Waswe, Enitaem Bae Hem Kamap Moabeta?
DISTAEM datfala World Health Organization and samfala nara grup wea wari long diswan garem olketa program for studyim and kontrolem wei wea sik hem spread. Samfala organization givimaot information and encouragem pipol for duim research long olketa niu medicine and wei for kontrolem sik wea kam from olketa insect. Evri samting hia hem for trae for deal witim disfala problem wea go ahed for kamap big. Olketa man wanwan and olketa community tu savve duim planti samting for savve abaotem diswan and protectim olketa seleva. Nomata olsem, wei for protectim man wanwan hem difren from wei for kontrolem sik raonem full world.
For win for kontrolem olketa sik, planti savveman biliv hem important tumas for pipol evriwea long world for waka tugeta and trustim each other. Nius woman Laurie Garrett, wea winim Pulitzer Prize sei long buk bilong hem, The Coming Plague—Newly Emerging Diseases in a World out of Balance: “Wei wea pipol long olketa difren ples and kantri distaem deal witim each other moa and moa minim pipol evriwea long earth mas no just interest long environment long community, province, kantri or part long earth wea olketa seleva stap. Olketa smolfala living samting wea karem sik no luksavve long spialaen wea man putim.” Taem wanfala sik seknomoa kamap long wanfala kantri, stretawe olketa nara kantri wea stap klosap and raonem full world wari long datwan.
Samfala gavman and pipol no trustim eni samting from nara kantri for stopem sik—nomata hem olketa program for kontrolem sik. And tu, planti taem wei wea olketa gavman no luksavve hao samting olketa duim affectim future and greedy fasin saed long bisnis savve spoelem samting wea olketa kantri waka tugeta for trae for duim. Long stragol hia bilong olketa man againstim sik, waswe, bae olketa smolfala living samting win? Man for raet, Eugene Linden, wea tingse olketa smolfala living samting bae win, sei: “No staka taem stap for changem diswan.”
Reason for Hope
Hard tumas for olketa niu samting long science and technology deal witim evri niu sik wea kakamap. And, tu, problem bilong sik wea kam from olketa insect hem wanfala nomoa long olketa danger wea savve spoelem health bilong olketa man. Bat reason for hope hem stap. Nomata olketa scientist just start for minim wei wea olketa living samting stap tugeta long earth, olketa luksavve hao earth hem fit for healim hemseleva. Planet bilong iumi savve balancem moa olketa samting saed long nature. Olsem example, planti taem bush hem grow bak moa long land wea pipol kliarem, and wei wea olketa smolfala living samting, olketa insect, and olketa animal stap tugeta, gogo savve balance moa.
Moa important winim datwan, spesol design long nature point go long wanfala Creator, wanfala God wea startim evri samting long earth. Planti scientist talemaot hao masbi wanfala man wea garem bigfala savve nao creatim earth. Tru nao, pipol wea tingting gud no savve denyim hao God hem stap. Bible storyim datfala Creator, Jehovah God, olsem olmaeti and loving. Hem barava wantem iumi for hapi.
Bible explainim tu hao firstfala man wea min for no obey hem pasim go wei for no perfect and sik and dae long olketa man. Waswe, datwan minim iumi mas safa for olowe? Nomoa! Purpose bilong God hem for mekem disfala earth wanfala paradaes, wea olketa man bae stap gud tugeta witim evri nara creature, big and smol. Bible storyim hao wanfala world bae kam wea no eni creature, nomata barava bigfala animal or sismol insect bae spoelem olketa man.—Isaiah 11:6-9.
Hem tru, olketa man bae garem waka for keepim datfala world—saed long living bilong olketa man and wei wea olketa lukaftarem environment. God komandim olketa man for “lukaftarem” earth. (Genesis 2:15) Long paradaes long future, olketa man bae duim datfala waka long perfect wei taem olketa obey for followim olketa instruction wea kam from datfala Creator seleva. So, iumi savve luk forward long datfala day wea “no eniwan bae sei: ‘Mi sik.’ ”—Isaiah 33:24.