2 | Protectim Need blo Famili

Why Hem Important

Staka pipol stragol evriday for kasem wanem olketa needim. Sorre samting nao, olketa trabol wea happen lo world mekem datwan for hard go moa. Why nao olsem?

• Taem trabol kasem community, pipol experiencem dat kost blo olketa samting olsem kaikai and haos for rent hem go ap.

• Taem olketa big problem happen hem mekem pipol no garem waka or pei hem kat daon.

• Olketa disaster savve spoelem bisnis blo pipol, distroem haos, or nara samting wea olketa ownim, and savve mekem olketa for kamap poor.

Samting Iu Need for Savve

• Taem iu savve hao for iusim gud selen blo iu, bae iu redi for taem blo trabol.

• Tingim hao selen no savve stap for olowe. Selen wea iu kasem, savings blo iu, and olketa samting wea iu garem hem savve isi for lus.

• Samfala samting selen no savve peim, olsem for famili stap gud tugeta and hapi.

Wanem Iu Savve Duim Distaem

Bible sei: “Sapos iumi garem kaikai, kaleko, and ples for stap, iumi mas satisfae nomoa witim olketa samting hia.”​—1 Timothy 6:8.

For iumi satisfae hem minim for kat daon lo olketa samting wea iumi laekem and for hapi nomoa witim wanem iumi needim evriday. Diswan hem important especially taem iumi no garem inaf selen.

For satisfae, maet iu need for changem samfala samting lo laef blo iu. If iu spendem selen winim haomas iu kasem, bae situation blo iu kamap worse.