Olketa Reference for Laef and Ministry Meeting Buk—November
NOVEMBER 4-10
GUD SAMTING FROM BIBLE | 1 JOHN 1-5
“No Lovem World and Olketa Samting lo World”
(1 John 2:15, 16) No lovem world and no lovem tu olketa samting long world. Sapos eniwan lovem world, hem no lovem Dadi long heven. 16 Diswan hem bikos wei bilong man for laekem nogud samting wea body and eye bilong hem laekem, witim tu wei for man show-off witim samting wea hem garem, hem wei bilong pipol long disfala world. Olketa samting hia no kam from Dadi long heven bat hem kam from pipol long world.
Barava Followim Example Bilong Jesus
13 Samfala maet tingse samfala samting long disfala world hem gud nomoa. Nomata datwan hem tru, hem isi tumas for samting bilong disfala world for pullim interest bilong iumi, gogo, iumi lusim wei for servem Jehovah. And no eni samting bilong disfala world hem for helpem iumi kam moa klos long God. Dastawe, sapos iumi start for lovem olketa samting long disfala world, nomata hem olketa samting wea no rong, iumi stap long danger. (1 Timothy 6:9, 10) And tu, staka samting long disfala world hem barava nogud and savve spoelem iumi. Sapos iumi lukluk long olketa movie or television program wea mekhae long raf fasin, wei for lovem material samting, or dirty fasin, iumi savve start for ting nating long olketa samting hia—and then olketa samting hia savve isi for switim iumi. Sapos iumi kaban witim pipol wea interest tumas for garem gudfala living or for win saed long bisnis, kaen samting olsem savve kamap barava important long iumi tu.—Matthew 6:24; 1 Corinthians 15:33.
(1 John 2:17) And tu, world bae finis and evri samting wea pipol long world laekem bae finis tu, bat man wea duim wanem God hem laekem bae stap for olowe.
Tingting Gud Abaotem Wei Bilong Iu and Samting wea Iu Mas Duim
18 Nara samting wea savve helpem iumi for againstim “olketa samting long world” hem for tingim disfala toktok bilong John wea sei: “World bae finis and evri samting wea pipol long world laekem bae finis tu, bat man wea duim wanem God hem laekem bae stap for olowe.” (1 John 2:17) Pipol tingse world bilong Satan bae stap for olowe. Bat disfala world bae finis. Sapos iumi evritaem tingim klosap nao evri samting long world bae finis, datwan bae helpem iumi for no letem Satan trikim iumi.
Faendem Gudfala Point
(1 John 2:7, 8) Olketa brata wea mi lovem, mi no givim wanfala niu law long iufala, bat mi storyim datfala old law wea iufala kasem finis taem iufala start for lane abaotem hem and followim hem. Disfala old law hem datfala toktok wea iufala herem finis. 8 Nomata olsem, disfala law wea mi storyim long iufala hem niu. Jesus hem followim datwan and iufala tu bikos darkness hem gogo for finis and datfala tru laet hem shaen nao.
Iumi Savve Trustim Olketa Reminder Bilong Jehovah
14 Olketa Christian Greek Scripture garem plande reminder for iumi showimaot love long narawan. Jesus sei mek-tu barava important law hem for “lovem narawan long sem wei wea iu lovem iuseleva.” (Matt. 22:39) James, wea hem haf brata bilong Jesus, sei love hem “law bilong king.” (Jas. 2:8) Aposol John sei: “Olketa brata wea mi lovem, mi no givim wanfala niu law long iufala, bat mi storyim datfala old law wea iufala kasem finis.” (1 John 2:7, 8) Wanem nao John minim taem hem sei “old law”? Hem story abaotem datfala law wea sei iumi mas lovem narawan. Datfala law hem “old” bikos olketa disaepol kasem finis from Jesus “taem [olketa] start for lane abaotem hem and followim hem.” Bat datfala law hem “niu” tu bikos samfala samting bae happen long future and long taem olsem nao olketa disaepol mas showimaot kaen love wea man no tingim hemseleva or wea maet hem willing for dae for brata bilong hem. Iumi tinghae long olketa warning wea helpem iumi for no tingim iumiseleva olsem staka pipol long world, bat for showimaot love long narawan.
