Hao, Iu Luksavve lo Truth?

1. Hao nao iu ting lo truth?

PIPOL blo Jehovah lovem truth wea stap insaed Bible. Hem nao faondeson lo faith blo iumi. (Rome 10:17) Iumi barava bilivim dat Jehovah hem setimap Christian kongregeson for “sapotim and defendim truth.” (1 Tim. 3:15) And iumi hapi for obeyim “olketa wea leadim” iumi, taem olketa explainim truth from Bible and givim direction wea followim will blo God.—Heb. 13:17.

2. Olsem James 5:19 talem, wat nao danger wea savve kamap afta iumi lanem truth?

² Nomata afta iumi lanem truth and acceptim dat organization blo God nao provaedem olketa direction wea iumi fit for trustim, maet samwan savve mekem iumi for go difren from truth. (Readim James 5:19.) Satan laekem tumas for mekem iumi no trustim Bible or direction from organization blo God.—Eph. 4:14.

3. Why nao hem important for iumi hol strong lo truth? (Ephesus 6:​13, 14)

³ Readim Ephesus 6:​13, 14. Klosap nao Satan bae promotim olketa idea wea bae laea lo evri nation for mekem olketa againstim Jehovah. (Rev. 16:​13, 14) Iumi expectim tu Satan bae increasim wat hem duim for gohed trae hard for laea lo pipol blo Jehovah. (Rev. 12:9) Dastawe, hem important for iumi trainim iumiseleva for luksavve lo difference between truth and laea blo Satan, and for obeyim truth. (Rome 6:17; 1 Pet. 1:22) During lo datfala bigfala trabol, laef blo iumi bae depend lo wei for obeyim truth!

4. Wat nao bae iumi storyim lo disfala article?

⁴ Lo disfala article, bae iumi storyim tufala important quality wea iumi need for garem wea bae helpem iumi for luksavve lo truth lo Bible and for acceptim direction from organization blo God. Then bae iumi storyim thrifala idea wea bae helpem iumi for gohed hol strong lo truth.

OLKETA IMPORTANT QUALITY WEA IUMI NEED FOR GAREM FOR LUKSAVVE LO TRUTH

5. Hao nao wei for fraet lo Jehovah hem helpem iumi for luksavve lo truth?

⁵ Fraet lo Jehovah. Stretfala wei for fraet lo Jehovah hem mekem iumi for barava lovem hem and no laek for duim eni samting wea bae mekem Hem no hapi. Iumi barava laek for lanem difference between wat hem raet and rong, between wat hem tru and laea, mekem iumi savve duim wanem Jehovah hapi lo hem. (Prov. 2:​3-6; Heb. 5:14) Iumi mas no letem wei for fraetem man for winim love blo iumi for Jehovah, bikos staka taem wat olketa man hapi lo hem, hem samting wea Jehovah no hapi lo hem.

6. Why nao tenfala Israelite leader talem toktok wea no barava tru?

⁶ If iumi fraetem olketa man winim wei for fraet lo God, bae iumi savve lusim truth. Tingim example blo 12-fala leader wea go spaem datfala land wea Jehovah promis for givim lo olketa Israelite. Tenfala spae letem feeling for fraetem olketa Canaanite for winim love blo olketa for Jehovah. Olketa sei olsem lo olketa nara Israelite: “Iumi no fit for go ap and faetem pipol hia bikos olketa strong winim iumi.” (Num. 13:​27-31) Lo tingting blo man, olketa Canaanite strong winim olketa Israelite, and datwan hem tru. Bat taem olketa Israelite tingse olketa no fit for winim olketa enemy, hem olsem olketa forgetim Jehovah. Tenfala spae hia shud focus lo wat nao Jehovah laekem olketa Israelite for duim. Olketa shud ting raonem tu wat Jehovah just duim finis for olketa. If olketa duim datwan, bae olketa luksavve dat strong blo olketa Canaanite hem smol nomoa taem olketa comparem witim big maeti paoa blo Jehovah. Joshua and Caleb no olsem tenfala spae wea no garem faith, tufala laek for duim samting wea mekem Jehovah hapi. Tufala sei olsem lo olketa Israelite: “Sapos Jehovah hapi lo iumi, bae hem tekem iumi go insaed lo datfala land and givim lo iumi.”—Num. 14:​6-9.

