Muv Go for Win Evribit!
“Lukim! wanfala white horse; and datwan wea sidaon long hem garem wanfala bow; and olketa givim hem wanfala crown, and hem go aot for win and for winim faet bilong hem evribit.”—REVELATION 6:2.
1. Wanem future samting nao John lukim insaed wanfala vision?
THRU long spirit bilong God, aposol John savve luk go 1,800 year insaed long future and storyim taem wea Christ kamap King. John needim faith for bilivim samting wea hem lukim insaed long datfala vision. Iumi distaem garem klia pruv hao disfala wei for kamap king hem happen long 1914. Witim eye bilong faith, iumi lukim Jesus Christ hem “go aot for win and for winim faet bilong hem evribit.”
2. Wanem nao Devil hem duim taem Kingdom hem start, and diswan pruvim wanem samting?
2 Bihaen Kingdom hem start, olketa aotem Satan from heven, wea diswan mekem hem faet moa strong and witim moa kros, bat nomata olsem, diswan nating helpem hem for win. (Revelation 12:7-12) Kros bilong hem mekem living long world kamap moa worse. Living bilong olketa man luk olsem hem go ahed for pisis. For Olketa Jehovah’s Witness diswan hem klia pruv hao King bilong olketa hem muv go for “winim faet bilong hem evribit.”
Wanfala Niu World Society Hem Start
3, 4. (a) Wanem change long organization nao kamap insaed long Christian kongregeson start from taem wea Kingdom hem start, and why nao need kamap for olketa? (b) Olketa change hia help long wanem wei, olsem Isaiah hem talem?
3 Taem Kingdom hem start, hem taem nao for mekem Christian kongregeson wea kamap gud moa—wea distaem garem moa Kingdom responsibility—for followim moa klos example bilong Christian kongregeson long first century. So, insaed long issue bilong June 1 and 15, 1938, Wastaoa hem storyim hao Christian organization shud waka. Bihaen, issue bilong December 15, 1971, explainim klia Governing Body bilong distaem insaed article “Wanfala Governing Body wea Difren From Wanfala Legal Corporation.” Long 1972, olketa appointim olketa body of elders for help and lead insaed long olketa kongregeson.
4 Wei for stretem bak proper wei for lead hem barava strongim Christian kongregeson. Nara samting wea join witim diswan hem olketa arrangement wea Governing Body duim for teachim olketa elder long waka bilong olketa, and trainim olketa long judicial samting. Wei wea olketa arrangement bilong organization bilong God long earth hem go ahed and gud samting wea kamaot from datwan hem samting wea Isaiah 60:17 talem profesi abaotem: “For changem copper mi bae tekem kam gold, and for changem iron mi bae tekem kam silver, and for changem wood, copper, and for changem olketa ston, iron; and mi bae appointim peace olsem olketa overseer bilong iufala and raeteous fasin olsem olketa man for givim waka for iufala.” Olketa gudfala change hia showimaot blessing bilong God and pruvim wei wea God appruvim olketa wea showimaot strongfala saport for Kingdom bilong hem.
5. (a) Wanem nao Satan duim taem hem lukim wei wea Jehovah blessim pipol bilong Hem? (b) For fitim Philippians 1:7, wanem nao pipol bilong Jehovah duim taem Satan hem kros?
5 Loving help and wei for lead wea God givim for pipol bilong hem bihaen Kingdom hem start hem samting wea Satan barava lukim. Long 1931 disfala smol grup talemaot long pablik hao olketa no Bible Student nomoa. For fitim Isaiah 43:10, olketa hia Olketa Jehovah’s Witness! Maet bikos long datwan or nomoa, Devil hem mekem barava bigfala persecution kamap raonem world. Nomata long olketa kantri wea religion free for duim samting, olsem United States, Canada, and Germany, olketa Witness mas evritaem go long kot for keepim freedom bilong olketa for worship. Kasem 1988, U.S. Supreme Court hem herem 71 kot case abaotem Olketa Jehovah’s Witness, and 47 long olketa case hia olketa winim. Distaem, long full world, olketa kot case go ahed, olsem long first century, mekem wei for “defendim and iusim law for protectim gud nius” hem go ahed.—Philippians 1:7.
