Tinghae Long Wei wea Jehovah Lukluk Long Iumi

1, 2. Hao nao wei wea Jehovah lukluk long iumi hem difren from hao police iusim security camera?

LONG staka kantri police putim olketa security camera long road mekem olketa savve chekim traffic and tekem piksa bilong eni accident wea happen. Olketa camera tekem tu piksa bilong eni draeva wea bangam man long road and wea trae for ranawe and no helpem man wea hem bangam. Olketa piksa hia savve helpem police for faendem and arrestim olketa man olsem. From olketa putim staka camera long road, datwan helpem police faendem olketa criminal and panisim olketa.

² Bible sei Jehovah “lukluk evriwea.” (Prov. 15:3) Waswe, diswan minim hem evritaem lukluk long iumi for lukim sapos iumi brekem olketa law bilong hem? Waswe, hem lukluk long iumi for panisim iumi sapos iumi duim mistek? (Jer. 16:17; Heb. 4:13) Nomoa! Jehovah lukluk long iumi bikos hem lovem iumi and hem laekem iumi for stap gud and hapi.—1 Pet. 3:12.

3. Wanem nao faevfala wei wea Jehovah lukaftarem iumi?

³ Wanem nao bae helpem iumi for minim gud love wea God garem for iumi? Bae iumi storyim faevfala wei wea Jehovah lukaftarem iumi. (1) Hem warnim iumi firstaem bifor iumi duim nogud samting. (2) Hem stretem iumi taem iumi duim samting wea no stret. (3) Hem givim iumi olketa Bible principle for followim. (4) Hem helpem iumi taem iumi kasem olketa hard taem. (5) Hem blessim iumi taem iumi duim stret samting.

JEHOVAH WARNIM IUMI

4. Why nao God warnim Cain firstaem bifor hem duim sin?

⁴ First samting, iumi bae storyim olketa wei wea Jehovah warnim iumi firstaem bifor iumi duim nogud samting. (1 Chron. 28:9) Tingim example bilong Cain. Hem “barava kros” taem Jehovah no hapi long hem. (Readim Genesis 4:3-7.) Jehovah warnim Cain sapos hem no “change for duim gudfala samting,” bae hem duim sin. God sei, hem olsem sin ‘weit aotsaed long door’ and redi for kasholem Cain. Jehovah askem Cain: “Waswe, bae iu winim hem?” Jehovah laekem Cain for lisin long datfala warning mekem God “savve hapi moa long hem.” Sapos Cain followim datfala warning bae hem gohed fren gud witim God.

5. Wanem nao samfala wei wea Jehovah warnim iumi?

⁵ Sapos iumi followim olketa warning bilong God iumi bae gohed fren gud witim hem. Jehovah lukim wanem nao insaed long heart bilong iumi. Hem savve long tingting bilong iumi and wanem iumi laekem, and iumi no savve haedem eniting from hem. Hem lovem iumi and laekem iumi for duim stret samting, bat hem no forcem iumi for duim datwan. So sapos hem lukim nogud samting long heart bilong iumi, hem bae warnim iumi. Hao nao hem duim datwan? Iumi savve herem olketa warning bilong God taem iumi readim Bible evritaem, readim olketa pablikeson, and taem iumi go long olketa meeting. Waswe, enitaem iu readim or herem eni samting wea helpem iu for deal witim wanfala wik point bilong iu wea Jehovah nomoa savve abaotem? Jehovah givim olketa warning hia long barava taem wea iumi needim.

6, 7. (a) Wanem nao pruvim Jehovah lovem iumi wanwan? (b) For olketa warning bilong God helpem iumi, wanem nao iumi mas duim?

⁶ Olketa warning wea stap long Bible pruvim Jehovah lovem iumi wanwan. Hem tru, staka million pipol kasem gud samting from Bible, olketa pablikeson bilong iumi, and olketa meeting. Bat Jehovah laekem iumi wanwan for followim olketa warning bilong hem long Bible mekem iumi duim stret samting. Datwan pruvim hem lovem iumi wanwan.

