Gohed Lane From Olketa Main Bible Teaching

1. Hao nao olketa Bible teaching affectim iu taem iu start for lanem truth?

OLKETA main Bible teaching wea iumi lanem taem iumi start for studyim Bible, hem changem laef blo iumi. For example, taem iumi lanem dat nem blo God hem Jehovah, iumi start for duim samting for kamap fren blo hem. (Isa. 42:8) Taem iumi lanem wat nao happen lo olketa wea dae, datwan helpem iumi for no wari if olketa loved wan blo iumi wea dae finis olketa gohed safa. (Eccl. 9:10) And taem iumi lane abaotem promis blo God dat earth bae kamap Paradaes, iumi no wari tumas abaotem future blo iumi. Iumi sure dat bae iumi no laef for short taem nomoa, olsem for 70 or 80 years, bat bae iumi laef for olowe.—Ps. 37:29; 90:10.

2. Hao nao 2 Peter 1:​12, 13 showimaot nomata olketa mature Christian tu savve kasem gud samting from olketa main Bible teaching?

² Iumi mas no forgetim olketa main Bible teaching wea iumi lanem finis. Lo mek-tu leta wea aposol Peter raetem, hem raet for olketa Christian wea “biliv strong lo olketa truth” finis. (Readim 2 Peter 1:​12, 13.) Bat olketa Christian hia feisim olketa spiritual danger insaed kongregeson, includim olketa false teacher and olketa man wea no obeyim God. (2 Pet. 2:​1-3) Peter laek for strongim olketa brata and sista for againstim olketa danger hia. So, hem remindim olketa abaotem samfala teaching wea olketa savve finis lo hem. Olketa teaching hia bae helpem olketa for gohed faithful lo Jehovah go kasem end.

3. Why nao evri tru Christian shud gohed ting raonem olketa main Bible teaching? Storyim example.

³ Taem iumi gohed for kamap mature Christian, iumi savve lanem olketa niu point from olketa main Bible teaching. For example: Wanfala chief kuk and wanfala man wea just lane hao for kuki maet iusim olketa sem ingredient for redyim wanfala supsup. Bat datfala chief kuk wea kuki for longtaem finis, hem savve iusim olketa sem ingredient lo difren wei for preparem staka naes supsup. Lo sem wei tu, olketa wea servem Jehovah for longtaem finis and olketa niu Bible student savve lanem olketa difren point from olketa main Bible truth. Situation blo iumi or olketa privilege wea iumi kasem, maet hem change afta iumi baptaes. So taem iumi ting raonem olketa Bible teaching wea iumi lanem longtaem finis witim situation blo iumi distaem, iumi savve lanem samfala niu point wea savve helpem iumi. Distaem bae iumi storyim wat olketa mature Christian savve lanem from thrifala main Bible teaching.

JEHOVAH NAO HEM CREATOR

4. Taem iumi lanem dat Jehovah nao Creator, hao nao datwan affectim iumi?

⁴ “Man wea wakem evri samting hem God.” (Heb. 3:4) Iumi savve wanfala Creator wea wise and wea garem bigfala paoa nao wakem earth and evri samting wea laef insaed. Hem wakem iumi, so hem barava savve gud lo iumi. And hem kea abaotem iumi. Hem savve wat nao best samting for iumi. For savve dat Jehovah hem Creator, hem changem laef blo iumi and laef blo iumi garem mining.

5. Wat nao wanfala truth wea savve helpem iumi for hambol? (Isaiah 45:​9-12)

⁵ Disfala truth abaotem hao Jehovah hem Creator, hem teachim iumi wanfala leson abaotem wei for hambol. For example, taem Job tingting tumas abaotem hemseleva and olketa narawan, Jehovah remindim Job dat Hem nao olmaeti Creator. (Job 38:​1-4) Disfala reminder helpem Job for lukim hao olketa wei blo God hem barava stret winim wei blo man. Bihaen, profet Isaiah tu hem sei: “Waswe, clay savve sei lo Man for Wakem Samting lo Clay: ‘Wat nao iu wakem?’”—Readim Isaiah 45:​9-12.

6. Wat taem nao hem important for iumi ting abaotem hao Jehovah hem Creator wea wise and garem bigfala paoa? (Lukim tu olketa piksa.)

⁶ Taem wanfala Christian servem Jehovah for longtaem finis, hem maet start for trustim own tingting blo hemseleva winim wei for luk lo Jehovah and Word blo Hem for direction. (Job 37:​23, 24) Bat hao if hem spendem taem for ting raonem gud bigfala wisdom and paoa blo Creator blo hem? (Isa. 40:22; 55:​8, 9) Datwan bae helpem hem for gohed hambol and luksavve tingting blo Jehovah hem stret winim tingting blo hem.

