Iu Savve Winim Samting wea Switim Iu!
“Mi no ting for lukluk long pornography. Bat taem mi lukluk long Internet wanfala advertisement kamap long computer. Mi no savve why, bat mi go lukim nao.”—CODY.a
“Long ples wea mi waka, wanfala naesbola gele trae for switim mi. Wantaem hem sei for mitufala seleva go long wanfala motel. Mi savve wanem nao hem laekem mitufala for duim.”—DYLAN.
SAMFALA pipol tingse hem no rong for followim feeling bilong olketa for duim samting wea no stret. Bat olketa narawan laek for winim samting wea switim olketa. Hao nao tingting bilong iu? Taem samting switim iu, waswe, iu shud followim feeling bilong iu, or trae for winim datwan?
Man wea letem samting for switim feeling bilong hem, especially for durong, savve kasem barava nogud samting. Bible warnim iumi: “Eniwan wea duim adultery . . . hem no garem gudfala tingting. Man wea duim datwan bae kasem nogud samting.”—Proverbs 6:32, 33.
Wanem nao iu shud duim sapos seknomoa wanfala samting hem switim iu for duim samting wea no stret? Bible sei: “Wanem God hem laekem nao, hem for iufala holy and for iufala no durong. Iufala wanwan mas savve hao for kontrolem body bilong iufala mekem iufala holy and God hem hapi long iufala.” (1 Thessalonica 4:3, 4) Hao nao iu savve kontrolem iuseleva? Tingim thrifala samting wea savve helpem iu.
First Samting: No Gohed Lukluk
Sapos iumi lukluk long olketa rabis piksa, datwan savve mekem iumi garem strongfala feeling for laek durong. Jesus showimaot datwan hem tru taem hem talem disfala warning: “Eniwan wea gohed for lukluk long wanfala woman and laek for durong witim hem, hem duim adultery finis witim hem long heart bilong hem.” Jesus sei tu: “Sapos eye bilong iu mekem iu for sin, aotem datwan and torowe.” (Matthew 5:28, 29) Wanem nao disfala toktok bilong Jesus teachim iumi? Iumi mas disaed strong for no lukluk long samting wea savve switim iumi for durong.
Luk difren taem iu lukim samting wea savve switim iu
Tingim sapos iu lukim wanfala braet laet wea savve spoelem eye bilong iu. Waswe, bae iu gohed lukluk long datfala laet? Nomoa! Bae iu luk difren or kavarem eye mekem laet hia no spoelem eye bilong iu. Long sem wei tu, sapos iu lukim samting long buk, long computer, or lukim samwan wea mekem iu garem feeling for laek duim sex, iu mas kwiktaem luk difren. Wei for duim olsem bae helpem iu for no gohed tingim datwan. Juan, wea bifor hem savve lukluk long pornography olowe, hem sei: “Taem mi lukim wanfala naesbola woman, mi laek for gohed lukluk long hem. So mi mas forcem miseleva for luk difren and mi luksavve mi mas stretawe prea long Jehovah. Bihaen mi prea, mi no gohed tingim datfala woman nao.”—Matthew 6:9, 13; 1 Corinth 10:13.
Tingim tu example bilong Job wea faithful long God. Hem sei: “Mi mekem promis finis. So bae hem hard for mi lukluk long eni gele long wei wea mekem mi garem tingting for durong witim hem.” (Job 31:1) Hem bae gud for iumi garem sem tingting olsem Job.
Traem diswan: Sapos iu lukim samting wea mekem iu garem feeling for laek duim sex, iu mas kwiktaem luk difren. Hem gud for followim samting wea disfala Psalm talem: “No letem eye bilong mi lukim rabis samting.”—Psalm 119:37.
Mek-tu Samting: Kontrolem Tingting Bilong Iu
Iumi evriwan no perfect, so samfala taem iumi garem feeling for laekem samting wea no stret. Bible hem sei: “Samting wea man seleva laekem nao savve traem hem. Taem datfala feeling for laekem samting hem kamap strong tumas, hem mekem man for duim sin.” (James 1:14, 15) Sapos iumi gohed tingim samting wea no stret, gogo iumi savve duim sin. Wanem nao iumi savve duim for stopem datwan?
