Kasem Gud Samting From Wei Bilong Iu
WANFALA man stap for 12-fala year long wanfala area long Athens. Evriday bihaen waka hem followim sem road go bak long haos. Then hem muv go long difren area narasaed long datfala taon. Wanday bihaen waka, hem start for go bak long haos. Hem kasem area wea hem bin stap long hem, then hem just luksavve hem go rong. Wei bilong hem for go olowe long there mekem hem go long haos wea hem stap bifor!
Iumi no sapraes hao samfala taem pipol sei wei bilong man for duim samting hem olsem fasin bilong hem, samting wea affectim laef bilong hem long samfala important wei. Long disfala wei, iumi savve markem wei bilong iumi for duim samting witim fire. Wanfala fire savve olsem laet wea iumi hapi for garem taem hem dark, hem savve stopem iumi for no feel cold and savve hotem kaikai bilong iumi. Bat, hem savve kamap wanfala nogud enemy tu wea savve distroem laef and evri samting wea man ownim. Sem samting hem tru abaotem wei bilong iumi. Sapos iumi trae hard for iusim long gudfala wei, hem savve helpem iumi. Bat olketa savve spoelem iumi tu.
For datfala man wea iumi storyim firstaem, wei for duim samting evritaem no kosim eni big problem, hem just westem lelebet taem bilong hem nomoa. Bat taem important samting kamap, wei bilong iumi savve mekem iumi kasem gud samting or savve leadim iumi long bigfala trabol. Tingim samfala really example long Bible wea showimaot wei wea iumi duim samting savve helpem or stopem service bilong iumi long God and wei wea iumi fren witim hem.
Example Insaed Bible Bilong Gud and Nogud Wei
Noah, Job, and Daniel kasem blessing bilong klos wei for fren witim God. Bible praisem olketa “from raeteous fasin bilong olketa.” (Ezekiel 14:14) Samting wea mekem iumi interest nao hem hao laef bilong thrifala man hia showimaot olketa mekem grow gudfala wei for duim samting.
Noah kasem instruction for buildim wanfala ark, wanfala ship wea long winim wanfala soccer field and hae winim wanfala faev-storey building. Kaen maeti project olsem bae mekem eni savveman for wakem ship long taem bifor feel olsem hem hard tumas. Noah witim sevenfala famili member bilong hem buildim datfala ark nomata olketa no garem eni tul olsem man garem distaem. And tu, Noah go ahed for preach long pipol long datfala taem. Iumi savve sure hem provaedem tu olketa spiritual and physical samting wea famili bilong hem needim. (2 Peter 2:5) For duim evri samting hia, Noah mas garem gudfala wei for waka. Narafala samting moa, Bible storyim Noah olsem man wea “wakabaot witim trufala God. . . . Noah go ahed for duim evri samting wea God komandim hem.” (Genesis 6:9, 22; 7:5) From Bible sei hem “no garem blame,” iumi sure hem go ahed for wakabaot witim God bihaen long Flood and tu, bihaen bigfala wei for againstim Jehovah kamap long Babel. Tru nao, Noah go ahed for wakabaot witim God go kasem dae bilong hem taem hem 950 year.—Genesis 9:29.
Gudfala wei bilong Job helpem hem for kamap man wea “no garem blame and garem stretfala fasin.” (Job 1:1, 8; 2:3) Hem wei, or fasin bilong hem, for olsem famili priest long wei for offerim olketa sakrifaes for olketa pikinini bilong hem bihaen evri feast, nogud olketa “‘bin sin and cursim God insaed long heart bilong olketa.’ Diswan nao samting wea Job savve duim evritaem.” (Job 1:5) Long famili bilong Job, wei for worshipim Jehovah evritaem hem barava important.
Daniel servem Jehovah “evritaem” insaed longfala laef bilong hem. (Daniel 6:16, 20) Wanem nao olketa gudfala spiritual wei bilong Daniel? Wan samting, hem evritaem prea long Jehovah. Nomata wanfala law tambuim diswan, “thrifala taem insaed long day [Daniel] nildaon and prea and givim praise front long God bilong hem, olsem hem savve duim evritaem.” (Daniel 6:10) Hem no lusim wei bilong hem for prea long God, nomata wei for duim olsem putim laef bilong hem long danger. Iumi sure disfala wei bilong Daniel strongim hem long laef bilong hem wea barava faithful long God. Luk olsem, Daniel garem tu gudfala wei for studyim and barava ting raonem olketa nambawan promis bilong God. (Jeremiah 25:11, 12; Daniel 9:2) Olketa gudfala wei hia barava helpem hem for go ahed strong go kasem end, faithful for ran go kasem end bilong resis for laef.
