Kasem Gud Samting From Olketa Priest wea Rul Olsem King
“Iufala ‘pipol wea God chusim and olketa priest wea rul olsem king. Iufala wanfala holy nation and spesol pipol bilong God.’”—1 PET. 2:9.
1. Why nao nara nem bilong “evening kaikai bilong Lord” hem Memorial, and why nao iumi celebratem?
LONG evening long Nisan 14, 33 C.E., hem nao lastfala taem wea Jesus Christ and 12 aposol celebratem Pasova. Bihaen Judas Iscariot go aot, Jesus startim wanfala niu celebration. Bible storyim datwan hem “evening kaikai bilong Lord.” (1 Cor. 11:20 footnote) Nara nem for datwan hem Memorial. Tufala taem nao Jesus sei: “Gohed for duim diswan for showimaot iufala rememberim mi.” Datwan hem wanfala spesol celebration bikos hem helpem iumi for tingim wanem Christ duim and dae bilong hem. (1 Cor. 11:24, 25) Olketa Jehovah’s Witness obeyim wanem Jesus talem and celebratem Memorial evri year. Long 2012, Nisan 14 hem start taem sun go daon long Thursday, April 5 followim kalenda bilong olketa Jew.
2. Wanem nao Jesus talem abaotem bred and wine?
2 Luke storyim wanem Jesus duim taem hem startim datfala celebration. Hem sei: “Jesus tekem tu wanfala bred. Hem prea, then hem brekem datfala bred and hem givim long olketa and sei: ‘Diswan hem piksarem body bilong mi wea mi bae givim for iufala. Gohed for duim diswan for showimaot iufala rememberim mi.’ Bihaen olketa kaikai finis, Jesus tekem datfala kap wine. Hem givim long olketa and hem sei: ‘Diswan hem piksarem datfala niu agreement wea bae hem start taem mi pourimaot blood bilong mi for iufala.’” (Luke 22:19, 20) Samting wea Jesus talem mekem olketa aposol for tingim wanem?
3. Taem Jesus story abaotem bred and wine, olketa aposol luksavve long wanem?
3 Olketa aposol savve olketa priest sakrifaesim olketa animal long temple long Jerusalem. Olketa priest offerim olketa sakrifaes for Jehovah forgivim sin bilong pipol and for mekem hem hapi. (Lev. 1:4; 22:17-29) So taem Jesus sei hem bae givim body bilong hem and pourimaot blood bilong hem, olketa aposol luksavve Jesus bae sakrifaesim perfect laef bilong hem. Datfala sakrifaes hem winim olketa animal sakrifaes.
4. Wanem nao Jesus minim taem hem sei kap wine “piksarem datfala niu agreement wea bae hem start taem mi pourimaot blood bilong mi”?
4 Wanem nao Jesus minim taem hem sei kap wine hem “piksarem datfala niu agreement wea bae hem start taem mi pourimaot blood bilong mi”? Olketa aposol savve long profesi wea Jeremiah talem abaotem niu agreement. (Readim Jeremiah 31:31-33.) Samting wea Jesus talem showimaot hem mekem niu agreement witim olketa aposol long datfala taem. Niu agreement hia changem Law agreement wea Jehovah mekem witim olketa Israelite thru long Moses. Waswe, tufala agreement hia join tugeta?
5. Wanem hope nao Law agreement mekem olketa Israelite for garem?
5 Tru tumas, tufala agreement hia join tugeta. Taem Jehovah mekem Law agreement witim olketa Israelite, hem sei: “Sapos iufala barava obeyim mi and keepim agreement wea mi mekem witim iufala, iufala nomoa bae spesol pipol bilong mi bikos full earth hem bilong mi. And iufala bae kamap wanfala kingdom bilong olketa priest and wanfala holy nation bilong mi. Toktok hia nao iu mas talem long olketa son bilong Israel.” (Ex. 19:5, 6) Long wanem wei nao olketa Israelite minim datfala toktok?
