Againstim Satan, and Bae Hem Ranawe!
“Stap anda long God; bat againstim Devil, and hem bae ranawe from iufala.”—JAMES 4:7.
1, 2. (a) Isaiah chapter 14 hem storyim wanem fasin bilong Devil? (b) Wanem nao olketa kwestin wea iumi bae story raonem?
DEVIL hem barava bighed winim eni narawan. Profet bilong God, Isaiah, raetem wanfala toktok wea showimaot klia bighed fasin bilong Devil. Winim 100 year bifor Babylonia hem kamap world paoa, hem olsem pipol bilong Jehovah talem disfala toktok againstim “king bilong Babylon”: “Iu sei olsem insaed heart bilong iu, ‘Bae mi go ap kasem skae. Bae mi liftimap throne bilong mi winim olketa star bilong God [olketa king long royal laen bilong David] . . . Mi bae mekem miseleva olsem Most Hae.’” (Isaiah 14:3, 4, 12-15; Numbers 24:17) Praodfala fasin bilong “king bilong Babylon” hem olsem fasin bilong Satan, “god bilong disfala world.” (2 Corinthians 4:4) Bat Satan and bighed fasin bilong hem bae finis, olsem rul bilong Babylon finis long wei wea hem kasem shame.
2 Bat taem Devil hem stap yet, maet iumi laek for savve: Waswe, iumi shud fraetem Satan? Why nao hem muvim pipol for persecutim olketa Christian? And wanem nao iumi savve duim for mek sure Devil bae no win ovarem iumi?
Waswe, Iumi Shud Fraetem Devil?
3, 4. Why nao olketa anointed Christian and fren bilong olketa no fraetem Devil?
3 Disfala toktok bilong Jesus Christ hem barava strongim olketa anointed Christian: “No fraet long olketa samting wea bae kasem iu. Devil bae gohed for putim samfala long iufala insaed prison for mekem iufala kasem test evribit, and mekem iufala kasem trabol for tenfala day. Showimaot iu faithful nomata sapos iu mas dae, and mi bae givim iu crown bilong laef.” (Revelation 2:10) Olketa anointed wan and olketa fren bilong olketa wea hope for stap olowe long earth no fraetem Devil from olketa fraet long God and ‘stap sef long shadow bilong wing bilong hem.’—Psalm 34:9; 36:7.
4 Olketa first disaepol bilong Jesus Christ gohed faithful nomata olketa safa and dae. Olketa no fraetem samting wea Satan savve duim, from olketa savve Jehovah bae nating lusim olketa wea loyal long Hem. Olsem tu, nomata olketa Christian and fren bilong olketa feisim strongfala persecution distaem, olketa disaed strong for gohed loyal long God. Nomata olsem, Paul talem hao Devil savve mekem man for dae. Waswe, datwan shud mekem iumi fraet?
5. Wanem nao iumi lanem from Hebrews 2:14, 15?
5 Paul talem hao Jesus tu kamap man wea garem blood and body mekem “thru long dae bilong hem, hem savve finisim datwan wea garem paoa for mekem man dae, hem nao Devil; and hem savve mekem free evriwan wea kamap slave for full laef bilong olketa from olketa fraet long dae.” (Hebrews 2:14, 15) From Satan hem “datwan wea garem paoa for mekem man dae,” hem kontrolem Judas Iscariot and then iusim olketa bigman bilong olketa Jew and bilong Rome for killim dae Jesus. (Luke 22:3; John 13:26, 27) Bat, from hem dae olsem wanfala sakrifaes, Jesus savve mekem olketa man kamap free from wei wea Satan kontrolem olketa, and mekem wei for iumi kasem laef olowe.—John 3:16.
6, 7. Haomas paoa nao Satan garem for mekem man dae?
6 Haomas paoa nao Devil garem for mekem man dae? From taem wea hem start for duim olketa wicked samting, olketa laea bilong hem and wei wea hem leadim olketa man go rong, kosim olketa man for dae. Diswan hem olsem bikos Adam hem sin and hem pasim sin and dae go long evri man. (Romans 5:12) And tu, olketa servant bilong Satan long earth persecutim olketa wea worshipim Jehovah, and samfala taem olketa killim olketa dae, olsem olketa duim long Jesus Christ.
