Showimaot Iu Kamap Strongfala Christian
“Ting raonem evri samting hia and tingting strong long olketa. Taem iu duim olsem hem bae showaot long evriwan iu kamap strongfala Christian.”—1 TIM. 4:15.
1, 2. Wanem nao iumi savve abaotem laef bilong Timothy taem hem young and samting wea change long laef bilong hem taem hem samting olsem 20 year?
TAEM Timothy hem smol boy yet, hem stap long Roman province long Galatia wea distaem hem Turkey. Bihaen Jesus hem dae, samfala kongregeson kamap long Galatia. Long datfala taem nao Timothy, mami, and grani bilong hem, kasem truth and olketa gohed gud long wanfala kongregeson hia. (2 Tim. 1:5; 3:14, 15) Luk olsem Timothy hem hapi for duim Christian waka taem hem young from hem stap witim famili bilong hem and long ples wea hem savve gud long hem. Bat seknomoa samfala samting start for change.
2 Diswan hem happen taem aposol Paul visitim ples bilong olketa for mek-tu taem. Long datfala taem, Timothy maet samting olsem 20 year. Maet taem Paul visitim Lystra hem herem olketa brata long olketa kongregeson talem ‘gudfala samting abaotem Timothy.’ (Acts 16:2) Nomata Timothy hem young yet, hem showimaot hem garem mature tingting. Holy spirit leadim Paul and olketa elder long kongregeson bilong Timothy for chusim hem for duim spesol waka long kongregeson. Olketa duim diswan long wei for putim hand antap long hem.—1 Tim. 4:14; 2 Tim. 1:6.
3. Wanem nao spesol samting Paul askem Timothy for duim?
3 Paul askem Timothy for duim wanfala spesol samting, wea hem nao for gogo witim Paul long missionary waka. (Acts 16:3) Timothy mas sapraes tumas and hapi tu! Timothy gogo witim Paul for staka year and samfala taem witim olketa narawan tu. Hem duim staka difren waka wea olketa aposol and olketa elder askem hem for duim. Paul and Timothy duim traveling waka wea datwan hem helpem olketa brata and sista fren gud witim Jehovah. (Readim Acts 16:4, 5.) Dastawe, gogo, staka Christian savve talem, Timothy hem wanfala strong Christian. Bihaen Timothy waka witim Paul for tenfala year, Paul hem sei olsem long olketa long Philippi: “No eni narawan moa garem wei olsem [Timothy]. Hem bae barava lukaftarem olketa samting saed long iufala. . . . Iufala lukim hem duim olketa samting for showimaot diswan, hem waka hard witim mi olsem wanfala pikinini witim dadi bilong hem for mekem staka pipol herem gud nius.”—Phil. 2:20-22.
4. (a) Wanem bigfala responsibility nao Paul askem Timothy for duim? (b) Olketa wanem kwestin nao iumi savve askem abaotem wanem Paul talem long 1 Timothy 4:15?
4 Long klosap sem taem wea Paul raet go long olketa long Philippi, hem givim bigfala responsibility long Timothy for markem olketa wea bae elder and ministerial servant. (1 Tim. 3:1; 5:22) Datwan hem showimaot olketa brata savve trustim Timothy, wea hem wanfala overseer. Bat long datfala sem leta, Paul encouragem Timothy for ‘showaot long evriwan hem kamap strongfala Christian.’ (1 Tim. 4:15) Taem iumi tingim staka waka wea Timothy duim finis, hao, datwan no showimaot hem barava strongfala Christian nao? Wanem nao Paul minim taem hem talem datfala toktok? Wanem gud samting nao iumi savve kasem from kaonsel bilong Paul?
Samting wea Showimaot Iumi Kamap Strongfala Christian
5, 6. Wanem nao happen long kongregeson long Ephesus wea savve spoelem wei wea olketa fren gud witim Jehovah? Wanem nao Timothy mas duim for helpem olketa?
