Why Nao Jesus No Joinim Politik?

TINGIM samting wea happen long year 32 C.E. taem hem gogo for evening. Staka pipol savve finis long Jesus wea hem nao Messiah bikos hem healim staka pipol wea sik and hem mekem pipol laef bak. And long datfala day, staka thousand pipol nao sapraes taem hem duim olketa mirakol and teachim olketa abaotem God. So, hem mekem olketa sidaon long olketa smol grup. Hem prea long Jehovah and hem duim mirakol for givim kaikai long olketa. Then hem kolektem olketa leftova kaikai for no weistim. Wanem nao pipol duim?​—⁠John 6:​1-​13.

Pipol tingse Jesus bae nambawan king, bikos olketa lukim hao hem lukaftarem pipol and hem tingim wanem olketa needim. (John 6:​14) Iumi no sapraes long wanem olketa duim. Tingim, olketa hia laekem tumas gudfala man for rulim olketa bikos pipol long difren ples rulim olketa long nogud wei. So olketa trae forcem Jesus for joinim politik. From diswan, tingim samting wea Jesus duim.

John 6:​15 sei: “From Jesus savve bae olketa kam holem hem for mekem hem king, hem go bak seleva moa long datfala maunten.” Samting wea Jesus duim showimaot klia hem barava disaed strong for no joinim politik long ples bilong hem. Jesus nating changem tingting bilong hem abaotem diswan. Hem sei olketa wea followim hem mas duim sem samting tu. (John 17:16) Why nao hem duim olsem?

Why Nao Jesus No Teksaed?

Jesus followim wanem Bible talem dastawe hem no teksaed long politik bilong disfala world. Tingim tufala samting hia.

“Taem man rulim narawan hem spoelem hem.” (Ecclesiastes 8:⁠9) Diswan nao wanem Bible talem abaotem hao man rulim narawan. Tingim, Jesus stap longfala taem long heven olsem wanfala spirit bifor hem kam long earth olsem man. (John 17:⁠5) So hem savve gud hao nomata olketa man trae hard, olketa no fit for provaedem wanem staka billion pipol needim, and God no wakem olketa man for duim olsem. (Jeremiah 10:23) Jesus savve olketa gavman bilong man hard for stretem olketa problem bilong man.

“Full world hem stap anda long paoa bilong Satan.” (1 John 5:​19) Waswe, iu sapraes long datfala toktok? Staka nao sapraes. Olketa savve long samfala gud pipol wea joinim gavman bikos olketa laek for mekem disfala world kamap sef ples for stap long hem. Nomata gudfala pipol hia trae hard for duim datwan, olketa no savve winim man wea Jesus sei hem “rulim disfala world.” (John 12:31; 14:30) Dastawe Jesus talem wanfala man wea joinim politik: “Kingdom bilong mi hem no bilong disfala world.” (John 18:36) Long datfala taem, Jesus no King yet long gavman bilong God long heven. Sapos Jesus joinim politik, hem no faithful nao long gavman bilong Dadi bilong hem.

Waswe, diswan minim Jesus teachim olketa wea followim hem for no obeyim olketa gavman? Nomoa, Jesus teachim olketa for garem stretfala tingting long wanem olketa fit for duim wea mekem God hapi, and wanem for olketa duim for mekem gavman hapi.

Jesus Respectim Olketa wea Garem Paoa

Taem Jesus teach long temple, olketa wea les long hem trae for trikim hem for talem rong samting taem olketa askem hem sapos pipol shud peim tax. So sapos Jesus sei nomoa, ansa bilong hem maet luk olsem hem againstim gavman, and maet datwan mekem olketa wea Rome rulim wea feel nogud for laek againstim gavman. Bat sapos Jesus sei ia, staka bae tingse hem sapotim olketa nogud samting wea kasem olketa. Ansa bilong Jesus barava fitim. Hem sei: “Givim go bak long King samting wea hem bilong King, and givim go bak long God samting wea hem bilong God.” (Luke 20:​21-25) So olketa wea followim hem shud obeyim God, and King wea diswan minim gavman.

Olketa gavman mek sure evri samting hem no olobaot. Olketa fit for askem pipol wea olketa rulim for honest, peim tax, and obeyim law. Wanem example nao Jesus showimaot long wei for “givim go bak long King samting wea hem bilong King”? Dadi and mami bilong Jesus obeyim law nomata hem hard for duim datwan. Example nao, Joseph and waef bilong hem Mary, wea babule, gogo for samting olsem 150 kilometer long Bethlehem taem Rome duim wanfala census. (Luke 2:​1-5) Jesus tu obeyim law olsem dadi and mami bilong hem for peim tax, nomata hem no need for peim. (Matthew 17:​24-​27) Hem keakea for no duim eni samting wea hem no fit for duim saed long gavman. (Luke 12:​13, 14) Iumi savve sei Jesus respectim olketa law bilong gavman, bat hem no laek for joinim olketa. So wanem nao Jesus minim taem hem sei, “givim go bak long God samting wea hem bilong God”?

Jesus Givim “Go Bak Long God Samting wea Hem Bilong God”

Wantaem, wanfala man askem Jesus abaotem wanem law nao hem important winim olketa nara law wea God givim long man. Christ ansa olsem: “‘Iu mas lovem God bilong iu Jehovah long full heart bilong iu. And iu mas iusim full soul, and evri savve bilong iu for lovem hem tu.’ Disfala law nao first wan, and no eni nara law important winim hem. Nara law wea barava important nao hem, ‘Iu mas lovem narawan long sem wei wea iu lovem iuseleva.’” (Matthew 22:​37-​39) Jesus teachim iumi for givim “go bak long God samting wea hem bilong God.” Main samting nao hem for iumi lovem God witim full heart bilong iumi.

