“Hapi Witim Waef wea Iu Tekem Taem Iu Young”
“Hapi witim waef wea iu tekem taem iu young . . . Son bilong mi, why nao iu shud feel hapi witim difren woman?”—PROVERBS 5:18, 20.
1, 2. Why nao iumi savve sei God blessim love midolwan long hasband and waef?
BIBLE hem tok stret abaotem sex. Proverbs 5:18, 19 hem sei: “Mekem ples wea iu kasem wata hem kasem blessing, and hapi witim waef wea iu tekem taem iu young. Wanfala mere deer wea iu savve lovem and wanfala naes maunten goat. Susu bilong hemseleva nao shud switim iu evritaem. Witim love bilong hem iu shud fulap witim bigfala hapi olowe.”
2 Long hia, datfala toktok “ples wea iu kasem wata” hem piksarem samting wea mekem man satisfae saed long sex. Disfala love and hapi midolwan long hasband and waef hem wanfala blessing from hem nao present from God. Bat diswan hem for olketa wea marit nomoa. Dastawe King Solomon long Israel bifor, wea raetem Proverbs, hem ask: “Son bilong mi, why nao iu shud feel hapi witim difren woman or holem difren woman?”—Proverbs 5:20.
3. (a) Wanem sorre samting nao happen long plande marit? (b) Hao nao God ting long adultery?
3 Taem wanfala man and woman marit, tufala mekem promis for lovem and faithful long each other. Nomata olsem, adultery hem samting wea spoelem plande marit. Tru nao, wanfala woman wea duim research abaotem diswan hem raetem insaed buk bilong hem hao “25 percent long olketa waef and 44 percent long olketa hasband duim adultery.” Aposol Paul talem olsem: “No letem eni samting giamanim iu. Olketa wea duim fornication, or worshipim idol, or duim adultery, or duim homosexual fasin, or man wea leidaon witim man . . . bae no kasem kingdom bilong God.” (1 Corinthians 6:9, 10) Hem barava klia. Adultery hem wanfala big sin againstim God and olketa tru worshiper mas stap klia long wei for duim datwan. Wanem nao bae helpem iumi for garem ‘marit wea kasem honor, and for marit bed stap klin’?—Hebrews 13:4.
Keakea, No Letem Heart Trikim Iu
4. Wanem nao samfala wei wea wanfala Christian wea marit finis savve isisi frenim samwan wea no marit partner bilong hem?
4 Long world distaem wea fulap witim nogud fasin, plande pipol “tingting olowe for duim adultery and olketa no fit for ranawe from sin.” (2 Peter 2:14) Olketa lukaotem wei for frenim samwan wea no marit partner bilong olketa. Long samfala kantri, wei wea staka woman waka distaem and man and woman waka tugeta, hem mekem wei for fren kamap long wakples. Distaem Internet tu mekem hem isi for man wea shame for story for frenim samwan. Plande pipol wea marit finis foldaon long kaen trap olsem and no luksavve hao datwan affectim olketa.
5, 6. Wanem nao mekem wanfala Christian woman klosap duim bigfala sin, and wanem nao iumi lanem from diswan?
5 Tingim hao wanfala Christian wea nem bilong hem Mary,a hem fren witim samwan and klosap durong. Hasband bilong Mary, wea no wanfala Jehovah’s Witness, no showimaot love long hem. Mary hem story abaotem wanfala taem bifor wea hem meetim wanfala wakfren bilong hasband bilong hem. Datfala man hem garem gudfala fasin, and bihaen, hem showimaot interest tu long religion bilong Mary. Mary hem sei: “Hem naesfala man and hem barava difren from hasband bilong mi.” No longtaem bihaen, tufala start for laekem each other. Hem ting olsem: “Mi no duim adultery and man hia showimaot interest long Bible. Maet mi savve helpem hem.”
6 Mary kasem bak gudfala tingting and hem no duim adultery. (Galatians 5:19-21; Ephesians 4:19) Conscience bilong hem pokem hem and hem finisim wei for fren witim datfala man. Samting wea kasem Mary hem showimaot hao “heart hem savve trikim man winim eni nara samting and hem nating hol bak.” (Jeremiah 17:9) Bible kaonselem iumi olsem: “Winim eni nara samting wea iu mas protectim, protectim gud heart bilong iu.” (Proverbs 4:23) Hao nao iumi savve duim datwan?
