‘Kliarem Road wea Iu Wakabaot Followim’

TAEM olketa Israelite lusim Babylon for go bak long Jerusalem long 537 B.C.E., Jehovah laek helpem olketa long datfala gogo. Hem sei: “Kliarem road wea olketa bae followim. Buildimap datfala road. Aotem olketa ston wea stap long hem.” (Isa. 62:10) Tingim wanem samfala Jew duim for followim toktok hia. Samfala grup wea go firstaem fulimap olketa hol long road, and levelim samfala part wea nogud. Datwan mekem hem isi for olketa Israelite wea wakabaot long datfala road taem olketa go bak long Jerusalem.

For kasem olketa spiritual goal hem olsem iumi mas wakabaot followim wanfala road tu. Jehovah laekem evriwan wea worshipim hem for gohed kasem olketa spiritual goal, and no letem eni samting for blokem olketa. Bible sei: “Sapos iu levelim road wea iu wakabaot followim, evri samting wea iu duim bae hem gud.” (Prov. 4:26) Nomata iu young or no young tumas, iumi evriwan savve kasem gudfala samting sapos iumi followim datfala advaes.

MEKEM OLKETA GUDFALA DISISON

Bible sei: “Strong wea olketa young wan garem nao mekem olketa kasem praise.” (Prov. 20:29) Staka young wan healthy, strong, kleva, and laek for kasem gud samting long laef. Staka pipol luksavve olketa young wan garem savve and olketa laekem olketa for iusim datwan for kasem gud samting long laef. Olketa young wea iusim savve and strong bilong olketa for worshipim Jehovah bae barava hapi.

Samfala pipol long world barava tinghae long savve wea olketa young wan bilong iumi garem. Olsem example, taem wanfala young Witness kasem gud mark long skul, maet wanfala teacher or narafala student sei hem shud aftarem hae education. Or maet samwan askem wanfala young wan wea savve hao for pleim sports for duim diswan olsem waka bilong hem for selen. Maet kaen samting olsem kasem iu, or maet iu savve long eniwan wea kasem hevi olsem. Wanem nao bae helpem Christian for mekem gudfala disison long taem olsem?

Olketa Bible principle savve helpem iumi for duim wanem Jehovah laekem and for kasem gud samting long laef. Olsem example, tingim wanem Bible talem long Ecclesiastes 12:1: “Taem iu young yet, tingim Nambawan God wea wakem iu.” Wanem nao iu or nara young wan savve duim for tingim Jehovah?

Tingim story bilong Erica wea stap long West Africa. Hem laek tumas for plei soccer. Taem Eric hem 15 year, hem plei long wanfala national soccer team. No longtaem bihaen bae hem fit for go long Europe for kasem training, and gogo maet hem plei for wanfala team and kasem big selen from datwan. Long datfala taem, Eric start for studyim Bible witim Olketa Jehovah’s Witness. Hao nao datfala advaes for “tingim” Jehovah helpem Eric? And wanem nao iumi savve lanem from experience bilong hem?

Taem Eric studyim Bible, hem lanem God bae finisim olketa problem long world. Eric luksavve for duim wanem God laekem hem important winim soccer. So hem baptaes and iusim taem and strong bilong hem for duim waka bilong Jehovah. Gogo hem kamap ministerial servant and helpem kongregeson, and bihaen hem kasem spiritual training long Bible Skul for Olketa Singol Brata.

Sapos Eric hem gohed plei soccer, maet hem kasem staka selen and bignem. Bat hem luksavve disfala Bible principle barava tru: “Riches bilong man hem strongfala taon bilong hem, and long tingting bilong hem riches hia hem olsem wall wea protectim hem.” (Prov. 18:11) Staka pipol tingse selen savve protectim olketa, bat datwan no tru. And tu, olketa wea strong for aftarem riches savve “mekem olketa seleva for kasem staka problem wea barava spoelem olketa.”—1 Tim. 6:9, 10.

Staka young wan wea duim full-taem service olketa hapi and stap gud. Eric sei: “Mi joinim bigfala team bilong olketa wea duim full-taem service. Hem nao best team for mi stap insaed and mi thankiu long Jehovah for showim mi best wei for kasem bigfala hapi and gudfala laef.”

Waswe long iu? Waswe, iu savve duim moa samting long waka bilong Jehovah, winim wei for aftarem olketa samting long world? Waswe, iu savve traem best for duim pioneer waka?—Lukim box wea garem title “Kasem Gud Samting wea Man No Savve Kasem Long University.”

AOTEM SAMTING WEA BLOKEM ROAD

Wanfala hasband and waef wea visitim United States branch office lukim olketa Bethelite wea servem Jehovah long there olketa hapi. Bihaen, datfala sista sei tufala luksavve tufala fit for duim moa samting for worshipim Jehovah. Tufala disaed for markem moa taem and iusim strong for kasem samfala nara privilege insaed organization.

