Olketa Reference for Laef and Ministry Meeting Buk—December
DECEMBER 2-8
GUD SAMTING FROM BIBLE | REVELATION 7-9
“Jehovah Blessim Wanfala Big Crowd”
it-1-E 997 par. 1
Big Crowd
Wanfala kwestin kamap: Sapos datfala “big crowd” hem pipol wea God sevem and wea gohed stap lo earth, lo wanem wei nao olketa ‘standap front lo throne blo God and front lo datfala Pikinini Sheepsheep’? (Re 7:9) Lo Bible, taem man ‘standap’ front lo wanfala man or grup, samfala taem datwan minim datfala man or grup hia hapi lo hem or appruvim hem. (Ps 1:5; 5:5, NW; Pr 22:29, AT; Lu 1:19) Interesting samting, lo Revelation chapter 6, hem storyim hao “olketa king long earth witim olketa bigman and olketa komanda bilong army and olketa wea rich and olketa wea garem paoa, witim evriwan wea slave and evriwan wea free,” olketa trae for haed “from God wea sidaon long throne and from kros bilong datfala Pikinini Sheepsheep, bikos bigfala day bilong kros bilong tufala hem kam nao, and hu nao bae laef?” (Re 6:15-17; comparem Lu 21:36.) So luk olsem datfala “big crowd” hem olketa wea stap sef lo disfala day blo kros and olketa savve “standap” front lo God and datfala Pikinini Sheepsheep bikos tufala appruvim olketa.
it-2-E 1127 par. 4
Trabol
Samting olsem 30 year bihaen Jerusalem distroe, lo wanfala vision, aposol John lukim wanfala big crowd from evri kantri, tribe, and pipol, and then wanfala lo olketa elder sei lo hem: “Hem olketa wea no dae long datfala big trabol.” (Re 7:13, 14) So datwan showimaot wanfala big crowd bae stap sef lo taem blo datfala big trabol. Semkaen toktok stap lo Acts 7:9, 10 wea pruvim datwan. Hem sei: “[God] sevem [Joseph] from olketa hard taem wea hem kasem.” So God no just helpem Joseph for no givap taem hem kasem hard taem, bat Joseph winim tu olketa hard taem wea hem kasem.
it-1-E 996-997
Big Crowd
Hu Nao Olketa? For helpem iumi savve hu nao datfala “big crowd,” iumi savve readim wanem Revelation chapter 7 and olketa nara verse talem abaotem olketa. Revelation 7:15-17 storyim hao God “kavarem olketa witim tent bilong hem.” Hem “leadim olketa go long olketa springwata wea savve mekem man laef,” and hem “draem evri tias long eye bilong olketa.” Semkaen toktok tu stap lo Revelation 21:2-4 wea sei: “Tent bilong God hem stap witim olketa man,” God “draem evri tias long eye bilong olketa,” and “no eniwan bae dae.” Disfala vision hia hem abaotem pipol lo earth, and no abaotem olketa wea stap lo heven wea ‘Niu Jerusalem kam daon’ from.
Faendem Gudfala Point
re-E 115 par. 4
Putim Mark lo Forhed blo Israel blo God
4 Iumi luksavve fofala angel piksarem fofala grup blo olketa angel. Jehovah iusim olketa for hol strong lo fofala wind blo earth, go kasem taem hem markem for judgem and finisim nogud pipol. Taem olketa angel let go lo wind from north, south, east, and west lo semtaem nomoa, Jehovah bae mekem bigfala trabol for happen nao. Hem bae olsem wei wea Jehovah iusim fofala wind for blowim go olketa Elamite, mekem olketa wikdaon, and then finisim olketa nao, bat disfala judgment bae happen lo barava bigfala wei winim datwan. (Jeremaea 49:36-38) Hem bae barava big winim “saekloun” wea Jehovah iusim for finisim nation blo Ammon. (Emos 1:13-15) Full organization blo Satan lo earth bae finis lo day wea Jehovah showimaot kros blo hem. Jehovah bae showimaot hem nomoa fit for rul for olowe.—Sams 83:15, 18; Aesaea 29:5, 6.
it-1-E 12
Abaddon
Hu nao angel wea gaedem datfala hol wea deep tumas wea nem blo hem Abaddon?
