Gohed for Hapi Nomata Long Hard Taem
“Evriwan wea haed long [Jehovah] bae hapi, olketa bae singaot witim hapi for olowe.”—PS. 5:11.
1, 2. (a) Wanem nao samfala samting wea savve mekem pipol sorre tumas? (b) Wanem nao olketa nara hard samting olketa tru Christian mas winim?
OLKETA JEHOVAH’S WITNESS kasem tu olketa nogud samting wea happen long world. Staka pipol bilong God kasem nogud samting from war, wei wea pipol brekem law, and duim samting wea no stret. Olketa disaster, wei for poor, sik, and dae mekem pipol sorre tumas. Paul hem sei: “Iumi savve evri samting wea God wakem gohed for krae long heart and safa tugeta kam kasem distaem.” (Rom. 8:22) And from iumi no perfect iumi tu kasem olketa nogud samting. Maet iumi tu olsem King David wea sei: “Olketa mistek bilong mi mekem mi feel nogud tumas. Hem olsem samting wea hevi tumas for mi karem.”—Ps. 38:4.
2 Olketa trufala Christian kasem olketa nogud samting wea pipol long world kasem and mas karem tu tokpiksa post bilong olketa. (Luke 14:27) Pipol heitim and spoelem Jesus and olketa duim sem samting tu long olketa disaepol bilong hem. (Matt. 10:22, 23; John 15:20; 16:2) Dastawe for followim Christ, iumi mas trae hard and no givap taem iumi weit for kasem olketa gudfala samting long niu world.—Matt. 7:13, 14; Luke 13:24.
3. Hao nao iumi savve God no laekem iumi for safa for mekem hem hapi?
3 Waswe, diswan minim olketa tru Christian laekem kaen laef wea mekem olketa for no hapi? Waswe, hem fitim for iumi sorre olowe nomoa go kasem end long disfala world? Nomoa nao! Jehovah laekem iumi for hapi taem iumi weit for hem mekem olketa promis bilong hem kamap tru. Staka taem Bible storyim pipol wea worshipim Jehovah olketa hapi. (Readim Isaiah 65:13, 14.) Psalm 5:11 hem sei: “Evriwan wea haed long [Jehovah] bae hapi, olketa bae singaot witim hapi for olowe.” Tru tumas, iumi savve hapi and no wari tumas nomata iumi kasem hard taem. Iumi bae storyim wanem Bible talem wea savve helpem iumi for hapi and no givap taem iumi kasem hard taem.
Jehovah Hem “Datfala Hapi God”
4. Hao nao God feel taem olketa angel and Adam and Eve no laekem hem for rulim olketa?
4 Tingim Jehovah. From hem Olmaeti God hem ruler bilong full universe. Hem no short long eni samting and no needim eniwan for helpem hem. Nomata Jehovah garem bigfala paoa, hem mas feel nogud taem hem lukim wanfala angel bilong hem bighed and kamap Satan. God mas barava feel nogud taem olketa nara angel bighed olsem Satan tu. Tingim, masbi God barava feel nogud tumas taem Adam and Eve, wea tufala nao spesol samting wea hem wakem, tufala no obeyim hem. Start kam long datfala taem, staka billion pipol wea born kam bihaen tufala, no laekem Jehovah for rulim olketa.—Rom. 3:23.
5. Wanem nao barava mekem Jehovah hem sorre?
5 Bighed wei wea Satan startim hem gohed yet kam kasem distaem. Samting olsem 6,000 year wea go pas finis Jehovah lukim pipol worshipim olketa idol, garem raf wei, killim dae man, and durong. (Gen. 6:5, 6, 11, 12) Nara samting tu, hem herem pipol talem olketa barava rabis laea toktok abaotem hem and olketa tok nogud abaotem olketa samting wea holy. Nomata pipol wea worshipim God tu samfala taem duim samting wea mekem hem sorre. Bible storyim wanfala taem wea olketa duim datwan olsem: “Plande taem olketa againstim hem long wilderness, olketa mekem hem sorre long draefala ples! And plande taem olketa testim God, and olketa mekem Holy Wan bilong Israel sorre.” (Ps. 78:40, 41) Jehovah savve barava feel sorre taem pipol bilong hem no laek followim hem. (Jer. 3:1-10) Tru tumas, taem olketa nogud samting happen Jehovah savve barava feel sorre tu.—Readim Isaiah 63:9, 10.