‘Man wea Wise Hem Protectim Hemseleva’
7. Taem iumi helpem samwan wea garem olketa marit problem, wanem advaes from Bible nao bae protectim iumi?
7 Aposol Paul hem raet olsem: “Man wea tingse hem standap mas lukaot nogud hem foldaon.” (1 Corinthians 10:12) And Proverbs 22:3 hem sei: “Man wea wise hem lukim trabol and protectim hemseleva.” Hem wise for luksavve long olketa samting wea savve mekem problem kamap winim wei for trustim iuseleva and tingim hao ‘No eni samting bae happen long mi.’ Olsem example, taem samwan long opposite sex garem olketa hardfala problem insaed long marit, no letem hem storyim olketa problem bilong hem long iu nomoa. (Proverbs 11:14) Talem fren bilong iu hao hem moabeta for hem storyim olketa marit problem witim marit partner bilong hem, olketa elder, or olketa nara mature Christian. Sapos fren bilong iu hem wanfala sista, encouragem hem for story long narafala sista, and sapos hem wanfala brata, encouragem hem for story long narafala brata. (Titus 2:3, 4) Olketa elder long olketa kongregeson bilong Olketa Jehovah’s Witness showimaot gudfala example saed long diswan. Taem wanfala elder need for story seleva witim wanfala Christian sista, hem duim diswan long ples wea nara pipol stap—olsem long Kingdom Hall.
8. Iumi mas keakea long wanem samting long wakples?
8 Long wakples and olketa nara ples, keakea long olketa samting wea savve mekem feeling for laek frenim narawan kamap. Olsem example, wei for evritaem spendem moa taem for waka witim samwan long opposite sex savve lead go long temptation. Sapos iu marit, toktok and wei bilong iu shud showimaot klia hao iu nating willing for frenim samwan wea no marit partner bilong iu. From iu lovem God, bae iu nating laek for switim feeling bilong narawan or garem lukluk wea ova tumas and kaleko wea showimaot body. (1 Timothy 4:8; 6:11; 1 Peter 3:3, 4) Wei for putim olketa piksa bilong marit partner and pikinini bilong iu long wakples bae remindim iu and olketa narawan hao iu barava tinghae long famili bilong iu. Disaed strong for nating encouragem—or acceptim—wei wea narafala man or woman trae for switim iu.—Job 31:1.
“Enjoyim Laef Witim Waef wea Iu Lovem”
9. Wanem nao olketa samting wea savve happen wea mekem feeling for laekem narawan barava kamap strong?
9 For protectim heart hem minim moa samting winim wei for stap klia long olketa samting wea savve mekem temptation kamap. Wei for frenim samwan wea no marit partner savve showimaot hasband and waef no luksavve long olketa need bilong each other. Maet hasband nating tingim feeling bilong waef or waef evritaem tok spoelem hasband. Then maet hasband or waef meetim samwan long wakples or long Christian kongregeson wea garem fasin wea partner bilong hem no garem. Kwiktaem nomoa tufala fren and feeling for laekem each other barava kamap strong nao. Olketa samting hia wea savve happen hem pruvim hao disfala toktok long Bible hem barava tru: “Each wan hem kasem test taem samting wea hem barava wantem pullim and switim hem.”—James 1:14.
10. Hao nao olketa hasband and waef savve strongim love wea olketa garem for each other?
10 Winim wei for hasband and waef kasem samting olketa laekem from samwan wea no marit partner bilong olketa—nomata hem love, wei for fren, or for kasem help for deal witim wanfala problem, olketa shud waka hard for strongim love for each other. So iufala olketa hasband and waef, spendem taem tugeta, and fren gud witim each other. Tingim bak wanem nao mekem iu lovem partner bilong iu. Trae for garem datfala feeling wea iu garem firstaem for partner bilong iu. Tingim olketa gudfala taem wea iutufala enjoyim tugeta. Prea long God abaotem diswan. David wea raetem psalm barava askem Jehovah olsem: “O God, mekem mi garem klinfala heart, and mekem mi garem gudfala fasin wea savve mekem mi stand strong.” (Psalm 51:10) Disaed strong for ‘enjoyim laef witim waef wea iu lovem for full laef wea God givim long iu.’—Ecclesiastes 9:9.
