Kwestin From Reader
Man savve disfellowship from Christian kongregeson sapos hem duim fornication or olobaot fasin, bat waswe sapos hem duim wei wea no klin?
Tru nao, samwan savve disfellowship from kongregeson sapos hem gohed for duim fornication, olobaot fasin, samfala wei wea no klin, and hem no repent. Aposol Paul storyim thrifala sin hia witim olketa nara sin wea savve mekem man disfellowship taem hem raet olsem: “Olketa samting wea kamaot from sin olketa showaot klia, and olketa nao fornication, wei wea no klin, olobaot fasin . . . mi warnim iufala . . . olketa wea duim olketa samting olsem bae no kasem kingdom bilong God.”—Galatians 5:19-21.
Fornication (Greek, por·neiʹa) hem wei for duim sex witim samwan wea man no maritim followim standard bilong Bible. Insaed diswan hem wei for duim adultery, jury fasin, wei wea pipol wea no marit duim sex, wei for duim sex witim mouth and long ass, and wei for tasim private part bilong narawan wea hem no marit partner bilong iu. Samwan wea no repent and gohed for duim fornication, no fit for stap insaed long Christian kongregeson.
Olobaot fasin (Greek, a·selʹgei·a) minim for “barava nating hol bak for duim sex olobaot; barava aftarem samting and nating respectim eni standard saed long fasin; and for no shame.” The New Thayer’s Greek-English Lexicon explainim datfala Greek word olsem “fasin for no kontrolem feeling for laekem sex, . . . barava rabis fasin, no shame, bighed.” Nara buk wea storyim olketa Greek and English word hem sei olobaot fasin hem kaen fasin wea “barava ovarem nao eni standard bilong community.”
Olsem olketa mining hia showimaot, tufala samting nao insaed “olobaot fasin”: (1) Datfala fasin hem barava brekem olketa law bilong God, and (2) man wea duim datwan hem barava no showimaot eni respect and hem bighed.
So, “olobaot fasin” hem no minim kaen rong samting wea man duim wea no serious tumas. Bat hem minim wei for barava brekem olketa law bilong God, and man wea duim rong hem barava nating kea. Hem nating showimaot respect, and hem barava ting daonem olketa standard, law and paoa for mekem law. Paul joinim olobaot fasin witim dirty fasin. (Romans 13:13, 14) From Galatians 5:19-21 listim olobaot fasin witim olketa nara rong wea lead go long wei for man no fit for stap anda long Kingdom bilong God, hem fitim for man wea duim olobaot fasin kasem repruv and maet disfellowship from Christian kongregeson.
Wei wea no klin (Greek, a·ka·thar·siʹa). Moa samting hem insaed “wei wea no klin” winim olketa samting wea insaed olketa nara tufala word “fornication,” and “olobaot fasin.” Insaed diswan hem evrikaen wei for no klin—saed long sex, toktok, samting man duim, and wei for worship kamap dirty witim olketa biliv wea rong. Plande difren sin wea serious tumas hem insaed “wei wea no klin.”
Olsem 2 Corinthians 12:21 talem, Paul story abaotem olketa “wea sin bifor bat no repent from wei wea no klin and fornication and olobaot fasin wea olketa duim bifor.” Diswan showimaot judicial komiti savve deal witim samfala “wei wea no klin,” bikos Bible listim diswan witim “fornication and olobaot fasin.” Bat, wei wea no klin savve minim staka samting and plande long olketa samting hia no needim judicial komiti for deal witim datwan. Olsem wei wea wanfala haos savve lelebet dirty or barava dirty fogud, samfala wei wea no klin savve barava no klin winim olketa nara wei wea no klin.
Long Ephesians 4:19, Paul storyim hao samfala long taem bilong hem “olketa no garem eni stretfala tingting saed long fasin” and “olketa letem olketa seleva duim nomoa olobaot fasin and evrikaen wei wea no klin witim greedy fasin.” So from Paul talem diswan iumi lukim hao kaen “wei wea no klin . . . witim greedy fasin” hem barava serious olsem olobaot fasin. Sapos samwan wea baptaes hem no repent and gohed for duim “wei wea no klin . . . witim greedy fasin,” olketa elder savve aotem hem from kongregeson from hem duim wei wea no klin wea ova tumas.
Tingim sapos wanfala Christian brata and sista wea engage for marit hole-hole and kiss-kiss staka taem. Maet olketa elder disaedem hao nomata tufala no showimaot fasin for barava no kea, wea datwan hem olobaot fasin, greedy fasin nao insaed samting wea tufala duim. So maet judicial komiti deal witim diswan bikos tufala duim wei wea no klin wea ova tumas. Saed long case wea pablisa hem evritaem story witim samwan long telephone long wei wea mekem hem feel olsem hem duim sex, maet olketa elder ting long diswan olsem wei wea no klin wea ova tumas and arrangem judicial komiti for deal witim datwan, especially sapos hem kasem kaonsel finis abaotem datwan.