Lo Revelation 9:11, datfala word “Abaddon” hem nem blo “angel wea gaedem datfala hol wea deep tumas.” Lo Greek languis, nem blo hem Apollyon, wea minim “Man for distroem evri samting.” Lo mek-19th century, samfala pipol trae for sei disfala scripture hem profesi abaotem olketa man olsem Emperor Vespasian, Muhammad, and Napoleon tu, and olketa sei datfala angel hem angel blo “Satan.” Bat lo Revelation 20:1-3, datfala angel wea “holem key bilong datfala hol wea deep tumas” hem kam daon from heven. God nao sendem hem kam and hem no wanfala angel blo “Satan” bat hem taemapem Satan and torowem hem insaed datfala hol wea deep tumas. The Interpreter’s Bible sei olsem abaotem Revelation 9:11: “Abaddon hem no angel blo Satan bat hem angel blo God wea duim waka blo God for distroem olketa samting wea God talem lo hem.”
Lo olketa Hebrew scripture, hem klia hao datfala word ʼavad·dohnʹ hem join witim Sheol and dae. Lo Revelation 1:18, Christ Jesus sei: “Mi laef for olowe and mi garem olketa key bilong dae and grev.” Luke 8:31 showimaot Jesus garem paoa ovarem datfala hol wea deep tumas. Hem garem paoa for distroem samting, and for distroem Satan tu, olsem Hebrew 2:14 storyim. Datfala scripture sei Jesus garem body olsem man mekem “dae blo hem savve finisim Devil, wea hem nao mekem pipol for dae.” Lo Revelation 19:11-16 hem barava klia hao God markem Jesus nao for finisim nogud pipol.
DECEMBER 9-15
GUD SAMTING FROM BIBLE | REVELATION 10-12
“‘Tufala Witness’ Dae and Laef Bak”
Kwestin From Reader
Hu nao tufala witness wea Revelation chapter 11 storyim?
Long Revelation 11:3 hem story abaotem tufala witness wea talem profesi for 1,260 day. Bible sei bihaen datwan, wanfala wild animal hem ‘faetem tufala, and killim tufala dae.’ Bat bihaen “thri and haf day” tufala witness hia laef bak, and pipol wea lukim tufala sapraes fogud.—Rev. 11:7, 11.
Hu nao tufala witness hia? Olketa nara samting wea Revelation chapter 11 storyim helpem iumi for savve. First samting, Bible sei: “Tufala olive tree and tufala lamp piksarem tufala witness hia.” (Rev. 11:4) Diswan mekem iumi tingim profesi long Zechariah wea story abaotem wanfala lamp and tufala olive tree. Datfala profesi sei tufala olive tree hia piksarem “tufala anointed wan,” wea hem nao Governor Zerubbabel and Hae Priest Joshua, “wea standap saed long Lord bilong earth.” (Zech. 4:1-3, 14) Mek-tu samting, Bible sei tufala witness hia duim olketa mirakol wea klosap semsem olsem olketa mirakol wea Moses and Elijah duim.—Comparem Revelation 11:5, 6 witim Numbers 16:1-7, 28-35 and 1 Kings 17:1; 18:41-45.
Governor Zerubbabel and Hae Priest Joshua, wea profesi bilong Zechariah storyim, tufala leadim pipol bilong God long taem wea olketa kasem test. Semsem tu witim Moses and Elijah. So tufala witness wea Revelation chapter 11 storyim piksarem olketa anointed brata wea leadim pipol bilong God taem Kingdom hem start for rul long heven long 1914. For thri and haf year bihaen 1914 olketa hia “werem kaleko wea showimaot olketa sorre,” wea piksarem wei wea olketa no givap for talemaot judgment message bilong God.
Bihaen long thri and haf year hia, olketa anointed Christian dae long tokpiksa wei taem gavman putim olketa long prison for lelebet taem, wea datfala thri and haf day nao piksarem datwan. Olketa enemy bilong pipol bilong God tingse olketa stopem nao preaching waka, and datwan mekem olketa enemy hia barava hapi.—Rev. 11:8-10.
Bat olsem datfala profesi talem, long end bilong datfala thri and haf day, tufala witness hia laef bak. Olketa anointed Christian hia kamaot from prison, and olketa wea gohed faithful kasem wanfala spesol waka. Long 1919, God iusim Jesus for markem olketa hia and samfala narawan for kamap “datfala wakaman wea faithful and wise” for givim spiritual kaikai long pipol bilong God long olketa last day.—Matt. 24:45-47; Rev. 11:11, 12.