(1 John 5:16, 17) Sapos eniwan lukim brata bilong hem duim wanfala sin wea bae no lead go long dae, hem mas prea for hem, and bae God givim laef long hem. Diswan hem for olketa wea duim sin wea bae no lead go long dae. Wanfala kaen sin hem stap wea savve lead go long dae. Mi no talem hem for prea for man wea duim kaen sin olsem. 17 Evri samting man duim wea no raeteous, hem sin. Bat wanfala kaen sin hem stap wea bae no lead go long dae.
it-1-E 862 par. 5
Forgiveness
Hem fitim for prea lo God for forgivim olketa narawan, nomata for kongregeson tu. Moses duim datwan for nation blo Israel. Hem talemaot sin wea nation duim and askem Jehovah for forgivim olketa, and Jehovah duim datwan. (Nambas 14:19, 20) And taem Solomon prea lo Jehovah for dedicatem temple, hem askem Jehovah for hem savve forgivim pipol blo hem taem olketa sin and then lusim nogud wei blo olketa. (Fas Kings 8:30, 33-40, 46-52) Ezra nao standap front lo olketa Jew wea go bak lo hom blo olketa and hem prea lo Jehovah for forgivim sin blo olketa. Prea wea hem talem from heart and kaonsel wea hem givim helpem olketa for changem wei blo olketa mekem Jehovah savve forgivim olketa. (Esra 9:13–10:4, 10-19, 44) James encouragem man wea sik lo spiritual wei for askem olketa elder lo kongregeson for prea for hem, and “God bae forgivim eni sin wea hem duim finis.” (Jas 5:14-16) Bat “wanfala kaen sin hem stap wea savve lead go long dae,” and hem nao for tok spoelem holy spirit. Man bae no savve kasem forgiveness for diswan. Olketa Christian shud no prea for olketa wea sin olsem.—1Jo 5:16; Mt 12:31; Heb 10:26, 27.
NOVEMBER 11-17
GUD SAMTING FROM BIBLE | 2 JOHN 1–JUDE
“Iumi Mas Waka Hard for Stap Insaed lo Truth”
(Jude 3) Olketa brata wea mi lovem, long firstaem, mi barava laekem tumas for raet kam long iufala abaotem wei wea God bae sevem iumi, wea hem nao hope bilong iumi evriwan. Bat then mi luksavve mi mas encouragem iufala for traem best for keepim biliv bilong iufala hem strong, wea olketa holy wan bifor garem sem biliv tu.
“Go Ahed for Kasem Paoa From Lord”
8 Iumi savve long olketa trap bilong Satan bikos Bible showim long iumi olketa main trik bilong hem. (2 Corinthians 2:11) Taem Devil againstim raeteous man Job, hem iusim bigfala problem saed long living, wei for killim dae olketa wea Job lovem, wei for famili againstim hem, safa saed long body, and laea toktok for againstim hem from olketa giaman fren. Job hem kasem bigfala sorre saed long feeling and feel olsem God lusim hem nao. (Job 10:1, 2) Nomata Satan maet no barava wan wea kosim olketa problem olsem distaem, semkaen hard samting affectim staka Christian distaem, and Devil savve mekius long olketa hard taem hia.
9 Olketa samting wea mekem man stap long spiritual danger kamap big tumas long disfala taem bilong end. Iumi stap insaed wanfala world wea wei for aftarem material samting hem moa important winim olketa spiritual goal. Television, radio and olketa magasin evritaem givim idea hao dirty fasin hem mekem man hapi and no sorre. And staka kamap pipol wea “lovem hapitaem winim wei for lovem God.” (2 Timothy 3:1-5) Sapos iumi no “faet hard for disfala faith,” kaen wei for tingting olsem savve mekem iumi no balance long spiritual wei.—Jude 3.
Faendem Gudfala Point
(Jude 4) Why mi talem diswan hem bikos samfala man stap witim iufala wea laea long iufala. Olketa Holy Raeting markem olketa finis for kasem judgment. Olketa hia no followim God. Olketa nating shame for duim rong samting and sei datwan hem olraet nomoa bikos God hem kaen tumas. Samting wea olketa duim showimaot olketa no faithful long man wea ownim iumi, wea hem nao Lord bilong iumi Jesus Christ.
