Why Nao Iumi Celebratem Evening Kaikai Bilong Lord?

“Mi kasem from Lord samting wea mi givim long iufala.”—1 CORINTHIANS 11:23.

1, 2. Wanem nao Jesus duim long Passover naet long 33 C.E.?

ONLY-BORN son bilong Jehovah hem long there. And tu 11-fala man wea ‘stap witim hem long olketa test bilong hem.’ (Luke 22:28) Hem Thursday evening, March 31, 33 C.E., and full moon mekem skae long Jerusalem luk naes tumas. Jesus Christ and olketa aposol bilong hem just finis for celebratem Passover. Judas Iscariot wea no faithful hem go aot finis, bat hem no taem yet for olketa narawan go. Why nao olsem? Bikos Jesus redy for duim wanfala barava important samting. Wanem nao datwan?

² Bikos Matthew, man wea raetem Gospel hem stap long there, bae hem talem iumi. Hem raet olsem: “Jesus hem tekem wanfala bred and, bihaen hem talem blessing, hem brekem and, taem hem givim long olketa disaepol, hem sei: ‘Tekem, kaikaim. Diswan minim body bilong mi.’ And tu, hem tekem wanfala kap and, bihaen hem prea for sei thankiu, hem givim long olketa, and sei: ‘Drink long hem, iufala evriwan; from diswan minim “blood bilong covenant” bilong mi, wea mi bae kapsaetem for planti pipol for forgivim sin.’” (Matthew 26:26-28) Waswe, diswan hem samting wea bae happen wantaem nomoa? Wanem nao mining bilong hem? Waswe, hem garem eni mining for iumi distaem?

“Go Ahed for Duim Diswan”

3. Why nao samting wea Jesus duim long naet bilong Nisan 14, 33 C.E., hem important?

³ Samting wea Jesus Christ duim long naet bilong Nisan 14, 33 C.E., hem no smol samting long laef bilong hem. Aposol Paul storyim diswan taem hem raet for olketa anointed Christian long Corinth, wea olketa go ahed celebratem diswan winim 20 year bihaen. Nomata Paul hem no stap witim Jesus and 11-fala aposol long 33 C.E., hem herem story from samfala aposol hia abaotem samting wea happen long datfala taem. And tu, Paul kasem moa pruv long olketa samting wea happen dat taem thru long revelation wea kam from God. Paul hem sei: “Mi kasem from Lord samting wea mi givim long iufala, wea Lord Jesus tekem wanfala bred long naet wea olketa givim hem go and, bihaen hem prea, hem brekem and sei: ‘Diswan minim body bilong mi wea mi givim for iufala. Go ahed for duim diswan for rememberim mi.’ Hem duim sem samting witim kap tu, bihaen hem kaikaim evening kaikai, hem sei: ‘Disfala kap minim niu covenant wea kamap from blood bilong mi. Go ahed for duim diswan, long evritaem wea iufala drinkim, for rememberim mi.’ ”—1 Corinthians 11:23-25.

4. Why nao olketa Christian shud celebratem Evening Kaikai Bilong Lord?

⁴ Luke wea raetem Gospel hem talem tu disfala komand bilong Jesus: “Go ahed for duim olsem for rememberim mi.” (Luke 22:19) Olketa nara transleison olsem tu: “Duim diswan for olsem memory bilong mi” (Today’s English Version) and “Duim diswan olsem wanfala memorial long mi.” (The Jerusalem Bible) Tru nao, planti kolem disfala celebration Memorial bilong dae bilong Christ. Paul kolem tu Evening Kaikai Bilong Lord—wanfala nem wea fitim, bikos diswan hem happen long evening. (1 Corinthians 11:20) Olketa Christian kasem komand for celebratem Evening Kaikai Bilong Lord. Bat why nao Jesus startim diswan?

Why Jesus Startim

5, 6. (a) Wanem nao wanfala reason why Jesus startim Memorial? (b) Talem nara reason why hem startim Evening Kaikai Bilong Lord.

