Praisem Christ Datfala Nambawan King!
“Iu garem bigfala glory, so go and winim olketa enemy bilong iu.”—PS. 45:4.
1, 2. Why nao iumi interest tumas long Psalm 45?
WANFALA nambawan king raedem horse for go faetem olketa enemy bilong hem. Hem defendim samting wea tru and raeteous. Bihaen hem winim olketa enemy hia, hem maritim naesfala gele. Pipol praisem datfala king for olowe and no forgetim hem. Diswan nao samfala interesting samting wea Psalm 45 hem storyim.
2 Bat Psalm 45 hem no wanfala naes story nomoa. Olketa samting wea hem storyim hem important long iumi bikos hem affectim laef bilong iumi distaem and long future tu. So iumi interest tumas for studyim gud disfala psalm.
“HEART BILONG MI HEM FULAP LONG STORY ABAOTEM GUDFALA SAMTING”
3, 4. (a) Wanem “gudfala samting” nao man wea raetem psalm story abaotem, and hao nao datwan affectim iumi? (b) Wanem message “abaotem wanfala king”nao iumi talemaot? (c) Wanem nao mekem toktok bilong iumi olsem “baero long hand bilong man wea savve tumas for copyim raeting”?
3 Readim Psalm 45:1. Man wea raetem psalm sei heart bilong hem fulap long story abaotem wanfala king. Hem hapi tumas for herem datfala nius and datwan mekem toktok bilong hem olsem “baero long hand bilong man wea savve tumas for copyim raeting.”
4 Waswe long iumi? Gud nius abaotem Kingdom bilong God hem mekem iumi hapi tumas tu. Datfala message abaotem Kingdom hem barava “gud nius” long 1914. Why nao olsem? Bikos start long datfala year Kingdom hem rul long heven nao, so hem no message abaotem wanfala Kingdom wea bae kamap long future, bat hem abaotem wanfala Kingdom wea start for rul finis. Diswan nao hem “gud nius abaotem Kingdom” wea iumi preachim “long evri ples long world mekem pipol long evri kantri mas herem.” (Matt. 24:14) Waswe, iumi hapi tumas long datfala message abaotem Kingdom? Waswe, iumi strong for preachim gud nius abaotem Kingdom? Datfala man wea raetem psalm hem ‘singsing abaotem wanfala king.’ Iumi tu talemaot message abaotem Jesus, wea distaem hem King long Kingdom bilong God long heven. Iumi invaetem evriwan, nomata olketa bigman bilong olketa gavman long world tu, for stap anda long Kingdom bilong Jesus. (Ps. 2:1, 2, 4-12) And taem iumi iusim Bible long preaching waka, toktok bilong iumi hem olsem “baero long hand bilong man wea savve tumas for copyim raeting.”
Iumi hapi for talemaot gud nius abaotem King bilong iumi, Jesus Christ
KING HEM TALEM NAESFALA TOKTOK
5. (a) Wanem nao mekem Jesus “luk naes”? (b) Wanem kaen wei nao Jesus showimaot taem hem preach, and hao nao iumi savve followim example bilong hem?
5 Readim Psalm 45:2. Bible no story tumas abaotem lukluk bilong Jesus. From hem perfect, masbi hem “luk naes.” Bat samting wea mekem hem barava luk naes nao hem wei wea hem faithful long Jehovah. And tu, Jesus hem kaen and iusim naesfala toktok wea kasem heart bilong pipol taem hem preachim message abaotem Kingdom. (Luke 4:22; John 7:46) Waswe, iumi tu traem best for followim example bilong Jesus taem iumi duim preaching waka?—Col. 4:6.
6. Long wanem wei nao God blessim Jesus “for olowe”?
6 From Jesus faithful and barava lovem Dadi bilong hem, Jehovah blessim ministry wea Jesus duim long earth, and bihaen hem sakrifaesim laef bilong hem, Jehovah givim reward long hem. Aposol Paul sei olsem abaotem Jesus: “Taem hem kamap wanfala man, hem hambol and obeyim God nomata gogo hem dae long wanfala post. Dastawe, God givim hem position wea hae winim position bilong hem bifor. From God hem kaen tumas, hem givim hem nem wea winim evri nara nem, mekem long nem bilong Jesus, evriwan long heven and long earth and andanit long graon mas baodaon long hem, and evriwan mas talemaot Jesus Christ hem Lord, for mekhae long God, wea hem Dadi bilong iumi long heven.” (Phil. 2:8-11) Jehovah blessim Jesus “for olowe” taem hem mekem hem laef bak and no savve dae moa.—Rome 6:9.