(Jude 12) Olketa man hia stap witim iufala long olketa feast wea iufala mekem for showimaot love long olketa brata. Bat olketa olsem ston wea haed andanit long wata. Olketa olsem man wea nating lukaftarem olketa sheepsheep bat wea tingim bele bilong olketa seleva nomoa and nating shame. Olketa olsem olketa cloud wea no garem wata wea wind blowim olobaot. Olketa olsem olketa tree wea no garem frut long taem bilong hem, wea barava drae, and wea olketa aotem nao.
it-2-E 279
Olketa Feast wea Pipol Mekem for Showimaot Love lo Narawan
Bible no storyim wanem nao happen lo olketa feast wea samfala mekem for showimaot love lo narawan, or haomas taem nao olketa duim olketa feast hia. (Jude 12) Jesus Christ and olketa aposol no komandim olketa for garem olketa feast hia, and hem no samting wea olketa mas duim, or hem samting wea olketa mas duim olowe. Samfala sei olketa Christian wea rich mekem olketa feast hia and invaetem olketa brata and sista wea poor. Olketa wea no garem mami or dadi, olketa widow, olketa wea rich, and olketa wea poor savve kaikai tugeta.
it-2-E 816
Ston
Luk olsem Greek word, spi·lasʹ, hem savve minim wanfala ston or reef wea stap andanit lo wata. Jude iusim word hia for piksarem samfala man wea stap lo Christian kongregeson wea laea lo olketa brata and garem nogud wei and tingting. Olsem olketa ston wea stap andanit lo wata savve spoelem olketa ship, olketa man hia savve barava spoelem olketa narawan lo kongregeson. Jude sei olsem abaotem olketa man hia: “Olketa man hia stap witim iufala long olketa feast wea iufala mekem for showimaot love long olketa brata. Bat olketa olsem ston wea haed andanit long wata.”—Jude 12.
(Jude 14, 15) Eʹnoch, wea hem mek-seven man long laen bilong Adam, talem profesi tu abaotem diswan taem hem sei: “Jehovah hem kam witim staka thousand holy angel bilong hem 15 for judgem evriwan, and for showimaot olketa wea no followim God olketa guilty bikos long olketa nogud samting olketa duim and talem wea againstim hem.”
‘God Hapi Long Hem’
Wanem profesi nao Enoch talem? Datfala profesi hem sei: “Jehovah hem kam witim staka thousand holy angel bilong hem for judgem evriwan, and for showimaot olketa wea no followim God olketa guilty bikos long olketa nogud samting olketa duim and talem wea againstim hem.” (Jude 14, 15) Taem iu readim datfala profesi, maet hem luk olsem God duim finis wanem Enoch profesi abaotem. Olketa nara profesi tu savve storyim samting olsem hem happen finis. Olketa raetem olketa profesi long wei olsem bikos nomata datfala profesi no kamap tru yet, hem olsem hem happen finis!—Isaiah 46:10.
‘God Hapi Long Hem’
Datfala profesi bilong Enoch hem kamap tru taem Jehovah finisim olketa nogud pipol long Flood long taem bilong Noah. Taem iumi tingim faith wea Enoch garem, datwan maet mekem iumi for tingim, ‘Waswe, mi garem strongfala faith olsem Enoch and mi bilivim disfala world hem klosap for finis?’ Datfala judgment message wea Enoch talemaot hem fitim taem bilong iumi tu. Samting wea happen long taem bilong Noah showimaot wanem bae happen long nogud pipol long taem bilong iumi tu. (Matthew 24:38, 39; 2 Peter 2:4-6) Distaem Jehovah and olketa angel bilong hem redi for finisim olketa nogud pipol. Iumi laek for gohed faithful olsem Enoch and for warnim pipol abaotem datwan. Maet iumi feel sorre bikos olketa long famili and olketa fren bilong iumi no worshipim Jehovah. Bat tingim, Jehovah lukaftarem Enoch and hem bae lukaftarem iumi tu!