⁵ Wanfala reason why Jesus startim diswan hem saed long wanfala purpose bilong hem for dae. Hem dae olsem man wea vindicatem sovereign rul bilong Father bilong hem long heven. So, Christ pruvim Devil Satan hem man for laea, wea giaman for sei olketa man servem God only bikos selfish reason nao muvim olketa. (Job 2:1-5) Wei wea Jesus faithful go kasem dae pruvim disfala toktok hem laea and diswan mekem heart bilong Jehovah hapi.—Proverbs 27:11.

⁶ Narafala reason why Jesus startim Evening Kaikai Bilong Lord hem for mekem iumi remember hao thru long dae bilong hem olsem wanfala man wea perfect and no garem sin, Jesus “givim soul bilong hem olsem ransom for baem bak planti pipol.” (Matthew 20:28) Taem first man sin againstim God, hem lusim perfect laef bilong hem olsem man and evri chance wea join witim datwan. Nomata olsem, Jesus sei: “God lovem world tumas dastawe hem givim only-born Son bilong hem, mekem evriwan wea showimaot faith long hem no need for dae bat kasem laef olowe.” (John 3:16) Tru nao, “pei bilong sin hem dae, bat present wea God givim hem laef olowe thru long Christ Jesus Lord bilong iumi.” (Romans 6:23) Wei for celebratem Evening Kaikai Bilong Lord mekem iumi rememberim bigfala love wea Jehovah and Son bilong hem showimaot saed long dae bilong Jesus wea olsem wanfala sakrifaes. Iumi shud tinghae tumas for datfala love!

Celebratem Long Wanem Taem?

7. Long wanem wei nao olketa anointed Christian kaikaim bred and drinkim wine long Memorial “evritaem”?

⁷ Paul sei olsem saed long Evening Kaikai Bilong Lord: “From evritaem iufala kaikaim disfala bred and drinkim disfala kap, iufala go ahed for talemaot dae bilong Lord, go kasem taem hem kam.” (1 Corinthians 11:26) Olketa anointed Christian wanwan bae kaikaim bred and drinkim wine long Memorial go kasem taem olketa dae. From datwan, front long Jehovah God and world, olketa bae evritaem talemaot faith bilong olketa long ransom sakrifaes bilong Jesus wea God provaedem.

8. Hao long nao sekson bilong olketa anointed wan bae celebratem Evening Kaikai Bilong Lord?

⁸ Go kasem wanem taem nao sekson bilong olketa anointed Christian bae celebratem Memorial bilong dae bilong Christ? Paul hem sei: “Go kasem taem hem kam.” Diswan showimaot hao wei for keepim bae go ahed go kasem taem Jesus kam for tekem olketa anointed follower bilong hem long heven thru long resurrection long ‘taem hem stap moa.’ (1 Thessalonians 4:14-17) Diswan hem semsem witim toktok wea Jesus talem for 11-fala loyal aposol bilong hem: “Sapos mi go and redyim wanfala ples for iufala, mi bae kam bak moa and tekem iufala kam long mi, mekem ples wea mi stap iufala tu bae stap.”—John 14:3.

9. Toktok bilong Jesus long Mark 14:25 hem minim wanem samting?

⁹ Taem Jesus startim Memorial, hem story abaotem datfala kap wine and sei olsem long olketa faithful aposol bilong hem: “Mi bae no drinkim moa eni samting bilong datfala grape tree go kasem day wea mi bae drinkim niu wan insaed kingdom bilong God.” (Mark 14:25) Bikos Jesus bae no drinkim really wine long heven, hem minim wei wea wine hem piksarem hapi. (Psalm 104:15; Ecclesiastes 10:19) Wei for stap tugeta long Kingdom hem hapi samting wea hem and olketa follower bilong hem barava luk forward long hem.—Romans 8:23; 2 Corinthians 5:2.

