Olketa Reference for Laef and Ministry Meeting Buk
© 2023 Watch Tower Bible and Tract Society of Pennsylvania
JULY 3-9
GUD SAMTING FROM BIBLE | EZRA 4-6
“Iufala Mas No Disturbim Waka”
Wanem Nao Iumi Lanem From Vision blo Zechariah?
13 Nomata King Artaxerxes banim olketa Jew for wakem bak temple, Hae Priest Jeshua (Joshua) and Governor Zerubbabel, wea leadim olketa Jew “statem moa disfala waka” lo temple. (Esra 5:1, 2) Maet samfala Jew no agree witim disison hia for startim moa disfala waka. Olketa savve olketa enemy bae lukim olketa duim datfala waka and bae trae for stopem olketa moa. Joshua and Zerubbabel need for sure Jehovah sapotim disison wea olketa mekem. Wanem nao helpem tufala for sure?
w86-E 2/1 29, box ¶2-3
Jehovah hem “Lukaftarem Olketa Elder Blo Olketa Jew”
Bihaen olketa Jew kamap free from Babylon, olketa no duim staka samting for 16-fala year. Tufala profet, Haggai and Zechariah, helpem olketa Jew for lusim kaen wei for hafhaf olsem, mekem waka for buildim bak temple blo Jehovah hem start moa. Bat no longtaem bihaen, olketa bigman blo Persia againstim waka hia. Olketa ask olsem, “Hu nao givim permission for iufala buildim disfala haos?”—Ezra 5:1-3.
Olketa elder barava careful lo hao olketa ansarem kwestin hia. Sapos olketa fraetem tumas olketa bigman hia, maet waka lo temple hem stop nao. Bat sapos olketa elder mekem olketa bigman for feel nogud, bae olketa duim sem samting. So olketa elder hia, (wea luk olsem Governer Zerubbabel and Hae Priest Joshua nao leadim olketa), ansa lo careful wei for mekem datfala waka hem gohed. Lo wei wea showimaot respect, olketa remindim olketa bigman hia hao plande year bifor nao, Cyrus talem olketa Jew for duim datfala waka. Hem law lo Persia for no eniwan savve changem law blo King, so olketa bigman wise for no stopem datfala waka. Datfala waka hem gohed, gogo King Darius appruvim datwan tu!—Ezra 5:11-17; 6:6-12.
Wanem Nao Iumi Lanem From Vision blo Zechariah?
7 Wanfala change kamap wea barava helpem olketa Jew. Wanem nao datwan? Darius I hem kamap niu king blo Persia. Lo mek-tu year wea hem rul, lo 520 B.C.E., hem luksavve hem againstim law for King Artaxerxes stopem olketa Jew for buildim temple. So Darius talem olketa Jew olketa savve finisim waka lo temple. (Esra 6:1-3) Olketa Jew barava sapraes lo datwan, bat Darius duim nara samting tu for helpem olketa. Hem givim order lo pipol wea trae for stopem waka lo temple for stop for duim datwan, and for givim selen and olketa building material for sapotim datfala waka! (Esra 6:7-12) Datwan helpem olketa Jew for finis for buildim temple lo 515 B.C.E., wea hem samting olsem fofala year nomoa.—Ezra 6:15.
Wanem Nao Iumi Lanem From Vision blo Zechariah?
16 Jehovah iusim tu “datfala wakaman wea faithful and wise” for givim direction lo iumi. (Matt 24:45) Samfala taem maet iumi kwestinim why iumi kasem samfala direction. Olsem example, maet iumi kasem instruction for redyim samfala samting for wanfala natural disaster wea iumi tingse bae no savve happen lo ples blo iumi. Or maet iumi tingse direction iumi kasem lo taem blo wanfala pandemic hem ova tumas. Wanem nao iumi shud duim sapos iumi tingse olketa instruction wea iumi kasem hem no fitim iumi? Hem gud for tingim hao olketa Jew kasem gud samting from olketa followim direction wea olketa kasem from Joshua and Zerubbabel. Hem gud for tingim tu olketa nara story lo Bible, olsem taem pipol blo God followim direction wea olketa tingse hem no fitim, bat hem sevem laef blo olketa.—Jajis. 7:7; 8:10.