NOVEMBER 18-24
GUD SAMTING FROM BIBLE | REVELATION 1-3
“Mi Savve Long Olketa Samting wea Iu Duim”
(Revelation 1:20) Mining bilong datfala holy secret abaotem sevenfala star wea iu lukim long raet hand bilong mi, and sevenfala lamp wea olketa wakem long gold, hem olsem: Sevenfala star piksarem olketa angel bilong sevenfala kongregeson, and sevenfala lamp piksarem sevenfala kongregeson.
Waswe, Iu Garem Gudfala Wei?
8 Wanfala samting wea savve helpem iumi for stap klia long kaen tingting olsem hem for no forget Jesus “holem sevenfala star long raet hand bilong hem.” Olketa “star” piksarem olketa anointed elder, bat diswan savve minim tu evri elder long olketa kongregeson. Jesus savve duim eni samting wea hem laekem witim olketa “star” long hand bilong hem. (Rev. 1:16, 20) From hem Hed bilong kongregeson, Jesus barava savve gud wanem nao olketa elder duim. “Eye bilong hem olsem fire” and hem lukluk long evri samting. So sapos wanfala elder barava needim samwan for stretem hem, Jesus bae mek sure hem kasem datwan long barava taem and long best wei. (Rev. 1:14) Nomata olsem, iumi mas respectim olketa elder wea stap long “raet hand” bilong Jesus. Paul sei: “Olketa wea leadim iufala and lukaftarem iufala mas givim ansa for hao olketa duim diswan. So obeyim and stap anda long olketa mekem olketa hapi for lukaftarem iufala bikos sapos nomoa, datwan bae spoelem iufala.”—Heb. 13:17.
(Revelation 2:1, 2) “Raet go long angel long kongregeson long Ephʹe·sus and sei: Man wea holem sevenfala star long raet hand bilong hem and wea wakabaot midolwan long sevenfala lamp wea olketa wakem long gold, hem sei olsem, 2 ‘Mi savve long olketa samting wea iu duim, and hard waka bilong iu and wei wea iu no givap. Iu no acceptim olketa nogud man, and from iu testim olketa wea laea for sei olketa aposol, iu luksavve olketa laea nomoa.
Jehovah Protectim Iumi for Sevem Iumi
11 Long vision wea stap long Revelation chapter 2 and 3, datfala King Jesus Christ lukim samting wea happen long sevenfala kongregeson long Asia Minor. Datfala vision showimaot Christ hem lukim evri samting wea gohed insaed long each kongregeson. Hem storyim wanem nao happen insaed long samfala kongregeson and hem talem nem bilong samfala man tu. Hem praisem samfala kongregeson and hem givim kaonsel long samfala tu. Wanem nao iumi lanem from diswan? Sevenfala kongregeson hia piksarem olketa anointed Christian bihaen long 1914. Nomata kaonsel wea Christ givim hem for olketa anointed wan, evri kongregeson long earth distaem savve kasem gud samting from datwan. Evri samting hia showimaot Jehovah hem iusim Son bilong hem for leadim pipol bilong Hem distaem. Hao nao iumi savve letem Jehovah for leadim iumi?
Followim Step Witim Organization Bilong Jehovah
20 For followim step witim organization bilong Jehovah wea muv ahed, iumi need for luksavve long position wea God givim long Jesus Christ olsem “hed bilong kongregeson.” (Ephesians 5:22, 23) ) Important samting tu hem wanem Isaiah 55:4 hem talem iumi: “Lukim! Mi [Jehovah] givim hem olsem wanfala witness for olketa nation, olsem wanfala leader and komanda long olketa nation.” Jesus savve hao for lead. Hem savve tu long olketa sheep bilong hem and wanem olketa duim. Tru nao, taem hem lukluk long sevenfala kongregeson long Asia Minor, faevfala taem hem sei: “Mi savve long olketa samting iu duim.” (Revelation 2:2, 19; 3:1, 8, 15) Jesus savve tu long olketa need bilong iumi, olsem Dadi bilong hem, Jehovah. Bifor hem givim datfala example prea, Jesus hem sei: “God wea hem Dadi bilong iufala, hem savve finis long evri samting wea iufala needim bifor iufala askem hem.”—Matthew 6:8-13.
