Kamap Gud Long Ministry​—Iusim Olketa Kwestin for Helpem Iu Teach Gud

WHY HEM IMPORTANT: Bible sei ‘tingting bilong man’ hem olsem wata wea ‘dip tumas.’ So olketa kwestin wea iumi askem man hem olsem baket wea iumi iusim for kasem tingting bilong hem. (Pr 20:5) Taem iumi askem man olketa kwestin hem helpem hem for ting raonem samting and givim ansa. Olketa ansa wea hem givim savve helpem iumi for minim tingting bilong hem. Wei wea Jesus iusim olketa kwestin helpem hem for teach gud. Hao nao iumi savve followim example bilong hem?

WANEM FOR DUIM:

• Askem tingting bilong man. Jesus askem samfala kwestin long olketa disaepol for savve long tingting bilong olketa. (Mt 16:13-16; be 238 par. 3-5) Wanem nao samfala kwestin iu savve askem for faendemaot tingting bilong man?

• Askem olketa kwestin for stretem tingting bilong man. For helpem Peter garem stretfala tingting, Jesus askem olketa kwestin and givim Peter samfala ansa for helpem hem savve long stret samting. (Mt 17:24-26) Wanem nao samfala kwestin iu savve askem for stretem tingting bilong man?

• Praisem man. Bihaen wanfala scribe “ansa long gudfala wei,” Jesus praisem hem. (Mr 12:34) Wanem nao iu savve talem for praisem man wea ansarem kwestin bilong iu?

LUKLUK LONG FIRST PART BILONG VIDEO DUIM WAKA WEA JESUS DUIM—TEACH, AND THEN ANSAREM OLKETA KWESTIN HIA:

• Nomata brata hia talem stretfala samting, wanem nao showimaot hem no teach long gudfala wei?

• Why nao hem gud for duim moa winim wei for explainim olketa samting?

LUKLUK LONG MEK-TU PART BILONG VIDEO, AND THEN ANSAREM OLKETA KWESTIN HIA:

• Hao nao olketa kwestin bilong brata helpem man for lane?

• Wanem nao olketa nara samting brata duim taem hem teach wea iumi laek for followim?