10. Haomas taem nao man shud celebratem Memorial?

¹⁰ Waswe, fitim man for keepim dae bilong Jesus evri month, week, or evriday? Nomoa. Jesus startim Evening Kaikai Bilong Lord and hem dae long day bilong Passover, wea olketa celebratem “olsem wanfala memorial” bilong taem wea olketa Israelite sev from wei for prisoner long Egypt long 1513 B.C.E. (Exodus 12:14) Olketa keepim Passover wanfala taem nomoa evri year, long mek-14 day bilong month bilong Nisan followim Jew kalenda. (Exodus 12:1-6; Leviticus 23:5) Diswan showimaot hao man fit for keepim dae bilong Jesus olsem wei for keepim Passover—wantaem evri year—no evri month, week, or day.

11, 12. Wanem nao history hem showimaot abaotem olketa early celebration bilong Memorial?

¹¹ Dastawe, fitim iumi for celebratem Memorial wantaem evri year long Nisan 14. Wanfala buk sei olsem: “Pipol kolem olketa Christian bilong Asia Minor olketa Quartodeciman [Fourteenthers] bikos long kastom bilong olketa for evritaem celebratem pascha [Evening Kaikai Bilong Lord] long mek-14 day bilong Nisan . . . Datfala day maet kamap long Friday or long eni nara day bilong week.”—The New Schaff-Herzog Encyclopedia of Religious Knowledge, Volume IV, page 44.

¹² Taem hem story abaotem disfala samting wea olketa duim long mek-tu century, man for raetem history J. L. von Mosheim sei olketa Quartodeciman celebratem Memorial long Nisan 14 bikos “olketa ting long example bilong Christ olsem wanfala law.” Nara man for raetem history sei: “Samting wea olketa Quartodeciman church bilong Asia duim hem semsem witim church long Jerusalem. Long mek-2 century, olketa church hia celebratem dae bilong Christ wea mekem olketa kamap free from sin, long Pascha bilong olketa long mek-14 day bilong Nisan.”—Studia Patristica, Volume V, 1962, page 8.

Mining Bilong Bred

13. Wanem kaen bred nao Jesus iusim taem hem startim Evening Kaikai Bilong Lord?

¹³ Taem Jesus startim Memorial, “hem tekem wanfala bred, talem prea, brekem and givim long olketa [aposol].” (Mark 14:22) Bred wea stap long there hem semkaen bred wea olketa just iusim for Passover. (Exodus 13:6-10) From olketa no putim eni yeast insaed taem olketa beikem, hem flat and isi for brek and hem mas brekem for givimaot. Taem Jesus duim mirakol for feedim planti thousand pipol witim bred, datwan tu hem thin bred wea isi for brekem, bikos hem brekem mekem olketa givimaot. (Matthew 14:19; 15:36) So, wei for brekem Memorial bred hem no piksarem eni samting.

14. (a) Why nao hem stret for bred bilong Memorial no garem yeast? (b) Wanem kaen bred nao hem stret for iusim or beikem long Evening Kaikai Bilong Lord?

¹⁴ Saed long bred wea hem iusim taem hem startim Memorial, Jesus sei: “Diswan minim body bilong mi wea mi givim for iufala.” (1 Corinthians 11:24; Mark 14:22) Hem fitim for datfala bred no garem yeast. Why nao olsem? Bikos yeast savve piksarem nogud fasin, wicked fasin, or sin. (1 Corinthians 5:6-8) Datfala bred hem piksarem perfect body bilong Jesus olsem man wea no garem sin, wea hem offerim olsem wanfala ransom sakrifaes. (Hebrews 7:26; 10:5-10) Taem olketa celebratem Memorial, Olketa Jehovah’s Witness tingim diswan and followim example wea Jesus showimaot taem hem iusim bred wea no garem yeast. Samfala taem, olketa iusim bred wea olketa Jew wakem wea no garem eni extra samting insaed, olsem onion or egg. Sapos nomoa, olketa savve mekem bred wea no garem yeast witim lelebet whole-grain flour (sapos fitim, wheat) wea olketa mixim witim lelebet wata. Olketa rolim flat datfala flour and beikem long fry pan go kasem taem wea bred hia drae.