PROMIS ABAOTEM “OLKETA PRIEST WEA RUL OLSEM KING”
6. Jehovah mekem Law agreement bikos long wanem promis?
6 Olketa Israelite minim datfala toktok “agreement” bikos Jehovah mekem agreement bifor tu witim Noah and Abraham. (Gen. 6:18; 9:8-17; 15:18; 17:1-9) Taem Jehovah mekem agreement witim Abraham, hem sei: “Pipol long evri kantri bae kasem blessing bikos long olketa pikinini bilong iu.” (Gen. 22:18) Law agreement wea Jehovah mekem witim olketa Israelite nao lead go long wei wea datfala promis kamap tru. Datfala Law agreement nao mekem olketa Israelite garem chance for kamap ‘spesol pipol bilong God.’ Jehovah duim datwan bikos hem laekem olketa Israelite for “kamap wanfala kingdom bilong olketa priest.”
7. Wanem nao Bible minim taem hem sei “wanfala kingdom bilong olketa priest”?
7 Olketa Israelite savve long waka bilong king and priest. Bat olketa savve Melchizedek nomoa Jehovah acceptim hem for king and priest long semtaem. (Gen. 14:18) Thru long datfala Law agreement, Jehovah givim chance for olketa Israelite for “kamap wanfala kingdom bilong olketa priest.” Bible storyim tu hao olketa hia bae kamap olketa priest wea rul olsem king.—1 Pet. 2:9.
8. Wanem nao waka bilong priest?
8 Waka bilong king hem for rulim pipol. Bat wanem nao waka bilong priest? Hebrews 5:1 sei: “Datfala Law nao markem evri man for duim waka olsem hae priest. Hae priest duim waka for olketa man wea join witim worship bilong olketa, mekem hem savve givim olketa sakrifaes for sin bilong olketa.” Priest wea Jehovah markem stand for pipol front long God. Hem givim sakrifaes and askem Jehovah for forgivim sin bilong olketa. Nara samting tu, priest hem stand for Jehovah taem hem teachim law bilong God. (Lev. 10:8-11; Mal. 2:7) Taem priest duim olketa samting hia, datwan helpem pipol for fren bak witim God.
9. (a) Wanem nao olketa Israelite need for duim for kamap “wanfala kingdom bilong olketa priest”? (b) Why nao Jehovah markem samfala for priest long Israel? (c) Why nao Law agreement no savve mekem olketa Israelite for kamap “wanfala kingdom bilong olketa priest”?
9 Law agreement mekem olketa Israelite nomoa garem chance for kamap priest wea rul olsem king for mekem pipol long nara kantri kasem gud samting. Bat for olketa Israelite garem datfala chance, olketa need for duim samting. God sei: “Iufala [mas] barava obeyim mi and keepim agreement wea mi mekem witim iufala.” Waswe, olketa Israelite savve “barava obeyim” Jehovah? Ia, bat bikos olketa no perfect olketa no savve kasem olketa hae standard bilong God evritaem. (Rom. 3:19, 20) Dastawe Jehovah markem samfala man for kamap priest long Israel for givim sakrifaes for sin wea olketa Israelite duim. Olketa priest hia no waka olsem king. (Lev. 4:1–6:7) Olketa priest savve mekem sakrifaes tu for sin bilong olketa seleva. (Heb. 5:1-3; 8:3) Nomata Jehovah acceptim olketa sakrifaes hia, datwan no barava finisim sin bilong olketa Israelite. Olketa priest wea stap anda long Law agreement no savve mekem eni Israelite for fren bak witim God long perfect wei. Dastawe Paul sei: “Blood bilong olketa buluka and goat no savve finisim olketa sin.” (Heb. 10:1-4) Bikos olketa Israelite no obeyim Law, olketa bae kasem panis. (Gal. 3:10) From datwan, olketa no fit for kamap priest wea rul olsem king for evri nara pipol.
10. Why nao Jehovah givim Law agreement?
10 Waswe, hem hard nao for eni Israelite for part long “kingdom bilong olketa priest” wea Jehovah promisim? Nomoa. Olketa Israelite bae garem chance sapos olketa traem best for obeyim Jehovah. Bat olketa no savve part long datfala kingdom taem olketa stap anda long Law agreement. Why nao olsem? (Readim Galatians 3:19-25.) For minim datwan, iumi need for savve why Jehovah givim Law agreement. Law protectim olketa faithful Israelite from false worship. Datwan mekem olketa for luksavve olketa sin and needim sakrifaes wea winim olketa sakrifaes wea priest givim. Law hem “leadim” olketa go long Christ or Messiah. Tufala title hia minim “man wea God chusim.” Taem Messiah kam, hem bae startim niu agreement wea Jeremiah profesi abaotem. Olketa wea acceptim Christ bae part long niu agreement and datwan mekem olketa kamap “wanfala kingdom bilong olketa priest.” Bae iumi storyim diswan.