HEM “WINIM OLKETA NARA KING”
7. Long olketa wanem wei nao Jehovah anointim Jesus long wei wea “winim olketa nara king”?
7 Readim Psalm 45:6, 7. From Jesus barava lovem stret samting and heitim samting wea savve spoelem nem bilong Dadi bilong hem, Jehovah anointim hem for kamap King long Kingdom bilong hem. Jehovah anointim hem witim oil wea mekem hem hapi “winim olketa nara king,” wea olketa tu kam from laen bilong David. Why nao hem hapi tumas olsem? First samting, Jehovah seleva nao anointim Jesus. Mek-tu samting, Jehovah anointim Jesus for kamap King and Hae Priest. (Ps. 2:2; Heb. 5:5, 6) Mek-thri samting, Jehovah no anointim Jesus long oil bat long holy spirit. And last samting, hem rul kam from heven and no from earth.
8. (a) Hao nao iumi savve Jesus bae rul long stretfala wei? (b) Disfala toktok ‘God nao hem throne bilong Jesus’ hem minim wanem?
8 Long 1914, Jehovah markem Son bilong hem for rul insaed Kingdom bilong hem long heven. Datfala scripture sei “stik” (scepter) wea Jesus holem hem stik bilong Kingdom wea raeteous, so iumi sure hem bae no saedem eniwan and hem bae evritaem duim samting wea stret. Hem garem raet for King bikos ‘God nao throne bilong hem,’ wea diswan minim Jehovah nao markem hem for King. Throne bilong Jesus bae stap “for olowe” tu. Iumi barava tinghae long wei wea iumi worshipim Jehovah anda long King wea hem markem!
KING HANGEM SWORD LONG SAED BILONG HEM
9, 10. (a) Wanem taem nao Christ hangem sword long saed bilong hem, and hem iusim datwan for duim wanem samting? (b) Christ bae iusim sword bilong hem for duim wanem samting long future?
9 Readim Psalm 45:3. Jehovah talem King for hangem sword long saed bilong hem, wea minim hem givim paoa long Jesus for go faetem olketa wea againstim rul bilong God, and for finisim olketa. (Ps. 110:2) From Christ hem King wea no eniwan savve winim hem long faet, Bible sei hem “strongfala man for faet.” Hem hangem sword long saed bilong hem long 1914, taem hem winim Satan and olketa demon bilong hem and torowem olketa from heven go daon long earth.—Rev. 12:7-9.
10 Datwan hem first samting nomoa wea datfala King hem duim for win. Bat hem no “winim olketa enemy bilong hem” yet. (Rev. 6:2) Jehovah laekem evri part long world bilong Satan for finis, and bae hem mekem Satan and olketa demon bilong hem no garem paoa for spoelem pipol. First samting wea bae finis nao hem Bigfala Babylon, wea hem nao evri false religion long world. Jehovah bae iusim olketa bigman bilong politik for finisim disfala rabis “jury woman.” (Rev. 17:16, 17) Then, Christ bae finisim evri gavman long world bilong Satan. Bihaen diswan, Jesus wea Bible sei hem “angel wea gaedem datfala hol wea deep tumas” bae winim olketa enemy bilong hem taem hem torowem Satan and olketa demon long datfala hol. (Rev. 9:1, 11; 20:1-3) Distaem bae iumi storyim wei wea Psalm 45 profesi abaotem olketa samting hia.