Interesting samting, Revelation 11:1, 2 sei samting wea kasem tufala witness hia happen long taem wea God hem measurem spiritual temple bilong hem, wea minim hem lukluk gud long datwan. Malachi chapter 3 storyim tu datfala taem wea God lukluk gud and klinim spiritual temple bilong hem. (Mal. 3:1-4) Datfala waka for lukluk gud and klinim spiritual temple hem gohed for haomas year? Hem start long 1914 and gohed kasem start bilong 1919. Datfala 1,260 day (42 month) witim datfala tokpiksa thri and haf day wea Revelation chapter 11 storyim, hem nao datfala semtaem wea God klinim spiritual temple start long 1914 and hem gohed kasem start bilong 1919.
Iumi hapi tumas bikos Jehovah duim disfala waka for mekem pipol bilong hem kamap klin and fit for duim olketa gudfala waka! (Titus 2:14) And tu, iumi tinghae long example bilong olketa anointed Christian wea leadim pipol bilong God long datfala taem wea olketa kasem test. Evri samting hia showimaot tufala witness wea Revelation chapter 11 storyim piksarem olketa anointed Christian hia.
Faendem Gudfala Point
it-2-E 880-881
Scroll
Tokpiksa Mining. Plande taem Bible iusim disfala word “scroll” lo tokpiksa wei. Lo vision, Ezekiel and Zechariah lukim wanfala scroll wea garem raeting lo tufala saed. From pipol lo bifor savve raetem toktok lo wansaed lo scroll nomoa, wei for raetem toktok lo tufala saed maet showimaot judgment message hia hem serious tumas. (Esikiel 2:9–3:3; Sekaraea 5:1-4) Lo vision wea John kasem, hem lukim God sidaon lo throne and hem holem wanfala scroll lo raet hand blo hem. Datfala scroll garem sevenfala seal for barava satem gud mekem no eniwan readim raeting wea stap lo hem go kasem taem Pikinini Sheepsheep blo God openem. (Re 5:1, 12; 6:1, 12-14) Lo nara vision bihaen, John tu kasem wanfala scroll wea hem mas kaikaim. Hem teist swit lo mouth blo John, bat bihaen hem mekem bele blo hem saoa. From datfala scroll hem open finis and no garem seal lo hem, datwan showimaot man bae minim toktok lo scroll hia. Taem John kasem datfala message lo scroll hem teist “swit” lo hem, bat then hem mas profesi abaotem olketa samting wea bae saoa lo pipol. (Re 10:1-11) Ezekiel tu kasem wanfala scroll wea garem “singsing blo olketa wea sorre and olketa sorre toktok.”—Eze 2:10, NW.
it-2-E 187 par. 7-9
Pain Taem Woman Bornem Pikinini
Lo vision, aposol John lukim wanfala woman lo heven wea “redi for bornem pikinini and hem singaot big from hem soa tumas long hem.” Woman hia bornem “wanfala pikinini boy, wea bae iusim wanfala iron stik for rulim evri kantri long world.” Nomata big snek trae for kaikaim pikinini, olketa “kwiktaem tekem [pikinini] go long God and long throne bilong hem.” (Re 12:1, 2, 4-6) Wei wea olketa tekem son hia go lo God showimaot God acceptim pikinini hia olsem son blo hem. Diswan hem olsem kastom blo pipol lo bifor. Olketa savve tekem pikinini wea just born go lo dadi for hem acceptim pikinini hia. Datfala “woman” hem “Jerusalem antap,” wea hem “waef” blo God and “mami” blo Christ and olketa anointed brata blo hem.—Ga 4:26; Heb 2:11, 12, 17.
Hem tru, “woman” blo God lo heven hem perfect, and bae no kasem pain taem hem bornem pikinini. So wei wea disfala “woman” pain tumas, hem lo tokpiksa wei. Hem minim hem luksavve hem klosap for bornem pikinini.—Re 12:2.