NIU AGREEMENT MEKEM OLKETA PRIEST WEA RUL OLSEM KING
11. Long wanem wei nao Jesus kamap faondeson for olketa priest wea rul olsem king?
11 Long 29 C.E., Jesus kamap Messiah. Hem baptaes taem hem 30 year and datwan showimaot hem willing for duim wanem Jehovah laekem. Taem Jesus baptaes, Jehovah sei: “Diswan nao Son bilong mi wea mi lovem.” Then Jehovah anointim hem witim holy spirit. (Matt. 3:13-17; Acts 10:38) God anointim Jesus for Hae Priest and for kamap King bilong evriwan wea showimaot faith long hem. (Heb. 1:8, 9; 5:5, 6) Samting wea Jesus duim savve mekem olketa narawan kamap priest wea rul olsem king.
12. Wanem nao sakrifaes bilong Jesus duim?
12 From Jesus hem Hae Priest, wanem sakrifaes nao hem savve givim wea bae mekem Jehovah forgivim evri sin bilong olketa wea faithful? Samting wea Jesus talem taem hem startim datfala Memorial celebration witim olketa aposol, showimaot hem bae sakrifaesim perfect laef bilong hem. (Readim Hebrews 9:11, 12.) Bihaen Jehovah anointim Jesus for kamap Hae Priest, Jesus willing for kasem olketa hard taem go kasem taem hem dae. (Heb. 4:15; 5:7-10) Bihaen Jesus laef bak, hem go long heven and givim price bilong sakrifaes bilong hem long Jehovah. (Heb. 9:24) Start long datfala taem, Jesus savve askem God for helpem olketa wea showimaot faith long datfala sakrifaes for worshipim God mekem olketa garem hope for laef olowe. (Heb. 7:25) Sakrifaes bilong Jesus nao startim niu agreement.—Heb. 8:6; 9:15.
13. Wanem gud samting nao olketa long niu agreement bae kasem?
13 God iusim holy spirit tu for anointim olketa wea insaed niu agreement. (2 Cor. 1:21) Olketa faithful Jew nao first wan long datfala agreement, then bihaen samfala wea no Jew. (Eph. 3:5, 6) Wanem gud samting nao olketa bae kasem? God bae forgivim sin bilong olketa. Jehovah promis olsem: “Mi bae forgivim mistek bilong olketa, and sin bilong olketa mi bae no tingim moa.” (Jer. 31:34) From Jehovah forgivim sin bilong olketa, olketa fit for kamap “wanfala kingdom bilong olketa priest.” Peter talem olketa anointed Christian: “Iufala ‘pipol wea God chusim and olketa priest wea rul olsem king. Iufala wanfala holy nation and spesol pipol bilong God. Hem chusim iufala for talemaot long evri ples olketa nambawan wei’ bilong hem. Hem nao kolem iufala kamaot from darkness and tekem iufala go insaed long nambawan laet bilong hem.” (1 Pet. 2:9) Peter talem moa toktok wea Jehovah talem taem hem givim Law long olketa Israelite, and hem sei datwan hem for olketa Christian wea insaed long niu agreement.—Ex. 19:5, 6.
EVRI PIPOL KASEM GUD SAMTING
14. Olketa priest wea rul olsem king waka long wea?
14 Olketa long niu agreement bae waka long wea? Olketa bae waka olsem priest long earth. Olketa stand for Jehovah taem olketa “talemaot long evri ples olketa nambawan wei” bilong Jehovah and givim spiritual kaikai. (Matt. 24:45; 1 Pet. 2:4, 5) Bihaen olketa dae and laef bak, bae olketa fit for duim evri waka bilong king and priest witim Christ long heven. (Luke 22:29; 1 Pet. 1:3-5; Rev. 1:6) Long wanfala vision, aposol John lukim staka angel and olketa anointed Christian standap klosap long throne bilong Jehovah long heven. Olketa singim “wanfala niu song” long “Pikinini Sheepsheep” wea hem olsem: “Iu iusim blood bilong iu for baem pipol for givim long God. Iu baem olketa hia from evri tribe and languis and pipol and kantri. Iu mekem olketa for kamap olketa king and olketa priest bilong God bilong iumi, and olketa bae kamap olketa king for rulim disfala earth.” (Rev. 5:8-10) Long nara vision, John sei moa: “Bae olketa hia kamap olketa priest bilong God and bilong Christ, and bae olketa kamap olketa king and rul witim hem for datfala 1,000 year.” (Rev. 20:6) Olketa hia witim Christ nao olketa priest wea rul olsem king mekem evriwan long earth kasem gud samting.