6. Wanem nao God duim taem samting hem happen wea savve mekem hem feel sorre?
6 Nomata Jehovah hem sorre olsem, datwan no stopem hem for duim samting. Taem problem kamap Jehovah kwiktaem duim samting for helpem pipol bilong hem. And hem duim olketa samting tu for mekem plan bilong hem kamap tru long future. From Jehovah duim olketa samting hia, hem hapi and luk forward long taem wea evriwan bae mekhae long rul bilong hem and olketa wea worshipim hem bae kasem olketa blessing. (Ps. 104:31) Tru tumas, nomata plande olketa againstim Jehovah, hem gohed for “datfala hapi God.”—1 Tim. 1:11; Ps. 16:11.
7, 8. Taem eni nogud samting hem happen, long wanem wei nao iumi savve followim Jehovah?
7 Hem tru, iumi no savve markem iumi witim Jehovah long wei for stretem olketa problem. Nomata olsem, iumi savve followim wei bilong Jehovah taem iumi kasem hard taem. Hem wei bilong iumi man for feel sorre taem eni nogud samting hem happen, bat nomata wanem samting hem happen iumi savve hapi moa. Jehovah wakem iumi for tekem olketa wei bilong hem, dastawe iumi garem tingting and wei for luksavve wea helpem iumi for ting raonem olketa problem bilong iumi and duim samting for stretem datwan.
8 Wanfala important samting for helpem iumi deal witim olketa problem bilong iumi, hem nao for iumi luksavve samfala samting hem hard for iumiseleva savve stretem. Taem iumi wari tumas abaotem olketa samting olsem, maet datwan mekem iumi barava feel nogud. Nomata iumi worshipim Jehovah bat kaen wei for wari olsem hem spoelem hapi bilong iumi. Bihaen iu ting raonem samfala wei for stretem problem, hem gud for no tingim tumas olketa problem hia, bat busy for duim olketa nara samting. Olketa story long Bible showimaot diswan hem tru.
Important for Garem Gudfala Tingting
9. Wanem nao Hannah duim wea showimaot hem garem gudfala tingting?
9 Tingim Hannah, mami bilong profet Samuel. Hem sorre tumas bikos hem no garem pikinini. Datwan mekem Peninnah tok spoelem hem and mekfani long hem. Hannah savve feel nogud gogo samfala taem hem savve krae and no kaikai. (1 Sam. 1:2-7) Long wanfala taem, Hannah go long temple bilong Jehovah, hem “sorre tumas and hem prea long Jehovah and hem krae big.” (1 Sam. 1:10) Bihaen Hannah talemaot feeling bilong hem long Jehovah, hae priest Eli kam long hem and sei: “Go and stap gud, and God bilong Israel bae givim iu samting wea iu askem long hem.” (1 Sam. 1:17) Long datfala taem masbi Hannah luksavve hem no savve duim eni samting moa. Hannah showimaot hem garem gudfala tingting, then hem “go and kaikai, and hem no luk wari nao.”—1 Sam. 1:18.
10. Wanem nao Paul duim taem Jehovah sei hem bae no finisim datfala nila?
10 Aposol Paul garem tingting olsem taem hem kasem hard taem. Wanfala samting kasem hem wea mekem hem sorre tumas. Hem sei datfala samting hem “wanfala nila long body.” (2 Cor. 12:7) Nomata wanem nao datwan, Paul duim samting for trae finisim datfala problem. Hem prea long Jehovah for finisim datwan. Haomas taem nao Paul hem prea long Jehovah abaotem datwan? Thrifala taem. Bihaen mek-thri taem, God talem long Paul hem bae no finisim datfala “nila long body.” Paul hapi nomoa and gohed for worshipim Jehovah.—Readim 2 Corinthians 12:8-10.