5 Iumi storyim olketa narafala verse long 1 Timothy chapter 4. (Readim 1 Timothy 4:11-16.) Bifor Paul hem raetem olketa toktok hia, hem go long Macedonia bat hem askem Timothy for stap long Ephesus. Why nao olsem? Samfala long Ephesus teachim samfala laea teaching wea mekem olketa long kongregeson no wan mind. Timothy mas helpem olketa long kongregeson mekem no eni samting spoelem wei wea olketa fren witim Jehovah. Long wanem wei nao hem bae helpem olketa? Hem mas showimaot gudfala example for olketa narawan followim.
6 Paul sei long Timothy: “Showimaot gudfala example long olketa brata and sista, mekem olketa savve followim iu long toktok bilong iu, long love bilong iu, long faith bilong iu and long wei bilong iu wea klin and gudfala.” Paul sei tu: “Ting raonem evri samting hia and tingting strong long olketa. Taem iu duim olsem hem bae showaot long evriwan iu kamap strongfala Christian.” (1 Tim. 4:12, 15) Taem Paul hem sei for Timothy kamap strongfala Christian, hem story abaotem olketa wei bilong Timothy, no position or bigfala responsibility wea Timothy garem. Hem bae gud sapos evri Christian traem best for kamap strongfala Christian olsem.
7. Wanem nao evriwan long kongregeson mas duim?
7 Staka waka stap for olketa brata duim long kongregeson olsem long taem bilong Timothy. Samfala duim waka bilong elder or ministerial servant. Olketa narawan pioneer. And samfala narawan tu duim traveling waka, waka long Bethel, duim missionary waka, and teach long olketa assembly and convention. Bat evri Christian nomata olketa man, woman, or young wan, savve duim samting wea bae showimaot olketa kamap strongfala Christian. (Matt. 5:16) And olsem Timothy, olketa wea garem bigfala responsibility long kongregeson tu mas showimaot olketa kamap strongfala Christian long wei bilong olketa.
Showimaot Gudfala Example Long Toktok Bilong Iu
8. Samting wea iumi talem savve duim wanem long worship bilong iumi?
8 Samting wea Timothy savve showimaot gudfala example long hem nao, hem long toktok bilong hem. Wanem nao iumi savve duim for showimaot iumi kamap strongfala Christian long toktok bilong iumi? Samting wea iumi talem showimaot wanem kaen man nao iumi. Jesus talem stret olsem: “Samting wea man tingting tumas abaotem nao bae hem storyim.” (Matt. 12:34) James, wea hem haf brata bilong Jesus luksavve tu samting wea iumi talem savve spoelem worship bilong iumi. Hem sei: “Sapos eni man tingse hem worshipim God bat hem no kontrolem toktok bilong hem, worship bilong disfala man hem iusles bikos hem laea long hemseleva.”—Jas. 1:26.
9. Hao nao iumi savve showimaot gudfala example long toktok bilong iumi?
9 Samting wea iumi talem savve showimaot long olketa narawan long kongregeson sapos iumi gohed kamap strongfala Christian or nomoa. Olketa mature Christian no talem toktok wea no showimaot respect and wea spoelem narawan. Bat olketa traem best for strongim narawan, story gud witim man wea sorre and encouragem narawan. (Prov. 12:18; Eph. 4:29; 1 Tim. 6:3-5, 20) Taem iumi redi evritaem for storyim long pipol samting wea iumi biliv strong long hem and for mekhae long olketa samting wea God hem sei hem stret, datwan showimaot iumi lovem God. (Rom. 1:15, 16) Taem iumi evritaem talem gudfala toktok maet gudfala pipol lukim datwan and maet olketa laek tu for followim example bilong iumi.—Phil. 4:8, 9.
