KAVA SUBJECT | WANFALA WAR WEA CHANGEM EVRI SAMTING

Hu Nao Bihaenem War and Wei for Safa?

World War I hem finis long November 11, 1918. Long datfala day olketa pipol no go waka, and staka pipol dance long street. Bat pipol hapi for lelebet taem nomoa. No longtaem bihaen, wanfala sik killim dae staka pipol winim World War I.

Long June 1918, datfala sik wea olketa kolem Spanish flu hem kasem olketa soldia wea faet long France. Datfala sik hem barava nogud. Olsem example, insaed tu-thri month nomoa, Spanish flu killim dae staka soldia bilong America wea datwan winim olketa wea dae insaed datfala faet. Taem war hem finis and olketa soldia go bak long hom bilong olketa, olketa pasim datfala sik long olketa narawan and hem spred go long staka ples long world.

Long olketa year bihaen datfala war, staka pipol hangre and kasem hard taem saed long selen. Taem war hem finis long 1918, pipol long staka ples long Europe no garem inaf kaikai. Kasem 1923, selen bilong Germany no fit for baem eni samting. Sixfala year bihaen datwan, economy bilong full world hem nogud nao. Gogo long 1939, World War II hem start. Wanem nao bihaenem olketa nogud samting hia?

SAEN BILONG OLKETA LAST DAY

Olketa Bible profesi helpem iumi for luksavve long wanem nao bihaenem World War I and samfala nara samting wea happen. Jesus Christ profesi abaotem taem wea ‘pipol long wanfala ples bae faetem pipol long nara ples,’ and olketa barava nogud sik and bigfala hangre bae kasem plande pipol. (Matthew 24:3, 7; Luke 21:10, 11) Hem talem olketa disaepol bilong hem, olketa samting hia hem saen bilong olketa last day. Bible buk bilong Revelation showimaot hao olketa nogud samting wea happen long earth hem join witim wanfala big faet wea happen long heven.—Lukim box, “War Long Earth and War Long Heven.”

Long Revelation hem storyim tu fofala horse wea fofala man raedem. Thrifala long olketa man hia piksarem war, bigfala hangre, and barava nogud sik wea semsem olsem wanem Jesus profesi abaotem. (Lukim box, “Waswe, Fofala Man wea Raedem Horse Kam Finis?”) World War I hem startim wanfala taem wea pipol safa and datwan hem gohed yet. Bible showimaot Satan nao bihaenem olketa samting hia. (1 John 5:19) Waswe, eniwan savve stopem olketa nogud samting wea Satan duim?

Revelation helpem iumi for luksavve Satan garem “lelebet taem nomoa.” (Revelation 12:12) Dastawe hem kros fogud and hem bihaenem olketa nogud samting wea gohed long world distaem. And datwan pruvim Satan garem lelebet taem nomoa.

FINISIM EVRI SAMTING WEA DEVIL HEM DUIM

World War I barava changem evri samting. Hem firstaem for staka kantri join insaed long war. Diswan mekem pipol againstim gavman and spoelem wei wea pipol trustim olketa. Hem pruvim tu Jesus aotem Satan from heven. (Revelation 12:9) Taem Satan kam long earth, hem olsem wanfala nogud ruler wea luksavve lelebet taem nomoa stap for hem rul. Bihaen Satan finis for rul, olketa nogud samting wea World War I hem startim bae finis.

Taem iumi minim olketa samting wea Bible profesi abaotem, datwan helpem iumi for luksavve klosap nao Jesus Christ wea hem King long heven bae “finisim evri samting wea Devil hem duim.” (1 John 3:8) Staka million pipol prea for Kingdom bilong God for kam. Waswe, iu tu duim olsem? Olketa wea garem faith bae lukim God iusim datfala Kingdom for duim samting wea hem laekem long disfala earth. (Matthew 6:9, 10) Taem Kingdom bilong God hem rul, bae iumi no lukim eni war moa! (Psalm 46:9) Sapos iu lane abaotem datfala Kingdom, bae iu garem chance for lukim taem wea evriwan long earth bae stap long peace!—Isaiah 9:6, 7.

