Tingim and Encouragem Narawan

1, 2. Wanem nao helpem 230 Jehovah’s Witness for no dae long death march long end bilong World War II?

TAEM World War II klosap for finis, and luk olsem army bilong Hitler bae lus, datfala Nazi gavman komandim olketa soldia for killim dae staka thousand prisoner wea stap yet long olketa prison bilong olketa. Olketa plan for tekem olketa prisoner from Sachsenhausen prison go long saedsea and putim olketa long olketa ship and then sinkim olketa ship hia. Gogo, pipol kolem disfala plan “olketa death march.”

² Olketa forcem 33,000 prisoner from datfala Sachsenhausen prison for march 250 kilometer go long Lübeck, wanfala taon long Germany wea garem harbor. Insaed disfala sekson hem 230 Jehovah’s Witness from sixfala difren kantri. Olketa soldia komandim olketa Witness for march tugeta. Evri prisoner hia wik bikos olketa sik and hangre. Bat no eni brata bilong iumi dae. Why nao olsem? Wanfala long olketa sei: “Mifala gohed encouragem narawan for no givap.” Samting wea helpem olketa for laef nao hem love wea olketa garem for narawan and strong from God wea “winim strong bilong man.”—2 Cor. 4:7.

3. Why nao iumi mas encouragem narawan?

³ Nomata iumi no insaed long wanfala death march distaem, iumi kasem plande hard taem. Bihaen Kingdom bilong God start for rul long 1914, olketa aotem Satan from heven and torowem hem kam daon long earth. Hem kros fogud from hem savve “hem garem lelebet taem nomoa.” (Rev. 12:7-9, 12) From iumi gogo for Armageddon, Satan mekius long olketa hard taem wea iumi kasem for mekem iumi no fren gud witim Jehovah. Iumi kasem tu olketa hevi long laef. (Job 14:1; Eccl. 2:23) Samfala taem olketa hevi hia mekem iumi barava wikdaon nomata iumi traem best. Olsem example, for staka year wanfala brata encouragem plande narawan for gohed faithful long Jehovah. Bat taem hem olo, hem and waef bilong hem sik, and hem nao start for feel wikdaon. Olsem datfala brata, iumi evriwan needim strong from Jehovah wea “winim strong bilong man,” and tu, encouragement from narawan.

4. Sapos iumi laek for encouragem narawan, wanem toktok bilong aposol Paul nao iumi mas followim?

⁴ Sapos iumi laek for encouragem narawan, iumi mas followim samting wea aposol Paul talem for olketa Hebrew Christian. Hem sei: “Iumi mas barava tingim narawan mekem iumi savve encouragem olketa for showimaot love and duim olketa gudfala samting. No misstim wei for hipap tugeta olsem samfala savve duim, bat encouragem narawan and gohed for duim datwan moa taem iufala lukim datfala day hem kakam klosap.” (Heb. 10:24, 25) Wanem nao iumi savve duim for followim disfala important toktok?

“BARAVA TINGIM NARAWAN”

5. Wanem nao hem minim for “barava tingim narawan,” and hao nao iumi savve duim datwan?

⁵ For “barava tingim narawan” hem minim for ting raonem hao for helpem narawan. Hard for iumi savve hao for helpem olketa brata and sista bilong iumi sapos iumi just hello nomoa long Kingdom Hall, or storyim nomoa samting wea no important. Hem tru, iumi no laek poke nose long laef bilong pipol. (1 Thess. 4:11; 1 Tim. 5:13) Bat iumi laek for savve gud long olketa brata bilong iumi. Iumi laek for savve hao olketa stap, wei bilong olketa, wanem olketa fit for duim and no fit for duim, and tingting bilong olketa abaotem spiritual samting. Olketa mas luksavve iumi fren bilong olketa and iumi lovem olketa. Iumi mas spendem taem witim olketa, no long taem wea olketa garem problem and feel wikdaon nomoa, bat long olketa narataem tu.—Rome 12:13.

6. Wanem nao bae helpem olketa elder for “barava tingim” olketa long kongregeson?

⁶ Bible sei olketa elder mas willing and laek for lukaftarem olketa long kongregeson. (1 Pet. 5:1-3) For duim gud disfala waka, olketa elder mas savve gud long olketa brata and sista. (Readim Proverbs 27:23.) Sapos olketa elder showimaot olketa willing for helpem olketa brata and sista and hapi for spendem taem witim olketa, bae olketa feel free for askem olketa elder for help taem olketa needim datwan. Hem bae moa isi tu for olketa storyim feeling and wari bilong olketa, wea bae mekem olketa elder savve hao for helpem olketa.