Long narasaed, wanfala no gud wei bilong Dinah mekem hem kasem nogud samting. Hem “evritaem go aot for lukim olketa dota bilong land,” wea no worshipim Jehovah. (Genesis 34:1) Disfala wei bilong hem wea maet luk olsem gud nomoa hem lead go long trabol. First samting, Shechem, wanfala young man wea pipol ting long hem olsem “wan wea kasem honor long full haos bilong dadi bilong hem,” spoelem hem. Bihaen, feeling bilong tufala brata bilong Dinah for pei bak mekem olketa busarem evri man insaed wanfala full taon. Samting wea kamaot from diswan hem barava nogud!—Genesis 34:19, 25-29.
Hao nao iumi savve mek sure wei bilong iumi bae helpem iumi and no spoelem iumi?
Iusim Gud Wei Bilong Iumi
Wanfala savveman hem raet, “olketa wei bilong man savve bossim future bilong iumi.” Bat diswan no minim hem mas olsem. Bible barava showimaot klia hao iumi savve chus for changem olketa nogud wei bilong iumi and mekem grow olketa gudfala wei.
Gudfala wei bilong iumi savve mekem moa isi for followim wei bilong laef olsem Christian and for win long hem. Alex, wanfala Christian from Greece, hem sei: “Wei for followim evritaem wanfala schedule for mek sure mi duim olketa difren responsibility hem sevem taem.” Theophilus, wanfala Christian elder, talem hao wei for plan helpem hem for win. Hem sei: “Mi barava sure mi bae no fit for lukaftarem olketa Christian responsibility bilong mi long gudfala wei sapos mi no garem wei for mekem gudfala plan.”
Iumi olketa Christian kasem encouragement for “go ahed for wakabaot followim order long disfala sem wei.” (Philippians 3:16) Disfala sem wei minim “wei for duim sem samting evritaem.” Olketa gudfala wei olsem hem helpem iumi bikos iumi no need for iusim taem for ting raonem evri step—iumi getius finis from iumi bin duim sem samting evritaem. Olketa wei bilong iumi wea strong savve kamap olsem fasin bilong iumi. Olsem wei bilong hem for draev sef helpem wanfala draeva for kwiktaem mekem gudfala disison taem hem feisim danger long road, olketa gudfala wei for duim samting savve helpem iumi for kwiktaem mekem olketa gudfala disison taem iumi followim Christian wei.
Olsem English man for raet Jeremy Taylor hem sei: “Olketa wei hem kamaot from akson.” Sapos olketa wei bilong iumi hem gudfala, hem savve isi for iumi duim gud samting. Olsem example, sapos hem wei bilong iumi olsem olketa Christian minister for evritaem tekpart long preaching waka, hem bae moa isi and iumi bae hapi for go aot long field service. Iumi read abaotem olketa aposol hao “evriday long temple and from haos tu haos olketa go ahed and nating givap for teach and talemaot gud nius abaotem Christ, Jesus.” (Acts 5:42; 17:2) Long narasaed, sapos iumi tekpart long ministry long samfala taem nomoa, iumi maet feel fraet, and needim moa taem for getius mekem iumi feel fit for duim disfala important Christian waka.
Hem tru tu saed long olketa nara part long Christian schedule bilong iumi. Wei bilong iumi for duim samting savve helpem iumi for evritaem ‘readim Word bilong God day and naet.’ (Joshua 1:8; Psalm 1:2) Wanfala Christian garem wei for readim Bible for 20 or 30 minute bifor hem sleep long naet. Nomata taem hem barava taed, hem faendem hao sapos hem trae for sleep bat hem no duim Bible reading firstaem, hem no savve sleep gud. Hem mas getap and lukaftarem datfala spiritual need. Disfala gudfala wei helpem hem for readim full Bible evri year for samfala year finis.