KING HEM FAET FOR “DEFENDIM SAMTING WEA TRU”
11. Long wanem wei nao Christ hem faet for “defendim samting wea tru”?
11 Readim Psalm 45:4. Disfala King hem no faet for winim olketa kantri or mekem pipol kamap slave. Hem garem gudfala reason for faet. Hem “faet for defendim wei for hambol, and for defendim samting wea tru and raeteous.” Wanfala samting wea barava tru nao hem wei wea Jehovah nomoa garem raet for rulim universe. Diswan nao hem important winim eni nara samting wea tru wea Jesus mas faet for hem. Taem Satan againstim God, hem kwestinim raet bilong Jehovah for rul. Start long datfala taem, olketa demon and man tu kwestinim datwan. Distaem nao hem taem for King wea Jehovah anointim for go faet and pruvim Jehovah nomoa garem raet for rul.
12. Long wanem wei nao King hem faet for “defendim wei for hambol”?
12 King hem faet tu for “defendim wei for hambol.” Jesus evritaem showimaot nambawan example for hambol and obeyim Dadi bilong hem. (Isa. 50:4, 5; John 5:19) Evriwan wea faithful for stap anda long King mas followim example bilong hem and mas hambol for stap anda long rul bilong Jehovah long evri samting. Olketa wea duim diswan nomoa bae stap long niu world bilong God.—Zech. 14:16, 17.
13. Long wanem wei nao Christ hem faet for defendim samting wea “raeteous”?
13 Christ faet tu for defendim samting wea “raeteous.” Diswan story abaotem olketa samting wea God sei hem raeteous, wea minim olketa standard bilong Jehovah saed long olketa samting wea stret and no stret. (Rome 3:21; Deut. 32:4) Isaiah talem disfala profesi abaotem Jesus Christ: “Wanfala king bae rul long raeteous wei.” (Isa. 32:1) Long taem wea Jesus rul, bae iumi garem “wanfala niu skae and wanfala niu earth” wea “evri samting bae raeteous.” (2 Pet. 3:13) Datwan minim evriwan wea stap long datfala niu world mas followim olketa standard bilong Jehovah saed long samting wea stret and no stret.—Isa. 11:1-5.
KING HEM DUIM “OLKETA NAMBAWAN SAMTING”
14. Long wanem wei nao raet hand bilong Christ bae duim “olketa nambawan samting”? (Lukim piksa long start bilong study.)
14 Taem King raedem horse for go faet, hem hangem sword long saed bilong hem. (Ps. 45:3) Then hem holem sword long raet hand and start for iusim. Man wea raetem psalm sei olsem abaotem Jesus: “Raet hand bilong iu bae duim olketa nambawan samting.” (Ps. 45:4) Taem Jesus Christ kam for finisim world bilong Satan long Armageddon, hem bae duim “olketa nambawan samting” againstim olketa enemy bilong hem. Iumi no barava savve wanem nao hem bae iusim for finisim world bilong Satan. Bat samting wea Jesus duim bae mekem olketa wea no obeyim olketa warning bilong God and no stap anda long King for barava fraet tumas. (Readim Psalm 2:11, 12.) Long profesi bilong Jesus abaotem taem wea world bae finis, hem sei pipol bae “fraet fogud and wari long olketa samting wea bae happen long earth, bikos olketa samting long skae wea strong tumas bae seksek.” Hem sei tu: “Then olketa bae lukim Son bilong man hem kam long olketa cloud long skae witim bigfala paoa and glory.”—Luke 21:26, 27.
15, 16. Hu nao bae insaed army bilong Christ wea go witim hem for faet?
15 Buk bilong Revelation sei King bae kam “witim bigfala paoa and glory” for winim olketa enemy bilong God. Hem sei: “Mi lukim heven hem open and mi lukim wanfala horse wea kala bilong hem white. Nem bilong man wea sidaon antap long datfala horse hem Faithful and Tru. Hem judge long raeteous wei and hem faet long war wea raeteous. And tu, olketa army long heven raedem olketa white horse and followim hem. Olketa werem naesfala kaleko wea klin and white. Longfala sword wea sharp hem kamaot from mouth bilong hem. Hem iusim datwan for finisim evri kantri long world and bae hem iusim wanfala iron stik for rulim olketa. And tu, hem step antap long olketa grape insaed datfala ples for aotem juice bilong olketa, wea datfala ples hem piksarem bigfala kros bilong Olmaeti God.”—Rev. 19:11, 14, 15.
