Toktok Bilong Jehovah Hem Laef
Olketa Main Point From Buk Bilong Revelation—I
TAEM olo aposol John prisoner long Patmos Island, hem lukim 16-fala vision. Olketa vision wea hem lukim hem abaotem wanem Jehovah God and Jesus Christ duim long day bilong Lord. Datfala day hem start long 1914 taem Kingdom bilong God hem start for rul go kasem end bilong 1,000 year rul bilong Christ. Bible buk Revelation wea John raetem long samting olsem 96 C.E., hem storyim olketa nambawan vision hia.
Distaem, iumi bae storyim olketa main point long Revelation 1:1 go kasem 12:17 wea storyim firstfala seven vision wea John lukim. Iumi laek savve long olketa vision hia bikos olketa storyim samting wea happen long world distaem and hem showim wanem Jehovah bae duim long taem wea klosap for kam. Wei for read abaotem olketa vision hia bae strongim and comfortim olketa wea garem faith.—Heb. 4:12.
“PIKININI SHEEPSHEEP” NAO OPENEM SIXFALA LONG SEVENFALA SEAL
Firstaem John lukim Jesus Christ long heven and then hem kasem olketa message wea hem mas ‘raetem long wanfala scroll and sendem go long sevenfala kongregeson.’ (Rev. 1:10, 11) Bihaen datwan hem vision abaotem throne long heven. Man wea sidaon long throne hem holem long raet hand bilong hem wanfala scroll wea garem sevenfala seal. Man wea “fit for openem disfala scroll” hem “Lion wea kam from tribe bilong Judah,” wea hem nao “pikinini sheepsheep” wea “garem sevenfala horn and sevenfala eye.”—Rev. 4:2; 5:1, 2, 5, 6.
Mek-thri vision showim samting wea happen taem “Pikinini Sheepsheep“ openem sixfala long sevenfala seal. Taem hem openem mek-six seal, wanfala big earthquake happen and bigfala day for kros hem kam. (Rev. 6:1; 12:17) Bat nextfala vision showim hao ‘fofala angel holem fofala wind bilong earth’ go kasem taem wea namba bilong 144,000 hem set. “Wanfala big crowd” wea no garem set namba “standap front long throne and front long Pikinini Sheepsheep.”—Rev. 7:1, 9.
Ansa for Olketa Bible kwestin:
1:4; 3:1; 4:5; 5:6—Wanem nao disfala toktok “sevenfala spirit” hem minim? Long tingting bilong God, namba seven minim evri samting finis nao. So disfala message long “sevenfala kongregeson” barava fitim nao evri pipol bilong God wea stap long winim 100,000 kongregeson evriwea long world. (Rev. 1:11, 20) From Jehovah givim holy spirit bilong hem fitim wanem hem laek for duim, disfala toktok “sevenfala spirit” minim bigfala waka wea datfala spirit duim long wei for blessim and minim samting for olketa wea herem disfala profesi. Luk olsem buk bilong Revelation evritaem storyim sevenfala samting. Namba seven hem minim evri samting finis nao and disfala buk hem mekem ‘kamap tru’ or finisim nao, “disfala holy secret bilong God.”—Rev. 10:7.
1:8, 17—Disfala toktok “Alpha and Omega” and “First Wan and Last Wan” hem minim wanem? Disfala toktok “Alpha and Omega” barava fitim Jehovah bikos from bifor kam no eni God hem hae winim hem and no eniwan bae hae winim hem. Hem nao ‘start and finis bilong evri samting.’ (Rev. 21:6; 22:13) Revelation 22:13 storyim Jehovah olsem “first wan and last wan” wea minim no eniwan moa hem stap kam bifor hem or bihaen. Bat disfala toktok “First wan and Last wan” long firstfala chapter long Revelation hem minim Jesus Christ. Hem nao firstfala man for laef bak olsem spirit wea no savve dae and hem last wan wea Jehovah seleva bae mekem hem laef bak long wei olsem.—Col. 1:18.