7 Nomata olsem, iumi shud no tingse Devil savve killim dae eniwan wea hem chusim. God protectim olketa wea bilong Hem and bae hem nating letem Satan finisim evribit olketa worshiper bilong hem long earth. (Romans 14:8) Hem tru, Jehovah letem pipol bilong hem kasem persecution and hem letem samfala long iumi for dae from samting wea Devil hem duim. Nomata olsem, Bible storyim nambawan hope bilong resurrection for olketa wea stap long ‘buk wea God garem for rememberim olketa’—and Devil no savve duim eni samting for stopem olketa for laef bak!—Malachi 3:16; John 5:28, 29; Acts 24:15.
Why Nao Satan Persecutim Iumi?
8. Why nao Devil persecutim olketa servant bilong God?
8 Sapos iumi olketa loyal servant bilong God, wanfala main reason hem stap why Devil hem persecutim iumi. Hem garem goal for mekem iumi no faithful. Satan hem laek for spoelem spesol wei wea iumi fren witim Dadi bilong iumi long heven. Iumi shud no sapraes long diswan. Long Eden, Jehovah talem profesi hao fasin for heit bae kamap midolwan long tokpiksa “woman” bilong hem and datfala “snek” and midolwan long olketa “seed” bilong tufala hia. (Genesis 3:14, 15) Bible showimaot hao Devil nao datfala “snek bilong bifor kam” and talemaot tu hao hem garem shortfala taem nomoa and hem barava kros. (Revelation 12:9, 12) Taem disfala fasin for heit hem gohed midolwan long tufala “seed” hia, olketa wea faithful for servem Jehovah savve expectim persecution. (2 Timothy 3:12) Waswe, iu savve long main reason why Satan persecutim iumi?
9, 10. Devil hem kwestinim wanem samting, and hao nao datwan join witim fasin bilong olketa man?
9 Devil kwestinim sapos God garem right for olsem sovereign ruler bilong universe. Hem kwestinim tu sapos olketa man bae faithful long Creator bilong olketa. Satan hem persecutim datfala gud man Job. Why nao olsem? Hem laek for mekem Job no faithful long Jehovah. Waef bilong Job and thrifala ‘man wea shud givim comfort bat wea mekem Job feel nogud’ olketa fitim plan bilong Devil long datfala taem. Olsem buk bilong Job showimaot, Devil sei no eniwan bae gohed faithful long God sapos God letem Satan testim olketa. Bat Job keepim faithful fasin bilong hem and pruvim hao Satan hem man for laea. (Job 1:8–2:9; 16:2; 27:5; 31:6) Distaem, Devil persecutim olketa Witness bilong Jehovah for trae mekem olketa no faithful and for trae pruvim hao samting hem talem hem tru.
10 Wei for savve hao Devil nao bihaenem persecution wea iumi kasem from hem laek for mekem iumi no faithful long God savve helpem iumi for no fraet and kamap strong. (Deuteronomy 31:6) God bilong iumi nao Sovereign bilong Universe, and hem bae helpem iumi for gohed faithful. Iumi laek for evritaem mekem heart bilong Jehovah hapi long wei for gohed faithful, mekem hem savve givim ansa long datwan wea tok daonem hem, Satan.—Proverbs 27:11.
“Sevem Mifala From Datfala Wicked Wan”
11. Wanem nao mining bilong datfala toktok, “No mekem mifala kasem temptation”?
11 Hem no isi samting for gohed faithful. For duim diswan iumi need for prea strong. Samting wea barava helpem iumi nao hem datfala example prea. Long wanfala part bilong datfala prea, Jesus hem sei: “No mekem mifala kasem temptation, bat sevem mifala from datfala wicked wan.” (Matthew 6:13) Jehovah no putim temptation for mekem iumi sin. (James 1:13) Nomata olsem, samfala taem olketa scripture long Bible sei hem duim or kosim samting, bat really, diswan minim hem letem nomoa olketa samting hia for happen. (Ruth 1:20, 21) So taem iumi prea for Jehovah no mekem iumi kasem temptation, hem minim iumi askem hem for no letem iumi for foldaon long datwan. And bae hem herem iumi, from iumi garem disfala promis from Bible: “God hem faithful, and hem bae no letem eni temptation kasem iufala wea iufala no fit for winim, bat witim datfala temptation hem bae mekem wei for iufala savve gohed and no givap.”—1 Corinthians 10:13.