Taem iu tingim olketa nogud samting, stretawe prea
Taem iu garem strongfala feeling for laek duim samting wea no stret, iu savve disaed for no followim datfala feeling. No gohed for tingim samting wea iu laekem. Troy, wea bifor hem savve lukluk olowe long pornography long Internet, hem sei: “For mekem mi no gohed tingim olketa nogud samting, mi mas tingim olketa gud samting. Hem no isi and staka taem mi no savve duim datwan. Bat gogo mi lane for kontrolem tingting bilong mi.” Wanfala woman wea nem bilong hem Elsa wea taem hem teenager hem savve olobaot hem sei, “Wei for busy and prea long Jehovah helpem mi for no tingim olketa nogud samting.”
Traem diswan: Taem iu garem strongfala feeling for duim samting wea no stret, stretawe prea long Jehovah. No gohed tingim olketa nogud samting, bat “tingim evri samting wea tru, evri samting wea important, evri samting wea raeteous, evri samting wea klin, evri samting wea mekem man garem love, evri samting wea fit for kasem respect, evri samting wea hem gud, and evri samting wea fit for kasem praise.”—Philippi 4:8.
Mek-thri Samting: Kontrolem Iuseleva
Taem samting switim man for duim samting wea hem laekem and hem garem chance for duim datwan, nogud samting savve kamaot from diswan. (Proverbs 7:6-23) Sapos datwan happen long iu, wanem nao savve helpem iu for no duim samting wea switim iu?
“Mi lukluk long Internet nomoa taem olketa narawan stap”
Bible sei: “Man wea luksavve long samting wea danger hem protectim hemseleva. Bat man wea no luksavve long datwan bae gohed nomoa and kasem nogud samting.” (Proverbs 22:3) So lane for kontrolem iuseleva. Luksavve long olketa samting wea savve switim iu, and stap klia long olketa samting hia. (Proverbs 7:25) Wanfala man wea nem bilong hem Filipe, wea lusim wei for lukluk long pornography, hem sei: “Mi putim computer long ples wea evriwan long famili savve lukim and mi putim program long computer for blokem olketa rabis piksa long Internet. And mi lukluk long Internet nomoa taem olketa narawan stap.” Troy wea iumi storyim finis sei: “Mi no lukim olketa rabis movie and mi no associate witim pipol wea mekhae long wei for durong. Mi no laek for duim eni samting wea bae switim mi for duim samting wea no stret.”
Traem diswan: Luksavve long olketa samting wea savve switim iu, and duim samting mekem iu stap klia long olketa samting hia.—Matthew 6:13.
NO GIVAP!
Hao sapos iu traem best bilong iu for duim stret samting, bat iu no win yet long diswan? No givap. Bible sei: “Nomata sapos raeteous man hem foldaon sevenfala taem, bae hem standap moa.” (Proverbs 24:16) Dadi bilong iumi long heven encouragem iumi for “standap moa.” Hem gud for acceptim help bilong hem and evritaem prea long hem. Bae iu garem strongfala faith taem iu studyim Bible. Bae iu kasem help for no givap taem iu go long olketa Christian meeting. Trustim disfala promis bilong God: “Mi bae strongim iu. Mi bae barava helpem iu.”—Isaiah 41:10.
Cody, wea iumi storyim finis sei: “Mi barava waka hard for lusim wei for lukluk long pornography. Nomata staka taem hem no isi, God helpem mi for duim datwan.” Dylan wea iumi storyim bifor sei: “Bae hem isi nomoa for mi go witim datfala gele long motel for durong witim hem. Bat mi laek for duim stret samting, so mi talem hem ‘Bae mi no duim datwan!’ Mi hapi tumas bikos mi garem gudfala konsens. Bat samting wea winim datwan nao, mi savve Jehovah barava hapi long mi.”
Taem iu strong for duim stret samting and no letem eni samting switim iu, iu savve sure God bae hapi long iu tu!—Proverbs 27:11.
a Long disfala article, mifala changem olketa nem.