Gudfala Example Long Wei Bilong Iumi
10. For kamap strongfala Christian, why nao hem barava important for no laea long wei bilong iumi?
10 Hem gud for toktok bilong iumi helpem narawan bat sapos man talem samting wea hem stret bat hem duim nogud samting, hem laea long wei bilong hem. Paul savve gud long wei bilong olketa Pharisee for laea long wei bilong olketa and nogud samting wea kamaot from datwan. Tu-thri taem finis Paul warnim Timothy abaotem datkaen nogud wei. (1 Tim. 1:5; 4:1, 2) Bat Timothy no laea long wei bilong hem. Long mek-tu leta wea Paul raetem go long Timothy, hem sei: “Mi tingim faith bilong iu wea hem barava tru.” (2 Tim. 1:5) Nomata olsem, Timothy mas showimaot long olketa narawan hem no laea long wei bilong hem. Hem mas showimaot gudfala example for olketa narawan.
11. Wanem nao Paul raetem long Timothy abaotem riches?
11 Taem Paul raetem tufala leta go long Timothy, hem encouragem hem for showimaot gudfala wei. Paul talem Timothy for no aftarem riches. Hem sei: “Staka nogud samting nao savve happen from wei for laekem selen tumas, and taem samfala laekem tumas selen, olketa lusim biliv bilong olketa and olketa kasem staka trabol.” (1 Tim. 6:10) Taem man laekem tumas riches, hem showimaot hem no fren gud witim Jehovah. Bat taem iumi hapi long simpol laef and hapi nomoa for “garem kaikai and ples for stap,” iumi showimaot iumi kamap strongfala Christian.—1 Tim. 6:6-8; Phil. 4:11-13.
12. Wanem nao iumi savve duim mekem iumi showimaot iumi kamap strongfala Christian?
12 Paul talem Timothy hem important for olketa Christian sista “werem kaleko wea showimaot respect and wea no ova tumas.” (1 Tim. 2:9) Olketa Christian sista showimaot nambawan example taem kaleko and lukluk bilong olketa showimaot respect, and taem olketa disaed gud long olketa nara samting wea olketa duim long laef bilong olketa. (1 Tim. 3:11) Olketa Christian brata mas olsem tu. Paul kaonselem olketa elder for “kontrolem [olketa] seleva and no ova tumas, for garem gudfala tingting and followim stretfala wei.” (1 Tim. 3:2) Taem iumi showimaot olketa wei olsem, pipol bae lukim iumi kamap strongfala Christian.
13. Olsem Timothy, hao nao iumi savve showimaot gudfala example taem wei bilong iumi hem klin and gudfala?
13 Timothy mas garem tu wei wea klin and wea gudfala. Taem Paul talem Timothy for olsem, hem storyim for hem klin long tingting and wei bilong hem, mekem taem Timothy hem stap witim olketa woman and story witim olketa, hem no duim eni samting wea no fitim. Hem mas ting long ‘olketa olo woman olsem mami bilong hem and olketa gele olsem sista bilong hem. Hem mas showimaot respect long olketa.’ (1 Tim. 4:12; 5:2) Maet man tingse no eniwan bae savve hem durong, bat God lukim diswan and gogo olketa narawan tu bae savve. Olsem tu, pipol bae luksavve long gudfala waka wea wanfala Christian hem duim. (1 Tim. 5:24, 25) Evriwan long kongregeson savve showimaot olketa kamap strongfala Christian taem wei bilong olketa hem klin and gudfala.
Love and Faith Hem Barava Important
14. Wanem nao olketa scripture talem abaotem wei for lovem narawan?
14 Love hem wanfala main samting wea olketa tru Christian showimaot. Jesus sei long olketa disaepol: “Sapos iufala lovem iufala evriwan, pipol bae savve iufala olketa disaepol bilong mi.” (John 13:35) Long wanem wei nao iumi savve showimaot love olsem? Bible talem iumi for “showimaot love long wei for patient witim narawan,” for “kaen long narawan, tingim feeling bilong pipol, willing nomoa for forgivim olketa” and welkamim olketa. (Eph. 4:2, 32; Heb. 13:1, 2) Paul hem sei: “Iufala mas tingim narawan and lovem hem olsem hem brata bilong iu.”—Rom. 12:10.