16 Hu nao bae insaed long “olketa army long heven” wea go witim Jesus for faet? Long firstaem wea Jesus hangem sword long saed bilong hem and aotem Satan and olketa demon bilong hem from heven, “olketa angel bilong hem” nao helpem hem. (Rev. 12:7-9) So luk olsem long Armageddon tu, olketa holy angel bae insaed long army bilong Christ. Waswe, eniwan moa bae insaed army bilong Christ? Jesus promisim olketa anointed brata bilong hem olsem: “Man wea win and wea duim olketa samting wea mi talem go kasem end, bae mi givim hem paoa ovarem pipol long world, olsem paoa wea Dadi bilong mi givim long mi. Datfala man bae iusim wanfala iron stik for rulim olketa pipol. Hem bae finisim olketa and bae olketa olsem clay pot wea barava pisis nao.” (Rev. 2:26, 27) Evri anointed brata bilong Christ bae go long heven bifor Armageddon hem start. So, olketa tu bae insaed long army bilong Christ. Olketa anointed Christian bae stap witim Jesus taem hem duim “olketa nambawan samting” for finisim olketa nation.
KING GO FOR WINIM OLKETA ENEMY BILONG HEM
17. (a) Datfala horse wea Christ raedem wea kala bilong hem white hem piksarem wanem? (b) Wanem nao sword and datfala bow and arrow piksarem?
17 Readim Psalm 45:5. King hem raedem wanfala horse wea kala bilong hem white. Revelation 6:2 hem sei: “Mi lukim wanfala horse wea kala bilong hem white and man wea sidaon antap long hem holem wanfala bow and arrow. God givim hem wanfala kraon and hem go for winim olketa enemy bilong hem.” Datfala horse piksarem war wea raeteous and wea stret long tingting bilong God. (Rev. 19:11) King hem holem sword and hem holem tu wanfala bow and arrow. Tufala samting hia piksarem wanem Christ bae iusim for finisim olketa enemy bilong hem.
Jehovah bae iusim olketa bird for klinim earth (Lukim paragraf 18)
18. Wanem nao bae happen taem Christ iusim “bow and arrow” bilong hem?
18 Man wea raetem psalm hem iusim interesting toktok taem hem talem profesi abaotem datfala King. Hem sei: “Olketa arrow bilong iu sharp fogud long heart bilong olketa enemy bilong iu, and olketa foldaon long graon front long iu.” Staka pipol bae dae evriwea long earth. Profesi long Jeremiah sei: “Long datfala day, body bilong olketa wea Jehovah killim dae bae stap long evri ples long earth.” (Jer. 25:33) Narafala profesi abaotem datfala sem samting hem sei: “Mi lukim tu wanfala angel wea standap long sun and hem singaot big long olketa bird wea flae long skae. Hem sei: ‘Iufala evriwan kam long hia for feast bilong God mekem iufala kaikaim body bilong olketa king and olketa komanda bilong army and olketa strong man. Bae iufala kaikaim tu body bilong olketa horse witim olketa wea sidaon antap long olketa, and body bilong evriwan, nomata olketa man wea free or wea slave, or olketa man nating or olketa bigman.’”—Rev. 19:17, 18.
19. Wanem nao bae Christ duim for “winim olketa enemy” bilong hem?
19 Bihaen datfala nambawan King Jesus Christ finisim nogud world bilong Satan, bae hem “go and winim olketa enemy” bilong hem. (Ps. 45:4) Bae hem duim diswan taem hem torowem Satan and olketa demon bilong hem insaed datfala hol wea deep tumas. Olketa bae stap long datfala hol taem Jesus witim 144,000 anointed Christian rul from heven for wan thousand year. (Rev. 20:2, 3) Long datfala taem, Devil and olketa demon bilong hem bae no savve duim eni samting for spoelem pipol. So evriwan long earth bae enjoyim wei for stap anda long rul bilong King. Bat bifor earth hem kamap paradaes, nara reason hem stap for hapi witim King and 144,000 wea rul witim hem. Iumi bae storyim diswan long nextfala study.