Word Bilong Jehovah Hem Laef
Olketa Main Point From Buk Bilong Lamentations
PROFET Jeremiah hem lukim hao datfala judgment message wea hem talemaot for 40 year, hem fulfill. Hao nao feeling bilong hem taem hem lukim taon wea hem lovem tumas hem finis evribit? Long start bilong Greek Septuagint hem storyim buk bilong Lamentations olsem: “Jeremiah hem sidaon and gohed for krae and talem olketa sorre toktok abaotem Jerusalem.” Jeremiah hem no savve forgetim hao olketa bilong Babylon stap raonem Jerusalem for 18 month then olketa bonem datfala taon, so long 607 B.C.E. hem raetem buk bilong Lamentations wea storyim wei wea hem wari and sorre tumas. (Jeremiah 52:3-5, 12-14) Long history, no eni nara taon olketa talem olketa sorre toktok abaotem olsem Jerusalem.
Buk bilong Lamentations hem garem faevfala grup bilong olketa poem. Fofala long olketa hia hem olketa sorre poem, and mek-faev hem wanfala prea. Fofala first song hem olketa acrostic, wea minim start bilong each verse hem garem wanfala long olketa 22 leta wea followim order bilong olketa leta bilong Hebrew alphabet. Nomata mek-faev song hem garem 22 verse nomoa wea semsem witim namba bilong olketa leta bilong Hebrew alphabet, olketa no arrangem followim order bilong Hebrew alphabet.—Lamentations 5:1, footnote.
‘EYE BILONG MI SOA FROM MI KRAE TUMAS’
“Lukim taon hia wea no eniwan stap, wea bifor staka pipol stap insaed! Hem kamap olsem wanfala widow woman, wea bifor olketa nation barava tinghae long hem! Long bifor hem wanfala princess midolwan long olketa distrik, bat distaem hem mas waka olsem wanfala slave!” Diswan nao wei wea profet Jeremiah start for storyim olketa sorre samting abaotem Jerusalem. Jeremiah hem talem reason why Jerusalem hem kasem trabol taem hem sei: “Jehovah nao mekem hem kasem sorre bikos hem duim staka sin.”—Lamentations 1:1, 5.
From Jerusalem hem piksarem wanfala widow woman wea barava sorre for hasband and olketa pikinini wea dae, hem ask olsem: “Waswe, eni nara man hem sorre long sem wei wea mi sorre tumas?” Hem prea long God for olketa enemy bilong hem olsem: “Plis lukim evri nogud samting wea olketa duim, and deal long strongfala wei witim olketa long sem wei wea iu deal witim mi from evri sin wea mi duim. From sorre bilong mi hem big tumas and heart bilong mi hem feel nogud tumas.”—Lamentations 1:12, 22.
From Jeremiah hem wari tumas, hem sei olsem: “Taem [Jehovah] kros tumas hem katem evri horn bilong Israel. Hem holem bak raet hand bilong hem from olketa enemy; and hem againstim Jacob olsem wei wea fire hem bonem evri samting wea stap raonem hem.” Datfala profet storyim bigfala sorre wea hem kasem olsem: “Eye bilong mi soa tumas from mi krae tumas. Mi barava feel nogud tumas.” Nomata olketa wea go pas tu olketa sapraes and sei: “Waswe, disfala taon nao pipol savve sei, ‘Hem luk naes tumas winim evri nara ples long full earth’?”—Lamentations 2:3, 11, 15.
Ansa for Olketa Bible Kwestin:
1:15—Long wanem wei nao Jehovah “purubutim samting for mekem wine bilong datfala young gele bilong Judah”? Taem olketa bilong Babylon distroem datfala taon wea olketa storyim olsem wanfala young gele, blood bilong pipol hem kamap olsem taem wea olketa smasem grape long samting for mekem wine. Jehovah hem profesi abaotem diswan and hem letem datwan for happen, so hem olsem hemseleva nao ‘purubutim datfala samting for mekem wine.’
2:1—Long wanem wei nao Jehovah ‘torowem wei wea Israel hem luk naes tumas from heven go daon long earth’? From “heven hem barava hae winim earth,” samfala taem wei wea olketa samting wea moa hae hem lusim position bilong hem, hem olsem olketa ‘torowem from heven kam daon long earth.’ “Wei wea Israel hem luk naes tumas,” wea hem nao glory and paoa wea hem garem taem Jehovah blessim hem, Jehovah hem torowem go daon taem Jerusalem finis evribit and Judah hem stap emti.—Isaiah 55:9.
2:1, 6—Wanem nao ‘stul bilong Jehovah for putim leg antap’ and “smol leaf haos” bilong hem? Man wea raetem psalm hem singsing olsem: “Iumi go insaed long nambawan tabernacle bilong hem; iumi baodaon front long stul bilong hem for putim leg antap.” (Psalm 132:7) So, datfala ‘stul for putim leg antap’ wea Lamentations 2:1 storyim hem haos bilong Jehovah for worship, wea hem nao temple bilong hem. Olketa bilong Babylon, olketa ‘bonem haos bilong Jehovah’ olsem wanfala smol leaf haos nomoa wea stap long wanfala garden.—Jeremiah 52:12, 13.
