Kwestin From Reader
Waswe, olketa man savve sin and dae bihaen lastfala test long end bilong datfala Wan Thousand Year Rul?
Tufala scripture insaed buk bilong Revelation savve helpem iumi for kasem ansa long datwan: “Olketa torowem dae and Hades go insaed long lake bilong fire. Diswan hem minim mek-tu dae, lake bilong fire.” (Revelation 20:14) “Hem bae aotem krae from eye bilong olketa, and dae bae nomoa, sorre and singaot and pain bae nomoa tu. Evri samting bifor hem finis nao.”—Revelation 21:4.
Tingim taem wea samting hia hem happen. Olketa bae torowem “dae and Hades” insaed long lake bilong fire bihaen olketa wea no dae long Armageddon, olketa wea bae resurrect, and tu, olketa wea born insaed datfala niu world kasem judgment “followim samting olketa scroll talem,” wea datwan hem olketa samting wea God laekem pipol for duim insaed datfala wan thousand year. (Revelation 20:12, 13) Aposol John talem narafala vision wea iumi savve faendem long Revelation chapter 21, wea bae fulfill insaed long datfala Wan Thousand Year Rul bilong Christ Jesus. Bat datfala vision bae fulfill evribit long end bilong datfala wan thousand year Judgment Day. Long datfala taem, Jesus bae finis long waka bilong hem for mekem wei for savve fren bak witim God and hem bae givim Kingdom go bak long Dadi bilong hem. Long tokpiksa wei, Jehovah bae stap witim pipol bilong hem, and hem bae stap witim olketa for olowe. Datfala profesi abaotem wei wea “dae bae nomoa” bae fulfill evribit bikos long datfala taem olketa man kamap perfect finis thru long ransom sakrifaes bilong Christ Jesus.—Revelation 21:3, 4.
So dae wea olketa scripture antap storyim hem dae wea kam from Adam, wea ransom bilong Christ bae finisim evribit. (Romans 5:12-21) From wei for dae wea evri man kasem from datfala first man hem finis evribit, olketa man bae barava olsem Adam long taem wea God creatim hem. Nomata Adam hem perfect, datwan no minim hem kanduit for dae. Jehovah talem Adam for no kaikai from “datfala tree bilong savve long samting wea gud and samting wea nogud.” And hem sei: “Bikos long day wea iu kaikaim bae iu dae.” (Genesis 2:17) Datwan hem dae wea man kasem taem hem min for duim sin. Bihaen datfala last test long end bilong datfala Wan Thousand Year Rul, olketa man bae free for disaedem samting wea olketa laekem. (Revelation 20:7-10) Olketa free for disaedem sapos olketa bae gohed for servem Jehovah or nomoa. So iumi kanduit for barava sure sapos eni man bae rejectim God, olsem Adam hem duim.
From no eni dae or Hades bae stap bihaen datfala last test, wanem nao bae happen sapos samwan hem bighed againstim God long datfala taem? Long datfala taem dae wea kam from Adam bae no stap. And Hades, wea hem nao grev bilong olketa man wea garem hope for resurrect, bae no stap tu. Nomata olsem Jehovah savve finisim eniwan wea kamap bighed againstim hem insaed datfala lake bilong fire, mekem hem no garem eni chance for kasem laef moa. Datfala wei for dae hem dae wea Adam and Eve kasem, wea hem difren from dae wea iumi kasem from Adam.
Nomata olsem, iumi no garem eni reason for expectim datwan for happen. Olketa wea faithful long datfala last test bae difren from Adam long wanfala barava important wei. Jehovah hem testim olketa evribit. Iumi sure Jehovah bae savve long evri samting wea stap long heart and evri samting abaotem olketa. And tu, iumi savve sure hao datfala last test bae showimaot klia hu nao olketa wea iusim long rongfala wei freedom bilong olketa for chus. So nomata samfala wea faithful long datfala last test savve go againstim God wea bae mekem hem finisim olketa evribit, luk olsem datwan bae no happen.
[Piksa long page 3]
Long wanem wei nao olketa man bae olsem Adam bihaen datfala last test?