12. Why nao iumi prea for God ‘sevem iumi from datfala wicked wan’?
12 Bihaen hem storyim temptation long datfala example prea, Jesus hem sei: “Sevem mifala from datfala wicked wan.” Samfala Bible transleison sei: “Sevem mifala from wicked fasin” (King James Version; Revised Standard Version) or “Protectim mifala from wicked fasin.” (Contemporary English Version) Bat, long Bible, datfala toktok ‘sevem from’ hem saed long pipol nomoa, and Gospel bilong Matthew talem hao Devil nao “datfala man for testim man.” (Matthew 4:3, 11) So hem important for iumi prea for God sevem iumi from “datfala wicked wan,” Satan. Hem trae for mekem iumi sin againstim God. (1 Thessalonians 3:5) Taem iumi prea long Dadi bilong iumi long heven for ‘sevem iumi from datfala wicked wan,’ iumi askem hem for leadim and helpem iumi, mekem Devil hem no win ovarem iumi.
No Letem Devil Win Ovarem Iu
13, 14. Why nao olketa long Corinth need for changem wei wea olketa deal witim wanfala man long kongregeson wea duim dirty fasin?
13 Taem Paul encouragem olketa Christian long Corinth for forgivim narawan, hem sei: “Eni samting wea iufala kaen tumas for forgivim long eniwan, mi duim olsem tu. Tru nao, for saed bilong mi, sapos mi kaen for forgivim eni samting, hem for saed bilong iufala front long eye bilong Christ; mekem Satan hem no win ovarem iumi, from iumi savve long olketa trik bilong hem.” (2 Corinthians 2:10, 11) Devil savve win ovarem iumi long plande difren wei, bat why nao Paul talem datfala toktok?
14 Paul hem kaonselem olketa long Corinth from olketa letem wanfala man wea duim dirty fasin for stap insaed long kongregeson. Masbi Satan barava hapi long diswan, bikos pipol ting daonem kongregeson from wei wea olketa acceptim kaen fornication wea ‘nomata pipol bilong olketa nation, bat no duim tu.’ Gogo, datfala man hem disfellowship. (1 Corinthians 5:1-5, 11-13) Bihaen, hem repent. Sapos olketa long Corinth nating willing for forgivim datfala man and acceptim hem moa, Devil bae win ovarem olketa long nara wei moa. Hao nao olsem? Olketa bae no showimaot mercy and no kaen, olsem Satan. Sapos datfala man wea repent hem “wikdaon from hem sorre tumas” and hem barava stop for worshipim God, olketa elder nao main wan wea mas ansa for diswan front long God wea showimaot mercy, Jehovah. (2 Corinthians 2:7; James 2:13; 3:1) Tru nao, olketa tru Christian barava no laek for followim Satan long wei for no showimaot mercy and no kaen.
Kasem Protection From Kaleko for Faet From God
15. Wanem faet nao iumi insaed long hem, and wanem nao iumi mas duim for win?
15 For kasem protection from Devil, iumi mas faetem wanfala spiritual faet againstim olketa wicked spirit. For win againstim olketa hia wea barava strong, iumi mas werem “full kaleko for faet wea kam from God.” (Ephesians 6:11-18) Part long disfala kaleko hem datfala “chest kava bilong raeteous fasin.” (Ephesians 6:14) King Saul bilong Israel bifor hem no obey and God aotem holy spirit from hem. (1 Samuel 15:22, 23) Bat sapos iumi duim olketa samting wea raeteous and werem full kaleko for faet, bae iumi garem holy spirit bilong God and protection wea iumi needim againstim Satan and olketa wicked angel bilong hem, olketa demon.—Proverbs 18:10.
16. Hao nao iumi savve gohed for kasem protection againstim olketa wicked spirit?
16 For gohed kasem protection againstim olketa wicked spirit, samfala important samting iumi need for duim nao, hem for evritaem readim and studyim Word bilong God, and iusim gud olketa pablikeson wea iumi kasem thru long “datfala faithful wakman.” (Luke 12:42) Long wei olsem iumi fulimap mind bilong iumi witim olketa gudfala spiritual samting, fitim kaonsel bilong Paul wea sei: “Olketa brata, evri samting wea tru, evri samting wea important, evri samting wea raeteous, evri samting wea klin, evri samting wea iumi fit for lovem, evri samting wea pipol tok gud abaotem, evri gud samting and evri samting wea fit for kasem praise, gohed for tingim evri samting hia.”—Philippians 4:8.
