Mekem Wei for Staka Pipol Moa Herem Gud Nius
1. Wanem nao olketa Christian bifor duim for mekem barava staka pipol herem gud nius?
1 Olketa fasfala disaepol bilong Jesus duim best bilong olketa for talemaot message bilong Kingdom long staka ples. Olketa iusim olketa wei wea win for mekem staka pipol moa herem gud nius. Olketa Christian wea raetem Bible raetem toktok wea kam from God long Greek languis wea hem main languis wea pipol wea stap anda long rul bilong Rome olketa iusim. And tu, start long mek-tu and thri century C.E., maet olketa wea strong for preach nao olketa faswan for iusim codex wea hem wanfala buk wea isi for iusim winim scroll for faendem olketa scripture.
2, 3. (a) Hao nao Isaiah 60:16 hem fulfill distaem? (b) Hao nao organization bilong Jehovah iusim olketa niu samting for mekem tru worship muv ahed?
2 Iusim Difren Kaen Niu Samting: Thru long profet Isaiah, Jehovah profesi olsem: “Iu bae susum milk bilong olketa nation.” (Isa. 60:16) Disfala profesi hem fulfill distaem tu long wei wea olketa servant bilong Jehovah iusim olketa gudfala samting from olketa nation for mekem preaching waka muv ahed. Olsem example, long 1914, Olketa Bible Student start for showim “Photo-Drama of Creation,” wea datwan hem longtaem bifor wei for wakem olketa movie hem kamap bigfala bisnis. Hem tek eit hour for lukim and hem garem kala and saond wea givim bigfala witness long staka million pipol.
3 Distaem pipol bilong God iusim olketa machine wea kwiktaem for printim samting and olketa computer for pablisim olketa Bible and Bible pablikeson long staka handred languis. Olketa kaen transport distaem wea fast tumas mekem pipol long 235 kantri savve kasem olketa Bible and Bible literature kwiktaem. Spirit bilong Jehovah muvim olketa servant bilong hem for iusim samting hia long gudfala wei for mekem barava staka pipol savve herem truth from Bible winim enitaem long history.
4. Olketa wanem change nao samfala duim mekem staka pipol savve herem gud nius?
4 Man Wanwan Mekem Samfala Change: Olketa tru worshiper tu willing for changem samfala samting for mekem moa pipol savve herem gud nius. Staka garem living wea simpol mekem olketa savve duim moa samting long preaching waka. Samfala go stap long ples wea needim staka pablisa moa for talemaot Kingdom. Olketa narawan mekem ministry bilong olketa kamap moa big long wei for lanem difren languis.
5, 6. Wanem nao iumi savve duim mekem staka pipol moa long territory herem gud nius?
5 And tu, iumi savve storyim gud nius long staka pipol sapos iumi preach taem pipol stap long haos and long ples wea pipol stap. Sapos pipol long territory no savve stap long haos long day, waswe, iu savve changem schedule bilong iu for witness long evening? Waswe, olketa pablik ples stap wea iu savve witness long pipol? Waswe, iu traem finis telephone witnessing and bisnis territory? Waswe, iu luk aotem chance for duim enitaem witnessing?
6 Iumi garem nambawan privilege for share long waka for witness abaotem nem bilong Jehovah and Kingdom bilong hem! Iumi laek gohed for sharem disfala truth from Word bilong God wea givim laef long staka pipol moa.—Matt. 28:19, 20.