2:16, 17—For followim stretfala order bilong Hebrew alphabet, why nao verse 16 no start witim ayin and verse 17 no start witim pe? Taem olketa wea raetem Bible iusim diskaen wei for raet, plande taem olketa savve followim stretfala order bilong alphabet. Bat, olketa no followim datkaen wei for raet sapos datfala poem hem no here stret. Samting wea moa important hem mining bilong datfala poem no wei for followim order bilong olketa leta bilong alphabet or for helpem man for rememberim datfala poem. Long sem wei, olketa iusim tufala Hebrew leta hia long mek-thri and mek-foa song bilong Lamentations.—Lamentations 3:46, 49; 4:16, 17.
2:17—Wanem “toktok” abaotem Jerusalem nao Jehovah fulfillim? Luk olsem diswan hem story abaotem Leviticus 26:17, wea sei: “Bae mi againstim iufala, and olketa enemy bilong iufala bae lukim hao iufala bae distroe; and olketa wea heitim iufala bae purubutim iufala, and iufala bae ranawe nomata taem no eniwan aftarem iufala.”
Olketa Leson for Iumi:
1:1-9. Jerusalem hem barava krae big tumas long naet, and wata long eye bilong hem mekem feis bilong hem tuwet. No eniwan stap long olketa gate bilong hem, and olketa priest barava sorre tumas. Olketa young gele bilong hem barava sorre narawe, and wei wea hemseleva sorre hem tumas nao. Why nao olsem? Bikos sin wea Jerusalem hem duim hem barava big tumas. Olketa barava nogud samting wea hem duim hem stap insaed skirt bilong hem. Wei for duim sin hem no savve mekem man hapi, bat hem mekem man krae, feel nogud, and sorre tumas.
1:18. Evritaem Jehovah judge long stretfala wei taem hem panisim olketa wea duim sin.
2:20. Olketa Israelite kasem warning hao sapos olketa no lisin long toktok bilong Jehovah, bae olketa kasem trabol, wea insaed diswan hem for kaikaim ‘olketa son and dota bilong olketa.’ (Deuteronomy 28:15, 45, 53) Hem barava wise for iumi followim standard wea God markem finis!
“PLIS IU MAS HEREM TOKTOK BILONG MI”
Long Lamentations chapter 3, hem storyim nation bilong Israel olsem “wanfala strong man.” Nomata disfala man kasem trabol, hem gohed for singsing olsem: “Jehovah hem duim gud samting long man wea hope long hem, long soul wea gohed for lukaotem hem.” Hem ask olsem insaed long prea long trufala God: “Plis iu mas lisin taem mi story long iu. Plis iu mas herem toktok bilong mi and singaot bilong mi for help.” Hem askem Jehovah for duim samting long enemy taem hem sei: “Plis Jehovah, duim samting long olketa fitim samting wea olketa duim.”—Lamentations 3:1, 25, 56, 64.
Jeremiah talemaot sorre feeling wea hem garem abaotem olketa nogud samting wea happen insaed long 18-fala month wea olketa stap raonem Jerusalem. Hem sei: “Panis from rong samting wea dota bilong pipol bilong mi duim, hem winim panis wea Sodom kasem for sin bilong hem, wea God finisim kwiktaem, and wea no eniwan helpem hem.” Jeremiah gohed for story olsem: “Pipol wea olketa killim dae long sword, olketa moabeta winim pipol wea dae from hangre, bikos olketa no garem kaikai long garden and olketa hangre for longfala taem bifor olketa isisi gogo for dae.”—Lamentations 4:6, 9.
Mek-faev poem hem olsem pipol wea stap long Jerusalem olketa story olsem: “Plis Jehovah, rememberim samting wea happen long mifala. Plis lukim trabol wea kasem mifala.” Taem olketa storyim olketa nogud samting wea kasem olketa, olketa ask olsem: “Jehovah, iu bae rul for olowe. Throne bilong iu stap for olowe. Plis Jehovah, tekem mifala kam bak long iu and bae mifala willing for kam bak long iu. Mekem mifala for stap moa olsem longfala taem bifor.”—Lamentations 5:1, 19, 21.
Ansa for Olketa Bible Kwestin:
3:16—Wanem nao datfala toktok “Hem brekem teeth bilong mi witim gravol,” hem minim? Wanfala buk hem sei: “Olketa Jew wea olketa tekem for kamap prisoner, mas beikem bred insaed olketa hol long graon, and datwan mekem bred hem mix witim gravol.” Taem man kaikaim kaen bred olsem hem savve brekem teeth bilong hem.
4:3, 10—Why nao Jeremiah markem “dota bilong pipol” bilong hem witim “olketa ostrich long wilderness”? Job 39:16 hem storyim hao wanfala ostrich “hem raf long olketa son bilong hem olsem olketa no pikinini bilong hem.” Olsem example, bihaen mere ostrich hem garem olketa smol bird, hem lusim datfala nest and go for stap witim olketa nara mere ostrich, and man wan nao lukaftarem olketa smol bird hia. And wanem nao datfala mere ostrich and man wan duim taem danger kamap? Tufala evriwan lusim olketa smol baby bird bilong tufala insaed long nest and tufala ranawe nao. Long taem wea Babylon stap raonem Jerusalem, bigfala hangre hem kamap long Jerusalem, and datwan mekem olketa mami wea evritaem savve kea for olketa baby bilong olketa, olketa kamap olsem olketa ostrich long wilderness wea no savve kea long olketa baby bilong olketa. Olketa jackal no olsem, bat olketa barava lukaftarem gud olketa young wan bilong olketa.
