Iumi Savve Trustim Olketa Reminder Bilong Jehovah

1. Wanem nao samfala subject wea iumi studyim plande taem, and hao nao datwan helpem iumi?

TAEM iu prepare for Wastaoa Study, waswe, enitaem iu sei: ‘Iumi studyim finis disfala subject’? Sapos iu attendim olketa meeting bilong Olketa Jehovah’s Witness for longtaem finis, maet iu luksavve samfala subject iumi studyim staka taem finis. Plande taem iumi study abaotem Kingdom bilong God, ransom, preaching waka, and olketa wei olsem love and faith. Taem iumi studyim moa olketa subject hia, datwan strongim faith bilong iumi and helpem iumi for “followim toktok bilong God, no herem nomoa.”—Jas. 1:22.

2. (a) Long Bible, plande taem datfala word “reminder” savve minim wanem? (b) Hao nao olketa law bilong Jehovah hem difren from olketa law bilong man?

² Long Bible, plande taem datfala word “reminder” savve minim olketa law and komand wea God givim long pipol bilong hem. Olketa law bilong Jehovah no olsem olketa law bilong man wea no perfect and wea staka taem olketa mas stretem or changem. Olketa law bilong Jehovah perfect and iumi savve trustim olketa. Hem tru, pipol bilong God distaem no need for followim samfala law wea hem givim for pipol bilong hem bifor. Bat datwan no minim olketa law hia no stret. Man wea raetem psalm sei: “Olketa reminder bilong iu raeteous for olowe.”—Ps. 119:144.

3, 4. (a) Samfala taem wanem nao insaed olketa reminder bilong Jehovah? (b) Wanem nao olketa Israelite bae kasem sapos olketa obeyim olketa reminder hia?

³ Samfala taem olketa reminder bilong Jehovah garem warning insaed. Plande taem God iusim olketa profet for givim warning long nation bilong Israel. Olsem example, taem olketa Israelite redi for go insaed Promis Land, Moses warnim olketa. Hem sei: “Keakea, nogud eni samting switim heart bilong iufala and iufala worshipim olketa nara god and baodaon long olketa, wea bae mekem Jehovah barava kros long iufala.” (Deut. 11:16, 17) Bible storyim staka nara reminder wea God givim for helpem pipol bilong hem.

⁴ Staka taem Jehovah talem olketa Israelite for fraet long hem, obeyim hem, and mekhae long nem bilong hem. (Deut. 4:29-31; 5:28, 29) God promis sapos olketa obeyim olketa reminder hia, olketa bae kasem staka blessing.—Lev. 26:3-6; Deut. 28:1-4.

HAO OLKETA ISRAELITE TING LONG OLKETA REMINDER BILONG GOD

5. Why nao Jehovah faet for King Hezekiah?

⁵ God evritaem duim wanem hem promisim long datfala nation bilong Israel. Olsem example, taem King Sennacherib bilong Assyria attakim Judah and sei bae hem aotem King Hezekiah, Jehovah sendem wanfala angel for helpem pipol bilong Hem. Insaed wanfala naet nomoa, angel bilong God killim dae 185,000 soldia bilong Assyria. Sennacherib shame and go bak long hom bilong hem. (2 Ki. 19:35; 2 Chron. 32:21) Why nao God faet for King Hezekiah? Bikos Hezekiah hem faithful long Jehovah and “gohed obeyim olketa law bilong hem.”—2 Ki. 18:1, 5, 6.

6. Wanem nao King Josiah duim wea showimaot hem trustim Jehovah?

⁶ Narawan wea obeyim Jehovah hem King Josiah. Start kam long taem wea hem eit year nomoa, hem duim “wanem hem stret long eye bilong Jehovah.” (2 Chron. 34:1, 2) Josiah showimaot hem trustim Jehovah taem hem distroem olketa idol and helpem pipol for worshipim Jehovah moa. From datwan, Jehovah blessim Josiah and full nation tu.—Readim 2 Chronicles 34:31-33.