7. Hao nao iumi savve strongim wei wea iumi fraet lo Jehovah? (Lukim tu piksa.)

⁷ For strongim wei wea iumi fraet lo Jehovah, iumi need for focus lo wei for mekem Jehovah hapi taem iumi mekem olketa disison. (Ps. 16:8) Taem iu readim datfala Bible story, askem iuseleva, ‘If mi lo there, wat nao bae disison blo mi?’ For example, imaginim iu lo there and lisin taem tenfala Israelite leader hia storyim negative report. Hao, bae iu bilivim story blo olketa and fraetem man, or bae love blo iu for Jehovah and wei wea iu laek for mekem hem hapi, hem strong winim datwan? Wanfala full genereson blo olketa Israelite nao nating luksavve lo datfala truth wea Joshua and Caleb storyim. From datwan, olketa lusim chance for go insaed Promis Land.—Num. 14:​10, 22, 23.

8. Wat kaen quality nao iumi mas waka hard for garem, and why nao olsem?

⁸ Hambol. Jehovah showim truth nomoa lo olketa wea hambol. (Matt. 11:25) Taem iumi lanem truth, iumi hambol for acceptim help. (Acts 8:​30, 31) Bat, iumi need for careful nogud iumi kamap praod. If iumi praod, bae gogo iumi tingse olketa idea blo iumiseleva hem wise olsem olketa Bible principle and direction from organization blo Jehovah.

9. Hao nao iumi savve gohed for hambol?

⁹ For gohed hambol, iumi need for tingim hao iumi barava smol tumas taem iumi comparem iumi witim Jehovah. (Ps. 8:​3, 4) And tu, iumi savve prea and ask for garem hambol wei and willing for lane. Thru lo Bible and organization blo hem, Jehovah teachim iumi tingting blo hem and helpem iumi luksavve datwan hem important winim tingting blo iumiseleva. Taem iu duim Bible reading, trae for lukaotem olketa point wea showim hao Jehovah lovem pipol wea hambol and heitim wei for praod, bighed, and show off. And taem iu kasem privilege lo service blo Jehovah wea mekem olketa narawan for tinghae lo iu, gohed for hambol.

WAT IUMI SAVVE DUIM FOR HOL STRONG LO TRUTH

10. Hu nao Jehovah iusim for provaedem instruction and direction for pipol blo hem?

¹⁰ Gohed trustim direction wea kam from Jehovah. Lo Israel bifor, Jehovah iusim Moses and then bihaen Joshua, for givim instruction lo pipol blo Hem. (Josh. 1:​16, 17) Olketa Israelite kasem gud samting taem olketa luksavve olketa man hia representim Jehovah. Staka handred year bihaen datwan, taem Christian kongregeson hem just start, 12-fala aposol nao givim direction. (Acts 8:​14, 15) Then afta, olketa nara elder lo Jerusalem tu insaed datfala grup. Taem kongregeson followim direction wea kam from olketa faithful man hia, “faith bilong olketa long olketa kongregeson hem gohed for kamap strong, and evriday plande pipol moa olketa biliv.” (Acts 16:​4, 5) Distaem, iumi tu kasem gud samting taem iumi followim direction wea kam from organization blo Jehovah. Bat, hao nao bae Jehovah feel if iumi les for luksavve lo olketa man wea Jehovah appointim? Iumi savve kasem ansa for datfala kwestin taem iumi discussim wat hem happen taem olketa Israelite go for Promis Land.

11. Wat nao happen lo olketa Israelite wea challengem wei wea God chusim Moses for leadim olketa? (Lukim tu piksa.)

¹¹ During lo taem wea olketa Israelite travel go for Promis Land, samfala leader lo Israel challengem Moses and position wea Jehovah givim lo hem. Olketa sei: “Full nation hia nao God chusim and Jehovah stap witim olketa [no just Moses].” (Num. 16:​1-3) Hem tru, lo tingting blo Jehovah “full nation” nao hem holy, bat hem chusim Moses for leadim pipol blo Hem. (Num. 16:28) Taem olketa tok againstim Moses, really olketa tok againstim Jehovah. Olketa no focus lo wat Jehovah laekem, bat olketa focus lo wei for kasem paoa and hae position wea datwan hem samting wea olketa seleva laekem. God killim dae olketa leader hia witim staka thousand Israelite wea sapotim olketa for againstim Moses. (Num. 16:​30-35, 41, 49) Iumi sure distaem tu, Jehovah no hapi lo olketa wea no respectim olketa arrangement blo organization blo hem.

