Word Bilong Jehovah Hem Laef
Samfala Main Point From Buk Bilong Deuteronomy
HEM year 1473 B.C.E. Foti year go pas finis bihaen Jehovah mekem olketa son bilong Israel kamap free from wei for slave long Egypt. Bihaen olketa go raon insaed wilderness for foti year, olketa Israelite still no garem eni land. Bat, distaem olketa klosap nao for go insaed Promis Land. Wanem nao bae happen taem olketa tekovarem datfala land? Olketa wanem kaen problem nao bae kamap, and hao nao bae olketa deal witim?
Bifor Israel akrosim Jordan River for go insaed land bilong Canaan, Moses redyim pipol for bigfala waka wea bae kamap bihaen. Long wanem wei nao hem duim diswan? Hem givim olketa tok for encouragem, muvim, kaonselem and warnim olketa. Hem remindim olketa Israelite hao olketa shud worshipim Jehovah God nomoa and olketa mas no followim olketa wei bilong pipol wea stap raonem olketa. Olketa tok hia nao hem big part bilong Bible buk bilong Deuteronomy. Olketa tok hia garem olketa kaonsel wea iumi needim distaem, from iumi tu stap insaed world wea mekem challenge kamap for worshipim nomoa Jehovah.—Hebrews 4:12.
Moses raetem full buk bilong Deuteronomy bat no last chapter. Olketa samting wea hem raet abaotem happen insaed lelebet winim tufala month.a (Deuteronomy 1:3; Joshua 4:19) Iumi laek savve hao nao kaonsel bilong hem savve helpem iumi for lovem Jehovah God witim full heart and faithful for servem hem.
‘NO FORGETIM OLKETA SAMTING WEA IU LUKIM’
Long first tok bilong hem, Moses storyim klia samfala samting wea happen long wilderness—especially olketa samting wea bae helpem olketa Israelite taem olketa redy for tekovarem Promis Land. Datfala story abaotem taem wea Moses appointim olketa judge barava remindim olketa hao Jehovah organizem pipol bilong hem long wei wea showimaot loving kea. Moses storyim tu hao nogud report bilong tenfala spae hem lead go for mekem datfala genereson for no go insaed land wea God promisim. Tingim hao disfala warning example mas barava affectim olketa wea lisin long Moses taem olketa seleva lukim land wea God promisim.
Taem olketa redy for go tekovarem land wea stap narasaed long river, olketa masbi kasem strong for no fraet taem olketa tingim bak wei wea Jehovah mekem olketa son bilong Israel winim olketa faet bifor olketa akrosim Jordan. Pipol long land wea olketa klosap for go insaed worshipim olketa idol. Dastawe, hem barava fitim Moses for talem strongfala warning for stap klia long wei for worshipim idol!
Ansa for Olketa Bible Kwestin:
2:4-6, 9, 19, 24, 31-35; 3:1-6—Why nao olketa Israelite killim dae samfala pipol wea stap long east saed bilong Jordan River bat no olketa narawan? Jehovah komandim Israel for no faetem olketa son bilong Esau. Why nao olsem? Hem bikos olketa hia pikinini bilong brata bilong Jacob. Olketa Israelite mas no spoelem or faet againstim pipol bilong Moab and Ammon, from olketa kamaot from laen bilong son bilong brata bilong Abraham, Lot. Bat, olketa Amorite King, Sihon and Og no fit for sei datfala land hem bilong olketa. Dastawe, taem Sihon les for letem olketa Israelite go pas long land bilong hem and Og faet againstim olketa Israelite, Jehovah komandim olketa Israelite for distroem olketa taon bilong olketa, and killim dae evriwan.
4:15-20, 23, 24—Waswe, disfala tambu for karvem idol hem minim hem rong for wakem eni karving for decoration? Nomoa. Disfala tambu hem againstim wei for wakem samting for worshipim—againstim wei for ‘baodaon long olketa idol and worshipim.’ Bible no tambuim wei for wakem karving or paintim piksa for decoration.—1 Kings 7:18, 25.
Olketa Leson for Iumi:
1:2, 19. Olketa son bilong Israel wakabaot raon long wilderness for samting olsem 38 year, nomata for kasem Kadesh-barnea hem “elevenfala day [nomoa] for wakabaot from Horeb [maunten area raonem Maunt Sinai wea God givim Ten Komandment] sapos followim road long Maunt Seir.” Diswan nao nogud samting wea kamaot from wei for no obeyim Jehovah God!—Numbers 14:26-34.
1:16, 17. Distaem olketa standard bilong God for judge hem no change. Olketa wea kasem mark for serve insaed judicial komiti mas no letem wei for saedem eniwan or wei for fraetem man mekem olketa no judge long stret wei.
