No Givim Eni Chance Long Devil

“No givim eni chance long Devil.”—EPHESIANS 4:27.

1. Why nao plande pipol no sure sapos Devil hem really stap?

FOR plande handred year, pipol tingse Devil hem garem olketa horn, leg olsem buluka, werem red kaleko, and iusim bigfala fork for torowem pipol insaed long hellfire. Disfala idea no kam from Bible. Bat for sure, olketa rong idea olsem mekem plande million pipol daotem sapos Devil hem really stap or mekem olketa tingse datfala word Devil minim wicked fasin nomoa.

2. Wanem nao olketa tru samting wea Bible talem abaotem Devil?

² Insaed Bible hem garem kliafala pruv hao Devil hem stap. Jesus Christ lukim hem long heven and story witim hem long earth. (Job 1:6; Matthew 4:4-11) Nomata Bible no talem wanem nao nem bilong disfala spirit creature long firstaem, olketa scripture kolem hem Devil (wea minim “Man wea laea for spoelem narawan”), from hem laea abaotem God. Hem garem tu datfala nem Satan (wea minim “Man for againstim narawan”), from hem againstim Jehovah. Bible kolem Satan “datfala snek bilong bifor kam,” from hem iusim wanfala snek for giamanim Eve. (Revelation 12:9; 1 Timothy 2:14) And tu, Bible kolem hem “datfala wicked wan.”—Matthew 6:13.a

3. Wanem kwestin nao bae iumi story abaotem?

³ Iumi olketa servant bilong Jehovah no laek for followim eni wei bilong Satan, datfala main enemy bilong tru God. Dastawe iumi mas followim datfala kaonsel bilong aposol Paul for “no givim eni chance long Devil.” (Ephesians 4:27) So wanem nao samfala fasin bilong Satan wea iumi mas no followim?

No Followim Wei Bilong Main Wan wea Laea for Spoelem God

4. Wanem laea samting nao “datfala wicked wan” talem wea barava spoelem God?

⁴ Hem fitim for Bible kolem “datfala wicked wan” Devil, from hem man wea talem laea samting for spoelem narawan. Man wea duim diswan hem spoelem nem bilong narawan long wei for talem samting abaotem hem wea no tru and wea barava daonem hem. God givim disfala komand long Adam: “Iu mas no kaikai from datfala tree bilong savve long gud and nogud samting, bikos long day wea iu kaikaim bae iu dae.” (Genesis 2:17) Eve tu hem savve long diswan, bat thru long wanfala snek, Devil sei long hem: “Iu bae nating dae. From God hem savve hao long day wea iu kaikai from hem, eye bilong iu bae open and iu bae kamap olsem God, long wei for savve long gud samting and nogud samting.” (Genesis 3:4, 5) Datwan barava nogud laea toktok for spoelem Jehovah God!

5. Why nao hem fitim for Diotrephes mas ansa for wei wea hem talem laea toktok for spoelem aposol John?

⁵ God givim disfala komand long olketa Israelite: “Iu mas no gogo raon midolwan long pipol bilong iu and spoelem olketa long wei for laea abaotem olketa.” (Leviticus 19:16) Aposol John hem story olsem abaotem man wea garem datkaen fasin long taem bilong hem: “Mi raetem samfala toktok for kongregeson, bat Diotrephes, wea hem laek for apim hemseleva winim olketa narawan evritaem, hem nating respectim eni samting wea mifala talem. Dastawe, sapos mi kam, bae mi talemaot olketa samting wea hem duim, olsem wei wea hem komplen, and tok nogud abaotem mifala.” (3 John 9, 10) Diotrephes hem talem laea toktok for spoelem John and fitim hem for mas ansa for datwan. Olketa Christian wea loyal bae no laek for olsem Diotrephes wea followim Satan, datfala main wan wea laea for spoelem God.

6, 7. Why nao iumi no laek for laea for spoelem eniwan?

⁶ Plande taem pipol talem laea toktok for accusim or spoelem olketa servant bilong Jehovah. “Olketa chief priest and scribe gohed for standap and barava accusim [Jesus].” (Luke 23:10) Hae Priest Ananias and samfala narawan talem laea toktok for accusim Paul. (Acts 24:1-8) And Bible kolem Satan “datwan wea accusim olketa brata bilong iumi, wea accusim olketa day and naet front long God bilong iumi.” (Revelation 12:10) Olketa brata hia wea Satan talem laea toktok for accusim olketa, hem nao olketa anointed Christian long earth long olketa last day distaem.