Hu nao disfala “pikinini boy”? Hem “bae iusim wanfala iron stik for rulim evri kantri long world” olsem profesi lo Sams 2:6-9 talem abaotem King wea God anointim. Longfala taem bihaen Jesus born lo earth, hem dae, hem laef bak and go lo heven, then John lukim disfala vision abaotem “pikinini boy.” Bihaen Jesus Christ hem dae, hem laef bak and “sidaon long raet saed bilong God. Then hem weit go kasem taem wea God givim paoa long hem for winim olketa enemy bilong hem.” So datfala vision hem abaotem taem wea Messiah Kingdom hem start and Son blo God, Jesus Christ, kamap King.—Heb 10:12, 13; Sams 110:1; Re 12:10.
DECEMBER 16-22
GUD SAMTING FROM BIBLE | REVELATION 13-16
“No Fraetem Olketa Wild Animal”
Jehovah Hem “Showimaot Mining Bilong Samting wea Haed”
6 Long samting olsem 96 C.E., aposol John lukim samfala barava interesting vision wea Jesus showim long hem. (Rev. 1:1) Long wanfala vision hia John lukim wanfala big snek hem standap long sandbis. Disfala big snek hem piksarem Satan. (Readim Revelation 13:1, 2.) John lukim tu wanfala wild animal hem kamaot from sea wea garem sevenfala hed and Satan nao givim bigfala paoa long hem. Bihaen, John lukim wanfala wild animal wea kala bilong hem red and hem tu garem sevenfala hed. Diswan hem luk olsem datfala wild animal wea Revelation 13:1 hem story abaotem. Wanfala angel talem John sevenfala hed bilong datfala wild animal wea kala bilong hem red, hem piksarem “sevenfala king” or gavman. (Rev. 13:14, 15; 17:3, 9, 10) Taem John raetem buk bilong Revelation, faevfala long olketa king hia rul finis, wanfala hem rul long datfala taem, and wanfala “hem no kam yet.” Hu nao olketa gavman, or world paoa hia? Bae iumi storyim each wan long sevenfala hed bilong datfala wild animal wea Revelation chapter 13 hem storyim. Buk bilong Daniel tu storyim samfala samting moa abaotem olketa gavman hia. Olketa profesi bilong Daniel talem samfala samting abaotem samfala long olketa gavman hia plande handred year bifor olketa start for rul.
re-E 194 par. 26
Faetem Tufala Wild Animal
26 Wanem nao datfala wild animal wea garem tufala horn? Hem England and America World Paoa, wea hem nao mek-seven hed blo firstfala wild animal bat distaem hem duim wanfala samting wea difren! From datfala vision storyim datfala wild animal seleva, datwan helpem iumi for luksavve hao hem bae duim samting seleva lo world. Disfala tokpiksa wild animal wea garem tufala horn hem tufala paoa wea rul lo semtaem and waka tugeta, nomata tufala evriwan independent from each other. Wei wea hem garem tufala horn “olsem horn bilong wanfala pikinini sheepsheep” showimaot hem act olsem hem no raf, and evriwan lo world shud followim hao hem rul. Bat hem toktok “olsem wanfala big snek” lo wei wea hem putim hevi, demandim, and barava raf lo eniwan wea no acceptim rul blo hem. Hem no encouragem pipol for stap anda lo Kingdom blo God wea Pikinini Sheepsheep blo God rulim, bat hem encouragem pipol for followim wanem Satan, datfala big snek, hem laekem. Hem mekem pipol lo olketa kantri for divaed and heitim each other, wea datwan showimaot olketa worshipim datfala first wild animal.
re-E 195 par. 30-31
Faetem Tufala Wild Animal
30 History showimaot disfala karving blo datfala wild animal hem organization wea England and America startim, sapotim, and mekhae lo hem and lo firstaem organization hem League of Nations. Then lo Revelation chapter 17, datfala karving bae showaot lo nara tokpiksa wei. Hem nao wanfala wild animal wea kala blo hem red, and hem laef and hem brith, and hem stap independent. Disfala organization wea olketa member hem olketa difren kantri, hem “toktok” lo wei for sei hem nomoa savve mekem pipol garem peace and stap gud. Bat tru samting nao hem ples wea olketa member kam for tok againstim and tok spoelem olketa nara kantri. Eni kantri or pipol wea no stap anda lo paoa blo United Nations, bae hem rejectim and no helpem olketa. Datfala League of Nations lo bifor aotem olketa kantri from organization blo hem wea no laek followim tingting blo hem. Lo start blo datfala big trabol, “olketa horn” blo disfala karving blo wild animal hem piksarem olketa army wea bae barava spoelem olketa samting.—Revelation 7:14; 17:8, 16.