5:7—Waswe, Jehovah savve panisim pipol for olketa sin wea laen dadi bilong olketa duim? Nomoa, Jehovah no panisim pipol for olketa sin wea laen dadi bilong olketa duim. Bible hem sei: “Iumi wanwan bae givim ansa for iumiseleva long God.” (Romans 14:12) Bat, olketa sin wea olketa laen dadi duim savve affectim olketa genereson wea kamap bihaen. Olsem example, wei wea olketa bilong Israel bifor worshipim olketa idol, hem mekem hem no isi for followim stretfala wei for worship for olketa faithful genereson long Israel wea kamap bihaen.—Exodus 20:5.
Olketa Leson for Iumi:
3:8, 43, 44. Long datfala taem wea Jerusalem kasem trabol, Jehovah no willing for lisin long pipol wea stap long datfala taon taem olketa singaot for help. Why nao olsem? Bikos olketa pipol long there no obey, and olketa no repent. Sapos iumi laekem Jehovah for ansarem olketa prea bilong iumi, iumi mas obeyim hem.—Proverbs 28:9.
3:20. From Jehovah hem “Most Hae ovarem full earth” hem mas kam daon ‘for lukim skae and earth.’ (Psalm 83:18; 113:6) Nomata olsem, Jeremiah luksavve hao datfala Olmaeti Wan hem barava willing for kam daon for olketa pipol, wea minim, hem willing for kam daon kasem level bilong olketa man mekem hem encouragem olketa. Iumi barava hapi hao trufala God hem garem bigfala paoa and wisdom, and tu, hem garem hambol fasin!
3:21-26, 28-33. Wanem nao iumi savve duim for no givap nomata iumi safa long bigfala wei? Jeremiah hem storyim hao iumi savve duim datwan. Iumi shud no forgetim hao Jehovah showimaot long bigfala wei loving kaeness and bigfala mercy bilong hem. Iumi shud rememberim tu hao wei wea iumi laef hem barava strongfala reason for no lusim hope bilong iumi and iumi need for patient and weit nomoa long Jehovah for sevem iumi, and no komplen. And tu, iumi shud “putim mouth [bilong iumi] long graon,” wea minim, iumi mas hambol for deal witim olketa test, and for luksavve God hem garem gudfala reason for letem olketa samting for gohed.
3:27. Olketa hard taem and wei wea pipol tok spoelem olketa young wan savve testim faith bilong olketa. Bat hem ‘gud for wanfala man karem datfala yoke taem hem young.’ Why nao olsem? Bikos for lane for karem yoke for safa taem man hem young, datwan helpem hem for deal witim olketa problem wea bae hem feisim long future.
3:39-42. Hem no wise for iumi ‘gohed for komplen’ taem iumi safa from nogud samting wea iumi duim. Bat winim wei for komplen abaotem samting wea kamaot from olketa sin wea iumi duim, “iumi shud lukluk gud long fasin bilong iumi, and kam bak long Jehovah.” Wise samting for iumi duim hem for repent and changem wei bilong iumi.
Trustim Jehovah
Datfala Bible buk bilong Lamentations hem storyim tingting bilong Jehovah abaotem Jerusalem and land bilong Judah bihaen olketa bilong Babylon bonem datfala taon and datfala land hem stap emti. Wei wea pipol hia talemaot sin bilong olketa, hem showimaot klia hao long tingting bilong Jehovah, reason for olketa kasem trabol hem from mistek bilong olketa. Olketa song insaed disfala buk hem garem toktok wea showimaot olketa pipol hia hope long Jehovah and laek for go bak for duim samting wea stret. Nomata diswan hem no feeling bilong plande long taem bilong Jeremiah, diswan nao hem feeling bilong Jeremiah and olketa wea repent long datfala taem.
Tingting bilong Jehovah abaotem samting wea kasem Jerusalem wea buk bilong Lamentations hem storyim hem teachim iumi tufala barava important samting. First samting, wei wea Jerusalem hem distroe and Judah hem stap emti muvim iumi for obeyim Jehovah and hem olsem warning for no ting nating long will bilong God. (1 Corinthians 10:11) Mek-tu samting hem example bilong Jeremiah. (Romans 15:4) Nomata long taem wea luk olsem no eni hope stap, datfala profet wea sorre tumas hem depend long Jehovah for sevem hem. Hem barava important for trustim Jehovah and Word bilong hem evribit!—Hebrews 4:12.
[Piksa long page 7]
Profet Jeremiah hem lukim judgment message bilong hem fulfill
[Piksa long page 8]
Olketa Witness hia long Korea olketa kasem test long faith bilong olketa from olketa no teksaed