⁷ No eni Christian laek for talem laea toktok for accusim or spoelem eniwan. Nomata olsem, datwan savve happen sapos iumi accusim narawan bat iumi no garem full information. Long Law bilong Moses, man wea min for talem laea toktok for accusim narawan savve kasem panis for dae. (Exodus 20:16; Deuteronomy 19:15-19) And tu, wanfala long olketa samting wea Jehovah barava heitim hem “giaman witness wea talemaot olketa laea.” (Proverbs 6:16-19) Dastawe, iumi no laek for followim wei bilong datfala main wan wea laea for spoelem and accusim narawan.

Rejectim Olketa Wei Bilong Firstfala Man for Killim Dae Man

8. Hao nao Devil hem “man for killim dae man from taem wea hem first start”?

⁸ Devil hem man for killim dae man. Jesus talem hao Devil ‘hem man for killim dae man from taem wea hem first start.’ (John 8:44) Start from taem wea hem mekem Adam and Eve lusim God, Satan hem man for killim dae man. Hem nao kosim dae bilong firstfala man and woman and evri pikinini bilong olketa. (Romans 5:12) From diswan iumi luksavve hao hem no stret for pipol sei Devil hem wicked fasin nomoa and no wanfala man, bikos wanfala fasin no savve killim dae man.

9. Olsem 1 John 3:15 hem storyim, hao nao iumi savve kamap olketa man wea killim dae man?

⁹ Wanfala long Ten Komandment wea God givim Israel hem sei: “Iu mas no killim man dae.” (Deuteronomy 5:17) Aposol Peter hem raet olsem long olketa Christian: “Nogud eniwan long iufala safa from hem man wea min for killim dae samwan.” (1 Peter 4:15) So iumi olketa servant bilong Jehovah bae no killim dae eniwan. Nomata olsem, bae iumi guilty front long God sapos iumi heitim Christian brata or sista bilong iumi and laekem for hem mas dae. Aposol John hem raet: “Eniwan wea heitim brata bilong hem, hem man for killim dae man, and iufala savve hao man for killim dae man no garem laef olowe.” (1 John 3:15) God komandim olketa Israelite: “Iu mas no heitim brata bilong iu insaed heart bilong iu.” (Leviticus 19:17) Iumi mas kwiktaem stretem eni problem midolwan long iumi and narafala brata or sista, mekem Satan, wea hem man for killim dae man, no spoelem wei wea iumi olketa Christian garem wan mind.—Luke 17:3, 4.

Stand Strong Againstim Main Man for Laea

10, 11. Wanem nao iumi mas duim for stand strong againstim datfala main man for laea, Satan?

¹⁰ Devil hem man for laea. Jesus hem sei: “Taem hem laea, hem tok followim fasin bilong hem, from hem man for tok laea and dadi bilong laea fasin.” (John 8:44) Satan hem laea long Eve, bat Jesus kam long world for witness abaotem truth. (John 18:37) For stand strong againstim Devil olsem olketa follower bilong Christ, iumi kanduit giamanim and laea long pipol. Iumi mas “tok tru.” (Zechariah 8:16; Ephesians 4:25) “Jehovah, God bilong truth” hem blessim nomoa olketa Witness bilong hem wea tok tru. Olketa wea wicked no garem right for stand for hem.—Psalm 31:5; 50:16; Isaiah 43:10.

¹¹ Sapos iumi tinghae long wei wea iumi savve long truth from Bible wea mekem iumi free from olketa laea bilong Satan, bae iumi hol strong long Christian Wei, wea hem nao “wei bilong truth.” (2 Peter 2:2; John 8:32) Full Christian teaching hem “truth bilong gud nius.” (Galatians 2:5, 14) Salvation bilong iumi hem depend long wei wea iumi “wakabaot long truth”—wea minim iumi followim datwan and stand strong againstim “dadi bilong laea fasin.”—3 John 3, 4, 8.

Againstim Datfala Main Wan wea Apostate

12, 13. Hao nao iumi shud deal witim olketa apostate?

¹² Long start, datfala spirit creature wea kamap Devil hem insaed long truth. Bat Jesus talem hao “hem no hol strong long truth, from truth no stap long hem.” (John 8:44) Disfala main wan wea apostate hem nating givap for againstim “God bilong truth.” Luk olsem samfala Christian long first-century foldaon long “trap bilong Devil,” and lusim truth from olketa letem hem for leadim olketa go difren. So Paul encouragem Timothy, wea waka tugeta witim hem, for teachim olketa witim kwaet fasin, mekem olketa kamap gud moa long spiritual wei and kamaot from trap bilong Satan. (2 Timothy 2:23-26) Bat, hem moabeta for barava hol strong long truth firstaem and no foldaon long trap bilong olketa apostate.