31 Start kam lo World War II, karving blo datfala wild animal, wea hem United Nations distaem killim dae staka pipol finis. Olsem example, lo 1950, wanfala army blo United Nations faet lo war between North Korea and South Korea. United Nations army witim army blo South Korea killim dae samting olsem 1,420,000 pipol from North Korea and China. And start lo 1960 go kasem 1964, olketa army blo United Nations faet lo Congo (Kinshasa). And tu, olketa world ruler, witim Pope Paul VI and Pope John Paul II, olketa gohed sei disfala organization hem lastfala hope and best hope blo olketa man for mekem peace kamap. Sapos pipol no stap anda lo organization hia, olketa sei pipol bae distroem olketa man gogo no eniwan stap. So lo tokpiksa wei, datfala karving blo wild animal killim dae evri man wea nating laek followim or worshipim hem.—Diutronomi 5:8, 9.
Olketa Main Point From Buk Bilong Revelation—II
13:16, 17. Nomata sapos iumi kasem hardfala taem for duim olketa samting long laef, olsem for “baem or salem eni samting,” iumi mas no duim samting wea showimaot iumi followim datfala wild animal. Sapos iumi garem ‘mark bilong wild animal long hand or forhed bilong iumi,’ datwan showimaot animal hia kontrolem tingting bilong iumi and wanem iumi duim.
Faendem Gudfala Point
Olketa Main Point From Buk Bilong Revelation—II
16:13-16. “Olketa rabis toktok wea thrifala demon talem” hem for mekem olketa king long earth no saedem Jehovah taem olketa angel kapsaetem sevenfala bowl wea fulap long kros bilong God. Bat olketa rabis toktok hia hem for mekem olketa againstim Jehovah.—Matt. 24:42, 44.
“Taem for God Sevem Iufala Hem Klosap”!
9 Long taem bilong bigfala trabol, iumi bae no preachim “gud nius abaotem Kingdom.” Taem for preachim datfala message hem finis nao. Datfala taem wea “world bae finis” hem klosap nao! (Matt. 24:14) Pipol bilong God bae talemaot wanfala strong message abaotem judgment wea bae kam. Maet iumi bae talemaot hao world bilong Satan hem redi for finis evribit. Bible sei datfala message bae olsem olketa hail ston. Hem sei: “Olketa bigfala hail ston foldaon from skae antap long olketa man. Hevi bilong wanfala hail ston hia hem samting olsem twenti kilo. Olketa man tok spoelem God bikos datfala hail hem nogud tumas and hem spoelem staka samting.”—Rev. 16:21.
DECEMBER 23-29
GUD SAMTING FROM BIBLE | REVELATION 17-19
“War blo God for Finisim Evri War”
w08-E 4/1 8 par. 3-4
Armageddon Hem War blo God for Finisim Evri War
Taem nogud pipol garem paoa, raeteous pipol bae no garem peace or stap gud. (Provebs 29:2; Eklesiastes 8:9) Iumi no savve stopem pipol for ravem man or duim olketa barava nogud samting. So only wei for kasem peace and justice for olowe hem for finisim nogud pipol. Solomon sei: “Ravis pipol bae garem trabol wea olketa mekem long stretfala pipol.”—Provebs 21:18.
From God nao Judge, iumi sure hem bae judge lo raeteous wei taem hem judgem olketa nogud pipol. Abraham sei lo God: “Yu gohed for jajem man long stretfala wei nomoa!” And Abraham lukim Jehovah evritaem duim stret samting! (Jenesis 18:25) And tu, Bible sei Jehovah no laek for killim dae nogud pipol, bat hem duim datwan bikos olketa no repent and no changem wei blo olketa.—Esikiel 18:32; 2 Peter 3:9.