Waswe, iumi savve hafhaf nomoa for lovem God? Waswe, iumi savve faithful long Jehovah God and gavman bilong hem long heven, and faithful tu long gavman long disfala world? Jesus sei: “No eniwan savve waka for tufala boss, bikos bae hem heitim narawan and lovem narawan, or bae hem faithful long narawan and ting daonem narawan.” (Matthew 6:​24) Jesus storyim hao man no savve faithful long God and long semtaem busy for kasem staka selen. Bat wanem Jesus talem hem fitim tu wei for no joinim politik, olsem olketa follower bilong hem duim bifor.

Samfala barava old record showimaot hao olketa wea followim Jesus bifor no tekpart long politik. From olketa worshipim nomoa God wea Christ worshipim, dastawe olketa no laek promis for sapotim Rome and emperor bilong hem, no joinim army, and no waka long gavman. From datwan, staka nogud samting kasem olketa. Samfala taem pipol wea heitim olketa sei, olketa hia heitim evriwan. Waswe, wanem olketa talem hem tru?

Olketa Tru Christian Tingim Pipol

Tingim wanem Jesus talem abaotem mek-tu law wea barava important. Hem sei: “Iu mas lovem narawan long sem wei wea iu lovem iuseleva.” Hem klia, olketa wea barava followim Christ no fit for heitim eniwan. Jesus lovem pipol, hem waka hard, and hem helpem olketa witim problem bilong olketa nomata hem big or smol.​—⁠Mark 5:​25-​34; John 2:​1-​10.

Wanem nao mekem pipol for savve long Jesus? Nomata Jesus duim olketa nambawan samting olsem for healim olketa wea sik, feedim staka thousand pipol, and mekem man laef bak, pipol no tingim hem from olketa samting hia. Bat hem stret for olketa sei hem Teacher. (John 1:​38; 13:13) Jesus explainim hao main reason why hem kam long earth hem for teachim pipol abaotem Kingdom bilong God.​—⁠Luke 4:​43.

Dastawe olketa wea followim Jesus tu iusim taem bilong olketa for duim sem waka wea Boss bilong olketa duim taem hem stap long earth, for teachim pipol gud nius abaotem Kingdom bilong God. Jesus Christ talem evri trufala Christian for teachim pipol evriwea long world abaotem Kingdom bilong God. (Matthew 24:14; 28:​19, 20) Taem gavman long heven wea bae no savve finis rul, hem bae showimaot love long evri samting wea God wakem. Hem bae duim evri samting followim wanem God laekem, and bae finisim tu wei for safa and dae. (Matthew 6:​9, 10; Revelation 21:​3, 4) Dastawe Bible sei message wea Christ talemaot hem “gud nius”!​—⁠Luke 8:⁠1.

Sapos iu laek savve hu nao olketa trufala follower bilong Jesus Christ distaem, hao nao bae iu luksavve long olketa? Waswe, olketa joinim politik? Or waswe, main waka wea olketa duim hem sem waka wea Jesus duim for preach and teach abaotem Kingdom bilong God?

Waswe, iu laek for lanem samfala nara samting tu abaotem Kingdom bilong God and hao hem savve helpem iu distaem? Mifala laekem iu for story witim Olketa Jehovah’s Witness long ples wea iu stap, or iu savve luk long Web site, www.watchtower.org.

[Box/​Piksa long page 24, 25]

Waswe, Olketa Jehovah’s Witness Helpem Pipol Long Community?

Olketa Jehovah’s Witness no joinim politik. Bat olketa duim staka samting for helpem difren kaen pipol long community bilong olketa. Tingim wanem olketa duim:

◼ Evri year winim 7 million Jehovah’s Witness iusim winim 1.5 billion hour for teachim pipol abaotem Bible. Olketa storyim hao Bible savve helpem pipol for lusim rabis wei bilong olketa, helpem famili for stap gud, and helpem pipol for garem gudfala living.

◼ Olketa buk wea olketa printim and givimaot hem stap long winim 500 languis. Long samfala languis hia, pipol long datfala ples no garem eni nara buk long languis bilong olketa seleva. Olketa no markem price for olketa buk hia.

◼ Olketa garem skul wea helpem man for savve hao for tok front long staka pipol. Disfala skul helpem staka million pipol for story long gudfala wei.

◼ Olketa garem read-and-raet class wea helpem staka thousand pipol evriwea long world for savve hao for read and raet.

◼ Olketa garem winim 400 Regional Building Komiti evriwea long world for lanem pipol for savve hao for wakem olketa building wea pipol savve kam for lane abaotem Bible. Long 10-fala year wea go pas finis, olketa wakem winim 20,000 building for prea, wea hem nao Kingdom Hall.

◼ Olketa helpem Olketa Jehovah’s Witness and nara pipol wea disaster kasem olketa evriwea long world. Long 2-fala year wea olketa big cyclone spoelem samfala ples long America, olketa Witness wakem bak winim 90 Kingdom Hall and 5,500 haos.

[Piksa long page 23]

Taem pipol forcem Jesus for joinim politik, hem go bak seleva ‘long maunten’