Word Bilong Jehovah Hem Laef

Olketa Main Point From Buk Bilong Second Samuel

WASWE, for showimaot iumi luksavve long sovereign rul bilong Jehovah, iumi mas obeyim hem long perfect wei? Waswe, man wea faithful hem evritaem duim samting wea stret long eye bilong God? Wanem kaen man nao God “lovem from heart bilong hem”? (1 Samuel 13:14) Bible buk bilong Second Samuel barava ansarem gud olketa kwestin hia.

Gad and Nathan, tufala profet wea fren bilong King David long Israel bifor, tufala nao raetem Second Samuel.a Olketa finis for raetem long samting olsem 1040 B.C.E., klosap long end bilong 40 year wea David rul olsem King. Main samting wea disfala buk hem story abaotem hem David and wei wea hem fren witim Jehovah. Hem wanfala interesting story abaotem wanfala nation wea fulap witim trabol wea gogo, kamap nation wea garem gudfala living and kasem wan mind taem wanfala strongfala king rul ovarem olketa. Hem mekem man barava interest for readim, and olketa raetem long wei wea showimaot strongfala feeling bilong olketa man wea hem story abaotem.

“MOA AND MOA PIPOL FOLLOWIM DAVID”

(2 Samuel 1:1–10:19)

Feeling bilong David for Saul, Jonathan and Jehovah tu, hem showaot klia tumas taem hem barava sorre taem tufala hia dae. Long Hebron, David kamap king bilong tribe bilong Judah. Son bilong Saul, Ish-bosheth, kamap king bilong evri nara tribe bilong Israel. “Moa and moa pipol followim David,” and samting olsem seven and haf year bihaen, hem kamap king bilong full Israel.—2 Samuel 5:10.

David tekovarem Jerusalem from olketa Jebusite and hem mekem datwan kapitol bilong kingdom bilong hem. Fastaem wea hem trae for tekem ark bilong covenant long Jerusalem, wanfala barava nogud samting happen. Nomata olsem, long mek-tu taem hem win for duim datwan, and David hem dance for showimaot hapi bilong hem. Jehovah mekem covenant witim David for wanfala kingdom. David winim olketa enemy bilong hem and God gohed for blessim hem.

Ansa for Olketa Bible Kwestin:

2:18—Why nao Bible kolem Joab and tufala brata bilong hem, thrifala son bilong Zeruiah, wea hem mami bilong olketa? Long olketa Hebrew Scripture, plande taem record bilong famili laen hem followim dadi. Maet hasband bilong Zeruiah hem dae longtaem finis, or maet hem no fitim for nem bilong hem stap insaed long olketa Holy Scripture. Maet olketa listim nem bilong Zeruiah from hem sista or haf sista bilong David. (1 Chronicles 2:15, 16) Only taem Bible storyim dadi bilong thrifala brata hia, hem taem hem dae and olketa berem hem long Bethlehem.—2 Samuel 2:32.

3:29—Wanem nao mining bilong datfala toktok, “wanfala man wea holem twirling spindle” [samting olketa iusim for wakem wool]? Hem waka bilong olketa woman for wakem kaleko. Dastawe, datfala toktok maet minim olketa man wea no fit for faet long olketa war, and from diswan, mas duim waka bilong olketa woman.

5:1, 2—Haomas taem go pas bihaen olketa killim dae Ish-bosheth bifor David kamap king bilong full Israel? Luk olsem start bilong rul bilong Ish-bosheth, hem no longtaem bihaen Saul hem dae and long semtaem wea David kamap king long Hebron. Ish-bosheth hem rul for tufala year nomoa. David rul ovarem Judah from Hebron for seven and haf year. No longtaem bihaen hem kamap king bilong full Israel, hem mekem Jerusalem kamap kapitol. So, samting olsem faevfala year go pas from taem wea Ish-bosheth hem dae, go kasem taem wea David kamap king bilong full Israel.—2 Samuel 2:3, 4, 8-11; 5:4, 5.

8:2—Taem Israel faet witim olketa Moabite, haomas Moabite nao olketa killim dae? Luk olsem maet olketa measurem olketa and no kaontem. David mekem olketa Moabite leidaon long graon saed long each other. Then hem iusim wanfala rope or string for measurem olketa laen hia. Luk olsem olketa killim dae tufala laen, wea minim bigfala haf bilong olketa Moabite, and wanfala laen, wea minim smol haf, olketa stap laef.

Olketa Leson for Iumi:

2:1; 5:19, 23. Bifor David hem go for stap long Hebron and bifor hem faetem olketa enemy, hem luk aotem Jehovah. Iumi tu shud luk aotem direction bilong Jehovah bifor iumi mekem olketa disison wea bae affectim spiritual saed bilong iumi.