Faendem Gudfala Point
w93-E 6/15 32 ¶3-5
Waswe, Iu Savve Trustim Bible?
Olketa wakem datfala coin lo Tarsus, wea hem nao wanfala taon wea stap lo southeast part blo kantri wea olketa kolem lo Turkey distaem. Olketa wakem coin hia lo mek-4 century B.C.E, wea hem nao taem wea Mazaeus, datfala governor blo Persia, hem rul. Coin hia sei hem governor blo datfala province lo “Narasaed lo River,” wea hem nao, datfala Euphrates River.
Bat why nao datwan hem interesting? Bikos bae iu faendem sem toktok insaed Bible blo iu. Ezra 5:6 go kasem 6:13 hem olketa message wea Darius, datfala king blo Persia, and wanfala governor wea nem blo hem, Tattenai, sendem go lo each other. Olketa storyim wei wea olketa Jew wakem bak temple blo olketa lo Jerusalem. Ezra hem wanfala savveman for mekem olketa copy blo Law blo God, and from diswan, iumi sure samting hem talem bae barava stret and tru. Bae iu lukim lo Ezra 5:6 and 6:13, hem sei Tattenai hem “governor blo territory wea nem blo hem Narasaed lo River.”
Ezra raetem datwan lo samting olsem 460 B.C.E., wea hem 100 year bifor olketa wakem datfala coin. Maet samfala man sei information olsem abaotem wanfala governor bifor hem no important tumas. Bat sapos iumi savve trustim olketa man wea raetem Bible for putim kaen smol information olsem insaed Bible, datwan shud mekem iumi barava trustim olketa nara samting wea olketa raetem, iaman?
JULY 10-16
GUD SAMTING FROM BIBLE | EZRA 7-8
“Gudfala Wei blo Ezra Givim Praise lo Jehovah”
Study—Givem Reward and Man Enjoyim
8 Tru nao, love bilong iumi for Word bilong Jehovah shud kam from heart bilong iumi, ples wea feeling hem kam from. Iumi shud hapi for ting raonem olketa scripture wea iumi readim. Iumi shud ting strong long olketa deep spiritual point, minim evribit, and ting raonem olketa. Diswan needim kwaet wei for ting raonem and prea. Olsem Ezra, iumi need for redyim heart bilong iumi for readim and studyim Word bilong God. Bible sei olsem abaotem hem: “Ezra nao redyim heart bilong hem for lukluk long law bilong Jehovah and for duim and for teachim rul and justice long Israel.” (Ezra 7:10) Lukim thrifala goal bilong Ezra taem hem redyim heart bilong hem: for study, for hemseleva followim, and for teach. Iumi shud followim example bilong hem.
si-E 75 ¶5
Bible Buk Namba 13—1 Chronicles
5 Ezra nao fit for raetem tru samting abaotem history hia winim eni nara man. “Ezra redyim heart blo hem for studyim Law blo Jehovah and for followim datwan and for teachim olketa law hia and olketa judicial disison lo Israel.” (Ezra 7:10) Jehovah givim holy spirit blo hem for helpem hem. Datfala king blo Persia wea rulim full world lo datfala taem, luksavve Ezra hem garem wisdom blo God and hem givim Ezra paoa for rul lo Judah. (Ezra 7:12-26) So from Jehovah and king givim paoa lo hem, Ezra savve iusim information and olketa document wea stap lo datfala taem for raetem datfala history.
it-1-E 1158 ¶4
Wei for Hambol
Leadim Iumi lo Stretfala Wei. Man wea hambol nao God bae leadim hem kam lo hem. Ezra garem bigfala responsibility nao for leadim samting olsem 1,500 man, witim olketa priest, olketa Nethinim, and olketa woman and pikinini, go bak lo Jerusalem taem olketa lusim Babylon. Olketa karem tu, staka gold and silver for temple lo Jerusalem. Olketa needim protection lo datfala gogo, bat Ezra no laek askem King blo Persia for helpem olketa, bikos datwan hem wei for depend lo olketa man. And tingim tu hao bifor, hem sei olsem lo king: “Hand blo God blo mifala protectim evriwan wea depend lo hem for kasem gud samting.” So hem arrangem wanfala taem for no kaikai mekem olketa showimaot lo God olketa hambol. Olketa askem God for protectim olketa and hem nao wanem hem duim. Hem protectim olketa from wei wea enemy savve attak haed, mekem olketa win for kasem Jerusalem. (Ezra 8:1-14, 21-32) God showimaot hem barava tinghae lo datfala profet Daniel, wea prisoner lo Babylon, taem hem sendem angel lo Daniel for givim wanfala vision lo hem. Hem tinghae lo Daniel bikos lo wei wea hem hambol for askem God for helpem hem for minim olketa samting and for leadim hem.—Daniel 10:12.
