DEAL WITIM WEI WEA PRICE BLO EVRITING GO AP
Acceptim Dat Iumi No Savve Kontrolem Evriting
Taem price blo olketa samting hem isisi go ap, maet iumi no luksavve especially taem wages blo iumi tu hem go ap. Bat, taem price hem go ap kwiktaem and wages blo iumi hem semsem nomoa, iumi savve barava wari and stress, especially if iumi garem famili.
Iumi no savve kontrolem wei wea price blo evriting go ap. Bat taem iumi acceptim dat diswan hem reality, iumi bae kasem gud samting.
WHY DATWAN IMPORTANT
Pipol wea garem balance tingting abaotem wei wea price blo evriting go ap faendem hem isi for . . .
no wari tumas. Taem iumi no wari tumas, iumi savve tingting gud and mekem olketa wise disison.
avoidim wei for duim samting wea no wise. For example, hem no wise for iumi ignorem olketa bill blo iumi or for weistim selen lo wat iumi no needim.
avoidim wei for argue witim olketa famili member abaotem selen.
luksavve lo hao for deal witim, wea diswan includim wei for adjustim olketa priority blo iumi, and hao iumi spendem selen.
WAT IU SAVVE DUIM
Willing for adjust. Taem evriting hem expensive tumas, hem wise for iumi katem daon spending blo iumi, sapos fitim. Samfala pipol trae for enjoyim laefstael wea olketa no fit for maintainim, diswan hem olsem olketa trae for swim againstim current blo river wea ran big. Gogo, olketa seleva bae taed nomoa. If iu garem famili, maet iu wari tu abaotem hao for provaedem need blo olketa, wea datwan hem stret samting for wari abaotem. Nomata olsem, tingim diswan: Olketa famili member blo iu needim love, taem, and attention blo iu winim eni nara samting.
Wei for trae gohed garem expensive laefstael hem olsem wei for trae swim againstim current blo river wea ran big