Mining Bilong Wine

15. Wanem nao insaed long kap wea Christ iusim taem hem startim Memorial bilong dae bilong hem?

¹⁵ Bihaen hem pasim raon datfala bred wea no garem yeast, Jesus tekem wanfala kap, “talem thankiu and givim long [olketa aposol], and evriwan drink from hem.” Jesus explainim mining bilong diswan olsem: “Diswan minim ‘blood bilong covenant’ bilong mi, wea mi bae kapsaetem for planti.” (Mark 14:23, 24) Wanem nao insaed long datfala kap? Hem wine, no juice bilong grape. Taem Bible story abaotem wine, hem no minim juice bilong grape. Olsem example, Jesus sei wine nao savve mekem “oldfala wineskin” bosta. And olketa enemy bilong Christ sei hem “drinkim tumas wine.” Datwan bae no tru sapos wine hia hem juice bilong grape nomoa. (Matthew 9:17; 11:19) Wine nao olketa drinkim long taem bilong Passover, and wea Christ iusim taem hem startim Memorial bilong dae bilong hem.

16, 17. Wanem kaen wine nao fitim iumi for iusim long Memorial, and why nao olsem?

¹⁶ Red wine nomoa hem fit for piksarem samting wea datfala kap hem stand for, hem nao, blood wea Jesus kapsaetem. Hemseleva nao talem: “Diswan minim ‘blood bilong covenant’ bilong mi, wea mi bae kapsaetem for planti.” And aposol Peter raet olsem: “Iufala [olketa anointed Christian] savve hem no witim olketa samting wea savve rotten, olsem silver or gold, wea hem baem iufala from olketa nogud wei wea iufala kasem thru long kastom bilong olketa laen dadi bilong iufala. Bat witim spesol blood, olsem bilong wanfala lamb wea perfect and klin evribit, wea bilong Christ.”—1 Peter 1:18, 19.

¹⁷ Red wine nao hem kaen wine wea Jesus iusim taem hem startim Memorial. Nomata olsem, samfala wine distaem no fitim bikos olketa garem alcohol spirit or brandy or samkaen herb or spice insaed long olketa. Blood bilong Jesus hem fitim evribit, no need for addim eni samting moa witim. So, olketa wine olsem port, sherry, and vermouth bae no fitim. Wine wea iumi iusim long Memorial hem shud red wine wea no garem eni sugar or eni nara samting insaed. Iumi savve iusim red wine wea kam from grape, and tu olketa wine olsem red burgundy and claret.

18. Why nao Jesus no duim mirakol saed long bred and wine bilong Memorial?

¹⁸ Taem hem startim disfala kaikai, Jesus no duim mirakol for changem bred and wine for kamap really body and blood bilong hem. Wei for kaikaim body bilong man and drinkim blood hem brekem law bilong God. (Genesis 9:3, 4; Leviticus 17:10) Jesus still garem full body and evri blood bilong hem long datfala taem. Hem offerim body bilong hem olsem wanfala perfect sakrifaes, and blood bilong hem kapsaet long next aftanun long sem day bilong olketa Jew, Nisan 14. So, bred and wine bilong Memorial piksarem body and blood bilong Christ.a