Olketa elder need for garem fasin for luksavve taem olketa tingim hao for deal witim olketa case olsem. Bifor olketa elder disaedem sapos wanfala case hem fitim for judicial komiti deal witim, olketa mas barava lukluk gud long wanem nao really happen and disaedem sapos samting wea happen hem barava ova tumas or nomoa. Diswan, hem no for sei man wea no acceptim kaonsel hem guilty long olobaot fasin, and hem no wei for just kaontem nomoa haomas taem nao man savve duim wanfala sin bifor judicial komiti fit deal witim hem. Long evri case, olketa elder mas tingting gud raonem evri samting wea happen and prea for help bilong Jehovah, and faendemaot wanem nao barava happen, and wanem kaen nogud fasin nao datwan. Olketa mas tingim tu, hao big nao datwan, haomas taem or sapos hem duim olowe, and why nao and wanem nao muvim hem for duim datwan.
Wei wea no klin wea ova tumas hem no showaot long olketa sin saed long sex nomoa. Olsem example, insaed shortfala taem, wanfala boy wea baptaes finis smokem samfala rol tobacco and then hem talem parents bilong hem. Hem disaed strong for no duim moa datfala rong. Diswan hem wei wea no klin wea no kasem yet “wei wea no klin. . . witim greedy fasin.” Bible kaonsel from wan or tufala elder and sapot bilong parents shud fitim for diswan nao. Bat sapos datfala boy smokem tobacco evritaem, diswan showimaot hem barava min for duim samting wea savve mekem body dirty, and olketa elder mas arrangem wanfala judicial komiti bikos diswan hem wei wea no klin wea ova tumas. (2 Corinthians 7:1) Sapos datfala boy no repent, hem bae disfellowship.
Samfala Christian lukluk long dirty piksa. Diswan hem mekem God feel nogud, and hem savve mekem olketa elder seke fogud taem olketa herem wanfala Christian lukluk long hem. Bat no evri case wea man lukim dirty piksa bae needim wanfala judicial komiti for deal witim datwan. Olsem example, tingim sapos samfala taem, wanfala brata lukluk long dirty piksa. Hem feel shame tumas, hem talemaot diswan long wanfala elder, and hem disaed strong for no duim moa. Maet datfala elder disaedem hao samting wea datfala brata duim hem no barava kasem mark wea hem duim “wei wea no klin . . . witim greedy fasin”; and hem no showimaot fasin for nating kea long samting hem duim tu, wea minim hem no guilty long olobaot fasin. Nomata diswan no needim wanfala judicial komiti, wei wea no klin olsem needim strongfala kaonsel from Bible, and maet samfala moa help from olketa elder bihaen.
Bat tingim sapos wanfala Christian hem gohed for lukluk for staka year long olketa dirty piksa wea showim barava dirty wei for duim sex, and hem barava trae hard for haedem wei wea hem duim diswan. Maet insaed diswan hem wei for duim gang rape, taemapem narawan and duim sex long hem, kaen wei for duim sex wea mekem narawan safa, deal long raf wei witim olketa woman, or dirty piksa abaotem olketa pikinini. Taem olketa narawan faendaot, hem barava shame fogud. Nomata fasin bilong hem no showimaot fasin for nating kea abaotem diswan, maet olketa elder disaed ‘hem letem hemseleva’ for duim disfala barava dirty fasin, and hem duim ‘wei wea no klin witim greedy fasin,’ wea hem nao, wei wea no klin wea ova tumas. Olketa elder mas arrangem wanfala judicial komiti bikos diswan hem wei wea no klin wea ova tumas. Sapos man wea duim disfala rong hem no showimaot hem barava repent, and no disaed strong for lusim fasin for lukluk olowe long olketa dirty piksa olsem, hem bae disfellowship from Christian kongregeson. Sapos hem invaetem samfala narawan for go long haos bilong hem for lukluk long nogud dirty piksa—wea really datwan minim hem mekhae long hem—diswan showimaot hem garem fasin for nating kea wea hem nao olobaot fasin.
Evritaem, olobaot fasin hem wanfala serious sin, wea plande taem hem sin saed long sex. Taem olketa elder trae for luksavve sapos samwan guilty long olobaot fasin, olketa shud luk for fasin for nating kea, barava aftarem samting wea rong, samting wea barava dirty, fasin for nating feel shame and nating respectim eni standard saed long fasin. Long narasaed, maet man duim wanfala sin bat hem no duim datwan witim fasin for nating kea long wanem hem duim, bat maet samting wea mekem datfala sin hem serious, hem wei wea hem duim datwan “witim greedy fasin.” For olketa case olsem, olketa elder mas deal witim datwan from hem showimaot wei wea no klin wea ova tumas.
For disaedem sapos samwan hem guilty long wei wea no klin wea ova tumas or olobaot fasin, hem wanfala serious responsibility bikos datwan bae barava affectim laef bilong man. Olketa wea judgem olketa case olsem shud duim datfala responsibility witim wei for prea and askem Jehovah for fasin for luksavve, fasin for minim samting, and holy spirit bilong hem. Olketa elder mas tingim evritaem need for keepim kongregeson klin, and hao Word bilong Jehovah mas barava faondeson for judgment bilong olketa, witim tu, direction from “faithful and wise slave.” (Matthew 18:18; 24:45) And long disfala wicked taem, winim eni narataem bifor, olketa elder need for tingim olketa toktok hia: “Savve long samting wea iufala duim, bikos hem no for man nao iufala judge bat hem for Jehovah.”—2 Chronicles 19:6.