PLANET BLO IUMI BAE STAP OLOWE TU?
FRESH WATA
LAEF lo earth bae no gohed sapos no eni wata hem stap, especially fresh wata. Really, klosap evri samting wea laef depend lo wata. Olketa lake, river, swamp area, and olketa wata wea stap andanit lo graon, hem provaedem wata for drink for olketa human being and olketa animal, and iumi iusim for watarem olketa crop wea iumi plantim.
Fresh Wata Stap lo Danger
Big haf lo planet blo iumi hem wata. Nomata olsem, World Meteorological Organization hem sei, “only 0.5% lo wata lo Earth nomoa hem fitim for iumi iusim and hem nomoa fresh wata wea stap.” Nomata diswan hem smol amount nomoa lo fresh wata wea shud inaf for iumi iusim for laef lo earth, big haf blo diswan olketa pollutim or hard for iumi kasem, bikos lo hae demand for wata and climate change. Olketa expert sei, luk olsem insaed 30 years, faev billion pipol maet no savve kasem fresh wata.
Planet blo Iumi Design for Stap Olowe
Earth hem garem olketa natural process wea mekem wata supply blo iumi for no finis. And tu, soil, olketa samting wea laef insaed wata, and even sun laet, olketa waka tugeta for klinim wata. Lukim samfala pruv wea showimaot hao planet blo iumi hem design for stap olowe.
Research showimaot hao soil savve aotem olketa samting wea pollutim wata. Lo olketa swamp area, samfala plant savve aotem nitrogen, phosphorus, and olketa chemical from wata.
Olketa scientist faendaot hao wata hem garem olketa physical and biological process wea klinim wata from olketa dirty wea kam from olketa natural organic waste. Olketa dirty hia hem pisis insaed wata wea flow, and olketa microorganism dissolvim datwan.
Fresh wata clam shell and mussel savve aotem olketa strong chemical from wata insaed tu-thri day nomoa, luk olsem hao olketa klinim wata hem winim olketa wata treatment wea man wakem.
Planet blo iumi stoarem wata thru lo wata cycle wea olketa kolem lo hydrologic system. Disfala cycle, witim olketa nara natural process hem preventim wata for go aot from atmosphere blo iumi, or for wata hem disappear.
Wat Olketa Man Duim
Wei for fixim eni oil wea leak and torowem poison lo stret ples, bae help for keepim olketa fresh wata source for klin
Olketa expert sei iumi mas careful for no weistim wata. For katem daon wei for mekem wata kamap dirty, hem bae gud for fixim vehicle blo iumi sapos oil hem leak, and sapos iumi laek torowem eni medicine wea iumi no iusim, no flushim lo toilet or pourim eni poison lo drainage.
Olketa engineer kamap witim idea wea olketa kolem lo desalination (for tekem wata from sea and aotem salt from). Goal blo datwan hem for iumi garem staka fresh wata.
Bat wei for duim datwan hem no inaf. Even wei for duim desalination savve kostim staka selen bikos iu bae iusim staka electricity for duim datwan. Lo 2021, wanfala report from United Nations abaotem hao for iusim wata hem sei: “Evriwea lo world, waka for duim datwan distaem hem mas dabol.”
Olketa Reason for Hope—Wat Bible Talem
“God pullim go ap olketa drop blo wata. And wata hia change for kamap cloud wea garem rain. Then olketa cloud pourim kam rain hia. And rain pour kam daon antap olketa man.”—Job 36:26-28.
God creatim olketa natural cycle for protectim wata wea stap lo earth.—Ecclesiastes 1:7.
Tingim diswan: If Creator savve hao for mekem olketa process olsem, wea savve klinim wata, hao, bae hem fit and willing for repairim olketa samting wea man kosim wea spoelem fresh wata blo iumi? Lukim article “God Promisim Planet blo Iumi Bae Stap for Olowe,” on page 15.