3:26-30. Wei for pei bak hem lead go long olketa nogud samting.—Romans 12:17-19.

3:31-34; 4:9-12. David hem nambawan example bilong wei for no garem fasin for heit and feeling for pei bak.

5:12. Iumi mas no forgetim hao Jehovah nao teachim iumi olketa wei bilong hem and openem wei for iumi fren gud witim hem.

6:1-7. Nomata David tingse hem duim stret samting, wei wea hem trae for muvim Ark antap long wanfala wagon hem againstim law bilong God and hem fail. (Exodus 25:13, 14; Numbers 4:15, 19; 7:7-9) And tu, wei wea Uzzah trae for holem Ark showimaot hao nomata man tingse hem duim gud samting, datwan no savve changem samting wea God askem.

6:8, 9. Taem nogud samting hem happen, fastaem David hem kamap kros, then hem fraet—maet hem blamem Jehovah tu for nogud samting wea happen. Iumi mas careful, nogud iumi blamem Jehovah for olketa problem wea iumi kasem from iumi no followim olketa komand bilong hem.

7:18, 22, 23, 26. Olketa fasin bilong David, olsem wei wea hem hambol, worshipim Jehovah nomoa, and interest for mekhae long nem bilong God, hem example for iumi followim.

8:2. Wanfala profesi wea Balaam talem 400 year bifor hem fulfill. (Numbers 24:17) Toktok bilong Jehovah hem evritaem kamap tru.

9:1, 6, 7. David keepim promis bilong hem. Iumi tu mas trae for duim samting wea iumi promis for duim.

JEHOVAH MEKEM TRABOL KASEM ANOINTED WAN BILONG HEM

(2 Samuel 11:1–20:26)

Jehovah hem sei long David: “Bae mi mekem famili bilong iu kasem trabol; and mi bae tekem olketa waef bilong iu and givim olketa long nara man, and hem bae leidaon witim olketa waef bilong iu andanit long disfala sun.” (2 Samuel 12:11) Why nao Jehovah talem datwan? Hem from sin wea David duim witim Bath-sheba. Nomata David repent and kasem forgiveness, hem kanduit missim samting wea bae kamaot from sin bilong hem.

Fasfala samting wea happen, datfala pikinini wea Bath-sheba bornem, hem dae. Then Amnom rapem haf sista bilong hem Tamar, young dota bilong David. For pei bak, brata bilong Tamar, Absalom, killim dae Amnon. Absalom mekem plan for againstim dadi bilong hem, and hem talemaot hao hem nao king long Hebron. Diswan forcem David for ranawe from Jerusalem. Absalom sleep witim tenfala concubine bilong dadi bilong hem wea stap for luk aftarem haos. Bihaen Absolem hem dae, David duim waka olsem king moa. Sheba, from tribe bilong Benjamin hem againstim David and from diswan hem dae.

Ansa for Olketa Bible Kwestin:

14:7—Wanem nao “sakol wea bone yet” hem piksarem”? Fire bilong sakol wea no bone kwiktaem hem piksarem pikinini wea laef.

19:29—Why nao David tok olsem taem Mephibosheth explainim reason why hem no go witim David? Taem David herem toktok bilong Mephibosheth, masbi hem luksavve hao hem nao mistek taem hem bilivim toktok bilong Ziba. (2 Samuel 16:1-4; 19:24-28) Luk olsem, diswan mekem David feel kros and hem no laek herem eni moa samting saed long datwan.

Olketa Leson for Iumi:

11:2-15. Trufala story abaotem olketa sin bilong David pruvim hao Bible hem barava Word bilong God.

11:16-27. Taem iumi duim wanfala serious sin, iumi shud no trae for haedem datwan olsem David hem duim. Bat, iumi shud talemaot sin bilong iumi long Jehovah and luk aotem help from olketa elder long kongregeson.—Proverbs 28:13; James 5:13-16.

12:1-14. Nathan showimaot nambawan example for olketa elder long kongregeson. Olketa stap for helpem olketa wea sin for kamap gud moa. Olketa mas savve hao for duim gud disfala responsibility.

12:15-23. Wei wea David garem stretfala tingting abaotem samting wea kasem hem, helpem hem for deal witim hard samting long gudfala wei.

15:12; 16:15, 21, 23. Taem luk olsem Absalom bae kamap king, praod fasin and wei for aftarem bignem mekem Ahithophel, wea David depend long hem from hem savve tumas for givim advaes, for nating loyal long David. Wei for garem savve bat no garem hambol and loyal fasin hem savve kamap wanfala trap.

19:24, 30. Mephibosheth hem barava tinghae long loving-kaeness bilong David. Hem willing for acceptim disison bilong king abaotem Ziba. Fasin for tinghae long Jehovah and organization bilong hem shud muvim iumi for stap anda.