17. Wanem nao bae helpem iumi for talemaot gud nius long gudfala wei?
17 Jehovah provaedem samting iumi needim mekem iumi “werem shoe bilong gud nius bilong peace.” (Ephesians 6:15) For evritaem tekpart long olketa Christian meeting hem redyim iumi for talemaot gud nius bilong Kingdom bilong God. Iumi kasem bigfala hapi taem iumi helpem olketa narawan for lanem truth bilong God and kamap free long spiritual wei! (John 8:32) Iumi mas garem datfala “sword bilong spirit, wea hem nao, Word bilong God,” for protectim iumiseleva from olketa false teaching and for “aotem olketa strongfala biliv.” (Ephesians 6:17; 2 Corinthians 10:4, 5) For iusim Word bilong God, Bible, long gudfala wei hem helpem iumi for teachim truth and hem protectim iumi mekem iumi no foldaon long olketa trik bilong Devil.
18. Hao nao iumi savve “stand strong againstim evri trik bilong Devil”?
18 Taem Paul startim story bilong hem abaotem spiritual kaleko bilong iumi for faet, hem sei: “Gohed for kasem strong from Lord and from bigfala strong bilong hem. Werem full kaleko for faet wea kam from God mekem iufala savve stand strong againstim evri trik bilong Devil.” (Ephesians 6:10, 11) Datfala Greek word wea iumi transleitim “stand strong” hem join witim wei wea wanfala soldia hem gohed for faet and no ranawe. Iumi stand strong long disfala spiritual faet, nomata Satan iusim olketa difren kaen kleva trik for trae spoelem olketa teaching bilong iumi, wei wea iumi garem wan mind, or for mekem iumi no faithful long God. Bat kam kasem distaem olketa attak bilong Devil no win—and bae olketa nating win long future!a
Againstim Devil, and Hem Bae Ranawe
19. Wanem nao wanfala wei wea iumi savve barava againstim Devil?
19 Iumi savve win long spiritual faet bilong iumi againstim Devil and olketa wicked spirit wea followim lead bilong hem. Iumi no need for fraetem Satan, from disaepol James hem raet olsem: “Stap anda long God; bat againstim Devil, and hem bae ranawe from iufala.” (James 4:7) Wanfala wei for barava againstim Satan and olketa wicked spirit wea waka tugeta witim hem, hem for stap klia evribit from eni samting saed long spiritism or magic and olketa wea duim kaen samting olsem. Bible showimaot klia hao olketa servant bilong Jehovah mas no lukaotem olketa saen or studyim olketa star for savve long future, or duim divination and spiritism. Sapos iumi busy long olketa Christian waka and strong long spiritual wei, iumi no need for fraet nogud samwan mekem kastom long iumi.—Numbers 23:23; Deuteronomy 18:10-12; Isaiah 47:12-15; Acts 19:18-20.
20. Hao nao iumi savve againstim Devil?
20 Iumi “againstim Devil” taem iumi followim olketa Bible standard and truth and taem iumi stand strong againstim hem. World hem wan mind witim Satan bikos hem nao god bilong olketa. (2 Corinthians 4:4) Dastawe iumi rejectim fasin bilong disfala world, olsem fasin for praod, selfish, raf, dirty fasin, and wei for lovem tumas material samting. Iumi savve hao taem Jesus iusim olketa scripture for againstim attak bilong Devil long wilderness, Devil hem ranawe from hem. (Matthew 4:4, 7, 10, 11) Satan bae ‘ranawe from iumi’ tu sapos iumi barava stap anda long Jehovah and depend long Hem thru long prea. (Ephesians 6:18) From iumi garem sapot bilong Jehovah God and Son wea hem barava lovem, no eniwan savve spoelem iumi for olowe—nomata Devil tu!—Psalm 91:9-11.
[Footnotes]
a For moa information abaotem datfala spiritual kaleko for faet wea kam from God, lukim The Watchtower, May 15, 1992, page 21-3.
Wanem Nao Ansa Bilong Iu?
• Waswe, iumi shud fraetem Devil?
• Why nao Satan persecutim olketa Christian?
• Why nao iumi prea for God sevem iumi from “datfala wicked wan”?
• Hao nao iumi savve win long spiritual faet wea iumi insaed long hem?
[Piksa long page 12]
Olketa first follower bilong Christ no fraet and gohed faithful go kasem dae
[Piksa long page 13]
Devil no savve duim eni samting for stopem resurrection bilong olketa wea Jehovah rememberim
[Piksa long page 14]
Waswe, iu prea for God sevem iu from “datfala wicked wan”?
[Piksa long page 15]
Waswe, iu werem “full kaleko for faet wea kam from God”?