it-1-E 1146 par. 1
Horse
Lo vision aposol John lukim Jesus Christ hem lo heven and hem raedem white horse and army lo heven raedem olketa white horse followim hem. Vision wea John lukim piksarem raeteous war wea Christ bae faet insaed for againstim evri enemy blo Jehovah, wea hem Dadi blo Jesus. (Re 19:11, 14) Bifor datwan, Christ kasem paoa for faet and olketa difren kala horse wea raed followim hem piksarem olketa nogud samting wea happen.—Re 6:2-8.
re-E 286 par. 24
King Bae Finisim Olketa Enemy lo Armageddon
24 Wild animal wea garem sevenfala hed and tenfala horn wea kamaot from sea piksarem olketa gavman lo world blo Satan. Animal hia witim laea profet, wea hem nao mek-seven world paoa bae finis evribit. (Revelation 13:1, 11-13; 16:13) Christ torowem olketa “long lake bilong fire” taem olketa “laef yet,” wea minim taem olketa waka tugeta yet for againstim pipol blo God lo earth. Waswe, diswan hem wanfala really lake? Nomoa. Hem no really lake olsem datfala wild animal and laea profet no really animal or man. Bat lake hia piksarem wei for finis evribit. Hem nao ples wea olketa bae torowem dae, grev, and Devil tu. (Revelation 20:10, 14) Hem no ples wea nogud pipol bae bone olowe, bikos kaen samting olsem hem barava rabis samting lo tingting blo Jehovah.—Jeremaea 19:5; 32:35; 1 John 4:8, 16.
re-E 286 par. 25
King Bae Finisim Olketa Enemy lo Armageddon
25 “Man wea sidaon long horse [bae] iusim longfala sword . . . for killim dae” evri narawan wea no join lo eni gavman bat wea followim pipol lo disfala nogud world. Jesus bae talemaot olketa fit for dae. From Bible no storyim olketa bae go lo lake blo fire, waswe, bae olketa kasem resurrection? No eni scripture sei pipol wea datfala Judge wea Jehovah markem killim dae bae laef bak. Olsem Jesus talem evriwan wea no wanfala “sheepsheep” bae go “long fire wea no savve dae, wea [God] redyim for Devil and olketa angel blo hem,” wea datwan minim for “dae and no laef moa.” (Matthew 25:33, 41, 46) Diswan hem last samting wea bae happen lo “taem wea God bae judgem and finisim pipol wea no obeyim hem.”—2 Peter 3:7; Neiham 1:2, 7-9; Malakae 4:1.
Faendem Gudfala Point
re-E 247-248 par. 5-6
Nambawan Secret Hem Showaot Klia
5 “Wild animal . . . hem stap long firstaem.” Tru tumas, wild animal hia hem League of Nations and hem stap start lo January 10, 1920, and hem gohed stap for staka year. Lo datfala taem, 63 kantri nao member blo hem. Bat then Japan, Germany, and Italy no laek member nao, and League of Nations aotem Soviet Union for no wanfala member. Lo September 1939, Nazi ruler blo Germany startim World War II. From League of Nations no savve mekem world for garem peace, hem go lo hol wea deep tumas. Lo 1942, hem finis nao. Jehovah no talemaot full mining blo disfala vision lo pipol blo hem bifor diswan happen or lo olketa year bihaen, bat hem helpem olketa for minim datwan lo barava taem! Lo New World Theocratic Assembly, Brata Nathan Knorr talem lo audience hao “datfala wild animal . . . hem no stap,” olsem profesi talem. Then hem askem disfala kwestin, “Waswe, bae League [of Nations] gohed stap lo hol?” Hem quotem Revelation 17:8 and sei: “Datfala organization blo olketa kantri lo world bae kam bak and stap moa.” And hem nao wanem happen. Diswan showimaot profesi blo Jehovah hem kamap tru!
Kamaot From Datfala Hol wea Deep Tumas
6 Hem tru, datfala wild animal wea kala blo hem red kamaot from datfala hol wea deep tumas. Lo June 26, 1945, lo San Francisco lo America, big samting happen lo nius. Fifti kantri lo world votem yes for acceptim disfala Charter blo United Nations organization. Disfala organization hem for “mekem olketa kantri lo world garem peace and for stap gud.” League of Nations and United Nations (UN) semsem lo staka wei. The World Book Encyclopedia sei: “Lo samfala wei, UN hem semsem witim League of Nations, wea olketa kantri organizem bihaen lo World War I . . . Staka lo olketa kantri wea organizem UN, olketa tu startim datfala League. Olsem datfala League, olketa startim UN for helpem olketa kantri gohed garem peace. Olketa main part blo UN hem semsem olsem datfala League.” So UN hem datfala wild animal wea kala blo hem red. Hem kam bak and stap moa. Wan handred and naenti kantri nao member blo UN, wea hem barava winim 63 kantri wea member blo League of Nations. And UN hem garem olketa bigfala responsibility winim League of Nations.