7. Wat nao Rahela duim for acceptim wanfala change wea kamap insaed organization?

⁷ Rahela, wea stap lo Slovenia, storyim dat taem hem ting abaotem hao Jehovah hem Creator, datwan helpem hem for acceptim olketa change wea kamap insaed organization. Rahela sei: “Samfala taem hem no isi for mi acceptim olketa disison wea olketa brata wea lead mekem. For example, nomata bihaen mi watchim datfala 2023 Governing Body Update #8, mi barava seke and feel nogud taem mi first lukim wanfala brata wea garem beard hem givim tok. So mi prea lo Jehovah for helpem mi acceptim disfala change.” Rahela luksavve dat Jehovah, wea hem nao Creator blo heven and earth, hem barava fit for leadim organization blo hem lo raet direction. If iu faendem hem no isi for adjust followim wanfala niu understanding or acceptim wanfala niu direction, hem gud for hambol and ting raonem bigfala wisdom and paoa blo Creator blo iumi.—Rom. 11:​33-36.

WHY GOD LETEM WEI FOR SAFA HEM GOHED

8. Taem iumi savve lo why God letem wei for safa gohed, hao nao datwan helpem iumi?

⁸ Why nao God letem wei for safa hem gohed? Samfala wea no kasem ansa for datfala kwestin olketa kros lo God or tingse no eni God hem stap! (Prov. 19:3) Bat, iumi lanem dat Jehovah no kosim wei for safa, iumi safa bikos iumi sin and no perfect. Iumi lanem tu dat from Jehovah hem patient witim olketa man, datwan mekem staka million pipol for lane abaotem hem and for lukim seleva hao Jehovah bae finisim wei for safa for olowe. (2 Pet. 3:​9, 15) Olketa truth hia from Bible hem comfortim iumi and helpem iumi for fren gud witim Jehovah.

9. Lo olketa wanem kaen situation nao hem gud for iumi tingim olketa reason why Jehovah letem wei for safa gohed?

⁹ Iumi luksavve why hem important for patient taem iumi weit lo Jehovah for finisim wei for safa. Nomata olsem, taem iumi or famili blo iumi kasem hard taem, injustice, or loved wan blo iumi dae, maet iumi wonder, why nao Jehovah no kwiktaem duim samting. (Hab. 1:​2, 3) Lo olketa taem olsem, hem wise for iumi tingim olketa reason why Jehovah letem olketa raeteous wan kasem hard taem.a (Ps. 34:19) Iumi savve ting raonem tu dat purpose blo Jehovah hem for finisim wei for safa for olowe.

10. Wat nao comfortim Anne bihaen mami blo hem dae?

¹⁰ Taem iumi savve lo truth abaotem why iumi safa, datwan savve helpem iumi for no givap. Anne, wea stap lo Mayotte, wanfala island lo Indian Ocean, hem sei: “Samfala year go finis mami blo mi hem dae, datwan mekem mi sorre tumas. Bat, mi evritaem remindim miseleva dat Jehovah hem no kosim wei for safa. Jehovah barava laek for finisim evri nogud samting wea mekem iumi safa and for resurrectim olketa loved wan blo iumi. Taem mi ting raonem olketa truth hia insaed Bible, datwan givim mi peace lo mind and hem barava comfortim mi.”

11. Hao nao wei for savve lo why Jehovah letem wei for safa gohed hem helpem iumi for gohed preach?

¹¹ From iumi savve lo truth abaotem why God letem wei for safa gohed, datwan helpem iumi for gohed for preach. Afta aposol Peter explainim dat Jehovah hem patient bikos hem laekem pipol for repent and for sev, Peter sei: “Iufala mas tingting gud abaotem wat kaen man nao iufala lo wei for holy and lo wanem iufala duim for showim iufala faithful lo God.” (2 Pet. 3:11) Wanfala lo olketa samting wea iumi savve ‘duim for showim iumi faithful lo God,’ hem for duim preaching waka. Olsem Dadi blo iumi Jehovah, iumi lovem pipol, and iumi laekem olketa for laef lo raeteous niu world blo God. Jehovah hem patient for givim chance lo pipol insaed territory blo iumi for worshipim hem. Iumi garem wanfala nambawan privilege for waka witim God and for helpem staka pipol moa for lane abaotem Jehovah bifor end hem kam!—1 Cor. 3:9.

IUMI STAP LO “OLKETA LAST DAY”

12. Taem iumi savve iumi stap lo “olketa last day” hao nao datwan helpem iumi?

¹² Bible storyim klia wei blo olketa pipol during lo “olketa last day.” (2 Tim. 3:​1-5) Iumi no need for luk farawe for lukim hao disfala profesi hem gohed for fulfill. Taem iumi lukim attitude blo pipol hem gohed for kamap worse, datwan mekem iumi sure dat iumi fit for barava trustim Word blo God.—2 Tim. 3:​13-15.