Faendem Gudfala Point
Olketa Main Point From Buk Bilong Ezra
7:28–8:20—Why nao plande Jew long Babylon no willing for go bak long Jerusalem witim Ezra? Nomata hem winim 60 year finis from taem wea firstfala grup bilong olketa Jew kam bak long homland bilong olketa, no staka pipol stap long Jerusalem. For go bak long Jerusalem man mas startim niu laef anda long olketa hard and danger samting. Living long Jerusalem long datfala taem hem no rich olsem living wea olketa Jew garem long Babylon. Datfala gogo hem danger tumas tu. Olketa wea go bak mas garem strongfala faith long Jehovah, strong for tru worship, and no fraet for go bak. Nomata Ezra tu bat depend long Jehovah for strongim hem. From encouragement bilong Ezra, 1,500 famili—maet full namba hem 6,000 pipol—olketa go bak. Bihaen Ezra duim samfala nara samting moa, 38 Levite and 220 Nethinim followim hem.
JULY 17-23
GUD SAMTING FROM BIBLE | EZRA 9-10
“Wei for Disobey Savve Mekem Man for Kasem Olketa Problem”
Olketa Main Point From Buk Bilong Ezra
9:1, 2—Waswe, wei for maritim olketa pipol bilong datfala ples bae kamap samting wea savve spoelem olketa? Datfala nation mas protectim worship bilong Jehovah go kasem taem wea Messiah hem kam. Wei for maritim pipol long nara ples savve barava spoelem tru worship. From samfala mekem agreement finis saed long marit witim pipol wea worshipim idol, gogo maet datfala full nation bae kamap part long olketa heathen nation. Datwan savve lead go long wei wea klin worship finis evribit from earth. Sapos olsem, Messiah bae kam long hu? Dastawe Ezra barava seke tumas taem hem lukim samting wea happen!
w09-E 10/1 10 ¶6
Wanem Nao Jehovah Laekem Iumi for Duim?
Man wea willing for obey hem kasem olketa blessing. Moses hem sei: “Obeyim olketa komandment . . . wea mi komandim lo iufala tuday mekem iufala kasem blessing.” (Verse 13) So evri komandment from Jehovah, wea minim evri samting hem askem iumi for duim, bae mekem iumi kasem blessing taem iumi obeyim. Hem olsem bikos Bible hem sei “God hem love.” (1 John 4:8) Dastawe Hem givim nomoa olketa kaen komand wea iumi needim for hapi and stap gud. (Isaiah 48:17) Taem iumi duim evri samting wea Jehovah askem, iumi savve misstim staka hard samting and bae kasem staka blessing lo future taem Kingdom hem rul ovarem full earth.
Faendem Gudfala Point
Olketa Main Point From Buk Bilong Ezra
10:3, 44—Why nao olketa sendem go olketa pikinini witim olketa waef? Sapos olketa no sendem go tu olketa pikinini, maet staka long olketa waef hia kam bak long olketa pikinini bilong olketa. And tu, plande taem mami nao mas lukaftarem olketa pikinini bilong hem.
JULY 24-30
GUD SAMTING FROM BIBLE | NEHEMIAH 1-2
“Semtaem Nomoa Mi Prea”
Tingim Jehovah Evritaem
5 Samfala taem maet iumi need for kwiktaem prea long God for helpem iumi. Tingim Nehemiah wea garem waka for givim wine long King Artaxerxes bilong Persia. Wantaem king hia lukim Nehemiah hem luk sorre. Hem askem Nehemiah: “Wanem nao iu laek for duim? [Nehemiah] kwiktaem prea long God bilong heven.” From hem no garem taem, hem mas talem shortfala prea nomoa and hem prea kwaet. Nomata olsem, God herem prea bilong hem. King hia helpem hem for buildim bak wall bilong Jerusalem. (Readim Nehemiah 2:1-8.) Tru nao, nomata man hem prea kwaet or hem talem shortfala prea, God savve herem datwan.