15, 16. Wanem gud samting nao olketa priest wea rul olsem king bae duim for pipol?
15 Wanem gud samting nao bae 144,000 duim for pipol long earth? Revelation chapter 21 storyim olketa priest hia olsem wanfala taon long heven, Niu Jerusalem, or “waef bilong datfala Pikinini Sheepsheep.” (Rev. 21:9) Revelation 21:2-4 sei: “Mi lukim datfala holy taon, wea hem nao Niu Jerusalem. Hem kam daon from heven, from God. Hem olsem wanfala gele wea redi for marit wea werem naesfala kaleko for man wea hem bae maritim. Then mi herem wanfala voice from datfala throne hem singaot big olsem: ‘Tent bilong God hem stap witim olketa man. Hem bae stap witim olketa and olketa bae kamap pipol bilong hem, and God nao bae stap witim olketa. Hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.’” Datwan hem nambawan blessing! No eniwan bae sorre, krae, or feelim pain bikos dae bae finis nao. Evriwan long earth bae perfect and fren gud witim God.
16 Revelation 22:1, 2 storyim samfala nara blessing wea bae iumi kasem from olketa priest wea rul olsem king. Hem sei: “Datfala angel showim mi wanfala river wea wata bilong hem savve mekem man laef. Hem klia olsem glass and hem ran kamaot from throne bilong God and bilong datfala Pikinini Sheepsheep. Datfala river hem ran kam long midol long main road bilong [Niu Jerusalem]. Olketa tree wea savve mekem man laef hem stap long tufala saed bilong datfala river, and olketa tree hia garem frut twelvfala taem evri year. Leaf bilong olketa tree hia hem for healim pipol long evri kantri long world.” Datwan showimaot God bae finisim sin bilong “pipol long evri kantri long world,” wea datwan minim evri famili wea stap long earth. Tru tumas, olketa samting wea kasem iumi bifor bae nomoa nao.
OLKETA PRIEST FINISIM WAKA
17. Wanem waka nao olketa priest wea rul olsem king bae finisim long end bilong 1,000 year?
17 Long end bilong 1,000 year, evri pipol long earth bae perfect bikos long waka bilong olketa priest wea rul olsem king. Long datfala taem, Jesus Christ wea hem Hae Priest and King, bae givim full famili bilong olketa man wea perfect for Jehovah lukaftarem. (Readim 1 Corinthians 15:22-26.) Datwan showimaot olketa priest wea rul olsem king finisim waka bilong olketa nao.
18. Bihaen 1,000 year, wanem nao olketa priest wea rul olsem king bae duim?
18 Bihaen datwan, wanem waka moa bae Jehovah givim long olketa? Revelation 22:5 sei: “Olketa bae king for olowe.” Bible no talem hu nao bae olketa rulim. Nomata olsem, olketa garem body wea no savve rotten and no savve dae, and olketa duim finis waka for helpem pipol wea no perfect. So Jehovah bae gohed iusim olketa olsem olketa king for duim samting followim plan bilong hem for olowe.
19. Wanem samting nao evriwan wea attendim Memorial bae ting raonem?
19 Taem iumi celebratem Memorial bilong dae bilong Jesus long Thursday, April 5, 2012, bae iumi ting raonem olketa Bible teaching hia. Olketa anointed Christian wea stap yet long earth bae kaikaim bred wea no garem yeast and drinkim red wine for showimaot olketa part long niu agreement. Diswan bae helpem olketa for tingim privilege and waka wea olketa garem wea join witim plan bilong God. Letem iumi evriwan wea bae attendim Memorial showimaot iumi tinghae long olketa priest wea rul olsem king, wea Jehovah chusim olketa mekem iumi tu for kasem gud samting.
[Piksa long page 29]
Olketa priest wea rul olsem king bae mekem pipol kasem gud samting for olowe