Uniform Blo Olketa Garem Purple Triangle
Maud stap lo France and hem waka lo wanfala skul. Waka blo hem for helpem olketa disable pikinini lo class rum. No longtaem go nomoa, olketa student lo wanfala class lane abaotem Holocaust and olketa Nazi concentration camp. Olketa prisoner lo olketa camp hia werem uniform wea garem difren kala badge lo hem. Kala and sheip blo badge showim reason why olketa putim prisoner hia lo prison.
Taem wanfala teacher story abaotem purple triangle badge wea samfala prisoner garem lo uniform blo olketa, hem sei: “Ating reason why olketa werem datfala kala badge hem bikos olketa homosexual.” Bihaen lo class, Maud story lo teacher hia and explainim dat olketa Nazi mekem olketa Jehovah’s Witnessa werem uniform wea garem purple triangle for luksavve hu nao olketa. Maud sei hem bae hapi for givim teacher hia moa information abaotem datwan. Teacher sei hem bae laek for kasem information hia and hem askem Maud tu for sharem datfala information witim olketa student.
Taem nara teacher storyim sem topic lo difren class hem iusim wanfala chart for showim olketa difren badge wea olketa prisoner garem lo uniform blo olketa. Chart hia hem showim dat purple triangle hem for Olketa Jehovah’s Witness. Bihaen lo class, Maud sei lo datfala teacher hem hapi for givim lo hem moa information abaotem datwan. Teacher sei hem bae hapi for kasem datwan and hem arrangem for Maud story lo olketa student lo datfala class tu.
Maud holem olketa pablikeson wea hem iusim
Maud redyim wanfala 15-minute tok for first class, bat taem hem redi for givim datwan, teacher sei lo hem: “Mi givim iu full hour for story.” Maud startim tok blo hem witim wanfala video wea showim olketa tru samting wea happen taem olketa Nazi persecutim Olketa Jehovah’s Witness. Taem video hia showim dat olketa Nazi tekem 800 Witness pikinini from parents blo olketa, Maud hem pausim datfala video and readim experience blo thrifala lo olketa pikinini hia. Taem video hem finis, Maud finisim tok blo hem witim lastfala leta wea Gerhard Steinacher raetem for parents blo hem. Hem wanfala Witness from Austria, wea 19 year old taem olketa Nazib killim hem dae, and hem raetem datfala leta tu-thri hour bifor hem dae.
Lo mek-tu class Maud hem givim tok wea klosap semsem. Bikos Maud hem no fraet, distaem tufala teacher story abaotem Olketa Jehovah’s Witness taem olketa teachim class abaotem pipol wea stap insaed olketa Nazi concentration camp.
a Lo taem blo World War II, olketa putim lo prison Olketa Jehovah’s Witness lo Germany, wea nara nem blo olketa lo dat taem hem Bibelforscher (Olketa Bible Student) bikos olketa no laek for sapotim olketa Nazi.
b Olketa sentencim Gerhard Steinacher for dae bikos hem no agree for joinim army blo Germany. Lo datfala last leta blo hem, hem sei: “Mi pikinini yet. Mi savve faithful only sapos Lord hem givim mi strong for duim datwan, and hem nao wat mi prea for hem.” Olketa killim dae Gerhard lo morning bihaen hem raetem leta hia. Olketa raetem disfala toktok lo grev blo hem: “Hem dae bikos lo faith blo hem lo God.”