Extemporaneous Toktok
Taem samwan askem iu for explainim wanem nao iu bilivim, wanem nao savve helpem iu for ansa long gudfala wei? Followim example bilong Nehemiah wea prea long kwaet wei bifor hem ansarem kwestin bilong King Artaxerxes. (Neh. 2:4) Next samting, kwiktaem formimap wanfala aotlaen long mind bilong iu. Iumi maet listim olketa step olsem: (1) Chusim wan or tufala point wea shud insaed ansa bilong iu (iu maet disaed for iusim olketa point insaed Olketa Bible Subject for Storyim). (2) Chusim olketa scripture wea iu bae iusim for saportim olketa point hia. (3) Planim hao for startim story bilong iu long wei wea tingim feeling bilong narawan mekem hem willing for lisin. Then start for story.
Faendem Gudfala Point
w86-E 2/15 25
Tru Worship Hem Win
Nomoa, bikos for longtaem finis, “evri day and evri naet” nao Nehemiah prea abaotem wei wea Jerusalem hem nogud. (1:4, 6) Taem hem kasem chance for talem King Artaxerxes hem laek wakem bak olketa wall blo Jerusalem, hem prea moa, wea hem nao samting wea hem duim plande taem finis. From Jehovah hem agree lo datwan, King markem olketa for wakem bak olketa wall hia.
Leson for Iumi: Depend lo Jehovah for direction. Taem iumi mas disaedem olketa big samting, iumi shud “gohed for prea and no givap.” Then iumi shud duim samting followim direction wea Jehovah givim.—Rome 12:12.
JULY 31–AUGUST 6
GUD SAMTING FROM BIBLE | NEHEMIAH 3-4
“Waswe, Iu Willing for Duim Eni Waka Nomoa?”
Olketa Main Point From Buk Bilong Nehemiah
3:5, 27. Iumi shud no olsem “olketa hae class wan” bilong Tekoite wea ting long olketa smol waka for saed bilong tru worship olsem hem no fitim olketa for duim. Bat, iumi savve followim example bilong olketa nara Tekoite wea willing for duim eni waka nomoa.
Jehovah Savve Helpem Iu for Duim Eni Samting wea Hem Laekem
11 Staka year bihaen, Jehovah iusim tu olketa dota blo Shallum for share insaed datfala waka for repairim wall blo Jerusalem. (Nehemaea 2:20; 3:12) Nomata dadi blo olketa hem wanfala prince, olketa dota blo Shallum willing for duim datfala waka wea barava no isi and wea hem danger tumas. (Nehemaea 4:15-18) Olketa barava difren from olketa bigman blo Tekoa, wea les for share insaed datkaen waka! (Nehemaea 3:5) Tingim hapi blo olketa dota blo Shallum taem datfala waka hem finis insaed lo 52 day nomoa! (Nehemaea 6:15) Distaem tu, olketa sista willing for help for duim olketa difren kaen waka lo service blo Jehovah, olsem wei for waka lo construction and for duim maintenance lo olketa building. Iumi needim olketa sista hia, wea iusim savve wea olketa garem, wea barava willing, and wea faithful for duim olketa kaen waka olsem.
Mekem Grow Sem Tingting Olsem Christ Abaotem Wei for Win
16 Evri Christian, olketa young wan and olo, shud trae for mekem grow tingting bilong Christ abaotem wei for win. Staka difren waka stap long kongregeson. No feel nogud taem samwan askem iu for duim samting wea luk olsem smol waka. (1 Samuel 25:41; 2 Kings 3:11) Parents, waswe, iufala encouragem olketa pikinini and young wan bilong iu for hapi for duim eni assignment olketa kasem, nomata hem long Kingdom Hall, assembly, or ples wea convention kamap? Waswe, olketa lukim iu duim smol waka? Wanfala brata, wea distaem serve long world headquarter bilong Olketa Jehovah’s Witness, hem barava rememberim example bilong parents bilong hem. Hem sei: “From wei wea olketa duim waka for klinim Kingdom Hall or ples wea convention kamap, mi luksavve olketa ting long hem olsem hem important. Planti taem olketa volunteer for duim olketa waka wea helpem kongregeson or olketa brata, nomata hao smol nao datwan. Wei bilong olketa helpem mi for willing for acceptim eni assignment wea mi kasem hia long Bethel.”