6. Waswe, olketa wei for putim tambu hem stopem pipol bilong Jehovah for muv ahed? Givim example.
6 Long olketa year bilong 1930, bifor World War II, olketa raf gavman tambuim waka bilong Olketa Jehovah’s Witness long Germany, Spain, and Japan. Bat long year 2000, thrifala kantri hia garem klosap 500,000 pipol wea strong for talemaot Kingdom bilong God. Datwan hem klosap tenfala taem winim namba bilong olketa Witness long full world long 1936! Tru nao, wei for putim tambu kanduit stopem pipol bilong Jehovah for muv ahed anda long Leader bilong olketa wea win, Jesus Christ.
7. Wanem nambawan samting nao happen long 1958, and wanem bigfala change nao kamap start long datfala taem?
7 Wei for muv ahed hia hem showaot long 1958, long New York City taem Olketa Jehovah’s Witness garem barava big convention, datfala Will Bilong God International Assembly, wea 253,922 nao attendim. Kasem 1970 waka hem open moa long thrifala kantri wea iumi storyim finis, bat no long East Germany long datfala taem. Bat olketa Witness stap anda long tambu yet long bigfala Soviet Union and olketa kantri wea stap anda long hem wea insaed long Warsaw Agreement. Distaem, insaed olketa kantri hia wea Communist bifor, winim 500,000 Witness go ahed strong.
8. Wanem nao kamaot from blessing bilong Jehovah long pipol bilong hem, and wanem nao Wastaoa long 1950 hem talem abaotem diswan?
8 Olketa Jehovah’s Witness kasem blessing bilong wei for grow bikos olketa go ahed for “lukaotem firstaem kingdom and raeteous fasin bilong [God].” (Matthew 6:33) Long really wei, profesi bilong Isaiah hem fulfill finis: “Smol wan seleva bae kamap wan thousand, and wan wea no mas big bae kamap wanfala maeti nation. Mi nao, Jehovah, bae speedim diswan long taem bilong hem.” (Isaiah 60:22) And datwan no finis yet. Insaed long tenfala year wea just go pas, 1,750,000 moa olketa strong for saportim rul bilong Kingdom. Olketa hia kamap part bilong wanfala sekson wea wanfala 1950 Wastaoa hem storyim olsem: “Distaem God hem redyim wanfala niu world society. . . . Disfala sekson wea olsem faondeson bae go thru long Armageddon, . . . olketa first wan wea bae duim waka insaed long datfala ‘niu earth’ . . . , organize long theocratic wei, wea savve long wei for organize.” Then datfala article hem sei: “So, iumi evriwan tugeta muv ahed strong olsem wanfala niu world society!”
9. Hao nao olketa samting wea Olketa Jehovah’s Witness lanem long olketa year wea go pas hem givim bigfala help?
9 Go kasem datfala taem, disfala niu world society wea go ahed for grow, wea lane for duim samting long smooth and gudfala wei, hem barava help long bigfala wei and maet long waka bihaen Armageddon tu for mekem evri samting kamap gud moa. Olsem example, olketa Witness lane for organizem olketa bigfala convention, for kwiktaem givim help long taem bilong trabol, and wakem olketa building kwiktaem. Disfala waka hem mekem planti pipol tinghae and respectim Olketa Jehovah’s Witness.
Stretem Rongfala Tingting
10, 11. Givim example long hao pipol kasem stretfala idea abaotem Olketa Jehovah’s Witness.
10 Nomata olsem, pipol accusim Olketa Jehovah’s Witness and sei olketa difren tumas from evri pipol. Diswan hem bikos long biliv bilong olketa Witness wea kam from Bible long olketa samting olsem blood transfusion, no teksaed, smoke, and fasin. Bat pablik start for barava luksavve hao olketa Witness garem gud tingting. Olsem example, wanfala doctor long Poland ringim office bilong Olketa Jehovah’s Witness and sei hem and olketa nara doctor wea waka witim hem long hospital olketa argue for tu-thri hour finis abaotem blood transfusion. Story hia hem start bikos long wanfala article wea kamap long datfala day insaed wanfala niuspepa long Poland, Dziennik Zachodni. Datfala doctor hem sei: “Miseleva feel sorre from olketa long medical iusim tumas blood. Diswan mas change, and mi hapi from samwan hem story abaotem diswan. Mi laekem moa information.”
