Hao, Hem Important for Garem Staka Fren lo Social Media?

Wanfala teenager wea nem blo hem Elaine sei: “Taem mi lukim olketa skulfren garem staka handred follower lo social media, mi tingting, ‘Wow, olketa garem staka fren!’ For tok stret, mi lelebet jealous lo olketa.”

Waswe, enitaem iu feel olsem? Sapos olsem, disfala article savve helpem iu for no foldaon lo trap for laek popular lo social media.

• Wat nao olketa danger?

• “Hem luk olsem olketa popular”

• Waswe, hem important for garem staka follower and staka pipol laekem wanem iu postim?

• Careful for no mekem hem luk olsem iu hambol bat iu praod nomoa

Wat nao olketa danger?

Lo Proverbs 22:1, Bible sei ‘gud nem hem winim staka selen.’ So hem gud nomoa for laek garem gud nem and for pipol laekem iu.

Bat samfala taem disfala feeling savve kamap strong tumas gogo iu bae feel hapi only sapos iu garem staka fren online. Waswe, eni danger lo datwan? Onya, wea 16 years old sei yes:

“Mi lukim hao samfala duim olketa karangge samting, olsem for jamp from mek-tu story lo skul building for mekem olketa narawan laekem olketa.”

Samfala young wan recordim karangge samting wea olketa duim and then olketa postim online for mekem olketa narawan savve lo olketa. Olsem example, samfala young wan uploadim olketa video wea showim olketa kaikaim soap wea man iusim for wasim kaleko wea garem poison lo hem, samting wea no eniwan shud duim!

Bible sei: “Iufala mas no duim eni samting . . . for haemapem iufala seleva.”—Philippians 2:3, Good News Translation.

Tingim diswan:

• Hao, iu tingse hem important for garem staka fren online?

• Hao, iu willing for spoelem health or laef blo iu for mekem olketa narawan laekem iu?

“Hem luk olsem olketa popular”

Olketa man no need for duim danger samting olowe for mekem staka narawan laekem hem. Erica, wea 22 years old sei samfala savve iusim nara teknik:

“Pipol bae postim staka piksa for mekem hem luk olsem olketa garem staka fren wea olketa olowe duim samting tugeta. Hem mekem pipol tingse olketa popular.”

Cara, wea 15 years old sei samfala savve laea for mekem pipol tingse olketa popular:

“Mi lukim samfala savve tek piksa wea mekem hem luk olsem olketa party witim olketa fren, batawea olketa stap nomoa lo haos.”

Matthew, wea 22 years old sei hem bin duim kaen samting olsem:

“Mi postim wanfala piksa and putim tag for sei mi lo Maunt Everest, bat mi nating bin kasem datfala maunten lo Asia!”

Bible sei: “Mifala laek for honest long evri samting wea mifala duim.”—Hebrew 13:18.

Tingim diswan:

• Sapos iu iusim social media, hao, iu enitaem postim samting wea no tru for mekem pipol laekem iu?

• Waswe, olketa piksa and koment wea iu postim hem showimaot trufala wei blo iu and wat iu bilivim?

Waswe, hem important for garem staka follower and staka pipol laekem wanem iu postim?

Plande pipol tingse wei for kamap popular online, iu mas garem staka follower and staka pipol mas laekem wanem iu postim. Matthew, wea iumi storyim finis, sei hem tu garem tingting olsem bifor:

“Mi savve askem pipol, ‘Haomas follower nao iu garem?’ or ‘Haomas pipol nao laekem post blo iu?’ For mekem namba blo olketa follower blo mi go ap, mi savve followim pipol wea mi no savve lo olketa bikos mi hope olketa bae start for followim mi. Mi tingse mi need for popular and social media mekem datfala feeling kamap moa strong.”

Maria, wea 25 years old sei samfala pipol savve judgem olketa seleva lo haomas pipol followim olketa and laekem wanem olketa postim:

“Sapos wanfala gele tekem selfie and no staka pipol laekem piksa blo hem, hem tingse hem luk rabis. Datfala tingting hem no stret, bat plande pipol savve feel olsem sapos datwan happen. Hem olsem olketa bullyim olketa seleva.”

Bible sei: “Iumi mas no praod, no trae for winim narawan, and no jealous long narawan.”—Galatia 5:26.

Tingim diswan:

• Sapos iu iusim social media, waswe, iu comparem iuseleva witim olketa narawan?

• Waswe, hem moa important lo iu for garem staka follower winim wei for garem olketa tru fren wea tingim iu?