11. Long wanem wei nao prea helpem iumi taem iumi kasem hard taem?
11 Tufala story hia long Bible, no minim for iumi prea wan or tufala taem nomoa long Jehovah abaotem olketa samting wea mekem iumi sorre tumas. (Ps. 86:7) Bat Bible sei: “Iufala mas no wari long eni samting, bat prea long God evritaem and prea strong long hem. Thankiu long hem and askem hem wanem iufala needim.” Wanem nao Jehovah bae duim taem hem herem prea olsem? Bible hem sei: “Peace wea God givim wea winim evri tingting bilong man bae protectim heart and tingting bilong iufala long Christ Jesus.” (Phil. 4:6, 7) Hem tru, Jehovah bae no finisim problem bilong iumi, bat hem ansarem prea bilong iumi long wei for protectim tingting bilong iumi. Bihaen iumi prea abaotem samting, maet iumi luksavve, for gohed wari abaotem datwan savve spoelem iumi.
Hapi Taem Iumi Duim Wanem God Laekem
12. Hao nao wei for gohed wikdaon hem savve spoelem man?
12 Proverbs 24:10 hem sei: “Waswe, iu feel wikdaon taem iu kasem trabol? Bae iu no strong nao.” Nara proverb hem sei: “Taem heart hem sorre tumas, bae man hem no hapi nao.” (Prov. 15:13) Samfala Christian sorre tumas gogo olketa no savve duim nao Bible reading and ting raonem Bible. Olketa no strong for prea, and maet olketa no laek for hipap witim olketa brata and sista. Wei for gohed olsem savve spoelem iumi.—Prov. 18:1, 14.
13. Wanem nao samfala samting wea savve helpem iumi taem iumi wikdaon and wea savve mekem iumi hapi?
13 Bat wei for tingim gud saed long samting bae helpem iumi for tingim olketa samting long laef bilong iumi wea savve mekem iumi hapi. David hem sei: “God bilong mi, mi hapi tumas for duim samting wea iu laekem.” (Ps. 40:8) Taem iumi kasem hard taem, iumi mas no letem diswan stopem iumi for gohed worshipim Jehovah. Wanfala samting wea iumi savve duim for no sorre tumas hem for duim olketa samting wea mekem iumi hapi. Jehovah talem iumi savve hapi taem iumi readim Bible and ting raonem evritaem. (Ps. 1:1, 2; Jas. 1:25) Iumi readim “olketa naes toktok” long Bible and herem tu long olketa meeting. Diswan savve strongim iumi and mekem iumi hapi.—Prov. 12:25; 16:24.
14. Wanem nao Jehovah promisim for iumi wea mekem iumi hapi distaem?
14 God givim iumi plande reason for iumi savve hapi. Hem promis for sevem iumi and datwan mekem iumi barava hapi tumas. (Ps. 13:5) Nomata long eni samting wea happen long iumi distaem, gogo God bae blessim olketa wea barava traem best for gohed lukaotem hem. (Readim Ecclesiastes 8:12.) Profet Habakkuk tu hem barava bilivim diswan and hem talem olketa naesfala toktok olsem: “Nomata fig tree hem no garem flaoa, and olketa vine no garem grape for harvestim, olive tree no garem frut, and olketa garden no garem eni kaikai, olketa sheepsheep maet go aot from fence, and maet no eni buluka stap insaed long fence, bat mi bae hapi long Jehovah, bae mi hapi long God wea sevem mi.”—Hab. 3:17, 18.
“Pipol wea God Bilong Olketa Hem Jehovah, Olketa Hapi!”
15, 16. Wanem nao samfala samting wea God givim iumi wea iumi savve enjoyim distaem?
