OLKETA KWESTIN WEA YOUNG PIPOL GAREM
Wanem Nao Bae Helpem Mi for Concentrate?
Why nao mi no savve concentrate?
“Mi savve readim staka buk bifor, bat distaem nomoa. Mi les for readim olketa longfala paragraf tu.”—Elaine.
“Sapos video wea mi watchim hem slow tumas, mi savve pressim button for mekem hem kwiktaem finis.”—Miranda.
“Taem mi concentrate for duim samting wea important then seke phone blo mi krae, mi no savve concentrate nao bat tingim nomoa ‘Hu nao text kam?’”—Jane.
Waswe, technology nao savve mekem iumi no concentrate? Samfala sei yes. Nicholas Carr wea raetem buk and givim advaes sei: “Sapos iumi iusim moa taem lo Internet, iumi trainim brain blo iumi for no concentrate bat for kwiktaem lukluk lo information nomoa.”a
Tingim thrifala area lo laef wea technology savve mekem iu for no concentrate.
Taem iu story witim narawan. Wanfala young woman wea nem blo hem Maria sei: “Nomata taem pipol story feis tu feis, samfala savve textim narawan, pleim olketa game, or chekim social media lo phone blo olketa. Hem mekem olketa no savve lisin gud lo man wea story kam.”
Taem iu lo class. Datfala buk Digital Kids sei: “Staka student sei olketa iusim electronic device blo olketa for sendem text or for readim or watchim olketa samting lo Internet . . . wea no join witim class blo olketa.”
Taem iu study. Chris wea 22 years old sei: “Hard samting for mi nao hem for no lukluk lo phone blo mi evritaem hem krae.” Sapos iu skul yet and iu mas duim homwok for wan hour, hem savve tek winim thri hour for duim sapos iu gohed lukluk lo device blo iu.
Important samting for tingim: Iu bae faendem hem hard for concentrate sapos iu letem technology kontrolem iu.
Sapos iu no concentrate, mind blo iu hem olsem wanfala wild horse wea hem nao kontrolem iu
Wanem nao bae helpem mi for concentrate?
Taem iu story witim narawan. Bible sei: “Evritaem tingim olketa narawan and no tingim iufala seleva nomoa.” (Philippi 2:4) Showimaot lo narawan iu tingim olketa lo wei for lisin gud. Lukluk lo olketa taem olketa story and no lukluk lo device blo iu.
“Taem iu story witim narawan, trae for no chekim phone blo iu. Showimaot respect lo hem lo wei for lisin gud lo hem.”—Thomas.
IDEA: Taem iu story witim narawan, trae for putim phone blo iu lo ples wea iu bae no lukim. Pipol wea duim research sei taem phone blo iu stap lo ples wea iu savve lukim, then datwan savve mekem iu for no concentrate lo man wea iu story witim.
Taem iu lo class. Bible sei: “Iufala mas herehere gud.” (Luke 8:18) Followim datfala advaes and sapos skul letem iu for iusim Internet taem iu lo class, no chekim olketa message, pleim olketa game, or story witim olketa narawan lo Internet lo taem wea iu shud lanem samting.
“Trae for lisin gud lo class. Raetem daon olketa samting wea teacher talem. Sapos fitim, sidaon klosap lo front lo class mekem iu savve concentrate.”—Karen.
IDEA: Raetem daon olketa samting wea iu lanem winim wei for typem lo computer. Pipol wea duim research sei datwan bae helpem iu for concentrate and rememberim wanem iu lanem.
Taem iu study. Bible sei: “Kasem waes an kasem gudfala save.” (Provebs 4:5) Datwan minim iu mas tek taem for ting raonem information wea iu readim winim wei for kwiktaem lukluk lo information just for pasim test nomoa.
“Taem mi study, mi putim tablet lo airplane mode mekem mi savve concentrate lo wanem mi duim. Mi no lukluk lo olketa message wea kam. Sapos mi tingim samting wea mi mas no forgetim, mi raetem daon.”—Chris.
IDEA: Mek sure area wea iu study savve helpem iu for concentrate. Keepim area hia klin and no fulap lo staka samting.
a From datfala buk The Shallows—What the Internet Is Doing to Our Brains.