Faendem Gudfala Point
(Revelation 1:7) Bae hem kam long olketa cloud and evriwan bae lukim hem. Olketa wea spiarim hem bae lukim hem tu, and bikos long hem evri tribe long earth bae hitim chest bilong olketa seleva from olketa sorre tumas. Bae hem mas happen olsem nao. Amen.
kr-E 226 par. 10
Kingdom blo God Finisim Olketa Enemy
10 Talemaot judgment. Evriwan wea againstim Kingdom blo God bae lukim wanfala samting wea bae mekem olketa for barava wari nao. Jesus sei: “Olketa bae lukim Son bilong man hem kam long olketa cloud witim bigfala paoa and glory.” (Mark 13:26) Taem olketa lukim Jesus kam lo olketa cloud witim bigfala paoa, olketa bae luksavve Jesus kam for talemaot judgment. Lo nara scripture wea storyim sem profesi abaotem olketa last day, Jesus storyim samfala samting moa abaotem judgment wea hem bae talemaot lo datfala taem. Information hia stap lo tokpiksa abaotem olketa sheepsheep and goat. (Readim Matthew 25:31-33, 46.) Jesus bae judgem olketa wea faithful for sapotim Kingdom blo God olsem “olketa sheepsheep” and olketa bae “apim hed bilong [olketa]” bikos olketa luksavve “taem for God sevem [olketa] hem klosap.” (Luke 21:28) Bat hem bae judgem olketa wea againstim Kingdom olsem “olketa goat” and olketa bae “hitim chest bilong olketa seleva from olketa sorre tumas.” Olketa luksavve olketa “bae dae and no laef moa.”—Matt. 24:30; Rev. 1:7.
(Revelation 2:7) Man wea willing for lisin mas herem samting wea holy spirit talem long olketa kongregeson. Hem sei: Bae mi letem man wea win for hem kaikaim frut long tree bilong laef wea stap long datfala paradaes bilong God.’
Olketa Main Point From Buk Bilong Revelation—I
2:7—Wanem nao “paradaes bilong God”? From olketa toktok hia hem for olketa anointed Christian, disfala paradaes mas minim spesol ples long heven front long God. Olketa anointed wea faithful bae kaikai long “tree bilong laef.” Olketa bae kasem laef wea no savve finis.—1 Cor. 15:53.
NOVEMBER 25–DECEMBER 1
GUD SAMTING FROM BIBLE | REVELATION 4-6
“Fofala Man wea Raedem Horse”
(Revelation 6:2) Mi lukim wanfala horse wea kala bilong hem white and man wea sidaon antap long hem holem wanfala bow and arrow. God givim hem wanfala kraon and hem go for winim olketa enemy bilong hem.
Fofala Man wea Raedem Horse—Hu Nao Olketa?
Hu nao datfala man wea raedem white horse? Nara verse long Bible buk Revelation hem talem iumi hu nao datfala man. Hem sei: “Nem bilong hem Word bilong God.” (Revelation 19:11-13) Datfala title Word bilong God, hem title bilong Jesus Christ, bikos hem nao man wea toktok for God. (John 1:1, 14) And olketa nara title bilong hem tu hem “King bilong olketa king and Lord bilong olketa lord,” and hem “Faithful and Tru.” (Revelation 19:16) Olketa title hia showimaot hem wanfala king wea garem paoa for faet, bat hem no iusim datfala paoa long rong wei or for spoelem narawan. Nomata olsem, maet iumi garem samfala kwestin.
wp17.3 4 par. 5
Fofala Man wea Raedem Horse—Hu Nao Olketa?
