Hao nao Pipol Ting lo Respect for Laef?

**WHY RESPECT FOR LAEF HEM IMPORTANT**

Olketa samting wea pipol duim wea showim olketa no respectim laef hem affectim health and safety blo wanfala community.

For smoke hem no just kosim cancer bat hem savve mekem body for no savve faetem olketa sik. Samting olsem 90 percent blo olketa wea dae from lung cancer hem olketa wea smoke or stap klosap samwan taem hem smoke.
Each year olketa shooting savve kosim trauma for staka pipol. Wanfala report from Stanford University sei: “Research showim hao olketa wea ranawe from [olketa skul shooting] nomata olketa no garekil, wat olketa experiencem hem affectim olketa for staka year.”
Taem pipol wea drunk or wea tekem drug olketa draev, road and ples for pipol wakabaot hem no sef nao. Taem pipol no tinghae lo laef, staka taem olketa lo community wea innocent nao kamap victim.

WAT IU SAVVE DUIM

Protectim health blo iu. Iu still savve lusim olketa samting wea savve spoelem health blo iu olsem wei for smoke, vaping, wei for drink tumas, or for tekem olketa drug. Olketa samting olsem savve spoelem iu and no showimaot respect for laef blo olketa wea stap raonem iu, includim tu olketa famili member.

‘Iumi mas klinim from body bilong iumiseleva eni samting wea savve mekem body bilong iumi for no klin.’—2 Corinth 7:1.

Evritaem tingim safety. For mek sure accident no happen, gohed for repairim haos blo iu. Draev lo wei wea sef, and mek sure trak blo iu gohed waka gud. No letem olketa narawan forcem iu for joinim olketa activity wea savve kosim accident or dae.

“Sapos iu buildim wanfala niu haos, iu mas mekem tu wanfala short wall raonem ruf blo hem, mekem iu no bloodguilty sapos eniwan foldaon from ruf lo haos blo iu.”—Deuteronomy 22:8.a

Kaen lo olketa narawan. Wei for respectim laef hem includim tu hao iumi ting lo pipol from difren race, kantri, and baekgraon. Tru nao, wei for garem negative tingting abaotem pipol and for heit nao kosim staka problem and war evriwea lo world.

“Lusim kaen wei for feel nogud and laek pei bak. Lusim tu, wei for kros, singaot, tok nogud, and evri samting wea savve spoelem narawan. Bat iufala mas kaen long narawan.”—Ephesus 4:31, 32.

WAT OLKETA JEHOVAH’S WITNESS DUIM

Olketa Jehovah’s Witness mekhae lo wei for lukaftarem gud health. Bible education program blo mifala helpem pipol for no addict and lusim olketa samting wea savve spoelem health.

Mifala barava followim safety standard lo olketa construction project blo mifala. Olketa volunteer wea help for buildim olketa ples blo mifala for meeting and olketa nara building wea mifala iusim for sapotim waka blo mifala, olketa kasem training for avoidim accident. Mifala inspectim olketa building blo mifala evritaem mekem hem followim safety law blo kantri.

Mifala provaedem humanitarian assistance. Insaed lo 12-fala month wea go pas, mifala help lo samting olsem 200 disaster wea happen evriwea lo world, and spendem klosap 12 million dollar for provaedem relief for olketa wea victim blo disaster.

Taem Ebola outbreak start for affectim staka pipol lo West Africa (2014) and Democratic Republic of Congo (2018), mifala explainim lo pipol hao for preventim datfala nogud sik mekem hem no spred. Mifala sendem tu samfala representative for story lo olketa grup abaotem subject “Wei for Obey Savve Sevem Laef.” Mifala markem olketa ples for wasim hand lo olketa entrance lo ples blo mifala for worship. And tu, mifala storyim why hem important for wasim hand and olketa nara samting wea savve help for no spredim sik.

Lo Sierra Leone, lo wanfala announcement lo radio, olketa thankiu lo Olketa Jehovah’s Witness for wei wea olketa helpem olketa Witness and olketa wea no Witness lo community for avoidim datfala Ebola virus.

Olketa Jehovah’s Witness patient for weit lo laen lo wanfala ples for wasim hand bifor olketa go insaed Kingdom Hall. — Ples for wasim hand front lo Kingdom Hall lo taem blo Ebola outbreak lo 2014, lo Liberia

a Lo Midol East bifor, datfala wise advaes hem showimaot wei for tingim safety blo olketa famili member and olketa narawan hem important.