Lane From Olketa Mistek Bilong Olketa Israelite

OLKETA Israelite savve finis wanem Jehovah laekem olketa for duim taem olketa go insaed long Promis Land. God talem Moses for sei long olketa: “Iufala mas raosem pipol from datfala land and pisisim evri idol bilong olketa wea olketa wakem from ston and iron, and pisisim evri haefala ples bilong olketa.”​—Num. 33:52.

Olketa Israelite mas no mekem covenant witim pipol from datfala land, and olketa mas no maritim eniwan from there tu. (Deut. 7:​2, 3) Tru nao, God warnim pipol bilong hem olsem: “Iufala mas careful for no mekem covenant witim pipol from datfala land wea iufala bae go long hem, nogud diswan kamap olsem wanfala trap for iufala.” (Ex. 34:12) Bat olketa Israelite no obeyim God and olketa foldaon long datfala trap. Wanem nao mekem olketa foldaon? Wanem nao iumi savve lanem from olketa mistek bilong olketa?​—1 Cor. 10:11.

Olketa Kaban Tugeta, Gogo, Olketa Worshipim Olketa Idol

Taem olketa Israelite tekovarem Promis Land, olketa winim olketa firstfala faet againstim pipol long datfala land. Bat olketa Israelite no duim evri samting wea God talem olketa for duim. Olketa no raosem enemy from Promis Land. (Judg. 1:1–​2:​10) Bat olketa Israelite stap tugeta witim “sevenfala nation” wea stap long datfala land, and from datwan, olketa start for fren gud witim pipol from olketa nation hia. (Deut. 7:1) Long wanem wei nao diswan hem affectim olketa Israelite? Bible hem sei: “Olketa Israelite start for maritim olketa dota from nara nation, and olketa Israelite givim dota bilong olketa for olketa son bilong nara nation, and olketa Israelite start for worshipim olketa god bilong olketa. So olketa Israelite duim samting wea Jehovah nating hapi long hem, and olketa forgetim God bilong olketa, Jehovah. Olketa gohed for worshipim olketa Baal and olketa holy post.” (Judg. 3:​5-7) From olketa Israelite kaban tugeta witim pipol from datfala land, samfala start for maritim olketa and worshipim olketa idol bilong olketa. From olketa Israelite duim olsem, datwan mekem hem hard for olketa raosem olketa heathen pipol from datfala land. Olketa Israelite spoelem tru worship and start for worshipim olketa false god.

Taem olketa Israelite kaban witim nara pipol wea stap long Promis Land, datwan mekem danger kamap for olketa Israelite bikos olketa hia savve spoelem tingting bilong olketa and wei wea olketa fren witim God. Bat tingim narafala samting wea maet hem mekem olketa Israelite worshipim olketa false god.

Wei wea Man Wakem Garden Hem Join Witim Wei for Worshipim Baal

Taem olketa Israelite go insaed long Promis Land, olketa no muv long olketa difren ples olsem olketa duim bifor, bat plande long olketa kamap olketa farmer and stap kwaet long wanfala ples. Maet olketa wakem garden long sem wei wea olketa bilong Canaan duim. Bat hem luk olsem olketa Israelite no followim nomoa wei wea pipol hia wakem garden. Taem olketa Israelite kaban witim pipol from nara nation, olketa followim tu biliv bilong olketa saed long agriculture.

Olketa bilong Canaan worshipim staka Baal, wea hem nao olketa god wea olketa tingse bae mekem graon kamap gud for plantim kaikai. Nomata olketa Israelite wakem garden and harvestim kaikai from hem, gogo, olketa worshipim olketa false god hia from olketa tingse olketa nao mekem olketa kasem staka kaikai. Plande long Israel duim samting wea luk olsem olketa worshipim Jehovah, bat tru samting nao, olketa kamap apostate.

Bigfala Warning for Iumi Distaem

Taem olketa Israelite go insaed long Promis Land, luk olsem olketa no tingim olketa bae worshipim Baal and duim olketa barava nogud samting. Bat wei wea olketa kaban witim pipol long there mekem olketa worshipim Baal. Sapos iumi kaban witim pipol wea no garem sem biliv olsem iumi and fasin olsem iumi, bae iumi kasem nogud samting. Hem tru, maet iumi waka or skul witim pipol wea no garem sem biliv olsem iumi, or maet samfala famili member tu no worshipim Jehovah. Nomata olsem, samting wea kasem olketa Israelite hem wanfala warning for iumi. Sapos iumi kaban witim pipol olsem, bae iumi kasem nogud samting. Bible barava talem tru samting taem hem sei: “Wei for kaban witim nogud pipol hem spoelem gudfala fasin.”​—1 Cor. 15:33.

Iumi distaem tu kasem olketa semkaen hard taem wea olketa Israelite kasem. Staka difren kaen samting olsem idol stap distaem wea pipol worshipim olsem god bilong olketa. Samfala nao hem selen, olketa wea garem bignem long sports, olketa wea garem bignem long television, movie, radio, politik, samfala bigman bilong religion, and olketa famili member tu. Olketa hia savve kamap main samting long laef bilong iumi. Wei for fren gud witim pipol wea no lovem Jehovah savve spoelem gudfala wei wea iumi fren witim God.

Samting wea switim staka Israelite for worshipim Baal hem dirty fasin. Olketa semkaen samting switim pipol bilong God distaem tu. Olsem example, hem isi tumas for man lukim olketa dirty piksa long computer, wea savve spoelem tingting bilong hem. Hem nogud tumas sapos datkaen samting switim wanfala Christian!

“Olketa wea Followim Samting wea God Talem, Olketa Hapi”

Sapos iumi chus for obeyim Jehovah saed long hu nao iumi kaban witim, datwan hem disison bilong iumi wanwan. (Deut. 30:19, 20) Bat iumi need for askem iumiseleva olsem: ‘Hu nao mi savve kaban witim long hapitaem? Wanem nao tingting bilong olketa abaotem olketa mark bilong God saed long fasin? Waswe, olketa worshipim Jehovah? Waswe, bae olketa encouragem mi for garem gudfala fasin wea God hapi long hem?’

Man wea raetem psalm hem sing olsem: “Olketa wea no duim eni rong samting and wea followim law bilong Jehovah, olketa hapi. Olketa wea followim samting wea God talem and olketa wea gohed for lukaotem hem, olketa hapi.” (Ps. 119:​1, 2) Tru tumas, “olketa wea fraet long Jehovah and wea followim olketa wei bilong hem, olketa hapi.” (Ps. 128:1) Taem iumi disaed hu nao for kaban witim, hem gud for lane from olketa mistek bilong olketa Israelite and barava obeyim Jehovah.​—Prov. 13:20.

[Piksa long page 26]

Wei for kaban witim pipol wea no lovem Jehovah savve mekem iumi for worshipim olketa idol