Iumi Savve Stap Klia Long Wei for Durong
“Wasim hand bilong iufala, and . . . klinim heart bilong iufala.”—JAS. 4:8.
1. Wanem nao hem big tumas long world distaem?
WEI for durong hem big tumas long world distaem. Olsem example, staka pipol sei hem olraet nomoa for man sleep witim man or woman sleep witim woman, or for tufala wea no marit sleep tugeta. Staka movie, buk, singsing, and advertisement mekhae long wei for durong. (Ps. 12:8) Nomata olsem, Jehovah savve helpem iumi for evritaem duim wanem hem laekem. Iumi savve stap klia long wei for durong long disfala world wea staka pipol olobaot.—Readim 1 Thessalonica 4:3-5.
2, 3. (a) Why nao iumi mas rejectim feeling for laekem rong samting? (b) Wanem nao bae iumi storyim long disfala study?
2 Sapos iumi laekem Jehovah for hapi long iumi, iumi mas rejectim olketa samting wea Hem no laekem. Bat from iumi no perfect, maet iumi start for garem tingting for laek durong, olsem fish wea laek kaikaim bait long wanfala huk. Sapos iumi start for garem dirty tingting, iumi mas kwiktaem aotem datwan. Sapos iumi no duim olsem, feeling for laek durong bae kamap strong, and taem chance kamap maet iumi durong nao. Hem nao wanem Bible talem. Hem sei: “Taem datfala feeling for laekem samting hem kamap strong tumas, hem mekem man for duim sin.”—Readim James 1:14, 15.
3 Feeling for laekem rong samting savve grow insaed heart bilong iumi. Dastawe iumi mas barava careful long wanem iumi start for laekem. Sapos iumi rejectim feeling for laekem rong samting, bae iumi stap klia long wei for durong and misstim olketa nogud samting wea kamaot from datwan. (Gal. 5:16) Long disfala study, iumi bae storyim thrifala samting wea savve helpem iumi for faet againstim feeling for laekem rong samting. Thrifala samting hia nao: wei wea iumi fren witim Jehovah, kaonsel from Bible, and help wea iumi kasem from olketa mature Christian.
“FREN GUD WITIM GOD”
4. Hao nao wei for fren gud witim Jehovah helpem iumi for rejectim dirty tingting?
4 Bible sei olsem long olketa wea laek for “fren gud witim God”: “Wasim hand bilong iufala, and . . . klinim heart bilong iufala.” (Jas. 4:8) Taem iumi tinghae long wei for fren witim Jehovah, bae iumi laekem hem for hapi long samting wea iumi duim, and samting wea iumi tingim. Sapos iumi evritaem tingim olketa samting wea klin, heart bilong iumi tu bae klin. (Ps. 24:3, 4; 51:6; Phil. 4:8) Jehovah savve from iumi no perfect maet iumi start for garem dirty tingting. Bat from iumi no laek for mekem Jehovah feel sorre, iumi traem best bilong iumi for rejectim kaen tingting olsem. (Gen. 6:5, 6) Iumi disaed strong for evritaem tingim olketa samting wea klin.
5, 6. Hao nao prea savve helpem iumi for rejectim feeling for laek durong?
5 Jehovah bae helpem iumi for rejectim dirty tingting sapos iumi prea for help bilong hem. Hem givim holy spirit for strongim iumi mekem iumi savve stap klia long wei for durong. Taem iumi prea long Jehovah, iumi savve talem long hem iumi laek for garem tingting wea mekem hem hapi. (Ps. 19:14) Iumi savve askem hem for lukluk gud long iumi nogud iumi garem eni nogud tingting insaed heart bilong iumi wea savve leadim iumi for duim sin. (Ps. 139:23, 24) Gohed askem Jehovah for helpem iu stap klia long wei for durong and for duim stret samting, nomata long taem wea datwan hem no isi.—Matt. 6:13.
6 Bifor iumi lanem truth maet iumi duim and enjoyim samfala samting wea Jehovah no hapi long hem, and maet iumi still garem feeling for laek duim olketa samting hia. Bat Jehovah savve helpem iumi for change and duim olketa samting wea mekem hem hapi. Olsem example, bihaen King David durong witim Bath-sheba, David repent and askem Jehovah for helpem hem gohed faithful and for garem “heart wea klin.” (Ps. 51:10, 12) Sapos iumi garem strong feeling for laek durong bifor iumi lanem truth, and iumi still garem olketa feeling hia, Jehovah savve helpem iumi for barava laek for obeyim hem and for duim stret samting. Jehovah savve helpem iumi for no garem dirty tingting.—Ps. 119:133.