Jehovah Showimaot Olketa Samting wea “No Longtaem Nomoa Mas Happen”
17 False religion bae no isisi lusim paoa bilong hem gogo hem nomoa nao. Datfala jury woman bae gohed garem bigfala paoa and trae for mekem olketa gavman duim wanem hem laekem. Bat klosap nao God bae “mekem olketa [gavman] garem tingting for duim samting wea hem laekem.” (Readim Revelation 17:16, 17.) Jehovah bae mekem olketa gavman long disfala world bilong Satan, wea United Nations nao stand for olketa, for attakim false religion. Datfala jury woman bae no fit for kontrolem nao olketa gavman hia, and bae hem lusim tu evri riches bilong hem. Twenti or thirti year go finis staka pipol tingse religion bae gohed strong and pipol bae evritaem respectim religion. Bat distaem datwan hem start for change. Nomata olsem, datfala jury woman bae no isisi lusim paoa bilong hem. Seknomoa bae hem finis nao.—Rev. 18:7, 8, 15-19.
DECEMBER 30–JANUARY 5
GUD SAMTING FROM BIBLE | REVELATION 20-22
“Mi Wakem Evri Niu Samting”
re-E 301 par. 2
Wanfala Niu Skae and Wanfala Niu Earth
2 Staka handred year bifor John hem born, Jehovah sei lo Isaiah: “Bae mi mekem niu skae an niu graon. Evrisamting wea hemi hapen bifoa, bae pipol i fogetem finis nao.” (Aesaea 65:17; 66:22) Firstaem wea disfala profesi kamap tru hem taem olketa faithful Jew go bak lo Jerusalem lo 537 B.C.E., wea datwan hem bihaen lo 70 year wea olketa stap olsem prisoner lo Babylon. Lo datfala taem, olketa hia kamap “wanfala niu earth” from olketa kamap klin, and olketa stap anda lo niu gavman, wea hem nao “wanfala niu skae.” Bat aposol Peter storyim hao disfala profesi bae kamap tru lo future. Hem sei: “Iumi weitim wanfala niu skae and wanfala niu earth wea hem promisim, wea evri samting bae raeteous.” (2 Peter 3:13) John nao storyim hao disfala promis bae kamap tru lo day blo Lord. “Skae and earth wea stap bifor,” wea hem nao world blo Satan witim olketa gavman wea hem and olketa demon kontrolem, bae finis. Nogud pipol wea olketa nao datfala raf “sea” bae finis tu. Bat “wanfala niu skae and wanfala niu earth” bae kamap. Niu skae hem niu gavman, wea hem nao Kingdom blo God, and niu earth hem olketa pipol wea Kingdom blo God bae rulim olketa.—Comparem Revelation 20:11.
w13-E 12/1 11 par. 2-4
“Mi Wakem Evri Niu Samting”
“[God] bae draem evri tias long eye bilong olketa.” (Revelation 21:4) Wanem kaen tias nao bae hem draem? Hem no olketa tias wea iumi garem taem iumi hapi or olketa tias wea protectim eye blo iumi. God promis for draem olketa tias wea iumi garem bikos iumi safa and sorre. God bae draem olketa tias hia lo wei for finisim evri samting wea mekem iumi safa and sorre.
“No eniwan bae dae.” (Revelation 21:4) Dae hem enemy blo iumi and hem mekem iumi krae winim eni nara samting! Jehovah bae mekem olketa man wea obeyim hem for no dae. Hao nao bae hem duim datwan? Hem bae finisim sin wea iumi kasem from Adam, wea mekem iumi dae. (Rome 5:12) Jehovah bae mekem olketa man wea obey for kamap perfect bikos lo ransom sakrifaes blo Jesus. Then dae wea hem lastfala enemy “bae hem finisim.” (1 Corinth 15:26) Pipol wea faithful bae laef olowe and garem perfect health olsem God hem laekem.