Faendem Gudfala Point
Olketa Main Point From Buk Bilong Nehemiah
4:17, 18—Hao nao man savve iusim wanfala hand nomoa for duim datfala waka for buildim bak wall? Hem isi nomoa for olketa wea karem hevi samting. Sapos olketa karem hevi samting antap long hed or shoulder, olketa savve balancem witim wanfala hand “taem nara hand holem missile.” Olketa wea build wea mas iusim tufala hand evriwan, each wan “garem sword long hip bilong hem taem hem build.” Long wei olsem, olketa redi for faet sapos enemy hem attak.
AUGUST 7-13
GUD SAMTING FROM BIBLE GUD SAMTING FROM BIBLE | NEHEMIAH 5-7
“Nehemiah Laek Waka for Olketa, No Olketa Narawan Nao Waka for Hem”
Olketa wea Saportim Tru Worship Bifor and Distaem
Nehemiah givim moa samting winim taem and savve bilong hem for organizem samting. Hem iusim material samting bilong hemseleva tu for saportim tru worship. Hem iusim selen bilong hemseleva for baem bak olketa Jew brata bilong hem from wei for slave. Hem givim selen long olketa and no askem interest. Hem nating “putim hevi” long olketa Jew long wei for askem selen olsem governor, samting wea hem fit for kasem. Bat haos bilong hem evritaem open for feedim “wan handred and fifti man, and olketa wea kam long mifala from olketa nation wea stap raonem mifala.” Each day hem provaedem “wanfala buluka, sixfala best sheep and bird” for olketa guest bilong hem. And tu, wantaem evri tenfala day hem offerim “staka long evri difren kaen wine”—evriting hia hem nao baem.—Nehemiah 5:8, 10, 14-18.
“Iufala Mas No Wikdaon”
16 Jehovah helpem Nehemiah and olketa Jew for buildim bak wall bilong Jerusalem, and olketa finisim diswan insaed 52 day nomoa! (Neh. 218, footnote; 6:15, 16) Nehemiah no lukluk nomoa taem olketa narawan duim datfala waka olsem wanfala boss. Hem waka witim olketa for buildim bak wall bilong Jerusalem. (Neh. 5:16) Staka elder followim example bilong Nehemiah taem olketa waka long olketa construction project or klinim and fixim olketa Kingdom Hall. And tu, olketa duim shepherding kol long olketa brata and sista and waka witim olketa long ministry.—Readim Isaiah 35:3, 4.
Hao Nao Jehovah Bae Rememberim Iu?
Evritaem Bible showimaot hao wei wea God “remember” minim hem duim gud samting. Olsem example, bihaen floodwata fulap long earth for 150 day, “God rememberim Noah . . . , and God mekem wanfala wind for blow pas ovarem earth, and wata hem start katdaon.” (Genesis 8:1) Samfala handred year bihaen, Samson, wea olketa Philistine aotem eye bilong hem and chainim, hem prea olsem: “Jehovah, rememberim mi, plis, and strongim mi, plis, distaem nao.” Jehovah rememberim Samson taem hem givim hem bigfala strong mekem hem savve pei bak againstim olketa enemy bilong God. (Judges 16:28-30) And for Nehemiah, Jehovah blessim olketa hard waka bilong hem, and trufala worship kamap gud moa long Jerusalem.