Sapos rong tingting start for grow insaed heart bilong iumi, iumi mas kwiktaem aotem datwan (Paragraf 6 storyim diswan)
“IUFALA MAS FOLLOWIM TOKTOK BILONG GOD”
7. Hao nao Bible savve helpem iumi for rejectim dirty tingting?
7 Jehovah savve iusim Bible for ansarem olketa prea bilong iumi. Wisdom bilong God wea stap insaed Bible savve “mekem man for klin.” (Jas. 3:17) Taem iumi readim Bible evriday, datwan savve helpem iumi for tingim evritaem olketa samting wea klin. (Ps. 19:7, 11; 119:9, 11) And tu, Bible storyim samfala example and talem olketa warning wea savve helpem iumi for rejectim dirty tingting.
8, 9. (a) Hao nao gogo wanfala young man durong witim wanfala olobaot woman? (b) Datfala example long Proverbs chapter 7 helpem iumi for stap klia long wanem samting distaem?
8 Long Proverbs 5:8, Bible warnim iumi for stap klia long wei for durong. Long Proverbs chapter 7 hem storyim wanfala young man wea go wakabaot long wanfala evening klosap long haos bilong wanfala olobaot woman. Woman hia standap long street and “hem werem kaleko bilong jury woman.” Hem wakabaot go long datfala young man, grabim hem and kissim hem, and talem samfala toktok for switim hem for durong. Young man hia no rejectim feeling for laek durong, and hem durong nao witim datfala woman. Nomata long firstaem datfala young man no tingting for go duim sin, bat hem duim nao. And hem kasem barava nogud samting from datwan. Sapos datfala man garem wei for luksavve, bae hem no go klosap long datfala woman!—Prov. 7:6-27.
9 Olsem datfala young man, maet iumi tu mekem samfala disison wea hem no wise bikos iumi no luksavve long danger. Olsem example, long naet, samfala channel long TV savve showim olketa dirty movie, so hem danger samting for evritaem changem channel just for faendem program wea iu maet laek for lukluk long hem. Hem danger samting tu for click long wanfala link long Internet sapos iu no savve wanem Web site nao datfala link bae showim. And hem danger samting for iusim olketa chat room or Web site wea garem olketa advertisement wea switim pipol for durong, and olketa link for lukluk long olketa rabis piksa. Long olketa taem olsem, maet iumi lukim olketa samting wea mekem iumi garem feeling for laek durong, and datwan savve mekem iumi for duim samting wea Jehovah no laekem.
10. Why nao hem danger samting for switim feeling bilong narawan? (Lukim piksa long start bilong study.)
10 Bible storyim tu wei wea man and woman mas respectim each other. (Readim 1 Timothy 5:2.) Christian bae no switim feeling bilong samwan wea hem no marit partner bilong hem or wea hem no plan for maritim. Samfala maet duim samfala samting for showimaot olketa laekem narawan, olsem example, wei wea olketa luk long narawan, or akson bilong olketa. Olketa tingse hem olraet nomoa for duim olsem sapos tufala no tasim each other. Bat tufala wea duim olsem savve start for garem feeling wea no stret for each other, and gogo maet tufala durong nao. Samfala foldaon finis long diswan, and hem savve kasem iumi tu sapos iumi no careful.
11. Wanem gudfala example nao Joseph showimaot for iumi?
11 Joseph showimaot gudfala example for iumi. Waef bilong Potiphar trae for switim Joseph for durong witim hem. Joseph rejectim hem, bat woman hia no givap for trae switim Joseph. Evriday nao hem askem Joseph “for stap witim hem.” (Gen. 39:7, 8, 10) Wanfala savveman sei waef bilong Potiphar tingse sapos tufala stap seleva, maet Joseph bae laek for durong witim hem. Bat Joseph no letem datfala woman for switim hem, and Joseph tu no duim eni samting for switim datfala woman. From datwan, Joseph no garem feeling for laek durong witim datfala woman. So taem datfala woman grabim kaleko bilong Joseph and trae for forcem Joseph for durong witim hem, Joseph kwiktaem ranawe from datfala woman.—Gen. 39:12.
12. Hao nao iumi savve samting wea iumi lukluk long hem savve affectim heart bilong iumi?
12 Bible warnim iumi hao samting wea iumi lukluk long hem savve affectim heart bilong iumi and mekem iumi garem feeling for laek durong. Jesus sei: “Eniwan wea gohed for lukluk long wanfala woman and laek for durong witim hem, hem duim adultery finis witim hem long heart bilong hem.” (Matt. 5:28) Diswan nao samting wea happen long King David. Taem David wakabaot long ruf bilong haos bilong hem, “hem lukim wanfala woman hem swim.” (2 Sam. 11:2) Hem gohed for lukluk long datfala woman and tingting abaotem hem. Nomata woman hia hem marit woman, David start for laekem hem and gogo hem durong witim hem.