12. Why nao iumi savve gohed trustim organization blo Jehovah?

¹² Iumi fit for gohed trustim organization blo Jehovah. Taem olketa wea lead luksavve need kamap for adjustim hao iumi understandim wanfala Bible truth or hao Kingdom waka hem organize, olketa no hol bak for mekem olketa change hia. (Prov. 4:18) Olketa duim olsem bikos, winim eni nara samting, olketa laek for mekem Jehovah hapi. And tu, olketa duim best for mekem olketa disison wea base lo Word blo God, wea hem nao standard or pattern wea evri pipol blo Jehovah mas followim.

13. Wat nao standard blo olketa gudfala toktok, and wat nao iumi mas duim?

¹³ “Gohed followim pattern [or standard] bilong olketa gudfala toktok.” (2 Tim. 1:13) Standard blo olketa gudfala toktok hem minim olketa Christian teaching wea stap insaed Bible. (John 17:17) Evriting wea iumi bilivim hem base lo olketa teaching hia. Organization blo Jehovah hem teachim iumi for hol strong lo datfala standard. Taem iumi duim olsem, bae iumi kasem blessing.

14. Hao nao samfala Christian bifor no hol strong lo standard blo “olketa gudfala toktok”?

¹⁴ Wat nao bae happen if iumi go difren from standard blo “olketa gudfala toktok”? Tingim wanfala example. Lo first century, luk olsem wanfala story hem go raon midolwan lo samfala Christian dat day blo Jehovah hem kam nao. Maet datfala information kam insaed wanfala leta, and olketa sei aposol Paul nao raetem. Then instead for olketa chekim gud datwan, samfala Christian lo Thessalonica bilivim datfala story and even spredim lo olketa narawan. Hard for olketa bilivim datfala laea story, if olketa rememberim wat Paul teachim olketa taem hem stap witim olketa. (2 Thess. 2:​1-5) Paul kaonselem olketa brata and sista for no bilivim evri story wea olketa herem. And for helpem olketa luksavve if wanfala story hem really kam from hem, hem sei olsem lo end blo second leta blo hem for olketa lo Thessalonica: “Mi Paul nao wea mi talem kam hello, and mi tu mi raetem. Taem iufala lukim disfala raeting long evri leta bilong mi, iufala mas savve mi nao mi raetem.”—2 Thess. 3:17.

15. Hao nao iumi savve protectim iumiseleva from laea information wea luk olsem hem kam from organization? Storyim example. (Lukim tu piksa.)

¹⁵ Wat nao iumi savve lanem from toktok blo Paul for olketa lo Thessalonica? Taem iumi herem samting wea difren from wat iumi lanem lo Bible or herem eni story wea mekem iumi seke or sapraes, iumi need for iusim gudfala tingting. Lo Soviet Union bifor, olketa enemy blo iumi iusim wanfala leta for laea lo olketa brata, olketa sei hem from world hedquarter. Datfala leta encouragem olketa brata for formim wanfala separate, independent organization. Datfala leta hem luk exactly olsem hem kam from world hedquarter. Bat olketa faithful brata luksavve datfala leta hem laea wan. Olketa luksavve message insaed hem difren from wat olketa lanem finis. Distaem olketa enemy blo truth iusim technology for mekem iumi konfius or divaedem iumi. Instead for letem datfala information for mekem iumi “lusim stretfala tingting,” iumi savve protectim iumiseleva taem iumi ting raonem wat iumi herem or readim, and mek sure hem followim wat iumi lanem finis.—2 Thess. 2:2; 1 John 4:1.

16. Olsem Rome 16:​17, 18 storyim, wat nao iumi shud duim if samwan go difren from truth?

¹⁶ Gohed wan mind witim olketa wea loyal lo Jehovah. God laekem iumi for wan mind taem iumi worshipim hem. Iumi bae gohed for wan mind if iumi hol strong lo truth. Eniwan wea go difren from truth hem mekem wei for divaed kamap insaed kongregeson. Dastawe, God warnim iumi for “mas no fren witim olketa,” nogud gogo iumiseleva tu bae lusim truth.—Readim Rome 16:​17, 18.

17. Wat nao gud samting wea iumi bae kasem taem iumi luksavve lo truth and hol strong lo hem?

¹⁷ Taem iumi luksavve lo truth and hol strong lo hem, iumi bae stap sef and gohed gud lo spiritual wei. (Eph. 4:​15, 16) Bae hem protectim iumi from olketa laea teaching and olketa idea wea Satan promotim, and bae iumi stap sef anda lo kea blo Jehovah during lo bigfala trabol. So gohed strong lo truth, and “God wea givim peace bae blessim iufala.”—Phil. 4:​8, 9.