Iusim Gud Olketa Kwestin

FROM olketa kwestin needim ansa—nomata man talem or tingim nomoa—olketa help for pullim interest bilong olketa wea lisin. Olketa kwestin savve helpem iu for startim story and for enjoyim interesting wei for story tugeta. Olsem wanfala speaker and teacher, maet iu iusim olketa kwestin for mekem interest kamap, for helpem samwan for ting raonem wanfala subject, or for strongim samting wea iu talem. Taem iu iusim gud olketa kwestin, iu encouragem narafala pipol for tingting strong and no for lisin nating. Evritaem tingim goal bilong iu and askem olketa kwestin long wei wea bae helpem iu kasem datfala goal.

For Encouragem Pipol for Story. Taem iu long field ministry, lukaotem chance for askem pipol for talem tingting bilong olketa, sapos olketa willing.

Planti Witness startim olketa interesting story long wei for ask, “Waswe, enitaem iu tingim. . . ?” Taem olketa chusim kwestin wea planti pipol barava ting abaotem, olketa bae enjoyim tumas field ministry. Nomata datfala man maet no bin ting raonem datfala kwestin bifor, maet hem muvim hem for laek savve long ansa. Iu savve startim story abaotem planti difren samting long wei for ask “Wanem nao tingting bilong iu . . . ?,” “Hao nao iu feel . . . ?,” and “Waswe, iu biliv . . . ?”

Taem man for talemaot gud nius, Philip, hem go long wanfala bigman bilong kot long Ethiopia wea read big long profesi bilong Isaiah, Philip askem hem: “Waswe, iu minim [or, iu barava savve long] samting wea iu readim?” (Acts 8:30) Disfala kwestin hem openem wei for Philip explainim olketa tru samting abaotem Jesus Christ. Samfala Witness distaem iusim kaen kwestin olsem for faendem pipol wea barava laek for minim klia Bible truth.

Taem olketa garem chance for talem tingting bilong olketa seleva, planti bae feel moa willing for lisin long iu. Bihaen iu askem wanfala kwestin, lisin gud. Mas kaen and no againstim hem taem iu herem ansa bilong hem. Sapos hem fitim, praisem hem. Wantaem, bihaen wanfala scribe hem ‘ansa long gudfala wei,’ Jesus praisem hem, taem hem sei: “Iu no farawe from kingdom bilong God.” (Mark 12:34) Nomata sapos iu no agree witim datfala man, iu savve thankiu long hem from hem talem tingting bilong hem. Samting wea hem talem maet mekem iu luksavve long samting wea iu need for tingim taem iu sharem Bible truth witim hem.

For Introducem Olketa Important Point. Taem iu story witim wanfala grup or long man wanwan, trae for iusim olketa kwestin wea lead go long olketa important point. Mek sure olketa kwestin hia hem saed long samting wea audience bilong iu barava interest long hem. Iu savve iusim tu kaen kwestin wea mekem man interest bikos ansa hem no showaot klia. Wei for stop lelebet bihaen iu askem wanfala kwestin savve mekem audience barava interest for lisin long next samting wea iu talem.

Wantaem, profet Micah iusim samfala kwestin. Bihaen hem askem wanem nao God expectim from olketa wea worshipim hem, datfala profet askem nara fofala kwestin, and hem talem tu ansa wea maet fitim each wan. Evri kwestin hia help for redyim man wea readim for kasem kliafala ansa wea hem givim long conclusion bilong datfala part bilong story bilong hem. (Mic. 6:6-8) Waswe, iu savve duim samting olsem taem iu teach? Traem.

For Story Raonem Wanfala Subject. Iu savve iusim olketa kwestin for helpem narawan for minim gud pruv for samting iu story raonem. Olsem Malachi 1:2-10 storyim, Jehovah duim diswan taem hem talem wanfala important toktok long Israel. Firstaem hem talem olketa: “Mi bin lovem iufala pipol.” Olketa fail for tinghae long datfala love, so hem askem olketa: “Waswe, Esau hem no brata bilong Jacob?” Then Jehovah hem point go long Edom wea emti evribit olsem pruv hao hem no lovem datfala nation from wicked fasin bilong olketa. Hem iusim tu samfala tokpiksa and kwestin for strongim hao Israel fail for tinghae long love bilong hem. Samfala kwestin hem talem long wei wea luk olsem olketa priest wea no faithful nao askem. Samfala nara kwestin hem olketa wea Jehovah nao askem long olketa priest. Disfala story hem muvim feeling and kasholem interest bilong iumi; kliafala wei wea hem story raonem samting hem hard for denyim; and datfala message hem hard for forgetim.

Samfala speaker iusim gud olketa kwestin long semkaen wei. Nomata audience no need for talem ansa, hem mekem olketa interest, olsem olketa join insaed wanfala story.