11 Long wanfala meeting wea olketa garem last year, olketa bilong medical from Canada, Europe, Israel, and United States storyim information wea bae helpem olketa doctor for givim treatment long sikman and no iusim blood. Long datfala meeting, long Switzerland, olketa sei nomata planti pipol no ting olsem, namba bilong olketa sikman wea kasem blood transfusion wea dae hem moa hae winim olketa sikman wea no kasem datwan. Planti taem olketa Witness wea sik kwiktaem lusim hospital winim olketa wea tekem blood, wea diswan hem katem daon kost bilong treatment.
12. Givim wanfala example long hao olketa bigman praisem biliv bilong Olketa Jehovah’s Witness saed long wei for no teksaed long politik.
12 Pipol talem planti gudfala samting tu abaotem wei wea Olketa Witness no teksaed bifor and long taem bilong World War II taem olketa stand strong anda long attak bilong olketa Nazi. Datfala video Jehovah’s Witnesses Stand Firm Against Nazi Assault, wea Olketa Jehovah’s Witness wakem and wea olketa showim long Ravensbrück concentration camp long Germany long November 6, 1996, hem mekem pipol talem planti gudfala toktok. Taem olketa showim datfala sem video long narafala concentration camp long Bergen-Belsen long April 18, 1998, bigman bilong datfala Center for Political Education long Lower Saxony, Dr. Wolfgang Scheel hem sei: “Wanfala tru samting wea happen long history wea mekem man feel shame hem wei wea Olketa Jehovah’s Witness rejectim National Socialism long strong wei winim olketa Christian church. . . . Nomata hao iumi maet feel abaotem olketa teaching and strong saed long religion bilong Olketa Jehovah’s Witness, wei wea olketa stand strong long rul bilong Nazi hem mekem iumi fit for respectim olketa.”
13, 14. (a) Wanem wisefala tingting for saed bilong olketa first century Christian nao wanfala man talem? (b) Givim olketa example bilong gudfala toktok wea pipol talem for saed bilong pipol bilong God distaem.
13 Taem olketa bigman or disison bilong kot saportim Olketa Jehovah’s Witness long olketa bigfala samting, diswan savve daonem rong tingting and mekem pipol ting gud abaotem olketa Witness. Planti taem diswan openem wei for olketa Witness story witim pipol wea no enitaem bifor willing for lisin. So Olketa Jehovah’s Witness barava tinghae long kaen samting olsem. Diswan mekem iumi tingim samting wea happen long first century long Jerusalem. Taem Sanhedrin, datfala Jew hae kot, laek for killim dae olketa Christian bikos olketa strong for preach, Gamaliel, “wanfala teacher bilong Law wea evri pipol barava tinghae long hem,” talemaot wanfala warning and sei: “Olketa man bilong Israel, lukluk gud long iufala seleva long wanem iufala laek duim long olketa man hia. . . . No duim eni samting long olketa man hia, bat leavim olketa; (bikos, sapos disfala plan or waka hem from olketa man, bae hem finis; bat sapos hem from God, iufala bae no fit for finisim olketa;) nogud maet iufala kamap pipol wea faet againstim God.”—Acts 5:33-39.
14 Olsem Gamaliel, no longtaem go nomoa samfala bigman talem toktok wea saportim freedom bilong religion for Olketa Jehovah’s Witness. Olsem example, chairman bilong International Academy for Freedom of Religion and Belief bifor hem sei olsem: “Hem no stret for no givim raet long wanfala religion bikos pipol sei olketa biliv bilong hem difren and pipol no acceptim datwan.” And wanfala professor bilong science wea studyim religion long university bilong Leipzig hem askem wanfala kwestin wea fitim abaotem wei wea gavman bilong Germany hem markem wanfala sekson for lukluk insaed long olketa smol religion, taem hem ask: “Why nao pipol laek lukluk long olketa smol religion and no long tufala bigfala church [Roman Catholic Church and Lutheran Church]?” For kasem ansa iumi savve tingim toktok bilong wanfala bigman long Germany bifor, wea raet olsem: “No eni daot stap hao olketa wea ova tumas insaed long religion nao bihaenem samting wea sekson bilong gavman duim.”