2:7—Wanem nao “paradaes bilong God”? From olketa toktok hia hem for olketa anointed Christian, disfala paradaes mas minim spesol ples long heven front long God. Olketa anointed wea faithful bae kaikai long “tree bilong laef.” Olketa bae kasem laef wea no savve finis.—1 Cor. 15:53.
3:7—Wanem taem nao Jesus kasem “key bilong David” and hao nao hem iusim datwan? Taem Jesus baptaes long 29 C.E., hem kamap King wea God markem long laen bilong David. Bat Jesus no kasem datfala key bilong David go kasem 33 C.E. taem hem stap long raet saed bilong God long heven. Long datfala taem nao hem kasem evri nambawan samting bilong Kingdom bilong David. Bihaen datwan, Jesus hem iusim datfala key for start duim samfala waka bilong datfala Kingdom. Long 1919, Jesus givim ‘key bilong haos bilong David’ long “wakaman wea faithful and wise” taem hem markem datfala wakaman “for lukaftarem evri samting bilong hem.”—Isa. 22:22; Matt. 24:45, 47.
3:12—Wanem nao “niufala nem” bilong Jesus? Disfala nem hem join witim niufala waka and paoa bilong Jesus. (Phil. 2:9-11) Jesus nomoa savve gud long datfala nem and taem hem markem olketa faithful brata bilong hem long heven witim datfala nem, datwan mekem olketa fren gud witim hem. (Rev. 19:12) Hem givim samfala spesol paoa wea hem kasem for olketa tu.
Wanem Nao Iumi Lanem?
1:3. Bikos “taem wea set finis [for God judgem world bilong Satan] hem klosap,” iumi mas minim distaem message long buk bilong Revelation and obeyim.
3:17, 18. For garem staka spiritual samting, iumi mas baem from Jesus “gold wea olketa klinim long fire.” Diswan minim iumi mas duim staka gudfala waka. (1 Tim. 6:17-19) Iumi need for werem “whitefala kaleko,” wea showimaot iumi pipol wea followim Christ, and iusim olketa gudfala toktok wea stap long Wastaoa magasin olsem “medicine for rabem long eye,” mekem iumi garem gudfala spiritual tingting.—Rev. 19:8.
7:13, 14. Olketa 24 elder hem minim 144,000 long heven wea kamap olketa king and priest. Olketa priest long Israel bifor, wea King David markem long 24 grup nao piksarem olketa. Wanfala elder nao talem John hu nao datfala big crowd. Luk olsem olketa anointed Christian start for laef bak bifor 1935. Why nao olsem? Bikos long datfala year nao olketa anointed wakaman bilong God luksavve long datfala big crowd.—Luke 22:28-30; Rev. 4:4; 7:9.
TAEM MEK-SEVEN SEAL HEM OPEN GOGO SEVENFALA TRUMPET KRAE
Pikinini sheepsheep nao openem mek-seven seal. Sevenfala angel kasem sevenfala trumpet. Trumpet bilong sixfala long sevenfala angel krae for talemaot olketa message bilong judgment long “mek-thri part” bilong olketa man wea sei olketa Christian. (Rev. 8:1, 2, 7-12; 9:15, 18) Hem nao samting wea John lukim long mek-faev vision. John hem join insaed long nextfala vision taem hem kaikaim scroll and measurem temple. Bihaen krae bilong mek-seven trumpet, olketa bigfala voice talemaot disfala toktok: “Kingdom ovarem world hem kamap kingdom bilong Lord and Christ bilong hem.”—Rev. 10:10; 11:1, 15.
Mek-seven vision hem storyim go moa samting wea Revelation 11:15, 17 hem talem. Bigfala saen nao showaot long heven. Woman long heven hem bornem wanfala boy. Devil hem aot from heven. From hem kros long datfala woman, hem go “for faet againstim olketa pikinini bilong disfala woman.”—Rev. 12:1, 5, 9, 17.
