Hao Nao Pipol Ting lo Respect for Famili?

WHY RESPECT FOR FAMILI HEM IMPORTANT

• Datfala buk The Seven Principles for Making Marriage Work hem sei taem hasband and waef respectim each other, datwan helpem tufala for showimaot tufala tingim each other “no just lo olketa big samting nomoa bat lo olketa smol samting wea tufala duim evriday for each other.”

• Research showim olketa pikinini wea lane for respectim olketa narawan olketa confident lo olketa seleva, fren gud witim parents blo olketa, and no garem staka problem saed lo tingting and feeling blo olketa.

WAT IU SAVVE DUIM

Plan tugeta witim famili. First samting, storyim tugeta wat nao hem minim for “respect.” Mek-tu samting, raetem daon samfala wei wea evriwan lo famili shud garem and samfala wei wea olketa shud no garem. Mek-thri samting, storyim tugeta datfala plan witim olketa pikinini blo iu mekem iufala evriwan garem sem tingting abaotem respect.

Showim example. Hao, iu judgem olketa famili member blo iu for wat olketa duim wea no stret, iu mekfani taem olketa talem tingting blo olketa, or ignorem or stopem olketa taem olketa story lo iu?

Idea: Trae for ting lo respect olsem samting wea iu need for showimaot lo marit partner and pikinini blo iu, and hem no samting wea iu tingse iu nao mas kasem.

Showim respect nomata iu no agree. Taem iu talemaot tingting blo iu, avoidim wei for sei “evritaem iu” or “no enitaem iu.” Dat kaen toktok hem olsem iu againstim wanfala wei blo famili member blo iu and datwan savve mekem olketa smol wei for no agree kamap big problem.

WAT OLKETA JEHOVAH’S WITNESS DUIM

Olketa Jehovah’s Witness encouragem olketa lo famili for treatim each other witim respect. Iu savve lukim diswan lo olketa article, buk, brochure, and lo olketa video wea mifala pablisim wea available and hem free nomoa.

FOR OLKETA MARIT COUPLE: Lukim olketa article anda lo sekson Help for Olketa Famili wea savve helpem olketa hasband and waef for . . .

• garem wei for lisin gud

• avoidim wei for no laek story lo each other

• stop raoa

(Search for “Help for Olketa Famili” lo jw.org)

FOR PARENTS: Lukim olketa article anda lo sekson Help for Olketa Famili wea savve helpem parents for trainim pikinini blo olketa for . . .

• mas obey

• help for duim olketa waka lo haos

• talem “plis” and “thankiu”

(Search for “Lukaftarem Pikinini” and “Lukaftarem Teenager” lo jw.org)

Lukim tu appendix, “Questions Parents Ask,” lo disfala buk Questions Young People Ask—Answers That Work, Volume 1. (Search for “Questions Parents Ask” lo jw.org)

FOR YOUNG PEOPLE: Lo sekson Olketa Teenager and Young Adult lo jw.org hem garem olketa article, video, and olketa worksheet wea savve helpem olketa young wan for . . .

• fren gud witim parents and brata and sista blo olketa

• story witim parents abaotem olketa rul lo wei wea showim respect

• keepim trust wea parents garem for iu

(Search for “Olketa Teenager and Young Adult” lo jw.org)

For iusim website jw.org hem free nomoa. No needim fee, for subscribe, or for iu kamap member, and olketa bae no ask for eni personal information blo iu.