Duim Samting wea Iu Fit for Duim and Hapi
“MI NO fit for duim nao!” Maet iumi talem datfala toktok plande taem, taem iumi no fit for duim samting wea iumi plan for duim. Wanfala Christian mami wea garem firstfala baby bilong hem maet talem kaen toktok olsem bikos hem barava taed tumas and hem mas lukaftarem baby bilong hem olowe and hem no savve duim olketa samting wea hem laek for duim long worship bilong hem. Narafala Christian maet feel olsem tu bikos mami and dadi bilong hem barava kontrolem hem taem hem smol wea datwan mekem hem tingse hem no savve duim olketa samting wea hem laek for duim insaed long kongregeson. Wanfala olo sista maet no hapi bikos hem no savve duim staka samting long ministry wea hem savve duim bifor long taem wea hem strong yet. Christiane, wea famili responsibility stopem hem for duim staka samting wea hem laek for duim long waka bilong Jehovah, hem sei olsem: “Taem mi herem tok wea encouragem olketa brata and sista for pioneer, datwan savve mekem mi krae.”
Wanem nao iumi savve duim taem iumi feel olsem? Wanem nao samfala Christian duim for kasem gudfala tingting abaotem samting wea olketa fit for duim? Wanem nao olketa gudfala samting wea man savve kasem sapos hem garem gudfala tingting abaotem samting wea hem fit for duim?
Mas Balance
Aposol Paul hem talem iumi wanem iumi savve duim for gohed hapi. Hem sei: ‘Hapi evritaem long Lord. Narafala taem moa bae mi sei, Hapi! Evriwan shud luksavve long wei wea iu balance.’ (Phil. 4:4, 5) For iumi hapi long waka bilong iumi for God, iumi mas garem gudfala tingting abaotem samting wea iumi fit for duim or nomoa. Sapos iumi markem olketa goal wea hem hard tumas for kasem maet datwan mekem iumi barava wari. Bat sapos iumi no markem olketa goal wea iumi fit for kasem, then bae iumi iusim datwan olsem excuse and bae iumi no willing for trae for kasem eni goal long Christian ministry.
Nomata wanem kaen living iumi garem, Jehovah hem laekem iumi for duim samting wea iumi fit for duim witim full soul and full heart bilong iumi. (Col. 3:23, 24) Sapos iumi no duim olsem, iumi bae no fulfillim dedication bilong iumi long Jehovah. (Rom. 12:1) And tu, datwan hem no savve mekem iumi kasem trufala hapi and olketa nara blessing wea man savve kasem taem hem worshipim Jehovah witim full soul.—Prov. 10:22.
Datfala toktok, “balance” long Bible, hem savve minim wei for tingim narawan. (Jas. 3:17) Hem savve minim tu for no ova tumas for duim samting wea iumi fit for duim. So sapos iumi garem wei olsem, bae iumi garem gudfala tingting abaotem samting wea iumi savve duim. Waswe, datwan hem hard tumas? Nomata sapos iumi savve garem gudfala tingting abaotem wanem olketa narawan fit for duim, maet iumiseleva faendem hem hard for garem gudfala tingting abaotem iumiseleva. Tingim diswan, sapos wanfala gud fren bilong iu hem barava taed from hem duim staka samting, bae iu helpem hem for garem gudfala tingting mekem hem savve changem samfala samting long laef bilong hem! Long sem wei tu, iumi need for luksavve sapos iumi tu start for duim olketa samting wea iumi no fit for duim.—Prov. 11:17.
Sapos dadi and mami bilong iumi barava kontrolem iumi taem iumi smol, bae hem no isi for iumi garem gudfala tingting abaotem olketa samting wea iumi fit for duim. Taem samfala smol, olketa tingse evritaem olketa mas barava duim gud evri samting, and sapos nomoa bae mami and dadi no lovem olketa. Sapos iumi garem kaen tingting olsem, maet iumi garem difren tingting from hao Jehovah ting long iumi. Jehovah hem lovem iumi bikos iumi worshipim hem witim full heart bilong iumi. Bible sei Jehovah hem “savve gud long iumi from hem nao wakem iumi, and hem no forgetim iumi dust nomoa.” (Ps. 103:14) Hem luksavve long samting wea iumi fit for duim and hem lovem iumi taem iumi strong for worshipim hem nomata maet iumi no fit for duim samfala samting. Hem gud for iumi tingim hao God bilong iumi hem no ova tumas taem hem askem iumi for duim samting wea iumi fit for duim, and datwan bae helpem iumi for luksavve long samting wea iumi fit for duim and samting wea iumi no fit for duim.—Mic. 6:8.
