WASWE, IU SAVVE FINIS?

Long taem bilong Bible, why nao samfala man brekem kaleko bilong olketa?

BIBLE storyim samfala taem wea pipol brekem kaleko bilong olketa. Pipol wea readim Bible distaem maet tingse hem krangge samting for man brekem kaleko bilong hem. Bat olketa Jew duim datwan for showimaot feeling bilong olketa taem olketa sorre tumas, shame fogud, or barava kros.

Olsem example, Reuben “brekem kaleko bilong hem” taem hem luksavve hem no savve sevem brata bilong hem Joseph bikos olketa nara brata bilong hem salem Joseph for kamap slave. Taem dadi bilong olketa, Jacob, tingse wild animal killim dae Joseph, Jacob “brekem kaleko bilong hem.” (Gen. 37:​18-​35) Job “brekem kaleko bilong hem” taem hem herem evri pikinini bilong hem dae. (Job 1:​18-​20) Wanfala man for talem message “wea brekem kaleko bilong hem finis” kam long Hae Priest Eli for talem hem olketa Israelite lus long faet, olketa enemy killim dae tufala son bilong Eli, and olketa tekem ark bilong covenant. (1 Sam. 4:​12-​17) Taem olketa readim Law bilong Moses long Josiah, hem luksavve pipol bilong hem no followim datfala Law, so hem “brekem kaleko bilong hem.”​—⁠2 Ki. 22:​8-​13.

Long taem wea olketa kotem Jesus, Hae Priest Caiaphas “brekem kaleko bilong hem” taem hem sei samting wea Jesus talem hem barava nogud. (Matt. 26:​59-​66) Wanfala teaching bilong olketa rabbi sei man wea herem narawan tok spoelem nem bilong God mas brekem kaleko bilong hem. Bat nara teaching bilong olketa rabbi wea olketa mekem bihaen temple long Jerusalem hem distroe sei: “Man wea herem narawan tok spoelem nem bilong God distaem no need for brekem kaleko bilong hem nogud gogo evri kaleko bilong hem brek.”

Nomata man brekem kaleko bilong hem datwan no mekem God tinghae long hem sapos hem no barava sorre. Dastawe Jehovah talem pipol bilong hem for ‘no brekem kaleko bilong olketa,’ bat olketa mas barava sorre long wanem olketa duim and kam bak long hem.​—⁠Joel 2:​13.