4:9. For Israel win, hem barava important for olketa ‘no forgetim olketa samting wea olketa lukim.’ Taem niu world wea God promisim kakam klosap, hem important for iumi tu for evritaem tingim olketa nambawan samting wea Jehovah duim long wei for studyim gud Word bilong hem.
LOVEM JEHOVAH, AND OBEYIM OLKETA KOMANDMENT BILONG HEM
Long mek-tu tok bilong hem, Moses storyim taem wea God givim Law long Maunt Sinai and hem talem moa Ten Komandment. Jehovah talem olketa Israelite for finisim evribit sevenfala nation. Moses remindim olketa son bilong Israel long wanfala important leson olketa lanem taem olketa stap long wilderness: “Man laef no long bred nomoa bat evri toktok wea kamaot from mouth bilong Jehovah nao mekem man laef.” Long taem hia, olketa mas “keepim full komandment.”—Deuteronomy 8:3; 11:8.
Taem olketa stap insaed land wea God promisim, olketa Israelite bae needim law saed long worship, wei for judge, gavman, war, and evriting wea kamap insaed living bilong community and olketa man wanwan. Moses reviewim olketa law hia and strongim need for lovem Jehovah and obeyim olketa komandment bilong hem.
Ansa for Olketa Bible Kwestin:
8:3, 4—Long wanem wei nao kaleko bilong olketa Israelite no kamap old and leg bilong olketa no boela taem olketa wakabaot raon long wilderness? Diswan hem wanfala mirakol, wea semsem tu witim wei wea evritaem olketa garem manna. Olketa Israelite werem olketa sem kaleko and shoe wea olketa garem bifor olketa wakabaot raon long wilderness, maet hem luk olsem olketa givim go long narawan taem olketa pikinini growap and olketa full-grown man dae. From olketa census wea kamap long start and end bilong taem for wakabaot raon long wilderness showimaot olketa Israelite no kamap staka moa, kaleko and shoe wea olketa garem firstaem bae inaf nomoa.—Numbers 2:32; 26:51.
14:21—Why nao olketa Israelite savve givim long man from difren ples or sellim long man from difren kantri wanfala animal wea dae finis wea olketa no aotem blood wea olketa seleva kanduit kaikaim? Insaed Bible, datfala toktok “man from difren ples” maet minim man wea no wanfala Israelite wea kamap wanfala niu follower or man wea followim olketa main law bilong kantri bat wea no worshipim Jehovah. Wanfala man from difren kantri and wanfala man from difren ples wea no kamap olketa niu follower no stap anda long Law and olketa savve iusim animal wea dae finis wea olketa no aotem blood bilong hem. Hem olraet nomoa for olketa Israelite givim or sellim olketa animal olsem long olketa. Bat, long narasaed, niu follower hem stap anda long Law covenant. Olsem Leviticus 17:10 talem, hem tambu for disfala man kaikaim blood bilong animal.
24:6—Why nao wei for tekem “wanfala hand mill or top part bilong grindstone olsem promis” for changem wanfala kaon, hem olsem man tekem “wanfala soul”? Wanfala hand mill and top part bilong grindstone piksarem “soul” bilong man or samting wea mekem hem go ahed laef. For tekem mill or grindstone bae mekem full famili no garem kaikai.
25:9—Wanem nao mining bilong wei for aotem sandol and spit long feis bilong man wea les for duim brata-in-law marit? Wei for followim “kastom bilong taem bifor long Israel saed long right for baem bak samting . . . , man mas tek aotem sandol bilong hem and givim long nara man.” (Ruth 4:7) For tek aotem sandol from man wea les for duim brata-in-law marit pruvim hao hem no acceptim position and right for garem pikinini for brata bilong hem wea dae. Diswan hem samting for shame long hem. (Deuteronomy 25:10) For spit long feis bilong hem showimaot wei for mekem hem shame.—Numbers 12:14.
Olketa Leson for Iumi:
6:6-9. From olketa Israelite kasem komandment for savve long Law, iumi tu mas savve long olketa komandment bilong God, rememberim evritaem, and teachim long olketa pikinini bilong iumi. Iumi mas ‘taemap olsem wanfala saen long hand bilong iumi’ long wei wea olketa samting iumi duim—wea hand bilong iumi piksarem—mas showimaot hao iumi obeyim Jehovah. And olsem “samting wea stap front long hed,” evriwan mas lukim iumi garem fasin for obey.
6:16. Iumi no laek testim Jehovah olsem olketa Israelite wea no showimaot faith duim long Massah, ples wea olketa komplen abaotem no eni wata.—Exodus 17:1-7.
8:11-18. Wei for lovem material samting savve mekem iumi forgetim Jehovah.
