Kwestin From Reader

Sapos wanfala man and woman wea no marit stap tugeta for full naet, bat no garem eni gud reason for duim datwan, waswe, datwan pruvim tufala sin and needim wanfala judicial komiti for deal witim datwan?

Yes, sapos no eni gud reason stap for why tufala stap tugeta for full naet, luk olsem samting tufala duim showimaot tufala durong. From datwan, olketa elder bae arrangem wanfala judicial komiti for deal witim datwan.—1 Cor. 6:18.

Sapos eni samting olsem happen, body of elders need for story raonem gud mekem olketa luksavve sapos olketa need for arrangem judicial komiti or nomoa. Olsem example: Waswe, tufala hia fren? Waswe, tufala bin kasem kaonsel from olketa elder finis abaotem hao tufala treatim each other? Wanem nao mekem tufala gogo stap tugeta for full naet? Waswe, tufala plan for duim datwan? Waswe, no eni nara samting wea tufala fit for duim? Or waswe, eni emergency or samting wea tufala no expectim mekem tufala no wei nao, dastawe tufala mas stap tugeta full naet? (Eklesiastes 9:11) Wanem nao tufala arrangem saed long wea nao tufala sleep? From each case hem difren, maet samfala nara information moa stap wea bae helpem olketa elder for mekem disison.

Bihaen body of elders storyim evri information, olketa bae disaed sapos olketa need for arrangem wanfala judicial komiti for deal witim datwan.