Nomata samfala Christian savve long datwan, hem no isi for olketa garem gudfala tingting olsem. Sapos iu wanfala wea garem kaen tingting olsem, hem gud for iu go long wanfala Christian wea strong long spiritual wei and wea savve gud long iu and askem hem for helpem iu. (Prov. 27:9) Waswe sapos iu laek for kamap wanfala regular pioneer? Datwan hem barava naesfala goal! Waswe, bae hem isi for iu kasem datfala goal? Maet iu needim samwan for helpem iu for changem samfala samting long laef bilong iu. Maet wanfala Christian fren wea iu trustim hem savve story witim iu sapos olketa famili responsibility hem mekem iu no fit for kamap wanfala regular pioneer distaem. Maet hem savve helpem iu for disaed sapos iu savve changem samfala samting mekem iu savve kamap wanfala pioneer or nomoa. Maet hasband tu savve helpem waef bilong hem for luksavve wanem nao waef fit for duim. Maet hem savve encouragem waef for rest lelebet bifor hem start for duim samfala waka moa long next month. Taem waef hem duim olsem, datwan bae mekem hem strong moa and hem savve gohed for hapi long ministry.
Duim Samting wea Iu Fit for Duim
Sapos man hem gogo for olo or garem sik, maet hem no savve duim samting wea hem laek for duim long waka bilong hem for Jehovah. Sapos iu wanfala mami or dadi, maet iu tingse iu no kasem staka gud samting bikos olketa pikinini bilong iu savve mek noise tumas taem iu study seleva or long taem bilong olketa Christian meeting. Bat waswe, iu forgetim olketa samting wea iu fit for duim bikos iu tingim olowe olketa samting wea iu no fit for duim?
Staka thousand year go finis, wanfala Levite storyim samting wea hem laekem tumas bat wea hem no fit for kasem. Hem garem privilege for waka long temple tufala week long evri year. Nomata olsem, hem talem hao hem laek for stap olowe long there. (Ps. 84:1-3) Wanem nao helpem disfala man wea faithful for hapi? Hem luksavve nomata sapos hem waka long wanfala day nomoa long temple, datwan hem barava spesol privilege. (Ps. 84:4, 5, 10) Winim wei for tingim tumas olketa samting wea iumi no fit for duim, iumi mas trae for luksavve and tinghae long olketa samting wea iumi fit for duim.
Wanfala Christian sista long Canada, Nerlande, hem duim diswan. From hem no savve wakabaot, hem mas iusim wheelchair. Hem tingim tumas hao hem no savve duim samting wea hem laek duim long ministry. Gogo hem changem tingting bilong hem and hem tingim wanfala ples wea pipol savve go for peim olketa samting, and hem disaed for markem datfala ples olsem ples wea hem savve preach evritaem. Hem sei: “Mi sidaon long wheelchair klosap long ples wea olketa man savve kam sidaon long hem. Mi hapi taem mi story witim pipol wea savve kam and sidaon for lelebet taem.” Taem Nerlande duim olsem, datwan mekem hem barava hapi.
Changem Samfala Samting Sapos Hem Fitim
Taem wind hem blowim sail bilong wanfala boat, hem savve barava go kwiktaem. Bat taem wind hem strong tumas, man wea tekem boat mas changem sail bilong boat mekem boat hem no feisim wind. Man hia hem no savve kontrolem datfala big wind, bat hem savve kontrolem boat bilong hem taem hem changem samfala samting. Plande taem iumi savve kasem olketa nogud samting wea olsem datfala big wind wea iumi no savve kontrolem. Bat iumi savve kontrolem laef bilong iumi taem iumi mekius long olketa samting wea savve helpem iumi. Taem iumi tingim olketa niu samting wea kamap long laef bilong iumi, datwan bae helpem iumi for gohed hapi long waka bilong iumi for God.—Prov. 11:2.