Faendem Gudfala Point
“Winim Nogud Fasin Witim Gudfala Fasin”
15 Mek-thri samting, olketa enemy bilong Nehemiah iusim datfala Israelite man Shemaiah, wea hem no loyal long nation bilong hem, for trae mekem Nehemiah brekem Law bilong God. Shemaiah hem sei olsem long Nehemiah: “Iumi markem wanfala taem for meet long haos bilong tru God, insaed long temple, and iumi mas satem olketa door bilong temple; from olketa bae kam for killim iu dae.” Shemaiah talem hao olketa enemy redi for killim dae Nehemiah, bat sapos hem haed long temple hem bae sevem laef bilong hem. Bat Nehemiah hem no wanfala priest. Hem bae wanfala sin sapos hem haed insaed long haos bilong God. Waswe, bae hem brekem Law bilong God for trae sevem laef bilong hem? Nehemiah hem sei “Sapos eni man olsem mi go insaed long temple, bae hem dae stret! Bae mi no go insaed!” Why nao Nehemiah no foldaon insaed datfala trap? Bikos hem savve hao nomata Shemaiah hem wanfala Israelite, “hem no God wea sendem hem kam.” Tru nao, bae hem hard for wanfala tru profet talem hem for brekem Law bilong God. Long datfala taem tu, Nehemiah no letem olketa nogud enemy for winim hem. No longtaem bihaen datwan hem sei: “Gogo, mifala finis for buildim datfala wall long mek-twenti faev day bilong Elul, wea datwan hem fifti-tu day bihaen taem wea mifala start.”—Nehemiah 6:10-15; Numbers 1:51; 18:7.
AUGUST 14-20
GUD SAMTING FROM BIBLE | NEHEMIAH 8-9
“Hapi wea Jehovah Givim Bae Strongim Iufala”
Lane From Prea wea Olketa Levite Redyim Gud
2 Wanfala month bifor datfala spesol hipap, olketa Jew finis nao for wakem bak wall bilong Jerusalem. (Neh. 6:15) Olketa duim datfala waka insaed 52 day nomoa. Then long first day bilong month bihaen datwan, wea hem Tishri, olketa hipap for herem Ezra and olketa nara Levite readim Law bilong God and helpem olketa for minim. (Piksa 1) Olketa dadi, mami, and olketa pikinini tu standap and herehere start from taem sun kamap go kasem midolday. Olketa Israelite hia showimaot nambawan example for iumi. Nomata sapos iumi garem naesfala Kingdom Hall for sidaon insaed, maet samfala taem mind bilong iumi go wakabaot long taem bilong meeting. Bat olketa Israelite hia lisin gud, ting raonem samting wea olketa herem, and krae tu taem olketa luksavve olketa no obeyim Law bilong God.—Neh. 8:1-9.
Waswe, Bae Iu ‘Gohed for Letem Spirit Leadim Iu’?
9 Jehovah hem “datfala hapi God.” (1 Timothy 1:11; Psalm 104:31) Son hem hapi tumas for duim will bilong Dadi bilong hem. (Psalm 40:8; Hebrews 10:7-9) And ‘hapi bilong Jehovah hem sef ples for iumi.’—Nehemiah 8:10.
10 Hapi wea kam from God hem mekem iumi barava satisfae taem iumi duim will bilong God nomata taem hard samting, sorre, or persecution kamap. “Barava savve bilong God” hem mekem iumi hapi tumas! (Proverbs 2:1-5) Iumi fren witim God from iumi kasem stretfala savve abaotem hem and garem faith long hem and ransom sakrifaes bilong Jesus. (1 John 2:1, 2) Narafala samting wea mekem iumi hapi tu hem wei wea iumi part bilong wanfala spiritual famili evriwea long world. (Zephaniah 3:9; Haggai 2:7) Kingdom hope and nambawan privilege wea iumi garem for talemaot gud nius hem mekem iumi hapi. (Matthew 6:9, 10; 24:14) And nara samting wea mekem iumi hapi hem datfala hope for kasem laef olowe. (John 17:3) From iumi garem nambawan hope olsem, iumi shud “hapi fogud.”—Deuteronomy 16:15.