Wanem taem nao olketa man hia start for raedem horse? Man wea raedem firstfala horse, Jesus, hem start for raed taem God givim hem wanfala crown. (Revelation 6:2) Wanem taem nao God mekem Jesus kamap King long heven? Datwan no happen bihaen hem dae and laef bak long heven. Bible sei bihaen Jesus go bak long heven, hem mas weit firstaem. (Hebrew 10:12, 13) Jesus talem olketa disaepol bilong hem wanem bae showimaot hem start for rul long heven. Jesus sei taem hem start for rul, evri samting long world bae worse. Pipol bae faetem nara pipol, bigfala hangre bae kamap, and olketa barava nogud sik bae kamap. (Matthew 24:3, 7; Luke 21:10, 11) No longtaem bihaen World War I hem start long 1914, evri samting wea happen long world showimaot datfala taem wea Jesus storyim hem start nao, and iumi stap long “olketa last day” wea Bible sei evri samting long earth bae hem nogud.—2 Timothy 3:1-5.
(Revelation 6:4-6) Mi lukim nara horse hem kam wea kala bilong hem red. Man wea sidaon antap long hem kasem paoa for aotem peace from earth mekem olketa pipol killim dae olketa narawan. Hem kasem tu wanfala big sword. 5 Taem hem openem mek-thri seal, mi herem mek-thri cherub hem sei: “Kam!” Mi lukim wanfala horse wea kala bilong hem blak and man wea sidaon antap long hem holem wanfala scale. 6 Mi herem samting olsem wanfala voice hem kam from fofala cherub hia. Hem sei: “Price bilong wan kilo wheat hem wanfala de·narʹi·us, and price bilong thri kilo barley hem wanfala de·narʹi·us. Iusim gud olive oil and wine nogud hem finis.”
Fofala Man wea Raedem Horse—Hu Nao Olketa?
Man wea raedem red horse hem piksarem war. Disfala man hem kasem paoa for aotem peace from earth. Long 1914, wanfala war kamap wea kasem full world, wea hem firstaem for diswan happen. Then mek-tu world war hem kamap, wea hem worse winim firstfala world war. Samfala pipol sei winim 100 million pipol dae long olketa war start kam long 1914! And tu, staka narawan kasem olketa barava nogud samting from olketa war hia.
wp17.3 5 par. 4-5
Fofala Man wea Raedem Horse—Hu Nao Olketa?
“Mi lukim wanfala horse wea kala bilong hem blak and man wea sidaon antap long hem holem wanfala scale. Mi herem samting olsem wanfala voice hem kam from fofala cherub hia. Hem sei: ‘Price bilong wan kilo wheat hem wanfala denarius, and price bilong thri kilo barley hem wanfala denarius. Iusim gud olive oil and wine nogud hem finis.’”—Revelation 6:5, 6.
Man wea raedem blak horse hem piksarem bigfala hangre. Disfala scripture showimaot kaikai hem barava short so price bilong wan kilo wheat hem wanfala denarius, wea diswan hem pei bilong man wea waka for full day, long first century! (Matthew 20:2) Olketa savve peim thri kilo barley long wanfala denarius tu, wea hem grain wea quality bilong hem no mas gud olsem wheat. Waswe, kaikai hia bae fitim wanfala big famili? Taem scripture hia sei pipol mas iusim gud olive oil and wine, wea pipol long datfala taem savve iusim olowe, datwan hem olsem warning for olketa mas weim kaikai bilong olketa.
(Revelation 6:8) Mi lukim wanfala horse wea kala bilong hem luk nogud, olsem man wea sik. Dae nao nem bilong man wea sidaon antap long hem, and grev hem go followim hem. Olketa kasem paoa for killim dae smol haf long evri pipol long earth. Olketa bae iusim bigfala sword, bigfala hangre, olketa barava nogud sik, and olketa wild animal for killim pipol dae.
wp17.3 5 par. 8-10
Fofala Man wea Raedem Horse—Hu Nao Olketa?
Mek-foa man wea raedem horse hem piksarem dae, wea kamaot from olketa nogud sik and olketa nara nogud samting. Olsem example, no longtaem bihaen 1914, staka million pipol dae from datfala Spanish flu. Samting olsem 500 million pipol nao kasem datfala sik, wea diswan hem wanfala long evri thrifala man long earth!
Bat Spanish flu hem wanfala sik nomoa. Olketa savveman sei winim 300 million pipol dae from datfala sik smallpox long mek-20 century. Kam kasem distaem, staka million pipol dae from AIDS, TB, and malaria nomata olketa savveman duim staka research for finisim olketa sik hia.