Hu Nao Iumi Luk Long Hem for Help?
15, 16. (a) Why nao samting wea Gamaliel duim hem help long smol wei nomoa? (b) Hao nao thrifala nara bigman no savve duim planti samting for saed bilong Jesus?
15 Samting wea Gamaliel talem hem mekhae long point hao waka wea God saportim hem kanduit fail. Olketa first Christian kasem gudfala samting from datfala toktok wea hem talem long Sanhedrin, bat olketa no forgetim tu hao toktok bilong Jesus abaotem wei wea olketa follower bilong hem bae kasem persecution hem tru. Samting wea Gamaliel duim hem stopem plan bilong olketa bigman bilong religion for finisim olketa, bat datwan no stopem persecution evribit, bikos story go ahed for sei: “So olketa lisin long hem, and olketa kolem olketa aposol, whipim olketa, and orderim olketa for no tok long nem bilong Jesus, and letem olketa go.”—Acts 5:40.
16 Taem olketa tekem Jesus long kot, Pontius Pilate, wea no faendem hem duim eni rong samting, hem trae for letem Jesus go. Bat hem no win. (John 18:38, 39; 19:4, 6, 12-16) Nomata tufala member bilong Sanhedrin, Nicodemus and Joseph bilong Arimathea, wea lisin long Jesus, no savve duim eni samting for stopem datfala kot for duim samting againstim Jesus. (Luke 23:50-52; John 7:45-52; 19:38-40) Help wea olketa man savve givim taem olketa saed witim pipol bilong Jehovah—nomata wanem samting nao muvim olketa—hem lelebet nomoa. World bae go ahed for heitim olketa tru follower bilong Christ, olsem olketa heitim hem tu. Jehovah nomoa bae stopem diswan for olowe.—Acts 2:24.
17. Wanem stretfala tingting nao Olketa Jehovah’s Witness garem, bat why nao olketa no wikdaon for go ahed preachim gud nius?
17 From olketa garem stretfala tingting, Olketa Jehovah’s Witness expectim persecution for go ahed. Wei for againstim olketa bae finis only bihaen system bilong Satan hem finis evribit. Nomata olsem, disfala persecution, wea no mas gud, hem no mekem olketa Witness for hol bak for fulfillim assignment bilong olketa for preachim Kingdom. Why nao olketa shud hol bak, from God nao saportim olketa? Olketa luk long strongfala Leader bilong olketa, Jesus Christ, olsem stretfala example.—Acts 5:17-21, 27-32.
18. Wanem hardfala taem nao stap yet front long pipol bilong Jehovah, bat wanem nao bae happen wea olketa barava sure long hem?
18 From barava start bilong hem, trufala religion feisim strongfala wei for againstim. Klosap nao hem bae kasem bigfala attak bilong Gog, Satan wea kamap barava nogud start from taem wea olketa aotem hem from heven. Bat trufala religion bae go ahed for stap. (Ezekiel 38:14-16) “Olketa king evriwea long earth,” anda long lead bilong Satan “bae faet againstim Lamb, bat, from hem Lord bilong olketa lord and King bilong olketa king, Lamb bae winim olketa.” (Revelation 16:14; 17:14) Tru nao, King bilong iumi hem muv go for win and klosap nao bae hem “winim faet bilong hem evribit.” Hem wanfala bigfala privilege for muv witim hem, for savve hao klosap nao no eniwan bae againstim moa olketa wea worshipim Jehovah taem olketa sei: “God hem stap witim iumi”!—Romans 8:31; Philippians 1:27, 28.
Waswe, Iu Savve Minim?
• Wanem nao Jehovah duim for strongim Christian kongregeson start kam from taem wea Kingdom hem start?
• Wanem nao Satan hem duim for trae stopem Christ for winim faet bilong hem evribit, and wanem nao kamaot from diswan?
• Wanem balance tingting nao iumi shud garem abaotem gudfala samting wea pipol wea no Witness olketa duim?
• Wanem nao Satan klosap for duim, and wanem nao bae kamaot from datwan?
[Piksa long page 18]
Olketa convention showimaot wei wea pipol bilong Jehovah muv ahed
[Olketa Piksa long page 20]
Wei wea olketa Witness no teksaed long taem bilong World War II hem still givim praise long Jehovah