Faendem Gudfala Point
it-1-E 145 ¶2
Aramaic
Samfala year bihaen olketa Jew lusim Babylon and kasem bak lo Jerusalem, datfala priest Ezra readim buk blo Law lo olketa Jew wea stap lo there, and samfala Levite explainim datwan lo olketa. Nehemiah 8:8 hem sei: “And olketa gohed for read big from buk blo Law blo datfala tru God, and explainim Law hia and helpem pipol hia for minim datwan. So olketa helpem pipol hia for savve hao for followim wanem olketa herem.” Maet olketa transleitim kam datwan lo Aramaic languis bikos maet olketa Jew lanem and iusim datfala languis lo Babylon. Luk olsem olketa explainim datwan tu mekem olketa Jew minim hao samting olketa herem hem important tumas, nomata olketa minim Hebrew languis or nomoa.
AUGUST 21-27
GUD SAMTING FROM BIBLE | NEHEMIAH 10-11
“Olketa Willing for Mekem Sakrifaes for Jehovah”
w98 10/15 22 ¶13
Jerusalem Wea Fitim Nem Bilong Hem
13 Datfala “trufala arrangement” wea start long taem bilong Nehemiah hem readyim pipol bilong God for dedication bilong wall long Jerusalem. But narafala problem hem stap for deal withim. From bigfala wall wea garem 12-fala gate stap raonem Jerusalem, hem needim moa pipol. Nomata samfala Israelite stap long there, “taon hem waed and big tumas, and fewfala pipol nomoa stap insaed.” (Nehemiah 7:4) For stretem disfala problem, olketa pipol “choosim wanfala long evri tenfala man for kam stap long Jerusalem datfala holy taon.” Way wea olketa willing for followim disfala arrangement hem muvim pipol for blessim “evri man wea agree for stap long Jerusalem.” (Nehemiah 11:1, 2) Datwan barava gudfala example for olketa tru worshiper distaem wea living bilong olketa letem olketa for muv go long ples wea needim help bilong mature Kristian!
w86-E 2/15 26
Tru Worship Hem Win
For lusim land and haos blo olketa, and muv go lo Jerusalem bae needim staka selen, and bae no isi olsem wei for gohed stap lo Babylon. Maet wei for duim olsem bae mekem olketa stap lo danger tu. Dastawe olketa narawan tinghae lo olketa volunteer hia and masbi olketa prea for Jehovah blessim olketa.
God Hem Hapi Long Man wea Faithful
15 Taem iumi dedicate long Jehovah, iumi promis for evritaem duim wanem hem laekem. Iumi savve samfala taem bae hem no isi for iumi keepim datfala promis. So wanem nao iumi duim taem samwan askem iumi for duim samting wea iumi no laek for duim? Sapos iumi willing for obeyim God, iumi showimaot iumi faithful for keepim promis bilong iumi. Olketa blessing wea iumi kasem from Jehovah hem winim eni hard taem wea iumi kasem. (Mal. 3:10) Bat wanem nao dota bilong Jephthah duim taem hem herem promis bilong dadi bilong hem?
Faendem Gudfala Point
Olketa Main Point From Buk Bilong Nehemiah
10:34—Why nao pipol mas provaedem firewood? Law bilong Moses no komandim pipol for provaedem firewood. Diswan hem olsem from need hem kamap. For bonem olketa sakrifaes long altar needim barava staka firewood. Luk olsem, no staka Nethinim stap wea serve long temple olsem olketa slave wea no Israelite. So, for mekem firewood no finis olketa chusim samfala for tekem kam datwan.
AUGUST 28–SEPTEMBER 3
GUD SAMTING FROM BIBLE | NEHEMIAH 12-13
“Mas Loyal lo Jehovah Taem Iu Chusim Olketa Fren”
it-1-E 95 ¶5
Olketa Ammonite
Bihaen olketa aotem Tobiah from area blo temple, olketa readim and strongim moa law blo God lo Deuteronomy 23:3-6 wea tambuim eni Ammonite or Moabite for kam insaed lo kongregeson blo Israel. (Nehemiah 13:1-3) Olketa mekem tambu hia 1000 year bifor bikos olketa Ammonite and Moabite nating willing for helpem olketa Israelite taem olketa klosap for kasem Promis Land. Tambu hia stopem olketa for kamap full member blo nation blo Israel wea minim olketa bae no garem olketa sem raet and privilege olsem olketa Israelite. Bat datwan no stopem olketa Ammonite and Moabite wanwan for stap witim and associate witim olketa Israelite and kasem gud samting from olketa blessing wea God givim lo pipol blo hem. Samting wea showimaot datwan nao hem taem olketa letem Zelek for joinim army blo David, and tu, story abaotem Ruth, datfala woman blo Moab.—Ruth 1:4, 16-18.