11. Hao nao savve, wisdom, and fasin for luksavve hem savve strongim marit?
11 Narafala samting wea strongim marit hem wei for garem savve, wisdom, and fasin for luksavve. Proverbs 24:3, 4 hem sei: “Wisdom bae mekem wanfala famili kamap strong, and fasin for luksavve bae mekem hem barava stap strong. And savve bae mekem olketa rum insaed fulap witim evri spesol and naesfala samting wea garem hae price.” Olketa fasin olsem love, loyal fasin, fasin for fraet long God, and faith, hem part long olketa samting wea mekem famili hapi. For garem olketa fasin hia, man need for kasem savve abaotem God. Dastawe, olketa wea marit shud barava studyim gud Bible. And why nao hem important for garem wisdom and fasin for luksavve? For deal witim olketa problem wea iumi feisim evriday iumi needim wisdom, wea hem nao wei for followim samting wea iumi lanem from Bible. Man wea garem fasin for luksavve hem minim tingting and feeling bilong partner bilong hem. (Proverbs 20:5) Thru long Solomon, Jehovah hem sei: “Son bilong mi, lisin gud long wisdom bilong mi. Tanem kam ear bilong iu long savve bilong mi.”—Proverbs 5:1.
Taem “Trabol” Kamap
12. Why nao hem no sapraesing samting hao pipol wea marit kasem olketa problem?
12 No eni marit hem perfect. Bible talem hao olketa hasband and waef bae kasem “trabol long body bilong olketa.” (1 Corinthians 7:28) Wari, sik, persecution, and olketa nara samting savve mekem hevi kamap insaed marit. Bat taem olketa problem kamap, wei wea iutufala loyal long each other and laek for mekem Jehovah hapi bae muvim iutufala for waka tugeta for stretem datfala problem.
13. Long olketa wanem samting nao hasband and waef savve lukluk gud long olketa seleva?
13 Waswe sapos wei wea tufala deal witim each other nao mekem hevi kamap insaed marit? For savve hao for stretem datwan hem minim tufala mas waka hard. Olsem example, maet hem kamap wei bilong tufala for tok nogud long each other. (Proverbs 12:18) Olsem iumi storyim long firstfala article, wei for duim olsem savve barava spoelem marit. Wanfala proverb long Bible hem sei: “Hem moabeta for man stap long bush winim wei for stap witim waef wea toktok tumas and mek trabol.” (Proverbs 21:19) Sapos iu wanfala waef and marit bilong iu olsem, askem iuseleva, ‘Waswe, wei bilong mi hem mekem hem hard for hasband bilong mi laek stap witim mi?’ Bible hem talem olketa hasband olsem: “Gohed for lovem waef bilong iufala and no kros tumas long olketa.” (Colossians 3:19) Sapos iu wanfala hasband, askem iuseleva, ‘Waswe, waef bilong mi lukaotem love from narawan bikos mi no showimaot love long hem?’ Hem tru, iumi no iusim olketa samting hia olsem excuse for duim dirty fasin. Bat wei wea kaen samting olsem savve happen hem gudfala reason for storyim olketa problem tugeta.
14, 15. Why nao wei for frenim samwan wea no partner bilong iu bae no stretem olketa problem insaed marit?
14 Wei for frenim samwan wea no marit partner bilong iu bae no stretem olketa problem insaed marit. Waswe, wei for frenim samwan olsem bae mekem iu garem niufala marit wea moabeta? Maet samfala garem tingting olsem. Samfala savve sei olsem: ‘Disfala man wea mi frenim hem garem olketa fasin wea mi needim.’ Bat kaen tingting olsem hem no stret bikos eniwan wea lusim marit partner bilong hem—or encouragem iu for lusim partner bilong iu—barava no tinghae long wei wea marit hem holy. Hem no stret for tingse wei for frenim samwan wea no marit partner bilong iu bae mekem iu garem niufala marit wea moabeta.
15 Mary, wea iumi storyim firstaem, hem barava ting raonem olketa nogud samting wea savve kamaot from samting wea hem duim, olsem wei for lusim wei wea God hapi long hem and olketa narawan. (Galatians 6:7) Hem sei: “Taem mi ting raonem feeling wea mi garem for wakfren bilong hasband bilong mi, mi luksavve hao sapos eni chance kamap for disfala man savve long truth, mi nao stopem. Wei for duim rong samting bae affectim evriwan and mekem olketa narawan stambol!”—2 Corinthians 6:3.