7. Wanem nao happen taem olketa Israelite no obeyim Jehovah?

⁷ Bat pipol bilong God no evritaem barava trustim olketa reminder bilong Jehovah. Samfala taem olketa no obeyim Jehovah. Taem faith bilong olketa wik, hem isi for nara pipol switim olketa for worshipim olketa laea god. (Eph. 4:13, 14) Hem warnim olketa and sei olketa bae kasem nogud samting sapos olketa no trustim hem, and hem nao samting wea happen.—Lev. 26:23-25; Jer. 5:23-25.

8. Wanem nao iumi savve lanem from nation bilong Israel?

⁸ Wanem nao iumi savve lanem from nation bilong Israel? Pipol bilong God distaem tu kasem kaonsel and discipline. (2 Pet. 1:12) Evritaem iumi readim Bible, iumi kasem olketa reminder bilong Jehovah. Jehovah letem iumi for disaed sapos iumi bae obeyim olketa law bilong hem or duim samting wea iumiseleva tingse hem stret. (Prov. 14:12) Bae iumi storyim why iumi shud trustim olketa reminder bilong Jehovah and gud samting wea iumi kasem taem iumi duim olsem.

OBEYIM GOD AND BAE IU LAEF

9. Taem olketa Israelite wakabaot long wilderness, hao nao Jehovah showimaot hem sapotim olketa?

⁹ Olketa Israelite wakabaot long wilderness for 40 year. Long start bilong datfala gogo, Jehovah no talem wanem hem bae duim for leadim, protectim, and lukaftarem olketa. Nomata olsem, staka samting wea hem duim showimaot olketa bae kasem gud samting sapos olketa trustim hem and obeyim wanem hem talem. Jehovah iusim cloud long day and fire long naet for remindim olketa Israelite hem nao sapotim olketa taem hem leadim olketa long datfala wilderness. (Deut. 1:19; Ex. 40:36-38) Hem provaedem tu wanem olketa needim. “Olketa garem evri samting wea olketa needim. Kaleko bilong olketa no brek, and leg bilong olketa no boela.”—Neh. 9:19-21.

10. Hao nao Jehovah leadim pipol bilong hem distaem?

¹⁰ Klosap nao pipol bilong God bae stap insaed niu world wea evri samting hem raeteous. Waswe, iumi trustim Jehovah for provaedem wanem iumi needim long taem bilong “bigfala trabol” wea klosap for kam? (Matt. 24:21, 22; Ps. 119:40, 41) Hem tru, Jehovah no iusim cloud or fire for leadim iumi go insaed niu world. Bat hem iusim organization bilong hem for givim iumi olketa reminder. Olsem example, iumi kasem encouragement for strongim wei wea iumi fren witim Jehovah long wei for readim Bible, duim famili worship, and for evritaem go long olketa meeting and duim preaching waka. Waswe, iumi changem samfala samting long laef bilong iumi mekem iumi duim olketa samting hia? Sapos iumi duim olsem, bae iumi garem strongfala faith wea iumi needim mekem iumi fit for go insaed niu world.

11. Wanem nao God duim wea showimaot hem laekem iumi for healthy and hapi?

¹¹ Olketa reminder wea iumi kasem from organization bilong God helpem iumi tu for mekem olketa gudfala disison. Olsem example, iumi kasem encouragement for garem stretfala tingting abaotem olketa material samting, and for garem simpol laef mekem iumi no wari tumas. Iumi kasem samfala instruction abaotem kaleko and lukluk bilong iumi, hao for chusim gudfala hapitaem, and haomas education nao hem fitim. And tu, iumi kasem olketa reminder for mek redi for eni emergency wea maet kamap. Iumi kasem olketa reminder tu for mek sure haos, trak, and Kingdom Hall bilong iumi hem sef and bae no mekem eniwan garekil. Evri reminder hia showimaot God laekem iumi for healthy and hapi.