7. Taem olketa wea feel wikdaon toktok krangge, wanem nao iumi mas tingim?

⁷ Paul talem olketa long kongregeson long Thessalonica for “helpem olketa wea wik.” (Readim 1 Thessalonica 5:14.) “Olketa wea wik” hem minim olketa wea sorre and olketa wea feel wikdaon. Proverbs 24:10 hem sei: “Sapos iu feel wikdaon taem iu kasem trabol, bae iu no strong nao.” Sapos iumi laek for sapotim olketa wea barava feel wikdaon, iumi mas no forget samfala taem bae olketa toktok krangge. (Job 6:2, 3) Maet olketa talem nogud samting bat olketa no min for spoelem narawan. Rachelle luksavve long diswan. Mami bilong hem garem sik wea man barava sorre tumas. Rachelle sei: “Staka taem Mami savve talem toktok wea spoelem feeling bilong man. Taem hem duim olsem, plande taem mi trae for tingim hao datwan no really wei bilong mami, bat hem woman wea showimaot love and hem kaen. Mi luksavve man wea garem sik olsem no min for spoelem narawan. Bae hem worse moa sapos iu changem bak nogud samting wea man olsem talem or duim.” Long Proverbs 19:11 hem sei: “Wei for luksavve bae stopem man for kros, and pipol tinghae long man wea no tingim moa rong wea narawan duim.”

8. Hu nao barava needim iumi for “showim” long olketa iumi lovem olketa, and why nao olsem?

⁸ Hao nao iumi savve showimaot iumi “barava tingim” samwan wea feel wikdaon bikos long sin wea hem duim bifor? Nomata hem stretem datwan finis, maet hem shame yet long samting wea hem duim. Long leta wea Paul raetem for olketa long Corinth hem story abaotem samwan long kongregeson bilong olketa wea repent from sin bilong hem. Paul sei: “Iufala mas willing for forgivim and comfortim hem, nogud man hia hem wikdaon from hem sorre tumas. Dastawe mi encouragem iufala for showim long hem iufala lovem hem.” (2 Cor. 2:7, 8) Datfala toktok “showim” hem minim “for pruvim.” Brata or sista bilong iumi bae no savve iumi lovem hem and tingim hem sapos iumi no showimaot datwan long wanem iumi talem and samting wea iumi duim.

‘ENCOURAGEM NARAWAN FOR SHOWIMAOT LOVE AND DUIM GUDFALA SAMTING’

9. Hao nao iumi savve ‘encouragem narawan for showimaot love and duim gudfala samting’?

⁹ Paul hem sei: “Iumi mas barava tingim narawan mekem iumi savve encouragem olketa for showimaot love and duim olketa gudfala samting.” Olsem example, taem fire klosap for dae, iumi mas blowim datfala fire mekem hem gohed for laet. Olsem tu, iumi savve duim samfala samting for helpem olketa brata for laek gohed strong for worshipim Jehovah. Wanfala best wei for duim diswan hem for praisem olketa brata for gud samting wea olketa duim.

10, 11. (a) Hu nao needim praise? (b) Storyim example wea showimaot wei for praisem narawan savve helpem hem for duim stret samting.

¹⁰ Iumi evriwan needim praise, nomata iumi feel wikdaon or nomoa. Wanfala brata hem sei: “No enitaem dadi bilong mi praisem mi and sei mi duim gudfala samting.” So taem disfala brata growap, hem tingse hem no savve duim eni gud samting. Nomata distaem hem 50 year, taem olketa narawan praisem hem from hem duim gud waka bilong hem olsem elder datwan barava encouragem hem. Samting wea kasem hem mekem hem luksavve hem barava important for encouragem narawan, so hem evritaem lukaotem chance for praisem narawan. Olketa wea pioneer, wea olo, wea wikdaon, and iumi evriwan feel hapi taem samwan praisem iumi.—Rome 12:10.

¹¹ Taem olketa elder trae for helpem samwan wea duim samting wea no stret, wei for praisem hem for gud samting wea hem duim bifor maet helpem hem for kasem bak gudfala tingting and duim stret samting. (Gal. 6:1) Hem nao samting wea helpem wanfala sista wea nem bilong hem Miriam. Hem sei: “Mi kasem hard taem long laef bilong mi taem samfala fren bilong mi insaed kongregeson lusim truth, and long datfala semtaem Dadi bilong mi kasem sik long brain. Mi barava sorre fogud.” Hem start for frenim wanfala man wea no worshipim Jehovah. Hem tingse datwan bae mekem hem hapi. Bat taem hem duim datwan hem feel olsem hard for Jehovah lovem hem and hem ting for lusim truth. Wanfala elder remindim hem abaotem olketa gud samting wea hem duim for Jehovah bifor and talem hem Jehovah still lovem hem. Diswan strongim love bilong hem for Jehovah. Hem finis for frenim datfala man and hem gohed worshipim Jehovah.

