Wanem God Bae Duim for Finisim Olketa Nogud Samting

Bible showimaot wanem Jehovah and Son bilong hem, Jesus Christ, bae duim for finisim wei for safa wea Satan kosim. Bible sei: “Dastawe Son bilong God [Jesus] hem kam, for hem savve finisim evri samting wea Devil hem duim.” (1 John 3:8) Jesus bae finisim pipol wea greedy, heitim narawan, and duim olketa nogud samting. And hem promis for “aotem” Satan, datfala “man wea rulim disfala world.” (John 12:31) Satan bae no savve affectim pipol, so olketa bae stap long wanfala niu world wea evriwan stap long peace.—2 Peter 3:13.

Wanem nao bae happen long pipol wea no laek for changem wei bilong olketa and wea gohed for duim olketa nogud samting? Wanfala promis long Bible hem sei: “Olketa wea duim stret samting and olketa wea no garem blame bae stap long earth. Bat olketa rabis pipol bae no stap long earth, and nogud pipol bae finis.” (Proverbs 2:21, 22) So no eni nogud man bae stap nao for spoelem olketa narawan. Long datfala taem wea evriwan stap long peace, olketa wea obeyim Jehovah bae isisi kamap perfect.—Rome 6:17, 18; 8:21.

Long datfala niu world, wanem nao bae God duim for finisim olketa nogud samting? Hem bae no mekem pipol duim nomoa wanem hem laekem, olsem olketa machine. Bat hem bae teachim olketa for duim wanem hem laekem and helpem olketa for no garem nogud tingting bat for duim gud samting.

Wanem nao bae God duim for protectim pipol from olketa samting olsem natural disaster and sik? Hem promisim iumi klosap nao Kingdom bilong hem bae rulim disfala earth. King wea God markem for rul long datfala Kingdom hem Jesus Christ and hem garem paoa for healim pipol wea sik. (Matthew 14:14) Jesus garem paoa tu for kontrolem wind and sea and olketa kaen samting olsem. (Mark 4:35-41) Diswan minim pipol bae no safa nao from olketa samting wea “seknomoa” hem happen. (Ecclesiastes 9:11) Olketa samting olsem bae no kasem olketa man taem Christ hem rul.—Proverbs 1:33.

Wanem nao bae happen long staka million pipol wea dae finis? Bifor Jesus resurrectim fren bilong hem Lazarus, hem sei: “Mi nao givim laef long pipol and mekem olketa for laef bak moa.” (John 11:25) Tru nao, Jesus garem paoa for mekem olketa wea dae finis for laef bak!

Sapos iu laek for stap long world wea no eni nogud samting bae kasem gudfala pipol, hem gud for iu studyim Bible mekem iu savve long samfala samting moa abaotem trufala God and plan bilong hem. Olketa Jehovah’s Witness bae hapi for helpem iu for kasem disfala savve. Mifala encouragem iu for askem olketa for helpem iu or iu savve raet kam long mifala for kasem samfala information moa.