20:21, 22. Wisdom bilong wanfala man savve mekem plande pipol missim bigfala trabol.—Ecclesiastes 9:14, 15.

LETEM “JEHOVAH NAO JUDGEM IUMI”

(2 Samuel 21:1–24:25)

Bigfala hangre kamap for thrifala year from wei wea Saul hem guilty long blood taem hem killim dae olketa Gibeonite. (Joshua 9:15) Olketa Gibeonite ask for sevenfala son bilong Saul wea olketa mas killim dae for changem bak datwan. David givim olketa hia long olketa Gibeonite, and bigfala rain foldaon wea endim datfala drae season. ‘David and olketa servant bilong hem killim dae’ fofala Philistine giant.—2 Samuel 21:22.

David duim bigfala sin taem hem duim census wea Jehovah no appruvim. Hem repent and laekem for ‘Jehovah nao judgem hem.’ (2 Samuel 24:14) From diswan, 70,000 pipol dae from nogud sik. David duim samting wea Jehovah komandim hem for duim and datfala sik hem finis.

Ansa for Olketa Bible Kwestin:

21:8—Why nao disfala scripture hem sei dota bilong Saul, Michal, garem faevfala son, bat 2 Samuel 6:23 sei hem no garem eni pikinini go kasem taem hem dae? Plande pipol agree hao olketa boy hia nao olketa son bilong waef bilong Adriel, Merab, wea hem sista bilong Michal. Luk olsem Merab hem dae and Michal wea no garem eni pikinini, hem nao bringimap olketa boy hia.

21:9, 10—Hao long nao Rizpah gohed stap witim body bilong tufala son bilong hem and faevfala granson bilong Saul wea olketa Gibeonite killim olketa dae? Olketa hangem sevenfala hia “long start bilong harvest,” wea minim March or April. Olketa leavim dead body bilong olketa antap long wanfala maunten. Rizpah stap witim sevenfala body hia evri day and naet go kasem taem Jehovah endim datfala drae season wea showimaot kros bilong hem finis. Hem hard for eni bigfala rain kam bifor harvest season hem finis long October. So luk olsem Rizpah maet stap long there for samting olsem faev or sixfala month. Bihaen, David berem bon bilong olketa man hia.

24:1—Why nao datfala taem wea David kaontem pipol hem wanfala big sin? Law no tambuim wei for duim wanfala census. (Numbers 1:1-3; 26:1-4) Bible no talem why nao David kaontem olketa pipol. Bat, 1 Chronicles 21:1 storyim hao Satan nao muvim hem for duim diswan. Nomata wanem nao muvim David duim diswan, chief bilong army bilong hem, Joab, savve hao diswan hem rong and hem trae for stopem hem.

Olketa Leson for Iumi:

22:2-51. Song bilong David storyim long nambawan wei hao Jehovah hem trufala God wea barava fit for iumi trustim!

23:15-17. From David garem bigfala respect for law bilong God saed long laef and blood, hem no willing for duim samting sapos datwan luk olsem wei for brekem datfala law. Iumi mas garem semkaen tingting abaotem olketa komand bilong God.

24:10. Conscience bilong David muvim hem for repent. Waswe, conscience bilong iumi savve helpem iumi long sem wei?

24:14. David barava bilivim hao Jehovah showimaot moa mercy winim olketa man. Waswe, iumi garem strong biliv olsem?

24:17. David feel sorre hao full nation safa bikos long sin bilong hem. Wanfala sinner wea repent shud feel sorre sapos samting wea hem duim spoelem gudfala nem bilong kongregeson.

Iumi Savve Kamap ‘Man wea God Lovem From Heart Bilong Hem’

Mek-tu king bilong Israel hem ‘wanfala man wea Jehovah lovem from heart bilong hem.’ (1 Samuel 13:14) David nating daotem olketa raeteous standard bilong Jehovah, and hem no trae for independent from God. Taem David hem mistek hem talemaot sin bilong hem, acceptim discipline, and stretem wei bilong hem. David hem wanfala faithful man. Hem wise for iumi followim example bilong hem, especially taem iumi mistek.

Story bilong David showimaot klia hao wei for luksavve long sovereign rul bilong Jehovah minim iumi mas acceptim olketa standard bilong Hem saed long samting wea gud and nogud, and trae for faithful for followim olketa. Iumi fit for duim diswan. Iumi barava tinghae long olketa leson wea iumi savve lanem from buk bilong Second Samuel! Message from God insaed disfala buk hem barava laef and garem paoa.—Hebrews 4:12.

[Footnote]

[Piksa long page 16]

Wei for no forgetim hu nao mekem David kamap king helpem hem for hambol evritaem

[Olketa Piksa long page 18]

“Bae mi mekem famili bilong iu kasem trabol”

Bath-sheba

Tamar

Amnon