15. Why nao hem barava important for evriwan showimaot love, main wan nao olketa Christian overseer?
15 Sapos Timothy raf long olketa Christian brata and sista or no kaen long olketa, waka bilong hem for teach long kongregeson and for overseer bae hem iusles nomoa. (Readim 1 Corinthians 13:1-3.) Bat from Timothy lovem olketa brata and sista, welkamim olketa and duim gudfala samting for olketa, hem showimaot hem kamap strongfala Christian. Dastawe hem fitim taem aposol Paul hem raet long Timothy and sei hem barava important for Timothy showimaot gudfala example for lovem narawan.
16. Why nao Timothy mas showimaot hem garem strongfala faith?
16 Faith bilong Timothy kasem test taem hem stap long Ephesus. Samfala long kongregeson teachim samting wea no stret. Olketa narawan storyim “olketa laea story” or mekem olketa kwestin kamap for storyim wea nating helpem kongregeson. (Readim 1 Timothy 1:3, 4.) Paul hem sei olketa man olsem olketa “bighed, praod, no minim eni samting, olketa laekem tumas for story raonem olketa kwestin, and raoa abaotem olketa word.” (1 Tim. 6:3, 4) Waswe, bae hem wise for Timothy interest lelebet long olketa laea teaching hia tu? Nomoa. Paul encouragem Timothy for “faet long datfala nambawan faet for mekem [hem] gohed garem faith” and no herem “olketa iusles toktok wea spoelem holy samting and olketa laea savve wea pipol sei hem ‘tru.’” (1 Tim. 6:12, 20, 21) Timothy barava followim gudfala advaes wea Paul talem.—1 Cor. 10:12.
17. Wanem nao savve testim faith bilong iumi distaem?
17 Paul hem sei long Timothy, long “olketa taem wea bae kam, samfala bae lusim biliv bilong olketa, and obeyim olketa laea toktok and teaching bilong olketa demon.” (1 Tim. 4:1) Evriwan long kongregeson, witim olketa wea lead tu, mas olsem Timothy long wei for showimaot strongfala faith. Iumi savve showimaot iumi kamap strongfala Christian and showimaot iumi garem faith taem iumi barava strong for againstim eni samting wea olketa apostate talem.
Waka Hard for Showimaot Iu Strongfala Christian
18, 19. (a) Wanem nao iumi savve duim mekem evriwan luksavve iumi strongfala Christian? (b) Wanem nao bae iumi storyim long study bihaen diswan?
18 Nomata man hem luk naes, maet hem savve tumas for duim samting, or hem garem bignem, datwan no showimaot hem wanfala strong Christian. And nomata man stap long truth for plande year finis, maet datwan tu no showimaot hem wanfala strong Christian. Bat taem tingting, toktok, and wei bilong man hem followim tingting bilong Jehovah, datwan nao showimaot hem wanfala strong Christian. (Rom. 16:19) Iumi mas followim komand wea Jesus talem for lovem narawan and waka hard for garem strongfala faith. Tru tumas, iumi mas ting raonem wanem Paul talem long Timothy and tingting strong long datwan mekem evriwan savve lukim iumi strongfala Christian.
19 Nara samting wea showimaot iumi strongfala Christian hem taem iumi hapi wea datwan hem wanfala wei bilong holy spirit bilong God. (Gal. 5:22, 23) Study bihaen diswan bae storyim wanem iumi savve duim mekem iumi gohed hapi nomata iumi kasem hard taem.
Wanem Nao Ansa Bilong Iu?
• Samting iumi talem savve showimaot wanem abaotem iumi?
• Hao nao wei bilong iumi wea klin and gudfala hem showimaot iumi strongfala Christian?
• Why nao olketa Christian mas barava showimaot love and garem strongfala faith?
[Piksa long page 11]
Taem Timothy hem young, hem showimaot hem strongfala Christian
[Olketa piksa long page 13]
Waswe, olketa narawan luksavve iu strongfala Christian?