OLKETA REMINDER HELPEM OLKETA FIRST CHRISTIAN GOHED FAITHFUL

12. (a) Wanem nao Jesus storyim long olketa disaepol bilong hem plande taem? (b) Wanem nao Jesus duim wea Peter no forgetim, and wanem nao iumi lanem from example bilong Jesus?

¹² Long first century, pipol bilong God kasem staka reminder. Plande taem Jesus storyim long olketa disaepol hao wei for hambol hem important. Hem no talem datwan nomoa bat hem showimaot example tu long wei for hambol. Long naet bifor Jesus dae, hem hipap witim olketa aposol bilong hem for celebratem Pasova. Taem olketa aposol kaikai, Jesus hem getap and wasim leg bilong olketa. Diswan hem samting wea wakaman long haos nao savve duim. (John 13:1-17) Olketa disaepol no forgetim disfala samting wea Jesus duim. Samting olsem 30 year bihaen, aposol Peter wea stap long datfala Pasova hem kaonselem olketa nara Christian abaotem wei for hambol. (1 Pet. 5:5) Example bilong Jesus shud encouragem iumi evriwan for hambol.—Phil. 2:5-8.

13. Wanem nao nara samting wea Jesus sei olketa disaepol bilong hem mas garem?

¹³ Nara samting wea Jesus storyim long olketa disaepol bilong hem tu, hem for olketa mas garem strongfala faith. Wantaem, olketa disaepol no savve raosem demon from wanfala boy, so olketa askem Jesus olsem: “Hao nao mifala no savve raosem datfala demon?” Jesus sei long olketa: “Bikos faith bilong iufala hem smol tumas ia.” Then hem sei sapos olketa garem faith wea smol olsem “wanfala seed bilong mustard tree nomoa,” no eni samting bae hard for olketa. (Matt. 17:14-20) Taem Jesus duim ministry bilong hem long earth, hem teachim olketa disaepol bilong hem wei for garem faith hem barava important. (Readim Matthew 21:18-22.) Waswe, iumi evritaem attendim olketa convention, assembly, and meeting for strongim faith bilong iumi? Iumi enjoyim olketa hipap hia, and important samting, hem chance tu for showimaot iumi trustim Jehovah.

14. Why nao hem important for iumi showimaot kaen love wea man no tingim hemseleva?

¹⁴ Olketa Christian Greek Scripture garem plande reminder for iumi showimaot love long narawan. Jesus sei mek-tu barava important law hem for “lovem narawan long sem wei wea iu lovem iuseleva.” (Matt. 22:39) James, wea hem haf brata bilong Jesus, sei love hem “law bilong king.” (Jas. 2:8) Aposol John sei: “Olketa brata wea mi lovem, mi no givim wanfala niu law long iufala, bat mi storyim datfala old law wea iufala kasem finis.” (1 John 2:7, 8) Wanem nao John minim taem hem sei “old law”? Hem story abaotem datfala law wea sei iumi mas lovem narawan. Datfala law hem “old” bikos olketa disaepol kasem finis from Jesus “taem [olketa] start for lane abaotem hem and followim hem.” Bat datfala law hem “niu” tu bikos samfala samting bae happen long future and long taem olsem nao olketa disaepol mas showimaot kaen love wea man no tingim hemseleva or wea maet hem willing for dae for brata bilong hem. Iumi tinghae long olketa warning wea helpem iumi for no tingim iumiseleva olsem staka pipol long world, bat for showimaot love long narawan.

15. Wanem nao main waka bilong Jesus long earth?

¹⁵ Jesus hem barava tingim pipol. Hem showimaot diswan taem hem healim olketa wea sik and mekem olketa wea dae for laef bak. Bat main waka bilong Jesus long earth hem no for healim pipol. Waka bilong hem for preach and teach nao barava helpem pipol. Hao nao olsem? Olsem example, evriwan wea Jesus healim and mekem olketa laef bak olketa kamap olo and dae, bat olketa wea acceptim message bilong hem garem chance for kasem laef olowe.—John 11:25, 26.