Tingim samfala samting hia. Sapos iumi no strong tumas, maet hem no fitim for iumi duim olketa bigfala waka wea mekem iumi taed tumas for go long kongregeson meeting. Sapos iumi duim olsem, iumi bae kasem gud samting taem iumi hipap witim olketa Christian brata and sista bilong iumi. Or sapos wanfala mami wea pikinini bilong hem sik and datwan mekem hem no savve duim haos-tu-haos waka, maet hem savve disaed for invaetem wanfala Christian sista for tekem kam Bible study bilong hem long haos, mekem datfala mami savve join insaed long study taem pikinini hem sleep.
Waswe sapos samfala samting stopem iu for studyim gud olketa buk for olketa kongregeson meeting? Iu savve disaedem haomas samting iu fit for studyim, and barava duim gud datwan. For changem olketa goal wea iu markem finis hem savve mekem iu gohed strong and hapi.
Maet iumi mas waka hard for changem olketa goal bilong iumi. Wanfala hasband and waef, Serge and Agnès, wea stap long France, mas barava changem olketa plan bilong tufala. Serge hem sei: “Taem Agnès hem babule, mitufala savve plan bilong mitufala for kamap missionary hem nomoa nao.” Distaem Serge hem garem tufala gele, and hem talem hao hem and waef bilong hem garem niufala goal. Hem sei olsem: “From mitufala no fit for waka olsem missionary long nara kantri, mitufala disaed for duim waka olsem missionary long kantri bilong mifala. Mitufala joinim wanfala kongregeson wea story long difren languis.” Waswe, tufala kasem gud samting from olketa markem niufala goal? Serge hem sei olsem: “Mifala savve duim staka samting long kongregeson.”
Odile, wanfala Christian sista long France wea hem winim 70 year, hem garem sik wea spoelem tufala knee bilong hem, and datwan mekem hem no savve standap longtaem. Hem barava feel nogud bikos datfala sik stopem hem for duim haos-tu-haos waka. Nomata olsem, hem nating givap. Hem changem samting wea hem savve duim and hem ringim pipol long telephone for hem preach long olketa. Hem sei: “Nomata mi tingse bae hem no isi, bat taem mi duim mi barava hapi tumas!” Taem hem duim olsem datwan barava strongim hem for gohed moa long ministry bilong hem.
Taem Iumi Duim Samting Iumi Fit for Duim, Iumi Kasem Blessing
Taem iumi duim olketa samting wea iumi fit for duim datwan bae mekem iumi no wikdaon. Sapos iumi garem olketa goal wea fitim iumi for kasem, iumi bae hapi nomata maet iumi no savve duim staka samting.—Gal. 6:4.
Taem iumi garem gudfala tingting abaotem olketa samting wea iumi fit for duim, iumi bae garem gudfala tingting abaotem olketa nara Christian brata and sista bilong iumi. From iumi luksavve long olketa samting wea olketa fit for duim, iumi tinghae long samting wea olketa duim for iumi. Taem iumi tinghae long help wea iumi kasem, datwan bae helpem iumi for waka tugeta and minim olketa narawan. (1 Pet. 3:8) Tingim diswan, Jehovah hem nating askem iumi for duim samting wea iumi no fit for duim. Taem iumi garem gudfala tingting abaotem olketa samting wea iumi fit for duim, bae iumi hapi long olketa samting wea iumi duim long worship bilong iumi for Jehovah.
[Blurb long page 29]
For iumi hapi long waka bilong iumi for God, iumi mas garem gudfala tingting abaotem samting wea iumi fit for duim or nomoa
[Piksa long page 30]
Nerlande hem hapi taem hem duim samting wea hem fit for duim long ministry
[Piksa long page 31]
Lane hao for “changem sail for no feisim wind”
[Credit Line]
© Wave Royalty Free/age fotostock
[Piksa long page 32]
Serge and Agnès kasem gud samting taem tufala markem niufala goal