Main Reason for Faithful
16. Wanem nao samfala samting wea kamaot from dirty fasin?
16 Bible givim warning olsem: “Lips bilong wanfala difren woman hem olsem wanfala honeycomb wea fulap witim honey, and mouth bilong hem smooth winim oil. Bat samting wea kamaot bihaen hem barava saoa olsem poison tree; hem sharp olsem tu-saed sword.” (Proverbs 5:3, 4) Samting wea kamaot from dirty fasin hem nogud tumas and savve killim man dae tu. Olketa samting hia hem wei for garem guilty conscience, olketa nogud sik wea kamaot from sex, and wei for barava spoelem feeling bilong partner wea faithful. For sure, olketa samting hia hem barava gudfala reason for no duim samting wea savve lead go long adultery.
17. Wanem nao main reason for stap faithful long marit partner?
17 Main reason why adultery hem rong hem bikos Jehovah, Man wea startim marit and sex, hem againstim datwan. Thru long profet Malachi Hem sei: “Mi bae kam klosap long iufala pipol for judgem iufala, and mi bae kwiktaem givim judgment againstim . . . olketa wea duim adultery.” (Malachi 3:5) Proverbs 5:21 hem storyim samting wea Jehovah hem lukim taem hem sei: “Evri samting wea olketa man duim hem stap front long eye bilong Jehovah, and hem ting raonem evri gogo bilong hem.” Tru nao, “evri samting hem naked and showaot klia long eye bilong datwan wea iumi mas givim ansa long hem.” (Hebrews 4:13) So main reason for stap faithful long marit partner hem wei wea iumi luksavve hao nomata maet man savve haedem rong wea hem duim and hem tingse datwan no spoelem hem or community, eni wei for duim samting wea no klin saed long sex hem spoelem wei wea iumi fren witim Jehovah.
18, 19. Wanem nao iumi lanem from samting wea happen long Joseph and waef bilong Potiphar?
18 Olsem hem showaot long example bilong Joseph, son bilong Jacob, wei for laek garem peace witim God hem strongfala reason for stap faithful. From Potiphar, wanfala bigman bilong Pharaoh, hem hapi witim Joseph, hem givim Joseph hae position insaed long haos bilong hem. Waef bilong Potiphar lukim hao Joseph hem “luk naes long body and lukluk bilong hem barava naes.” Evriday hem trae for switim Joseph, bat hem no kasem samting wea hem laekem. Wanem nao mekem Joseph stand strong? Bible talem iumi olsem: “Hem nating willing and savve sei long waef bilong masta bilong hem: ‘Masta bilong mi . . . no holem bak eni samting from mi bat iu nomoa, from iu nao waef bilong hem. Hem hard tumas for mi duim disfala barava nogud samting and sin againstim God!’”—Genesis 39:1-12.
19 Joseph wea no marit, hem keepim klinfala fasin from hem nating willing for frenim waef bilong narafala man and durong. Proverbs 5:15 hem sei olsem long olketa hasband: “Drinkim wata from tank bilong iuseleva, wata wea kamaot from well bilong iuseleva.” Stap klia long wei for isisi frenim samwan wea no marit partner bilong iu. Waka hard for strongim love wea iu garem for marit partner bilong iu, and waka hard for stretem eni problem wea maet kamap. So gohed for “hapi witim waef wea iu tekem taem iu young.”—Proverbs 5:18.
[Footnote]
a Mifala changem nem.
Wanem Nao Iu Lanem?
• Hao nao maet wanfala Christian savve isisi frenim samwan wea no marit partner bilong hem?
• Wanem nao man savve duim for stap klia long wei for frenim samwan wea no marit partner bilong hem?
• Taem olketa problem kamap insaed marit, wanem nao hasband and waef shud duim?
• Wanem nao main reason for stap faithful long marit partner?
[Piksa long page 10]
Tru nao, hem isi tumas for frenim samwan long wakples wea hem no marit partner bilong iu
[Piksa long page 12]
‘Savve bae mekem olketa rum insaed fulap witim evri naesfala samting’