong iumi savve affectim wei bilong iumi?
16 Aposol Paul encouragem iumi for garem “gudfala tingting” and for garem sem tingting olsem Jehovah, no tingting bilong pipol long world. (Rome 12:1, 2) Paul talem iumi tu for kontrolem gud wanem nao iumi tingting abaotem. Hem sei: “Mifala aotem tingting . . . wea hem no stret and enikaen praod tingting wea againstim datfala savve abaotem God. Hem olsem mifala kasholem and leadim tingting [bilong mifala] for . . . obeyim Christ.” (2 Cor. 10:5) Tingting bilong iumi savve barava affectim wei bilong iumi, so iumi mas evritaem trae for tingim nomoa olketa samting wea God hapi long hem.—Phil. 4:8.
17 For iumi holy, iumi mas aotem olketa nogud tingting and feeling for laekem samting wea no stret. Iumi mas garem love for Jehovah wea kam from “gudfala heart.” (1 Tim. 1:5) Bat heart bilong iumi savve barava laea long iumi, and maet iumi no luksavve “olketa samting long world” hem barava affectim iumi. (Jer. 17:9) Dastawe hem important for iumi ‘gohed for lukluk gud long iumiseleva for savve sapos iumi followim yet olketa tru teaching.’ Taem iumi studyim Bible, iumi wanwan shud tingim diswan, ‘Waswe, God hem hapi long tingting bilong mi and samting wea mi laekem?’—2 Cor. 13:5.
18, 19. Why nao iumi shud waka hard for mekem Jehovah hapi long iumi?
18 Nara samting wea savve helpem iumi for againstim “olketa samting long world” hem for tingim disfala toktok bilong John wea sei: “World bae finis and evri samting wea pipol long world laekem bae finis tu, bat man wea duim wanem God hem laekem bae stap for olowe.” (1 John 2:17) Pipol tingse world bilong Satan bae stap for olowe. Bat disfala world bae finis. Sapos iumi evritaem tingim klosap nao evri samting long world bae finis, datwan bae helpem iumi for no letem Satan trikim iumi.
19 Aposol Peter sei iumi shud garem gudfala wei and duim samting wea God hapi long hem taem iumi “weitim and tingim evritaem datfala day bilong Jehovah. Long datfala taem fire bae finisim skae, and olketa samting long skae and long earth bae melt from hem hot tumas!” (2 Pet. 3:12) Klosap nao datfala day bae kam and Jehovah bae finisim evri samting long world bilong Satan. Go kasem datfala taem, Satan bae gohed for iusim “olketa samting long world” for traem iumi, olsem hem duim long Eve and Jesus. Iumi mas no olsem Eve long wei for trae kasem nomoa wanem iumiseleva laekem. Sapos iumi duim datwan, hem olsem Satan nao god bilong iumi. Iumi mas olsem Jesus and againstim olketa samting wea Satan iusim for traem iumi, nomata Satan mekem datwan luk naes tumas. Iumi wanwan laek waka hard for mekem Jehovah hapi long iumi.