12. Wanem nao maet happen sapos iumi comparem brata bilong iumi witim narawan, tok daonem hem, or mekem hem feel guilty?

¹² Taem iumi trae for encouragem narawan for gohed strong for worshipim God, iumi shud no comparem hem witim narawan, tok daonem hem from hem no followim standard bilong iumiseleva, or mekem hem feel guilty from hem no duim moa samting long Kingdom waka. Maet datwan mekem hem gohed strong, bat for lelebet taem nomoa. Best wei for encouragem olketa brata hem for praisem olketa and helpem olketa for luksavve reason why iumi traem best for worshipim God hem bikos iumi lovem hem.—Readim Philippi 2:1-4.

‘ENCOURAGEM NARAWAN TAEM DATFALA DAY HEM KAKAM KLOSAP’

13. Hao nao iumi savve encouragem narawan? (Lukim piksa long start bilong study.)

¹³ Paul sei tu iumi mas “encouragem narawan and gohed for duim datwan moa taem [iumi] lukim datfala day hem kakam klosap.” Wei for encouragem narawan hem olsem iumi putim firewood long fire mekem hem gohed for laet. Iumi encouragem olketa brata bilong iumi taem iumi strongim and comfortim olketa mekem olketa gohed for worshipim God. Taem iumi trae for helpem olketa wea feel wikdaon, iumi mas tok kaen long olketa. (Prov. 12:18) And iumi mas “willing for lisin” and “no kwiktaem for toktok.” (Jas. 1:19) Sapos iumi lisin long brata bilong iumi and trae for minim feeling bilong hem, maet iumi luksavve long wanem nao mekem hem wikdaon, then iumi savve talem toktok wea bae helpem hem.

14. Wanem nao wanfala elder duim for helpem brata wea feel wikdaon?

¹⁴ Tingim samting wea wanfala elder duim for helpem wanfala brata wea inactive for plande year. Taem brata hia story, datfala elder luksavve hem barava lovem Jehovah. Hem evritaem prepare for Wastaoa Study and hem traem best for no misstim eni meeting. Bat samfala long kongregeson duim samting wea mekem hem feel nogud and wikdaon. Datfala elder lisin gud long hem, trae for minim feeling bilong hem, and no judgem hem. And tu, hem talem hem olketa long kongregeson lovem hem. Gogo, brata hia luksavve hem letem olketa nogud samting wea happen bifor stopem hem for worshipim God wea hem lovem. Datfala elder invaetem hem for tufala go preaching tugeta and helpem hem for strong moa for duim ministry. Gogo brata hia kamap elder moa.

15. Wanem example nao Jehovah showimaot long wei for encouragem olketa wea feel wikdaon?

¹⁵ Taem iumi helpem brata or sista wea feel wikdaon maet hem no kwiktaem acceptim help bilong iumi, or hem tek taem for hem kamap strong moa. Maet iumi need for gohed sapotim hem for lelebet longtaem. Paul hem sei: “Helpem olketa wea wik, and patient long evriwan.” (1 Thess. 5:14.) Iumi mas no kwiktaem for givap, bat iumi gohed for helpem olketa wea wik. Long bifor, Jehovah hem patient witim pipol bilong hem wea wikdaon. Olsem example, God hem barava patient witim Elijah and tingim feeling bilong hem. Hem givim Elijah wanem hem needim for gohed worshipim hem. (1 Ki. 19:1-18) Narafala example hem David. From Jehovah luksavve David barava sorre long samting wea hem duim, hem forgivim hem. (Ps. 51:7, 17) God helpem tu man wea raetem Psalm 73 wea klosap stop for worshipim Hem. (Ps. 73:13, 16, 17) Jehovah barava kaen and patient witim iumi taem iumi feel wikdaon. (Ex. 34:6) Bible sei Jehovah showimaot mercy “evri morning,” and “mercy bilong hem no savve finis.” (Lam. 3:22, 23) Jehovah laekem iumi for followim example bilong hem for kaen long olketa wea feel wikdaon.

ENCOURAGEM NARAWAN FOR GOHED WAKABAOT LONG ROAD BILONG LAEF

16, 17. Taem disfala world hem gogo for finis, wanem nao iumi mas duim, and why nao olsem?

¹⁶ Thirti-thri thousand prisoner march from Sachsenhausen prison, and plande thousand long olketa nao dae. Nomata olsem, evriwan long 230 Jehovah’s Witness olketa laef. Samting wea barava helpem olketa for gohed laef nao hem bikos olketa encouragem and sapotim each other.

¹⁷ Distaem iumi wakabaot long road wea man wea kasem end bilong datfala road “bae kasem laef olowe.” (Matt. 7:14) Klosap nao evriwan wea worshipim Jehovah bae kasem laef long niu world wea evri samting bae raeteous. (2 Pet. 3:13) Taem disfala nogud world bilong Satan hem gogo for finis, iumi evriwan laek helpem narawan for gohed wakabaot long road bilong laef.