16. Storyim waka wea Olketa Jehovah’s Witness duim for preach and for teach.

¹⁶ Jesus talem olketa disaepol bilong hem for “go and teachim pipol long evri kantri for kamap disaepol.” (Matt. 28:19) Olketa Christian long first century gohed duim preaching waka wea Jesus startim, and iumi distaem preach long staka pipol and long staka ples winim enitaem bifor. Winim seven million Jehovah’s Witness strong for teachim nara pipol abaotem Kingdom bilong God long winim 230 kantri, and olketa studyim Bible witim plande million pipol. Disfala preaching waka pruvim iumi stap long olketa last day.

TRUSTIM JEHOVAH DISTAEM

17. Wanem kaonsel nao Paul and Peter talem for olketa Christian long first century?

¹⁷ Olketa reminder helpem olketa Christian long first century for strongim faith bilong olketa. Olsem example, taem Paul hem prisoner long Rome, hem talem Timothy for “gohed followim pattern bilong olketa gudfala toktok wea mi talem long iu.” (2 Tim. 1:13) Masbi datwan barava encouragem Timothy. Aposol Peter encouragem olketa Christian for no givap, lovem olketa brata, and kontrolem seleva. Then hem sei: “Mi bae gohed for talem long iufala olketa samting hia wea mi raetem kam long iufala, nomata iufala savve long olketa samting hia, and iufala biliv strong long olketa tru teaching.”—2 Pet. 1:5-8, 12.

18. Hao nao olketa Christian long first century ting long olketa reminder wea olketa kasem?

¹⁸ Olketa leta wea Paul and Peter raetem long olketa kongregeson hem semsem witim “toktok bilong olketa holy profet bifor.” (2 Pet. 3:2) Waswe, olketa brata bilong iumi long first century feel nogud taem olketa kasem olketa reminder olsem? Nomoa, olketa savve God nao remindim olketa bikos hem lovem olketa and laek for helpem olketa gohed faithful.—2 Pet. 3:18.

19, 20. (a) Why nao iumi shud trustim hao wei for followim olketa reminder bilong Jehovah hem best samting for iumi duim? (b) Wanem gud samting nao iumi savve kasem taem iumi duim olsem?

¹⁹ Distaem iumi garem staka reason for trustim hao wei for followim olketa reminder bilong Jehovah long Bible, hem best samting for iumi duim. Kaonsel long Bible hem evritaem stret. (Readim Joshua 23:14.) Bible storyim wei wea God deal witim pipol for plande thousand year. Evri samting wea olketa raetem long Bible hem for helpem iumi. (Rome 15:4; 1 Cor. 10:11) And tu, iumi lukim olketa profesi long Bible kamap tru long taem bilong iumi. Olketa profesi hem olsem olketa reminder wea olketa talem for future. Olsem example, plande million pipol kam for worshipim Jehovah, wea Bible sei bae happen “long olketa last day.” (Isa. 2:2, 3) Olketa nogud samting wea happen long world distaem tu hem part long Bible profesi. And olsem iumi storyim finis, preaching waka wea gohed evriwea long world hem samting wea Jesus sei bae happen.—Matt. 24:14.

²⁰ Iumi savve trustim Creator bilong iumi bikos hem evritaem duim samting wea hem talem. Waswe, iumi kasem gud samting from olketa reminder bilong hem? Wanfala sista wea nem bilong hem Rosellen hem sei: “Taem mi start for barava trustim Jehovah, mi start for lukim wei wea hem helpem mi for gohed and strongim mi.” Iumi tu savve kasem gud samting taem iumi obeyim olketa reminder bilong Jehovah.