God Mekem Iufala Holy
5 Readim Nehemiah 13:4-9. Staka pipol distaem garem nogud wei, so hem no isi for iumi gohed for holy. Bible story abaotem Hae Priest Eliashib and wanfala man wea nem bilong hem Tobiah. Tobiah hem wanfala Ammonite wea luk olsem hem waka for king bilong Persia. Tobiah and olketa fren bilong hem trae for stopem Nehemiah for no buildim bak wall bilong Jerusalem. (Neh. 2:10) Law sei hem tambu for olketa Ammonite go insaed long area bilong temple. (Deut. 23:3) So why nao hae priest letem man olsem Tobiah for stap insaed wanfala rum long temple?
6 Tingim thrifala reason: First wan, Tobiah hem fren bilong Eliashib. Mek-tu, Tobiah and son bilong hem Jehohanan maritim olketa Jew woman, and staka Jew tinghae long Tobiah. (Neh. 6:17-19) Mek-thri, Tobiah hem fren gud witim Sanballat, wea hem bigman bilong Samaria, and famili member bilong Hae Priest Eliashib. Gele bilong Sanballat maritim wanfala granson bilong Eliashib. (Neh. 13:28) From Hae Priest Eliashib ting long Tobiah olsem famili fren maet datwan nao mekem hem for letem disfala man wea no worshipim Jehovah and wea againstim pipol bilong hem for stap long temple. Bat Nehemiah showimaot hem faithful long Jehovah taem hem torowem olketa furniture bilong Tobiah aotsaed long temple.
w96 3/15 16 ¶6
Face-im Challenge Bilong Loyal Fasin
6 Sapos iumi loyal long Jehovah God, iumi bae no kampani withim olketa enemy bilong hem. Dastawe disaepol James hem raet: “Iufela wea no faithful, waswe, iufela no savvy hao way for fren withim world hem way for enemy withim God? So, sapos eniwan hem want for kamap fren bilong world hem mekem hemseleva wanfela enemy bilong God.” (James 4:4) Iumi want for garem loyal fasin wea King David showim aot taem hem say: “Waswe, mi no hate-im olketa wea barava hate-im iu, O Jehovah, and waswe, mi barava feel no gud long olketa wea againstim iu? Mi barava hate-im pipol olsem. Olketa kamap really enemy bilong mi.” (Psalm 139:21, 22) Iumi no want for kampani withim eniwan wea mean for duim sin, from iumi no garem sem interest olsem olketa. Waswe, way for loyal long God bae stopem iumi for kampani withim olketa enemy bilong Jehovah olsem, nomata sapos iumi meetim them or thru long video?
Faendem Gudfala Point
it-2-E 452 ¶9
Music
Wei for singsing lo temple hem barava important samting. Iumi savve lo diswan bikos lo staka scripture wea storyim olketa singer and hao no eniwan forcem olketa for duim nara waka blo olketa Levite, mekem olketa savve duim nomoa waka blo olketa for singsing. (1Ch 9:33) Samting wea showimaot olketa wanfala spesol grup blo olketa Levite, hem hao olketa no stap lo sem list blo olketa wea go bak lo Jerusalem olsem olketa narawan. (Ezr 2:40, 41) Nomata datfala king blo Persia, Artaxerxes (Longimanus), tu, iusim paoa blo hem for sei olketa hia witim olketa nara spesol grup, no need for peim tax. (Ezr 7:24) Gogo, king talem komand for “pipol lukaftarem olketa singer hia, insaed diswan hem for provaedem wanem olketa needim each day.” Nomata Bible sei king nao talem datfala komand, luk olsem datwan hem kam from Ezra wea king givim hem paoa for talem komand olsem. (Ne 11:23; Ezr 7:18-26) Dastawe, nomata olketa man for singsing olketa Levite, olketa wanfala spesol grup insaed Bible, bikos taem hem storyim olketa, hem sei “olketa singer and olketa Levite.”—Nehemiah 7:1; 13:10.