Ansa for Olketa Bible Kwestin:
8:1-5—Why nao no eni noise kamap long heven and wanem nao wanfala angel torowem kam daon long earth? No eni noise kamap long heven mekem olketa savve herem “prea bilong olketa holy wan” wea stap long earth. Diswan hem happen taem first world war hem finis. Samfala anointed Christian tingse olketa bae go ap long heven long end long taem bilong olketa Gentile, bat datwan no happen. Taem war hem gohed, olketa kasem hard taem. So olketa barava askem God for helpem olketa. God ansarem prea bilong olketa. Datfala angel torowem kam daon tokpiksa fire long earth mekem olketa anointed Christian for duim staka waka. Nomata olketa hia no staka, olketa start for preach abaotem Kingdom bilong God evriwea long world, wea datwan hem olsem fire long olketa wea sei olketa Christian. Olketa anointed Christian talemaot olketa strongfala warning from Bible olsem thunder and olketa trufala Bible teaching sut aot olsem laetning, wea datwan sekem giaman religion, olsem earthquake sekem olketa haos.
8:6-12; 9:1, 13; 11:15—Wanem taem nao sevenfala angel redi for mekem trumpet bilong olketa krae, and long wanem taem and long wanem wei nao olketa trumpet hia krae? Taem wea sevenfala angel redi for mekem sevenfala trumpet krae, hem start long 1919 go kasem 1922 taem olketa long John class wea strong bak kasem waka. Olketa anointed Christian busy for redi for duim preaching and for buildim moa olketa ples for wakem olketa buk. (Rev. 12:13, 14) Krae bilong olketa trumpet hia hem piksarem judgment bilong Jehovah wea pipol bilong God wea waka witim olketa angel talemaot againstim world bilong Satan. Diswan hem start long 1922 long convention wea kamap long Cedar Point, Ohio, and bae gohed kasem taem bilong bigfala trabol.
8:13; 9:12; 11:14—Long wanem wei nao last thrifala krae bilong trumpet hem ‘olketa trabol’? First fofala trumpet wea krae, hem for showimaot olketa religion wea sei olketa Christian dae finis long tokpiksa wei, bat last thrifala krae bilong trumpet hem for markem thrifala trabol wea bae happen. Mek-faev krae, hem taem pipol bilong God kamaot from “hol wea deep tumas” long 1919 and start for talemaot gud nius wea gogo kamap olsem wanfala trabol for olketa religion wea sei olketa Christian. (Rev. 9:1) Mek-six, hem abaotem bigfala waka wea start long 1922 for duim preaching evriwea long world winim enitaem bifor. Lastfala krae, hem abaotem taem wea Kingdom bilong Christ hem start for rul.
Wanem Nao Iumi Lanem?
9:10, 19. Olketa toktok wea kam from Bible wea stap long olketa buk bilong “wakaman wea faithful and wise” garem strongfala toktok. (Matt. 24:45) Disfala message hem olsem tail bilong olketa grashopa wea savve “givim pain olsem scorpion” and horse bilong army wea “tail bilong olketa hem olsem snek.” Why nao olsem? Bikos olketa buk hia talem warning abaotem “day bilong [Jehovah] for pei bak.” (Isa. 61:2) Iumi mas no fraet for givimaot olketa buk hia.
9:20, 21. Staka hambol pipol wea stap long olketa heathen kantri herem message wea iumi talemaot. Bat iumi no tingse “evri nara man,” wea minim staka heathen pipol, bae lusim religion bilong olketa and kamap Christian. Nomata olsem, iumi gohed nomoa for duim preaching.
12:15, 16. Disfala “earth” bilong Satan, or olketa wea garem paoa for rul long olketa difren kantri mekem wei for pipol seleva chusim lotu bilong olketa. Start kam long 1940, olketa wea garem paoa ‘swallowim datfala river [bilong persecution] wea kamaot from mouth bilong dragon.’ Tru nao, taem Jehovah laek for duim samting, hem savve iusim olketa gavman for duim wanem hem laekem. Proverbs 21:1 hem talem olsem: ‘Heart bilong wanfala king hem olsem smol river long hand bilong Jehovah. Hem savve tanem datwan followim eni wei wea hem laekem.’ Diswan savve strongim faith bilong iumi long God.