¹³ From firstfala man and woman lisin long Devil and no rejectim olketa laea bilong hem, olketa kamap olketa apostate. So, waswe, fitim for iumi lisin long olketa apostate, readim literature bilong olketa, or lukluk long video or olketa Web site bilong olketa long Internet? Sapos iumi lovem God and truth, bae iumi no duim datwan. Iumi shud no letem olketa apostate kam long haos bilong iumi or talem hello long olketa, from sapos iumi duim olsem iumi ‘share long wicked fasin bilong olketa.’ (2 John 9-11) Iumi no laekem Devil for trikim iumi and mekem iumi lusim Christian “road bilong truth” for followim olketa false teacher wea trae for “tekem kam olketa teaching wea spoelem man” and wea trae for ‘iusim olketa kleva toktok for spoelem iumi.’—2 Peter 2:1-3, Byington.

14, 15. Paul givim wanem warning long Timothy and olketa elder from Ephesus?

¹⁴ Paul talem olketa Christian elder from Ephesus: “Lukluk gud long iufala seleva and long evri sheep, from holy spirit appointim iufala olsem olketa overseer, for shepherdim kongregeson bilong God, wea hem baem witim blood bilong Son bilong hem. Mi savve hao bihaen mi go olketa raf wild dog bae kam midolwan long iufala and bae no deal witim olketa sheep long kaenfala wei, and from midolwan long iufala samfala man bae stap wea talem olketa laea samting for pullim olketa disaepol for followim olketa.” (Acts 20:28-30) Gogo, hem nao samting wea happen. Olketa apostate kamap wea “talem olketa laea samting.”

¹⁵ Long samting olsem 65 C.E., aposol Paul encouragem Timothy for “iusim word bilong truth long stretfala wei.” And hem raet: “Bat stap klia long olketa rabis toktok wea spoelem holy samting; bikos olketa bae gohed for kamap moa worse long wei wea olketa no followim God, and toktok bilong olketa bae spred olsem gangrene (soa wea rotten and savve spoelem full body). Hymenaeus and Philetus nao pipol olsem. Olketa man hia lusim truth, and sei resurrection hem happen finis and olketa spoelem faith bilong samfala.” Wei for apostate start nao! Paul hem sei: “Nomata olsem, strongfala faondeson bilong God (truth from Bible) hem stap yet.”—2 Timothy 2:15-19.

16. Nomata datfala first apostate iusim enikaen kleva trik, wanem nao helpem iumi for gohed loyal long God and Word bilong hem?

¹⁶ Plande taem Satan iusim olketa apostate for trae spoelem tru worship—bat hem fail. Long samting olsem 1868, Charles Taze Russell start for lukluk gud long olketa teaching wea olketa Christian church acceptim for longtaem finis and hem lukim hao olketa minim rong Bible. Russell and tu-thri narawan wea lukaotem truth startim wanfala Bible study class long Pittsburgh, Pennsylvania, U.S.A. Insaed samting olsem 140 year bihaen long datwan, olketa servant bilong Jehovah gohed for kasem moa savve and love for God and Word bilong hem. Nomata datfala first apostate iusim enikaen kleva trik, wei wea datfala faithful and wise slave gohed for lukaot long spiritual wei hem helpem olketa tru Christian hia for gohed loyal long Jehovah and Word bilong hem.—Matthew 24:45

No Letem Ruler Bilong World Kontrolem Iu

17-19. Wanem nao world wea stap anda long paoa bilong Devil, and why nao iumi mas no lovem datwan?

¹⁷ Nara wei wea Satan hem trae for trapim iumi hem for switim iumi for lovem disfala world, wea hem nao olketa man wea no raeteous and wea no followim God. Jesus kolem Devil “ruler bilong disfala world” and hem sei: “Hem no garem eni paoa ovarem mi.” (John 14:30) Iumi mas no letem Satan kasholem iumi! Bat, iumi luksavve hao “full world hem stap anda long paoa bilong [datfala] wicked wan.” (1 John 5:19) Dastawe Devil savve offerim long Jesus “evri kingdom bilong world” sapos hem baodaon and worshipim hem wantaem nomoa, wea datwan nao hem samting wea Son bilong God barava rejectim. (Matthew 4:8-10) Disfala world wea Satan rulim barava heitim olketa follower bilong Christ. (John 15:18-21) Dastawe aposol John warnim iumi for no lovem disfala world!