9:4-6. Iumi mas stap klia long wei for tingse iumi raeteous.
13:6. Iumi mas no letem eniwan mekem tingting bilong iumi go difren from wei for worshipim Jehovah.
14:1. Wei for man katem body or rezam full hed bilong hemseleva showim man no respectim body. Diswan maet join witim giaman religion and iumi mas no duim. (1 Kings 18:25-28) From iumi garem hope long resurrection hem no fitim for iumi duim kaen samting olsem for showimaot sorre taem samwan hem dae.
20:5-7; 24:5. Man shud showim wei for tingim olketa wea garem spesol need, nomata taem samting wea hem duim hem important.
22:23-27. Wanfala nambawan wei for wanfala woman protectim hemseleva taem samwan trae for rapem hem, hem for singaot big.
“IUFALA MAS CHUSIM LAEF”
Long mek-thri tok bilong hem, Moses talem hao bihaen olketa akrosim Jordan, olketa Israelite mas raetem Law long olketa bigfala ston and talemaot tu olketa curse for wei for no obey and olketa blessing for wei for obey. Mek-foa tok start witim wei for startim bak moa datfala covenant midolwan Jehovah and Israel. Moses talem moa warning abaotem wei for no obey and encouragem pipol for “chusim laef.”—Deuteronomy 30:19.
For join go witim fofala tok bilong hem, Moses storyim hao man for lead bae change and hem teachim olketa Israelite wanfala naesfala singsing wea praisem Jehovah and warnim olketa abaotem olketa trabol wea bae kamap sapos olketa no faithful. Bihaen hem blessim olketa tribe, Moses dae taem hem 120 year and olketa berem hem. Olketa stap sorre for hem insaed 30-fala day, wea semsem witim haf long taem wea olketa samting wea buk bilong Deuteronomy story abaotem hem happen.
Ansa for Olketa Bible Kwestin:
32:13, 14—From hem tambu for olketa Israelite kaikaim eni gris, wanem nao hem minim for olketa kaikaim “gris bilong olketa full-grown man sheep”? Toktok hia hem tokpiksa nomoa and hem minim best animal. Disfala sem verse hem iusim sem kaen tokpiksa taem hem storyim “kidney gris bilong wheat” and “blood bilong grape.”
33:1-29—Why nao Moses no talem blessing for Simeon taem hem blessim olketa son bilong Israel? Hem olsem bikos Simeon and Levi duim samting wea “no showimaot fasin for feel sorre,” and kros bilong tufala hem “raf” tumas. (Genesis 34:13-31; 49:5-7) Material samting wea tufala kasem hem no semsem witim olketa bilong olketa nara tribe. Levi kasem 48-fala taon, and wanem Simeon kasem hem insaed area bilong Judah. (Joshua 19:9; 21:41, 42) Dastawe, Moses no talem blessing for Simeon. Nomata olsem, blessing bilong hem insaed long blessing bilong evriwan long Israel.
Olketa Leson for Iumi:
31:12. Olketa young wan shud sidaon witim olketa wea full-grown long olketa kongregeson meeting and trae hard for lisin and lanem samting.
32:4. Evri waka bilong Jehovah perfect from hem showimaot fasin bilong hem wea hem justice, wisdom, love and paoa long wei wea balance evribit.
Garem Nambawan Samting for Iumi
Deuteronomy showimaot hao Jehovah “wanfala Jehovah” nomoa. (Deuteronomy 6:4) Hem buk wea storyim pipol wea frenim God long wanfala spesol wei. Buk bilong Deuteronomy talem warning tu abaotem wei for worshipim idol and hem mekhae long need for worshipim tru God nomoa.
Tru nao, Deuteronomy garem nambawan samting for iumi! Nomata distaem iumi no stap anda long Law Bilong Moses, iumi savve lanem staka samting wea bae helpem iumi for ‘lovem Jehovah God bilong iumi witim full heart, soul, and strong bilong iumi.’—Deuteronomy 6:5.
[Footnote]
a Maet Joshua or Hae Priest Eleazar nao raetem last chapter wea storyim taem wea Moses dae.
[Map long page 24]
(For formatted text, see publikeson)
SEIR
Kadesh-barnea
Mt. Sinai (Horeb)
Red Sea
[Credit Line]
Based on maps copyrighted by Pictorial Archive (Near Eastern History) Est. and Survey of Israel
[Piksa long page 24]
Fofala tok bilong Moses nao kamap bigfala haf bilong Deuteronomy
[Piksa long page 26]
Wanem leson nao Jehovah teachim taem hem provaedem manna?
[Piksa long page 26]
For tekem wanfala hand mill or top part bilong grindstone olsem wanfala promis hem olsem man tekem “wanfala soul”