⁷ For olketa warning bilong God helpem iumi, wanem nao iumi mas duim? First samting, iumi mas bilivim God lovem iumi, and then iumi mas followim wanem Bible talem. Sapos iumi garem eni tingting wea God no hapi long hem, iumi mas kwiktaem aotem datwan. (Readim Isaiah 55:6, 7.) Sapos iumi kwiktaem followim olketa warning wea God givim, iumi bae misstim staka problem. Waswe sapos iumi duim samting wea no stret? Waswe, Jehovah bae gohed lovem iumi?

DADI WEA LOVEM IUMI HEM STRETEM IUMI

8, 9. Taem samwan givim kaonsel long iumi wea kam from Bible, hao nao datwan showimaot Jehovah lovem iumi? Storyim example.

⁸ Taem Jehovah stretem iumi, iumi savve hem lovem iumi. (Readim Hebrew 12:5, 6.) Hem tru, iumi no laekem taem samwan kaonselem iumi, or stretem iumi. (Heb. 12:11) Bat taem samwan givim kaonsel long iumi wea kam from Bible, hem important for iumi luksavve why nao hem duim datwan. Hem no duim bikos hem laek mekem iumi feel nogud, bat hem lukim iumi duim samting wea savve spoelem wei wea iumi fren witim Jehovah. Hem willing for iusim taem bilong hem for showim iumi from Bible wanem iumi savve duim for fren bak witim Jehovah. Iumi tinghae long datfala kaonsel bikos hem kam from Jehovah.

⁹ Olsem example, wanfala brata evritaem savve lukluk long olketa rabis piksa bifor hem lanem truth. Taem hem lanem truth, hem stop nao for duim datwan. Gogo hem baem wanfala niu mobile phone, and then hem start for lukluk moa long olketa rabis piksa long Internet. (Jas. 1:14, 15) Wanem hem duim showimaot datfala feeling for laek lukluk long olketa rabis piksa hem stap yet, olsem sakol wea bone yet nomata fire dae finis. Wanfala taem hem givim mobile phone bilong hem long wanfala elder for iusim, and olketa Web site wea garem rabis piksa nao showaot long datfala mobile. Datfala elder stretawe kaonselem datfala brata. Datfala brata followim kaonsel wea elder givim, and gogo hem lusim nao datfala rabis wei. Jehovah lukim olketa sin wea iumi duim haed and hem savve stretem iumi bifor iumi duim samting wea bae spoelem wei wea iumi fren witim hem. Iumi hapi tumas Jehovah hem lovem iumi.

GOD GIVIM OLKETA BIBLE PRINCIPLE FOR IUMI FOLLOWIM

10, 11. (a) Hao nao iumi showimaot iumi laek savve long advaes bilong Jehovah? (b) Storyim experience bilong wanfala famili wea followim olketa Bible principle.

¹⁰ Man wea raetem psalm sei olsem long Jehovah: “Iu givim advaes long mi for leadim mi.” (Ps. 73:24) Iumi showimaot iumi laek savve long olketa advaes bilong Jehovah taem iumi studyim Bible. Taem iumi duim olsem, iumi bae savve long tingting bilong hem, followim advaes bilong hem, and gohed fren gud witim hem. Olketa advaes bilong Jehovah helpem iumi tu for provaedem need bilong iumiseleva and famili bilong iumi.​—Prov. 3:6.