Memorial—Kaikai wea Olketa Sharem Tugeta

19. Why nao iumi savve iusim winim wanfala pleit and wanfala kap taem iumi keepim Evening Kaikai Bilong Lord?

¹⁹ Taem Jesus startim Memorial, hem invaetem olketa faithful aposol bilong hem for drink from sem kap. Gospel bilong Matthew sei: “[Jesus] tekem wanfala kap and, bihaen hem prea for sei thankiu, hem givim long olketa, and sei: ‘Drink long hem, iufala evriwan.’ ” (Matthew 26:27) Wei for iusim “wanfala kap” nomoa, and no staka kap hem no hard, bikos long datfala taem 11-fala nomoa long there and hem isi for pasim raon datfala kap long each wan. Dis year, planti million bae hipap for Evening Kaikai Bilong Lord long winim 94,000 kongregeson bilong Olketa Jehovah’s Witness evriwea long world. From planti nao hipap for celebratem diswan long sem naet, hem hard for iusim wanfala kap nomoa for evriwan. Bat olketa big kongregeson followim sem principle taem olketa pasim raon samfala kap wine long audience. Long sem wei tu, iumi savve iusim samfala pleit for bred. No eni samting insaed Bible showaot datfala kap or glass mas garem wankaen design. Nomata olsem, datfala kap and pleit shud fitim taem hia. Hem gud for no fulimap kap tumas nogud wine hem kapsaet taem olketa pasim raon.

20, 21. Why nao iumi savve sei Memorial hem kaikai wea olketa sharem tugeta?

²⁰ Nomata iumi savve iusim samfala pleit bred and samfala kap wine, Memorial hem kaikai wea olketa sharem tugeta. Long Israel bifor, man savve mekem kaikai wea olketa kaikaim tugeta taem hem tekem wanfala animal wea olketa busarem go long temple bilong God. Haf long datfala animal olketa bonem long altar, wanfala haf go long priest wea duim waka and nara haf long olketa son bilong Aaron wea priest, and datwan wea givim offering and famili bilong hem tu kaikaim datfala kaikai. (Leviticus 3:1-16; 7:28-36) Memorial tu hem wanfala kaikai wea olketa sharem tugeta.

²¹ Jehovah hem join insaed long disfala kaikai olsem Man wea Startim datfala arrangement. Jesus nao sakrifaes, and olketa anointed Christian join for kaikaim bred and wine. Wei for kaikai long tebol bilong Jehovah showimaot hao olketa wea share long diswan stap long peace witim hem. Dastawe Paul hem raet olsem: “Datfala kap bilong blessing wea iumi blessim, waswe, hem no wei for share long blood bilong Christ? Datfala bred wea iumi brekem, waswe, hem no wei for share long body bilong Christ? Bikos wanfala bred nomoa stap, iumi, nomata iumi staka, iumi wanfala body nomoa, bikos iumi evriwan kaikaim datfala wanfala bred.”—1 Corinthians 10:16, 17.

22. Wanem nao olketa kwestin abaotem Memorial wea iumi bae lukluk long hem?

²² Evening Kaikai Bilong Lord hem only celebration bilong religion wea Olketa Jehovah’s Witness keepim evri year. Diswan hem fitim bikos Jesus komandim olketa follower bilong hem: “Go ahed for duim diswan for rememberim mi.” Long Memorial, iumi celebratem dae bilong Jesus, dae wea apim sovereign rul bilong Jehovah. Olsem iumi lukim finis, long disfala kaikai wea olketa kaikaim tugeta, bred hem minim body bilong Christ olsem man and wine hem blood wea hem sakrifaesim. Nomata olsem, samfala nomoa kaikaim bred and wine. Why nao olsem? Waswe, Memorial hem garem trufala mining for planti million wea no tekpart? Tru nao, Evening Kaikai Bilong Lord shud garem wanem mining for iu?

[Footnote]

Wanem Nao Ansa Bilong Iu?

• Why nao Jesus startim Evening Kaikai Bilong Lord?

• Haomas taem nao iumi shud celebratem Memorial?

• Wanem nao mining bilong bred wea no garem yeast wea olketa iusim long Memorial?

• Wine bilong Memorial hem piksarem wanem?

[Piksa long page 15]

Jesus startim Evening Kaikai Bilong Lord