15 Taem iumi weit for kasem olketa nambawan samting long future, Jehovah laekem iumi for enjoyim olketa gudfala samting wea hem givim long iumi. Bible hem sei: “Distaem mi luksavve no eni samting hem winim wei for [olketa man] hapi and for duim olketa gudfala samting. And evri man shud kaikai and drink and lukim gudfala samting wea hem kasem from hard waka bilong hem. Hem nao present wea God givim.” (Eccl. 3:12, 13) Taem man “duim olketa gudfala samting,” hem minim tu for duim gudfala samting for olketa narawan. Jesus hem sei man wea givim samting hem hapi winim man wea kasem samting. Iumi savve hapi tumas taem iumi duim naes samting long hasband or waef bilong iumi, olketa pikinini, mami and dadi and olketa relative. (Prov. 3:27) Taem iumi kaen long olketa Christian brata and sista, welkamim olketa and forgivim olketa, iumi bae hapi tumas and Jehovah tu hem hapi. (Gal. 6:10; Col. 3:12-14; 1 Pet. 4:8, 9) Taem iumi waka hard for duim gud ministry bilong iumi, iumi bae kasem staka blessing.
16 Datfala scripture long Ecclesiastes story abaotem naes samting wea iumi savve enjoyim tumas olsem for kaikai and drink. Tru tumas, nomata iumi kasem hard taem, iumi savve hapi long olketa naes samting olsem wea iumi kasem from Jehovah. Nara samting wea savve mekem iumi barava hapi, hem nao taem iumi lukluk long sun hem gogo daon, wanfala ples wea luk naes tumas, lukim olketa pikinini animal pleiplei, and duim olketa fani samting and olketa nara samting wea Jehovah wakem. Evri samting hia no needim selen for iumi lukluk long olketa and enjoyim. Taem iumi ting raonem olketa samting olsem, diswan mekem iumi barava lovem Jehovah from hem nao givim evri gud samting.
17. Wanem nao bae sevem iumi from nogud samting wea spoelem iumi distaem? For savve long wanem samting nao bae mekem iumi hapi?
17 Wei for lovem God, obeyim olketa komand bilong hem, and for garem faith long ransom sakrifaes bilong Jesus bae gogo mekem iumi perfect. Datwan hem minim iumi bae no garem nao hard taem wea iumi kasem distaem, and iumi bae hapi for olowe. (1 John 5:3) Go kasem datfala taem iumi savve hapi nomoa bikos Jehovah hem savve long evri samting wea spoelem iumi and hem bae stretem datwan. David hem sei: “Mi hapi tumas long wei wea iu kaen long mi. Iu savve long samting wea spoelem mi, iu savve long hard taem wea kasem mi.” (Ps. 31:7) Jehovah lovem iumi tumas and hem bae helpem iumi long hard taem wea kasem iumi.—Ps. 34:19.
18. Why nao pipol bilong God shud barava hapi?
18 Taem iumi weit for Jehovah mekem olketa promis bilong hem kamap tru, hem gud for iumi followim wei bilong hapi God, Jehovah. Iumi no laek letem wei for wari stopem iumi for no gohed worshipim God. Taem iumi kasem eni problem, sapos iumi wise and garem gudfala tingting datwan bae helpem iumi. Taem nogud samting kasem iumi, Jehovah bae helpem iumi for kontrolem feeling bilong iumi and for duim olketa samting wea bae helpem iumi taem iumi kasem hard taem. Hem gud for iumi hapi long olketa gud samting wea iumi kasem from hem, wea hem nao olketa physical samting and olketa samting wea helpem iumi for fren gud witim Jehovah. Taem iumi fren gud witim God, iumi bae hapi bikos “pipol wea God bilong olketa hem Jehovah, olketa hapi!”—Ps. 144:15.
Wanem Nao Iu Lanem?
• Taem iumi kasem hard taem, long wanem wei nao iumi savve followim wei bilong Jehovah?
• Long wanem wei nao gudfala tingting savve helpem iumi taem iumi kasem hard taem?
• Taem iumi kasem hard taem, wanem nao savve mekem iumi hapi taem iumi duim wanem God laekem?
[Olketa piksa long page 16]
Jehovah no hapi long olketa nogud samting wea happen distaem
[Credit Line]
© G.M.B. Akash/Panos Pictures
[Olketa piksa long page 18]
Jehovah givim olketa samting for mekem iumi hapi