Man wea showim Nambawan Example for iumi, Jesus Christ, garem wei for attendim olketa meeting wea pipol storyim Bible. “Olsem fasin bilong hem long sabbath day, hem go insaed long synagogue, and hem standap for read.” (Luke 4:16) For Joe, wanfala elder wea garem bigfala famili and mas waka for staka hour, wei for go long olketa meeting barava help for mekem grow feeling for needim and want for attend evritaem. Hem sei: “Disfala wei helpem mi go ahed gud, hem provaedem spiritual strong wea mi barava needim for win for deal witim olketa challenge and problem.”—Hebrews 10:24, 25.
Olketa kaen wei olsem hem barava important long disfala Christian resis for laef. Report from wanfala kantri wea pipol bilong Jehovah kasem persecution hem sei: “Olketa wea garem olketa gudfala spiritual wei and barava tinghae long truth no faendem hem hard for stand strong taem olketa kasem test, bat olketa wea nomata long ‘gudfala taem’ missim olketa meeting, no go evritaem long field service, and brekem faith long olketa smol samting, planti taem foldaon taem olketa kasem test wea olsem ‘fire.’”—2 Timothy 4:2.
Stap Klia Long Olketa Nogud Wei, Mekius Long Olketa Gud Wan
Samfala sei ‘wanfala man shud mekem grow nomoa olketa wei for duim samting wea hem willing for go ahed followim.’ Tru nao, olketa wei wea nogud barava olsem wanfala raf boss. Nomata olsem, iumi savve lusim.
For samfala taem Stella garem problem for lukluk olowe long video. Hem sei: “Luk olsem wanfala ‘gud’ reason stap for evri nogud wei wea winim mi.” Diswan hem tru saed long problem bilong hem for ova tumas for lukluk long video. Hem tingse hem bae lukluk for “relax lelebet” or for “duim difren samting.” Bat gogo wei bilong hem no balance, and hem lukluk long video for staka hour. “Disfala nogud wei stopem mi for muv ahed long spiritual wei,” hem sei. Gogo, from hem trae hard, hem katdaon long taem wea hem iusim for lukluk long video and hem lane for chus gud. Stella hem sei “Mi evritaem trae for no forgetim why nao mi want for lusim disfala wei for duim samting and mi depend long Jehovah for helpem mi stand strong long disison bilong mi.”
Wanfala Christian wea nem bilong hem Charalambos luksavve long wanfala nogud wei wea stopem hem for muv ahed long spiritual wei—wei for delay for duim samting. “Taem mi luksavve hao disfala wei for delay for duim samting hem nogud, mi start for changem laef bilong mi. Mi putim olketa goal and barava planim hao bae mi kasem and taem for kasem olketa. For evritaem followim olketa disison and plan hem barava stretem problem bilong mi, and mi keepim disfala gudfala wei for duim samting kam kasem distaem.” Tru nao, gudfala wei nao best samting for changem nogud wei.
Olketa wea iumi kaban witim tu savve mekem iumi for garem olketa gud or nogud wei. Olsem olketa nogud wei, olketa gudfala wei tu hem isi for iumi kasem from narawan. Long sem wei hao “wei for kaban witim nogud pipol hem spoelem gudfala fasin,” gudfala kaban maet showimaot example long olketa gudfala wei for followim. (1 Corinthians 15:33) Samting wea barava important, hem hao wei bilong iumi savve strongim wei wea iumi fren witim God or savve mekem diswan kamap wik. Stella hem sei: “Sapos olketa wei bilong iumi hem gudfala, hem savve mekem wei wea iumi servem Jehovah moa isi. Sapos olketa nogud, hem mekem hem moa hard.”
Waka for garem gudfala wei, and live followim. Bae hem kamap olsem strong samting wea helpem iu long laef.
[Piksa long page 19]
Olsem fire, wei bilong iumi savve helpem iumi or spoelem iumi
[Piksa long page 21]
Hem fasin bilong Jesus for stap long synagogue long Sabbath taem olketa readim Word bilong God
[Olketa Piksa long page 22]
Gudfala spiritual wei bilong iumi savve strongim wei wea iumi fren witim God