“No eniwan bae . . . feelim pain tu.” (Revelation 21:4) Wanem kaen pain nao bae nomoa nao? Hem pain wea iumi kasem lo body and evri sik saed lo feeling and tingting wea iumi kasem from iumi sin and no perfect. Olketa samting hia hem spoelem laef blo staka million pipol, bat hem bae nomoa nao.
Jehovah, God Bilong Truth
14 Iumi shud ting strong long samting wea Jehovah talem iumi insaed Word bilong hem. Hem tok tru abaotem hemseleva, and bae hem duim samting wea hem sei hem bae duim. No eni reason stap for iumi no trustim God. Iumi fit for bilivim Jehovah taem hem sei hem bae “pei bak long olketa wea no savve long God and olketa wea no obeyim gud nius abaotem Lord bilong iumi Jesus.” (2 Thessalonians 1:8) Iumi savve trustim Jehovah tu taem hem sei hem lovem olketa wea aftarem raeteous fasin, taem hem sei hem bae givim laef olowe long olketa wea showimaot faith, and taem hem sei hem bae finisim pain, singaot, and dae tu. Jehovah strongim hao iumi savve trustim disfala last promis bilong hem taem hem givim disfala instruction long aposol John: “Raetem, from olketa toktok hia hem faithful and tru.”—Revelation 21:4, 5; Proverbs 15:9; John 3:36.
Faendem Gudfala Point
it-2-E 249 par. 2
Laef
Lo komand wea God givim Adam, sapos hem obeyim God bae hem no dae. (Jenesis 2:17) Taem God finisim lastfala enemy dae, olketa man wea obeyim God bae no garem eni sin lo body wea bae mekem olketa dae. Olketa bae no dae bat laef olowe. (1Co 15:26) God bae finisim dae lo end blo rul blo Christ, wea buk blo Revelation sei Christ bae rul for 1,000 year. Revelation sei olketa wea bae kamap olketa king and priest witim Christ “olketa hia laef bak and kamap olketa king and rul witim Christ for 1,000 year.” “Evri narawan wea dae finis” wea no laef bak “go kasem taem wea datfala 1,000 year hem finis” hem masbi olketa wea stap laef lo end blo datfala wan thousand year, bat bifor Satan kamaot from datfala hol wea deep tumas and testim olketa man. Lo end blo datfala wan thousand year, pipol lo earth kamap perfect finis olsem Adam and Eve bifor olketa sin. Lo datfala taem olketa bae perfect. Olketa wea winim datfala test taem Satan kamaot from datfala hol for lelebet taem bae enjoyim laef olowe.—Re 20:4-10.
it-2-E 189-190
Lake blo Fire
Disfala toktok stap nomoa lo Bible buk Revelation and hem wanfala tokpiksa lake. Bible talem mining blo datfala tokpiksa lake. Hem sei: “Lake bilong fire [hem] piksarem mek-tu dae.”—Re 20:14; 21:8.
Nara samting wea showimaot datfala lake hem tokpiksa lake hem from wanem buk blo Revelation storyim. Revelation storyim hao datwan wea sidaon lo throne bae torowem dae lo disfala lake blo fire. (Re 19:20; 20:14) Dae hem no samting wea man savve bonem. And angel hem torowem Devil tu, wea hem wanfala spirit, lo datfala lake. From hem wanfala spirit, no eni fire savve bonem or spoelem hem.—Re 20:10; comparem Eksodas 3:2 and Jajis13:20.
From lake blo fire piksarem “mek-tu dae” and Revelation 20:14 sei datwan wea sidaon lo throne bae torowem “dae and grev” lo lake hia, hem klia hao datfala lake no minim dae wea olketa man kasem from Adam (Ro 5:12), or grev (Hades). So hem mas piksarem nara kaen dae wea man no savve laef bak, bikos no eniwea lo Bible hem sei datfala “lake” hem givim kam olketa wea stap lo there, olsem dae and grev (Hades) hem duim. (Re 20:13) So pipol wea nem blo olketa hem no stap lo “buk bilong laef,” wea hem nao olketa wea no repent and wea againstim rul blo God, olketa nao bae go insaed lo lake blo fire, wea minim mek-tu dae wea olketa dae and no savve laef bak.—Re 20:15.