13. Hao nao disfala illustration blo Jesus lo Luke 12:​15-21, hem helpem iumi?

¹³ From iumi savve lo disfala truth dat iumi stap lo olketa last day, datwan helpem iumi for focus lo wat nao hem really important. Iumi savve lanem why hem important for duim diswan from illustration blo Jesus lo Luke 12:​15-21. (Readim.) Why nao Bible sei datfala rich man hem “nating garem gudfala tingting”? Hem no bikos man hia hem rich, bat hem bikos hem no luksavve lo wat nao barava important. Hem hipimap “riches for hemseleva, bat hem no rich lo eye blo God.” Why nao datwan hem barava important? Bikos taem blo hem short, God talem hem: “Tunaet bae iu dae.” Distaem, disfala wicked system hem gogo for finis, so hem gud for askem iumiseleva: ‘Hao, olketa goal wea mi markem showimaot wat nao really important lo mi? Waswe lo olketa goal wea mi helpem olketa pikinini blo mi for garem? Hao, main samting lo laef blo mi, hem for iusim strong, taem, and selen blo mi for buildim ap riches for miseleva or for hipimap olketa riches lo heven?’

14. Olsem experience blo Miki showim, why nao hem important for ting abaotem olketa pruv insaed Bible dat iumi stap lo olketa last day?

¹⁴ Taem iumi barava ting abaotem olketa pruv wea showimaot iumi stap lo olketa last day, datwan savve helpem iumi for mekem olketa best disison lo laef blo iumi. Datwan nao happen lo Sista Miki. Hem sei: “Taem mi graduate from hae skul, mi laekem tumas for kamap wanfala scientist for studyim olketa animal. And mi garem goal tu for kamap regular pioneer and serve lo ples wea needim staka pablisa. Olketa mature brata and sista talem mi for tingting gud abaotem and lukim if mi fit for aftarem datfala waka and lo semtaem kasem olketa spiritual goal blo mi. Olketa remindim mi hao disfala wicked system hem klosap for finis. And olketa remindim mi tu dat lo niu world, bae mi garem staka taem for studyim hao many animal wea mi laekem. So mi chusim wanfala short course for lanem samfala skill for helpem mi faendem waka. From datwan, mi fit for faendem waka wea sapotim mi taem mi regular pioneer. And gogo mi go lo Ecuador, ples wea needim staka pablisa for preach.” Distaem, Miki and hasband blo hem duim circuit waka lo datfala kantri.

15. Hao nao example blo James helpem iumi for no givap nomata pipol no interest lo gud nius distaem? (Lukim tu piksa.)

¹⁵ Iumi shud no feel discourage nomata pipol no interest for lisin lo gud nius distaem. Pipol savve change. Tingim example blo James, haf brata blo Jesus. Hem lukim taem Jesus growap, and kamap Messiah, and hem lukim tu hao Jesus hem barava nambawan teacher. Nomata olsem, for staka year James no followim Jesus. Bat afta Jesus resurrect nao James just kamap wanfala faithful disaepol blo Jesus!b (John 7:5; Gal. 2:9) So hem important for iumi no givap lo olketa relative wea no interest distaem or for go bak for preach lo olketa wea no acceptim Kingdom message. Remember iumi stap lo olketa last day distaem, so hem barava important for iumi preachim gud nius. Message wea iu storyim lo olketa distaem maet affectim olketa bihaen, maet even afta big trabol hem start.c

GOHED TINGHAE LO OLKETA REMINDER BLO JEHOVAH

16. Wat nao olketa gud samting wea iu savve kasem from olketa reminder blo Jehovah? (Lukim tu box “Iusim for Helpem Olketa Narawan.”)

¹⁶ Samfala lo olketa spiritual kaikai wea iumi kasem hem for pipol wea no herem yet olketa main Bible teaching. For example, olketa pablik tok wea kamap evri week, samfala article and video lo jw.org, and olketa pablik magasin, hem especially for olketa wea no Jehovah’s Witness. Nomata olsem, iumi tu savve kasem gud samting from olketa reminder hia. Olketa savve helpem iumi for barava lovem Jehovah, strongim faith blo iumi lo Bible, and helpem iumi for kamap gud lo wei for teachim olketa main Bible truth lo olketa narawan.—Ps. 19:7.

17. Wat nao samfala situation wea savve kamap wea hem gud for iumi ting abaotem olketa main Bible teaching?

¹⁷ Iumi Olketa Jehovah’s Witness hapi taem iumi kasem wanfala niu understanding lo wanfala Bible truth. And iumi barava tinghae tu lo olketa main Bible teaching wea helpem iumi for fren gud witim Jehovah taem iumi start for lanem truth. So if enitaem iumi maet start for trustim own tingting blo iumiseleva winim wei for luk lo organization blo Jehovah for leadim iumi, hem gud for iumi hambol and luksavve wanfala olmaeti and wise Creator nao leadim disfala organization. Taem iumi or wanfala loved wan hem deal witim wanfala hard taem, iumi savve patient and ting abaotem why Jehovah letem wei for safa hem gohed. And taem iumi mas disaedem hao for iusim taem and olketa material tings blo iumi, hem barava important for tingim dat iumi lo olketa last day. Iumi laek for gohed iusim olketa reminder blo Jehovah for strongim iumi, motivatim iumi, and helpem iumi for gohed faithful lo Jehovah.