Hem no isi for tufala mekem olketa change long laef bilong tufala. Bat wanday, tufala ting raonem toktok bilong Jesus long John 8:31 wea sei: “Sapos iufala followim teaching bilong mi, iufala barava disaepol bilong mi nao.” Tufala luksavve for showimaot tufala tru disaepol bilong Jesus, tufala mas sakrifaesim samting, and Jehovah bae blessim eni sakrifaes wea tufala duim for mekem laef bilong tufala simpol. Tufala salem big haos and olketa nara samting wea tufala no needim, and muv go long wanfala kongregeson wea needim help. Distaem tufala pioneer and help tu for buildim olketa Kingdom Hall and duim volunteer waka long olketa distrik convention. Wanem nao feeling bilong tufala? Tufala sei: “Mitufala barava hapi from mifala mekem laef bilong mifala simpol and mifala duim wanem organization bilong Jehovah encouragem iumi for duim.”

MUV AHED LONG SPIRITUAL WEI

King Solomon sei: “Eye bilong iu shud lukluk long front, and iu shud no lukluk olobaot.” (Prov. 4:25) Wanem nao diswan minim? Iumi mas evritaem tingting strong for duim wanem Jehovah laekem. Iumi shud stap klia long eni samting wea savve stopem iumi for markem olketa spiritual goal and for kasem olketa goal hia.

1. Jehovah’s Witnesses using their youth to achieve spiritual goals; 2. A path cleared of obstacles

Wanem nao samfala spiritual goal wea iu savve markem? Wanfala gud goal for garem nao hem full-taem service. Narafala goal hem for go helpem wanfala kongregeson klosap long hom bilong iu wea needim olketa pablisa for preach long bigfala territory bilong olketa. Sapos iu wanfala brata, maet iu savve go helpem kongregeson wea no garem inaf elder or ministerial servant. Iu savve story witim circuit overseer for savve wanem kongregeson nao needim help. Sapos iu interest for go long farawe ples long kantri bilong iu or long nara kantri, iu savve askem information abaotem olketa kongregeson wea needim help.b

Distaem iumi tingim moa samting wea Isaiah 62:10 hem talem. From olketa Jew mas go bak long Jerusalem, samfala long olketa mas barava waka hard for levelim road. Distaem iumi tu need for waka hard for kasem olketa spiritual goal bilong iumi. No givap. God bae helpem iu for kasem olketa goal hia. Gohed askem Jehovah for wisdom taem iu trae for aotem olketa samting wea maet blokem iu. Gogo bae iu lukim hao Jehovah savve helpem iu for “levelim road wea iu wakabaot followim.”—Prov. 4:26.

a Mifala changem nem.

b Lukim Organized to Do Jehovah’s Will, page 111-112.

Kasem Gud Samting wea Man No Savve Kasem Long University

TAEM Flavia hem young gele, granmami bilong hem wea hem wanfala Jehovah’s Witness, storyim Bible long hem. Bat dadi bilong hem wanfala teacher and trae for mekem Flavia tinghae long wei for lane abaotem nature and for go long big skul. Pipol savve sei long hem: “Genereson bilong iu savve sevem earth.” Dadi bilong hem sapotim hem for go long wanfala university, and hem lane for duim research long hao for wakem fuel wea no savve spoelem air.

Taem Flavia long university hem luksavve staka student nating interest for ‘sevem earth.’ And tu, samfala program long university depend long olketa bisnis for sapotim olketa saed long selen, so maet pipol wea duim research long olketa program hia duim samting wea olketa bisnis hia laekem. Flavia no hapi long diswan. Taem Olketa Jehovah’s Witness kam long haos bilong hem, hem interest moa long wanem Bible talem abaotem God and future.

Flavia tinghae long olketa tru teaching long Bible and hem baptaes. Bat hem no garem staka taem for duim preaching waka bikos hem skul long university. Then wantaem hem herem circuit overseer storyim James 4:17 wea sei: “Sapos man hem savve nomoa long stretfala samting for duim bat hem no duim datwan, hem sin nao.” Datwan mekem Flavia for ting raonem wanem hem duim. Hem sei: “Mi laek for kasem blessing from Jehovah, bat long semtaem mi laek for duim gud waka bilong mi olsem scientist. So mi mas chus nao.”

Flavia disaed for finis for skul long university. Waswe, hem sorre bihaen long datfala disison? Hem sei:

“Taem mi waka for Jehovah, mi kasem gud samting wea man no savve kasem long university. Jehovah hem barava tingim mi. Hem lanem mi hao for kaen, for showimaot love, and for helpem pipol long spiritual wei. Mi garem hapi marit and hope wea winim wanem science savve givim. Jehovah nomoa savve sevem disfala earth. Mi bae no lusim hem.” Flavia and hasband bilong hem waka long hedquarter bilong Olketa Jehovah’s Witness long New York.