¹¹ Olsem example, wanfala farmer and waef bilong hem wea garem staka pikinini stap long wanfala farm wea olketa haerem long Philippines. Hem and waef bilong hem tufala pioneer. Then wanday, datfala famili barava seke taem man wea ownim farm sendem leta for talem olketa mas go aot from datfala farm. Why nao hem duim datwan? Samwan talem laea story abaotem olketa and sei olketa no honest. Datfala brata wari abaotem wea nao olketa bae stap. Bat hem trustim Jehovah and sei: “Jehovah bae provaed for mifala. Hem evritaem provaedem wanem mifala needim.” And hem nao wanem Jehovah duim. Samfala day bihaen, datfala man wea ownim farm changem tingting bilong hem and talem olketa for gohed stap. Why nao olsem? Hem lukim wei wea datfala famili followim olketa Bible principle and showimaot respect and no raoa, nomata olketa narawan talem laea story abaotem olketa. Hem tinghae long wei bilong famili hia, so hem letem olketa for stap and tu hem givim samfala pis land moa for olketa waka long hem. (Readim 1 Peter 2:12.) Tru tumas, taem iumi followim olketa Bible principle, Jehovah bae helpem iumi for deal witim olketa hard taem.

FREN WEA HELPEM IUMI FOR WINIM OLKETA HARD TAEM

12, 13. Wanem nao maet mekem samfala for tingse God no love olketa?

¹² Iumi savve kasem staka hard taem, and samfala hard taem wea iumi kasem savve gohed for longfala taem, olsem sik, persecution, or taem famili againstim iumi. And wanfala barava hard samting for iumi deal witim hem taem samwan long kongregeson mekem iumi barava feel nogud.

¹³ Olsem example, samting wea wanfala brata talem maet mekem iu feel nogud. Maet iu ting olsem: ‘Diswan shud no happen insaed organization bilong God!’ Bat datfala brata wea mekem iu feel nogud kasem samfala privilege long kongregeson, and olketa narawan laekem hem. Maet iu ting olsem: ‘Datwan hem no stret. Waswe, Jehovah no lukim? Why nao hem no duim samting abaotem disfala brata?’​—Ps. 13:1, 2; Hab. 1:2, 3.

14. Why nao maet Jehovah letem olketa brata for givim strong kaonsel long iumi?

¹⁴ Jehovah savve long staka samting wea iumi no savve long hem, and maet hem garem gud reason for letem wanfala samting for gohed. Olsem example, samwan maet givim kaonsel long iumi wea iumi tingse hem no stret, and datwan mekem iumi feel nogud. Bat maet tingting bilong God long datfala kaonsel hem no olsem. Maet iumi barava needim datfala kaonsel. Long laef story bilong Brata Karl Klein hem sei wanfala taem Brata Rutherford givim strong kaonsel long hem. Bihaen, taem Brata Rutherford hello gud kam long hem, Brata Klein no hello gud nao. Brata Rutherford luksavve Brata Klein feel nogud yet long kaonsel wea hem givim long hem. Brata Rutherford warnim Brata Klein olsem: “Keakea, Devil laek kasholem iu.” Samting wea Brata Rutherford talem barava helpem Brata Klein. Bihaen, taem Brata Klein hem member long Governing Body, hem sei hem stret for olketa brata kaonselem iumi, and sapos iumi feel nogud from olketa duim datwan, Devil bae kasholem iumi.a

15. Wanem nao iumi mas evritaem tingim taem iumi kasem olketa hard taem?

¹⁵ Sapos iumi kasem hard taem, iumi laekem datwan for kwiktaem finis. Bat hem important for iumi patient. Taem iumi kasem hard taem, datwan hem olsem taem man wea draev mas stop long road from traffic hem busy tumas. Hem shud patient for weitim taem olketa trak start for muv. Bat from hem no patient hem disaed for followim nara road. Bat taem hem followim nara road hem lus nao and hem leit for kasem ples wea hem laek for go long hem. Sapos hem patient and followim datfala road wea hem followim firstaem, maet bae hem no leit. Iumi mas patient tu taem iumi kasem hard taem. Sapos iumi patient and followim olketa Bible principle, Jehovah bae helpem iumi for winim olketa hard taem.