13. Why nao iumi mas evritaem careful long wei wea iumi lukluk long narawan, and wanem nao iumi mas duim?
13 Sapos iumi laek for rejectim dirty tingting, iumi mas followim example bilong Job for evritaem careful long wei wea iumi lukluk long narawan. (Job 31:1, 7, 9) Olsem Job, iumi savve disaed for no garem dirty tingting abaotem samwan wea iumi lukluk long hem. And sapos iumi lukim eni piksa wea savve mekem man garem dirty tingting long computer, long saen long saed road, long magasin, or long eni nara ples, iumi mas kwiktaem luk difren.
14. Wanem nao iumi mas duim for stap klia long wei for durong?
14 Taem iu ting raonem olketa samting wea iumi storyim finis, maet iu luksavve iu mas duim samfala samting moa for rejectim dirty tingting. Sapos iu need for changem samfala samting, kwiktaem duim datwan! Taem iu followim wanem Jehovah talem, iu bae stap klia long wei for durong.—Readim James 1:21-25.
‘ASKEM OLKETA ELDER FOR HELPEM IU’
15. Sapos iu faendem hem no isi for rejectim dirty tingting, why nao hem important for askem narawan for helpem iu?
15 Sapos iu faendem hem no isi for rejectim dirty tingting, story witim eni mature brata or sista long kongregeson wea bae givim gudfala advaes from Bible for helpem iu. Maet iu shame lelebet for storyim kaen samting olsem long narawan, bat hem important for askem narawan for helpem iu. (Prov. 18:1; Heb. 3:12, 13) Olketa mature Christian savve helpem iu luksavve long eni samting wea iu need for changem. Followim wanem olketa talem mekem iu savve gohed fren gud witim Jehovah.
16, 17. (a) Hao nao olketa elder savve helpem olketa Christian wea faendem hem no isi for rejectim dirty tingting? Storyim example. (b) Why nao hem important for olketa wea lukluk long olketa rabis piksa mas kwiktaem askem samwan for helpem olketa?
16 Olketa elder long kongregeson nao fit for helpem iumi. (Readim James 5:13-15.) Olsem example, wanfala young man long Brazil hem faet againstim rong tingting for staka year. Hem sei: “Mi savve Jehovah no hapi long samting wea mi tingim, bat mi shame for storyim datwan long narawan.” Wanfala elder luksavve datfala young man needim help, so elder hia encouragem hem for letem olketa elder helpem hem. Datfala young brata sei: “Mi sapraes for lukim wei wea olketa elder barava kaen and minim feeling bilong mi. Mi tingim datwan hem samting wea mi no fit for kasem. Olketa lisin long mi taem mi storyim problem bilong mi. Olketa iusim Bible for helpem mi lukim wei wea Jehovah lovem mi, and olketa prea for mi. Taem olketa duim datwan hem helpem mi for acceptim kaonsel wea olketa givim long mi.” Bihaen datfala brata strongim wei wea hem fren witim Jehovah, hem sei: “Distaem mi luksavve hem important for askem help from olketa narawan, winim wei for trae stretem seleva olketa problem bilong iumi.”
17 Sapos iu savve lukluk long olketa rabis piksa, iu mas kwiktaem askem samwan for helpem iu. Sapos iu no duim datwan kwiktaem, feeling for laekem samting wea no stret bae kamap strong, gogo maet hem leadim iu for durong. Datwan bae spoelem olketa narawan and spoelem nem bilong Jehovah. Staka Christian wea savve lukluk long olketa rabis piksa bifor, askem help from olketa elder and acceptim kaonsel wea olketa elder givim, bikos olketa laek for mekem Jehovah hapi and laek for gohed stap insaed Christian kongregeson.—Jas. 1:15; Ps. 141:5; Heb. 12:5, 6.
STAP KLIA LONG WEI FOR DURONG!
18. Wanem nao iu barava laek for duim?
18 Staka pipol long disfala world bilong Satan olketa durong. Bat pipol bilong Jehovah waka hard for evritaem tingim olketa samting wea klin and duim stret samting. Jehovah barava tinghae long datwan. Iumi laek for gohed fren gud witim Jehovah, followim wanem iumi lanem long Bible, and acceptim help wea iumi kasem from olketa mature Christian. Taem iumi duim datwan, iumi bae hapi and garem gudfala konsens. (Ps. 119:5, 6) And long future, taem Satan hem no stap, iumi savve laef olowe long raeteous niu world bilong God.