Samting wea kamaot from war, bigfala hangre, and olketa barava nogud sik hem semsem, hem nao dae. Evriwan wea dae from olketa samting hia olketa go long Grev, and Grev no givim olketa hia eni hope.
Faendem Gudfala Point
(Revelation 4:4) Twenti-foa throne hem stap raonem datfala throne and mi lukim twenti-foa elder wea sidaon long olketa throne hia. Olketa werem white kaleko and olketa gold kraon stap long hed bilong olketa.
(Revelation 4:6) Samting wea luk olsem wanfala sea hem stap front long datfala throne, and hem luk olsem glass wea shaen fogud. Datfala throne hem stap long midol, and fofala cherub nao stap raonem. Body bilong olketa garem staka eye long front and long bihaen.
re-E 76-77 par. 8
Throne blo Jehovah lo Heven Barava Nambawan
8 John savve hao God markem olketa priest for waka lo tabernacle bifor. So maet hem sapraes lo next samting wea hem lukim. Hem sei: “Twenti-foa throne hem stap raonem datfala throne and mi lukim twenti-foa elder wea sidaon long olketa throne hia. Olketa werem white kaleko and olketa gold kraon stap long hed bilong olketa.” (Revelation 4:4) John no lukim olketa priest, bat hem lukim 24 elder sidaon lo olketa throne and olketa werem crown olsem olketa king savve werem. Hu nao olketa elder hia piksarem? Olketa piksarem olketa anointed wan lo Christian kongregeson wea laef bak and kasem position lo heven wea Jehovah promisim lo olketa.
re-E 80 par. 19
Throne blo Jehovah lo Heven Barava Nambawan
19 Hu nao olketa cherub piksarem? Wanfala vision wea profet Ezekiel lukim bae helpem iumi for savve lo ansa. Ezekiel lukim Jehovah sidaon lo throne antap lo chariot lo heven, and hem lukim fofala samting wea luk semsem olsem wanem John lukim. (Ezekiel 1:5-11, 22-28, NW) Ezekiel lukim datfala chariot narataem moa, bat distaem hem sei fofala samting hia hem olketa cherub. (Ezekiel 10:9-15, NW) Fofala samting wea John lukim hem piksarem staka cherub wea worshipim God. Olketa cherub garem hae position lo organization blo God. John mas no sapraes for lukim olketa cherub stap klosap lo Jehovah bikos lo tabernacle bifor, tufala cherub wea gold stap antap lo kava blo ark blo agreement. Datfala ark piksarem throne blo Jehovah. Jehovah story kam midolwan lo tufala cherub for talem olketa komand for nation blo Israel.—Exodus 25:22, NW; Psalm 80:1, NW.
(Revelation 5:5) Bat wanfala long olketa elder sei long mi: “Iu no krae. Datfala Lion wea kam from tribe bilong Judah, wea hem rut bilong David, hem win mekem hem fit for aotem sevenfala seal and openem datfala scroll.”
cf-E 36 par. 5-6
“Datfala Lion wea Kam From Tribe Bilong Judah”
5 Plande taem lion hem piksarem wei for no fraet. Waswe, enitaem iu standap klosap lo wanfala big man lion and lukluk lo eye blo hem? Sapos olsem, maet iu lo ples wea olketa keepim olketa animal and iu stap sef bihaen lo fence. Nomata olsem, maet iu seksek taem iu lukim lion hia. Taem iu lukluk lo disfala strong animal and hem lukluk lo iu, iu luksavve bae hard for lion hia fraetem eni samting and laek ranawe. Bible sei: “Laeon . . . hemi strong an nating fraetem narafala animol.” (Provebs 30:30) Christ nao olsem wanfala lion wea nating fraet.
6 Iumi bae storyim thrifala wei wea Jesus olsem wanfala lion wea no fraet. First wan, hem no fraet for sapotim truth. Mek-tu, hem no fraet for duim samting wea stret, and mek-thri, hem no fraet taem pipol againstim hem. Iumi evriwan savve followim example blo Jesus for no fraet, nomata sapos iumi man for fraet.