16. Why nao maet Jehovah letem iumi for kasem hard taem?

¹⁶ Maet Jehovah letem iumi for kasem hard taem bikos hem laek for trainim iumi. (Readim 1 Peter 5:6-10.) Iumi mas no tingse God nao kosim olketa hard taem wea kasem iumi. (Jas. 1:13) ‘Devil, wea hem enemy bilong iumi’ nao hem kosim staka samting wea mekem iumi for safa. Bat hem important for savve Jehovah hem lukim wei wea iumi safa. Hem lovem iumi and hem bae mek sure olketa hard taem wea iumi kasem hem for “lelebet taem nomoa.” Trustim wei wea Jehovah lovem iu and bae strongim iu for no givap.​—2 Cor. 4:7-9.

JEHOVAH BLESSIM IUMI

17. Why nao Jehovah lukluk long heart bilong evriwan?

¹⁷ Jehovah lukluk long heart bilong evriwan for lukim hu nao barava lovem hem. Profet Hanani talem King Asa: “Jehovah hem lukluk gud evriwea long earth for iusim strong bilong hem for helpem olketa wea lovem hem long full heart.” (2 Chron. 16:9) Jehovah bae “iusim strong bilong hem for helpem” iu, wea minim hem bae protectim and blessim iu.

18. Why nao iumi trustim Jehovah bae blessim iumi sapos iumi duim gud samting? (Lukim piksa long start bilong study.)

¹⁸ Jehovah laek for blessim iumi. Sapos iumi laekem hem for blessim iumi, iumi mas “lukaotem gudfala samting,” “lovem gudfala samting,” and “duim gudfala samting.” (Amos 5:14, 15; 1 Pet. 3:11, 12) Jehovah blessim olketa wea duim stret samting, nomata sapos olketa narawan no lukim gud samting wea olketa duim. (Ps. 34:15) Tingim example bilong Shiphrah and Puah, tufala Israelite woman wea waka bilong tufala hem for helpem woman bornem baby. Pharaoh talem tufala for killim dae evri pikinini boy wea olketa Israelite woman bornem. Tufala woman hia obeyim God and no obeyim Pharaoh, and tufala sevem laef bilong olketa baby. Jehovah lukim gud samting wea Shiphrah and Puah duim and hem blessim tufala for garem pikinini tu. (Ex. 1:15-17, 20, 21) Samfala taem maet iumi feel olsem no eniwan lukim gud samting wea iumi duim, bat Jehovah hem lukim evri samting wea iumi duim. Hem bae blessim iumi.​—Matt. 6:4, 6; 1 Tim. 5:25; Heb. 6:10.

19. Hao nao wanfala sista luksavve Jehovah lukim gud samting wea hem duim?

¹⁹ Maet samfala taem iumi tingse Jehovah no lukim wanem iumi duim long preaching waka. Bat hem lukim wanem iumi duim. Wanfala sista from Hungary wea stap long Austria kasem address bilong wanfala woman wea story long Hungarian languis. Stretawe datfala sista go lukim datfala woman, bat hem no stap long haos. For wan and haf year datfala sista go bak staka taem for lukim hem, and sista leavim olketa pablikeson, olketa leta, and telephone namba bilong hem long haos bilong datfala woman. Samfala taem sista feel olsem samwan stap long haos, bat no eniwan openem door. Gogo, wanday taem sista go long haos, wanfala kaen woman openem door and sei: “Plis kam insaed. Mi readim evri samting wea iu tekem kam and mi weitim iu.” Insaed long datfala wan and haf year, datfala woman hem kasem chemotherapy treatment, wea mekem hem wik and no laek story long eniwan. Datfala woman start for study. Datfala sista savve Jehovah lukim and blessim wanem hem duim.

20. Hao nao iu feel abaotem wei wea Jehovah lovem iu?

²⁰ Olsem iumi lanem long disfala study, Jehovah lukim evri samting iumi duim and hem lukluk long heart bilong evriwan. Iumi no feel olsem Jehovah lukluk long iumi for lukim olketa mistek wea iumi duim. Bat iumi savve Jehovah lovem iumi and hem barava laek for helpem iumi and blessim iumi for olketa gud samting wea iumi duim. Datwan mekem iumi laek fren gud witim Jehovah.