¹⁸ John hem raet olsem: “No lovem world or olketa samting insaed long world. Sapos eniwan lovem world, hem no lovem Father; bikos evri samting long world⁠—samting wea body wantem and samting wea eye wantem and wei for show-off witim samting wea man garem—hem no kam from Father, bat hem kam from world. And tu, world and evri samting wea pipol long world laekem hem gogo for finis, bat man wea duim will bilong God bae stap for olowe.” (1 John 2:15-17) Iumi mas no lovem disfala world, from evri samting long world hem for switim body wea garem sin and hem difren evribit from olketa standard bilong Jehovah God.

¹⁹ Waswe sapos love for disfala world hem stap long heart bilong iumi? Sapos olsem, iumi mas prea for God helpem iumi aotem disfala feeling for lovem world wea insaed long diswan hem olketa samting wea body laekem. (Galatians 5:16-21) Sapos iumi evritaem tingim hao “olketa wicked spirit” nao olketa “ruler” ovarem olketa man wea no raeteous, bae iumi trae hard for “stap klin from world.”—James 1:27; Ephesians 6:11, 12; 2 Corinthians 4:4.

20. Why nao iumi fit for sei iumi “no part bilong world”?

²⁰ Jesus sei olsem abaotem olketa disaepol bilong hem: “Olketa no part bilong world, olsem mi tu no part bilong world.” (John 17:16) Olketa anointed Christian and fren bilong olketa wea dedicate long Jehovah trae hard for stap klin long spiritual saed and saed long fasin, and stap separate from disfala world. (John 15:19; 17:14; James 4:4) From iumi “preach abaotem raeteous fasin” and stap separate from disfala world wea no raeteous, world hem heitim iumi. (2 Peter 2:5) Hem tru, iumi mas stap midolwan long pipol wea samfala long olketa duim fornication, adultery, forcem man for givim selen, worshipim olketa idol, steal, laea, and savve drunk. (1 Corinthians 5:9-11; 6:9-11; Revelation 21:8) Bat iumi no letem “spirit bilong world” for affectim iumi, from disfala paoa wea muvim pipol for duim sin hem no kontrolem iumi.—1 Corinthians 2:12.

No Givim Eni Chance Long Devil

21, 22. Hao nao iu savve followim kaonsel bilong Paul long Ephesians 4:26, 27?

²¹ Samting wea muvim iumi nao, hem no spirit bilong world, bat hem spirit bilong God wea helpem iumi for garem olketa fasin olsem love and fasin for kontrolem seleva. (Galatians 5:22, 23) Olketa fasin hia helpem iumi for againstim eni wei wea Devil attakim faith bilong iumi. Hem laekem iumi for ‘kamap hot witim kros, gogo iumi duim nogud samting,’ bat spirit bilong God helpem iumi for “let go long kros and lusim bigfala kros.” (Psalm 37:8) Hem tru, maet samfala taem iumi garem gudfala reason for kros, bat Paul kaonselem iumi olsem: “Iufala savve kros, bat no sin; no letem sun go daon taem iufala kros yet, and no givim eni chance long Devil.”—Ephesians 4:26, 27.

²² Sapos iumi gohed for kros, datwan savve lead go long sin. Sapos iumi gohed kros olsem, datwan savve givim chance long Devil for spoelem wan mind long kongregeson or maet mekem iumi duim olketa wicked samting. Dastawe, iumi mas kwiktaem stretem olketa problem wea iumi garem witim narawan long wei wea God bae hapi long hem. (Leviticus 19:17, 18; Matthew 5:23, 24; 18:15, 16) So iumi letem spirit bilong God leadim iumi, showimaot fasin for kontrolem seleva, and nomata maet iumi garem gudfala reason for kros, no letem datwan kamap worse and mekem iumi barava feel nogud, or laek spoelem or heitim narawan.

23. Wanem nao olketa kwestin wea iumi bae story raonem long next article?

²³ Iumi storyim samfala fasin bilong Devil wea iumi mas no followim. Bat maet samfala wea readim diswan laek for savve: Waswe, iumi shud fraetem Satan? Why nao hem persecutim olketa Christian? And wanem nao iumi savve duim for mek sure Devil bae no win ovarem iumi?

[Footnotes]

Wanem Nao Ansa Bilong Iu?

• Why nao iumi shud stap klia long wei for talem laea samting for spoelem narawan?

• Olsem 1 John 3:15 storyim, hao nao iumi savve mek sure iumi no kamap man for killim dae man?

• Hao nao iumi shud ting long olketa apostate, and why nao olsem?

• Why nao iumi shud no lovem world?

[Piksa long page 9]

Iumi bae nating letem Devil spoelem wei wea iumi olketa Christian garem wan mind

[Piksa long page 10]

Why nao John encouragem iumi for no lovem world?