Taem iumi conductim olketa Bible study, iumi duim long wei wea student hem tekpart. Tru nao, hem bae helpem student moa sapos hem givim ansa long toktok bilong hemseleva. Long kaenfala wei askem olketa extra kwestin for helpem student kasem point. Long olketa main point, encouragem hem for iusim Bible olsem faondeson for ansa bilong hem. Maet iu ask tu: “Hao nao samting iumi storyim hem join witim disfala nara point wea iumi studyim finis? Why nao hem important? Hao nao diswan shud affectim laef bilong iumi?” Wei olsem hem moabeta winim wei for talem olketa biliv bilong iuseleva or for iu nao explainim go moa. Taem iu iusim olketa kwestin olsem iu helpem student for iusim ‘paoa bilong hem for tingting stret’ for worshipim God.—Rom. 12:1.

Sapos student hem no minim wanfala idea, iu mas patient. Maet hem trae for markem samting wea iu talem witim samting wea hem bilivim for planti year finis. For storyim datfala subject long difren wei maet helpem hem. Bat samfala taem iu need for pullim tingting long barava simpol wei. No hol bak for iusim Bible. Iusim olketa tokpiksa. Witim olketa samting hia, askem olketa simpol kwestin wea encouragem datfala man for tingting stret long evri pruv.

For Pullim Kamap Olketa Deep Feeling. Taem pipol ansarem olketa kwestin, olketa no evritaem talem really feeling bilong olketa. Olketa maet talem nomoa ansa wea olketa tingse iu laekem. Iu needim fasin for luksavve. (Prov. 20:5) Olsem Jesus duim, maet iu ask: “Waswe, iu bilivim diswan?”—John 11:26.

Taem planti disaepol bilong Jesus feel nogud long samting wea hem talem and lusim hem, Jesus askem olketa aposol bilong hem for talemaot feeling bilong olketa. Hem ask olsem: “Waswe, iufala tu laek for go?” Peter talem feeling bilong olketa taem hem sei: “Lord, hu nao bae mifala go long hem? Iu nao garem olketa toktok bilong laef olowe; and mifala bilivim and savve hao iu nao Holy Wan bilong God.” (John 6:67-69) Narataem, Jesus askem olketa disaepol bilong hem: “Olketa man sei Son bilong man hem hu?” Bihaen diswan hem askem wanfala kwestin wea encouragem olketa for talemaot wanem nao insaed long heart bilong olketa. “Bat waswe long iufala, iufala tingse mi hu nao?” Long ansa bilong hem, Peter hem sei: “Iu nao Christ, Son bilong living God.”—Matt. 16:13-16.

Taem iu conductim wanfala Bible study, maet hem gud for followim semkaen wei. Maet iu ask: “Hao nao olketa skulfren (or wakfren) bilong iu ting long diswan?” Then maet iu ask: “Hao nao feeling bilong iu abaotem datwan?” Taem iu savve long trufala feeling bilong man, bae iu fit olsem wanfala teacher for barava helpem hem.

For Strongim Moa. Iu savve iusim olketa kwestin for strongim samfala point tu. Aposol Paul duim diswan, olsem Romans 8:31, 32 hem talem: “Sapos God stap witim iumi, hu nao bae againstim iumi? Hem wea no holem bak Son bilong hemseleva bat givim hem for iumi evriwan, why nao bae hem witim datwan no givim tu evri nara samting?” Long tufala verse hia, lukim hao each kwestin hem mekem moa klia datfala toktok wea hem talem firstaem.

Bihaen hem raetem judgment bilong Jehovah againstim king bilong Babylon, profet Isaiah showimaot strong biliv taem hem sei: “Jehovah bilong olketa army hemseleva givim kaonsel, and hu nao savve stopem? And taem hem putim aot hand bilong hem, hu nao savve tanem datwan bak?” (Isa. 14:27) Samting wea insaed olketa kwestin hia showim hao no eniwan savve denyim point wea hem showimaot. Hem no needim eni ansa.

For Showimaot Rong Tingting. Olketa kwestin wea iu preparem gud firstaem olketa olsem tul wea garem paoa for showimaot rong tingting. Bifor hem healim wanfala man, Jesus askem olketa Pharisee and samfala savveman long Law: “Waswe, hem fitim law for duim healing long sabbath?” Bihaen hem healim datfala man, hem askem nara kwestin: “Hu long iufala nao, sapos son or buluka bilong hem foldaon insaed long well, bae no stretawe pullim hem aot long sabbath day?” (Luke 14:1-6) Hem no expectim eni ansa, and no eniwan givim ansa. Olketa kwestin hia showimaot rong tingting bilong olketa.

Samfala taem, olketa tru Christian tu savve foldaon long rong tingting. Samfala long Corinth long first century tekem brata bilong olketa long kot for stretem olketa problem wea olketa fit for stretem midolwan olketa seleva nomoa. Hao nao aposol Paul deal witim diswan? Hem askem samfala kwestin for stretem tingting bilong olketa.—1 Cor. 6:1-8.

Sapos iu practice, iu savve lane for iusim gud olketa kwestin. Bat remember for showimaot respect, especially taem iu story witim olketa olo, pipol wea iu no savve gud, and olketa wea garem hae position. Iusim olketa kwestin for storyim Bible truth long naesfala wei.