War Long Earth and War Long Heven

Samting olsem 1,900 year bifor World War I hem start, Satan sei for givim long Jesus “evri kantri long world.” (Matthew 4:8, 9) Jesus no letem datwan for switim hem, and gogo hem sei Satan hem “man wea rulim disfala world.” (John 14:30) And tu, aposol John sei “full world hem stap long paoa bilong Satan.”—1 John 5:19.

From Satan rulim disfala world, hem mek sense for sei hem nao bihaenem World War I and olketa nogud samting wea kamaot from datwan. Revelation storyim Satan nao bihaenem olketa nogud samting wea happen long 1914 kam kasem distaem. Olketa verse long Revelation chapter 12 explainim olketa samting wea happen:

Verse 7 Long heven, Michael (Jesus Christ) faetem datfala big snek (Satan).
Verse 9 Hem torowem go daon long earth Devil, “wea hem laea long evriwan long earth.”
Verse 12 “Earth and sea bae kasem barava nogud samting bikos Devil hem kam daon long iufala and hem kros fogud from hem savve hem garem lelebet taem nomoa.”

Olketa profesi long Bible and olketa samting wea happen long world showimaot datfala faet long heven hem happen bihaen Kingdom bilong God hem start for rul long heven long 1914.a So war long earth and war long heven hem happen long datfala important year.

a Lukim chapter 8 long buk, Wanem Nao Really Samting wea Bible Teachim? wea Olketa Jehovah’s Witness pablisim.

Waswe, Fofala Man wea Raedem Horse Kam Finis?

Man wea raedem horse wea kala bilong hem white hem wanfala King long heven. Datfala King hem Jesus Christ wea faet for defendim samting wea raeteous. (Psalm 45:4) Bihaen hem kamap King, first samting wea hem duim nao hem aotem Satan and olketa demon bilong hem from heven.—Revelation 6:2; 12:9.

Man wea raedem horse wea kala bilong hem red kasem paoa “for aotem peace from earth.” (Revelation 6:4) Start long 1914, war barava spoelem olketa man. Twenti-wan year bihaen World War I finis, World War II hem start, and pipol wea dae long datfala war hem staka winim olketa wea dae long World War I. Wanfala report sei long World War II samting olsem 60 million pipol nao dae. Start long 1945, olketa war maet gohed insaed samfala kantri nomoa bat olketa barava spoelem staka pipol. Samfala man wea raetem history sei insaed mek-20 century, winim handred million pipol dae long olketa war wea kamap.

Man wea raedem horse wea kala bilong hem blak and wea holem wanfala scale piksarem bigfala hangre. (Revelation 6:5, 6) Taem World War I hem gohed, olketa kantri wea faet againstim Germany stopem kaikai for kasem Germany. From datwan, samting olsem 750,000 pipol dae bikos olketa hangre. Long 1921, winim tu million pipol long Russia dae from hangre, and gogo sem samting tu happen long olketa nara kantri. So insaed mek-20 century, samting olsem 70 million pipol dae from hangre. Evri year, winim thri million pikinini wea no kasem faev year yet dae from olketa no garem inaf kaikai.

Man wea raedem horse wea kala bilong hem luk nogud piksarem olketa barava nogud sik wea killim dae pipol. (Revelation 6:8) Spanish flu hem firstfala big sik wea kamap long mek-20 century. Wanfala report sei datfala flu killim dae samting olsem 50 million pipol. Wanfala buk, Man and Microbes sei: “Disfala big sik hem wanfala barava nogud samting wea happen long history. Nomata pipol kasem samfala nogud sik wea kamap bifor, olketa sik hia no killim dae staka pipol kwiktaem olsem disfala flu.” Olketa sik olsem smallpox, malaria, and TB killim dae plande handred million pipol insaed mek-20 century.